تعالوا اخواتي شوفوا مشكلتي مع زوجي اللي بسببها تشوهت نيتي واسودت حياتي ..

السلام عليكم ..

اخواتي وحبايبي الغالين ..

تعجبني نصائحكم ومشورتكم لي كل ما اكتب استشارة انا اعتبركم لي الملجأ بعد الله في مشاكل حياتي .. لأنكم اكثر خبره وفهم بالحياة مني .. ومحبتكم للنصح والفايدة لغيركم تحفزني كلما اقع في مسكلة تحيرني اني اجي طايرة واكتبها لكم وانتظر الفائدة منكم ..

فالله يسعدكم جميعا بدون استثناء في الدنيا والآخرة ,,


مشكلتي على قد ماهي بسيطة الحمد لله الا اني عجزت القى لها حل ومسببة لي ارق وضيقة مايعلم بها الا رب العباد ،،

فالبداية بشرح لكم وضعي ..

انا زوجي يشتغل بالرياض وسكننا بالرياض واهلي واهله كلهم يسكنون في قرية من قرى نجد ..

يعني انا وهو من نفس القرية .. ونظام حياتنا ايام الدوام بالرياض والويكند في قريتنا وزوجي لو فيني الموت مايخليني وسط الاسبوع عند اهلي لو وش مايكون .. بس الويكند المسموح لي اجلس عندهم ..


طبعا من ايام ملكتنا وانا طالبة من زوجي يفهم امه ان لها مكان في بيتنا وانه بيتها ومنى ماتبي تغير جو الله يحييها عندنا والله ومحتسبة الاجر ابي اعين زوجي في برها ..

وتزوجنا والله ومن اول ايام زواجنا وهي مااستحت فيني عروس وجديدة اببد مطيحة عندنا بس ماقلت شي الله يحييها هذا بيت ولدها ..

قسم بالله كنت احبها واحب جيتها ومثل العسسل على قلبي وما اعتبرها غير مثل امي ..
كانت هذي نيتي يعلم بها الله من اول مادخلت حياة زوجي ..

بس للأسف صرت اكره هالأم وابغضها وابغض زيارتها لي وابغض يوم عندي هو اليوم اللي ازورها او هي تزورني .. تدرون وش السبب !!

السبب هو زوجي قسسم بالله شوه لي نيتي اللي كانت مثل البياض في اني اعينه على برها .. وكرهني في امه وفي بيت امه واليوم اللي وافقت اتزوجه فيها ..


كل اسبوع زعععل ونكد واكره نهايه الاسبوع لما يقرب الويكند بسبب سؤال متى تجين عند امي ؟
الويكند كله يوم ونص .. مانمشي من الرياض الا المغرب يوم الخميس ولانوصل الا تالي الليل ويوم السبت ماشين اول العصر .. بالله قولوا لي وش يصفى لي من هالويكند اتهنى فيه بشوفة اهلي وابرهم واعوض غيابي فيه عنهم طول الاسبوع !!
هذا غير الواجب علي من زيارة جداني وعماتي وخيلاني .. يقول لي ماااااعلي منك تطيرين والا توقعين في كل اسبوع لازم تجين يوم كامل عند امي !!!!!!!

وبعض المرات والله يجبرني انام عندهم على قلة الايام الي ازور فيها اهلي حاط لي غرفة ببيت امه عشان ننام فيها عندها .. والله حرااااام قلبي محروق على اهلي من كثر ما اشتاق لهم ولا اهتني بشوفتهم .. واللي يقهرني انه امه كثير تجي ببيتنا يعني خلاص انا وجبتها وما قصرت والله احيان بنفس اليوم اللي ازورها فيه تقول لولدها يمه برجع معكم للرياض هالاسبوع بالله مو حرااام يضيع الويكند ب جلسة عندها .. مو اهلي اولى فيه ؟؟؟

وخاصة انه ممنوووع علي منعا باتا اجلس عندهم وسط الاسبوع .. لو يسمح لي اقعد بعض المرات والله مابقصر في حقها .. هذا غير بعض المرات يكون عند اخوانه او احد من اهله بالرياض مناسبات ويصير يجلسني الويكند كله بالرياض !!

عجزت اقنعه حرااام عليك كل له حقه .. والاهل اولى الناس بمعروفي وبري وانا مو مقصرة في حق امك ب شي .. يقوم يزعل ويعصصب ويطين لي عيشتي وهذي سالفتنا وموالنا طول ايام الاسبوع نكد في هالموضوع اللي مايخلص .. والويكند نكد وحرقة قلب على اهلي وعلى حالي ..


تكفووون يااخواتي ساعدوني القى حل مع هالرجال اللي ذبحني بأمه قسم بالله محروق قلبي والله طول عمري انسانه طيبه عمري ماكرهت احد وهو خلاني اكرهها المسكينه والله مالها ذنب بس كرهتها من كثر ماتنكدت حياتي بسببها ومن كثر مانزلت من دموعي بسببها ..

كثير من البنات قالوا لي ترى الرجال كذا في بداية الزواج يفرد عضلاته على زوجته ويخليها تعشش في بيت امه وبعدين يهدأ .. هو جد هالكلام من واقع تجاربكم ؟؟


تكفووون نوروني ابي القى حل مع زوجي اللي مقفلها ب وجهي من كل ناحية وما يرضى الا لو اسكن تحت رجلين امه واخدمها برمش عيوني ،،

ماابي احد يزيدني هم على همي .. ابي حلول تساعدني ودعوات تسعد خاطري لعل منكم من لو اقسمت على الله لأبرها ..

انتظركم حبيبات قلبي 🌷