من زمان عنكم وحشتوني جداً جداً
وانا بعتذر لكل حبايبي اللي راسلوني ع الخاص واتأخرت عليهم في الرد
ولكن والله كنت مشغوله جداً الفترة اللي فاتت انتوا عارفين الاختبارات وقلقها
وكمان نفسيتي كانت إعلانه جداً مع الاحداث التي تمر بها سوريا ومصر حالياً
ربنا علي الظالم والمفتري
اللهم خذهم إليك أخذ عزيز مقتدر
واجعلهم عبرة لمن يعتبر
اللهم احفظهم واحميهم وارحم موتاهم
وصبر أمهاتهم
اللهم احفظ بلاد المسلمين
المهم يابنات
النهاردة هااقدملكوا بيتزا ولا المطاعم
بل تنافسها مش في الشكل بس ولكن في الطعم كمان
بجد نفس طعم عجينة بيتزا هت واجمل
أنا عندي الأولاد بيحبوا البيتزا اللي أنا بعملها اكتر من اللي بنشتريها من برة
وانا متأكدة اللي ها اجربها تصدق كلامي
اولاً
العجينه اللي بستخدمها في البيتزا هي عجينة
حبيبة قلبي ام أنمار وسبق ونزلت موضوع عنها
وللأسف الصور اتمسحت
وكتيير طلبوها مني ع الخاص
وكمان طلبوا طريقة الصلصة
النهاردة ان شاء الله بحاول ألبي طلباتكوا
كمان أنا أضفت للعجينه مكون بسيط
وهو دا سر المطاعم
ها اقولكوا عليه ف المكونات
مقادير العجينه
6 كوب دقيق
علبة زبادي
2 كوب حليب سايل دافئ
5 معلقه كبيرة زيت زيتون
1/4 كوب سكر
2 م ك خميرة
م ص بيكنج بودر
رشة ملح
والمكون البسيط اللي أضفته هو
1/4 م ص ثوم بودر او ممكن تحطي 1/2 م ص
صدقوني بتطلع العجينه روووعه نفس المطاعم
الطريقه
نخلط الحليب الدافئ والزيت والزبادي في خلاط الطعام
ثم نضيف له كوب دقيق والخميرة والسكر
ونخلط حوالي ثلاث دقائق
ثم يصب الخليط في وعاء ويضاف لباقي كمية الدقيق بعد ما أضفنا الدقيق البيكنج بودر والملح
يعني مش بحط ب ب والملح في الخلاط
لا بخليه مع الدقيق
ونعجن كويس جداً
لو في واحدة فيكم مضايقه من حاجه تحط همها في العجين
والصراحه أنا بحب اعجنها علي الرخامه. وبطريقة حورية المطبخ
أكيد كلكوا عارفينها
بتدي نتيجه هايله للمعجنات
وأكيد انتوا لاحظتوا دا في كل معجناتي ( ثقه هه)
المهم دي الصور توضح
ودي صورة قبل وبعد التخمير
العجينة بتختمر بسرعه جداً
وعما العجينه تختمر نكون جهزنا الصلصه
نقطع بصل ونشوحه مع شوية زيت
ثم نشوح معاه فلفل اخضر مقطع
أنا بحب اشوحهم ع النار شويه أحسن لانها بتدي طعم حلو
ثم نضيف الطماطم المقطعه
ونغطي حوالي خمس دقائق لغاية ما كل حاجه تلين
ثم نفرمها في المفرمه ونرجع نحطها ع النار تاني
ونضيف لها صلصة طماطم ومعلقة كاتشب
وملح وفلفل اسود وكسبرة ناشفه وشوية شطه للي يحب
ومعلقه صغيرة سكر عشان يدي توازن وماتكونش حامضه
ونسيبها تتسبك ع النار لغاية ما تنشف من المايه وتكون الصلصه متماسكه ومفيش فيها ولانقطة مايه
والصور توضح
ملحوظه مهمه جداً جداً
لازم ولابد الصلصة تكون باردة
بمعني ممنوع تحطيها علي العجينه وهي ساخنه
دا بيفسد العجينه ومش هاترتفع وتنفش معاكي
والسر دا أنا لاحظته من نفسي
من خلال خبرتي في المطبخ
يعني أنا بجهز منها كميه وبحطها ف الفريزر
ولما احب اعمل بيتزا بطلعها واخليها تفك او احطها فك الميكرويف
يارب تكون النقطه دي وضحت
نيجي لتشكيل البيتزا
نقطع العجينه كور كبيرة ع حسب حجم الصينيه
وبفردها الاول بالنشابه
وبعدين احطها في صينيه مدهونه
وافردها كويس وأحاول اعمل لها حواف يعني تكون الأطراف مرتفعه شويه عن الوسط
ثم نضع الصلصه
تابعوا معي باقي الموضوع
لانه طويل شويه
سوف اشرح كل نوع بالتفصيل بإذن الله
رجاءً عدم الرد
وحطيتها ع الأطراف
وبعد ما حطينا الصوص
ترش عليه جبن موزاريلا
وساعات بعمل خليط من الموزاريلا والشيدر والقشقوان
وهنا حبيت أغير في الشكل وعملتها كب بيتزا
ودي البيتزا التقليديه
وأضفت ع الوجه شرايح رفيعه جداً من
الفلفل الاخضر والبصل
وزيتون حلقات وسوسيس
ونوع تاني حطيت عليه بيبروني
ثم تخبز في فرن حامي
واليكم النتيجة النهائيه
اه نسيت اقولكوا بعد ماتستوي ف الفرن بضيف لها جبن موتزاريلا ويادوب بس تسيح من حرارة الفرن بطلعها
ودي كب بيتزا
كيوت وحلوة للأولاد ممكن ياخدوها معاهم المدرسه
يتبع ارجو عدم الرد