حنونه5 @hnonh5
محررة
تعالي اعلمك شلون تثقين بروحك بامتياز كزوجه و بنت و طالبه و الاهم كانسانه
بسم الله الرحمن الرحيم
الخميس 2 جمادي2 1432 هجري
و الصلاةو السلام على خير الانبياء و المرسلين
اللهم اني اكتب موضوعي خالصا لوجهك العظيم مساعدة لحبيباتي فيك اللهم فتقبله بنية خالصه بارك فيه و بارك بكل من يقرأه و سهل لنا امورنا و اني لارجوك و اتقرب اليك بكل اعمالي الصالحه و هي قليلة مقابل عطاياك ان تسهل امر زواج اخواني و زواجي و زواج اختي و ان تجعل الصالحين للصالحات و الخبيثين للخبيثات و ترزقنا بالوظايف الرسمية الصالحه العاليه اللهم امين عاجلا غير اجل
مشرفات ارجوكم لاتنقلونه عن الاسرية لانه هام للمتزوجات
بنات السلام عليكم مثل ما وعدتكم هذاهو الموضوع و مازلت احسه ناقص لان موضوع الثقه بالنفس كبير يبي له مواضيع كثيره عشان تدرس كل جوانبه
و لكن عملت جهدي لان مو تخصصي علم نفس لكن استعنت بالعلم البسيط الي عندي و المعلومات الي تكونت عندي من قراءاتي و النت ساعدني بهذا الموضوع
و اكثر شي ساعدني كتاب الدكتوره فوزية الدريع ثقتي بنفسي بارك الله فيها وكثر الله من امثالها و ان كان البعض بيزعل لانه ما يحبها بس هي تعتبر عالمه و مجتهده بتخصصها ومو شرط عشان نتعلم من انسان لازم كل توجهاته نفس توجهاتنا ناخذ الزين و نخلي الشين مثل ما تعلمنا بالجامعات لان القاعده العلمية تقول ما لايدرك كله لا يترك كله الي تبي الكتاب تلقاه بجرير بحدود 40 او 45 كتاب صغير نوعا ما بس مختصر و مليان معلومات عن دواخل النفس البشرية و ليه ما تثق بروحها و فيه الاسباب و الشروح و العلاج
نلاحظ بالحياة بنات و حريم واثقات من انفسهم رافعات الراس و اكتافهم عاليه و صدورهم منفوخه يضحكون حتى لو اخطائو او اسقطو مو نهاية الدنيا و بنات و حريم نظرتهم منكسره اغلب الوقت ساكتات بالمجلس ودهم يعبرون واذا عبرو كلامهم قليل يرضون باي شي يخافون يزعلون اي احد القسم الثاني غالب الظن عندهم مشكلة بالثقه بالنفس
احترت كيف ابدي الموضوع و كيف ارتب النقاط بس جت كذا بشكل عفوي وسامحوني على القصور عاد لان الموضوع مو ادبي واقدر اسرده بترتيب حلو هذا علمي
ببدا باساس المشكله و كل مشكله بالدنيا الافكار ايه الفرق بين واحده واثقه من روحها و واحده غير واثقه فكره مجرد فكره الاولى فكرتها انا الحمد لله واثقه من روحي عندي نواقص عيوب عادي انا بشر الثانية فكرتها مهما سويت من نجاح احسها ناقص لا لا ادائي مو حلو مهما تجتهد لازم تجلد ذاتها اذن هي الافكار لو تحكمنا فيها و عرفنا سر عملها بنعيش صح براحه و سعادة و رضا نفس و طمانينة قلب هذه الافكار السلبيه لها اساس منين جت؟؟؟؟
ص 99 من كتاب د فوزية:
ماهو اساس تفكيري عن نفسي؟
شرحي حسب فهمي:
وش اساس هالافكار السلبيه عن نفسي او من الي حطاها و تسبب فيها؟
اذا هم مثلا امي او ابوي او واحد منهم بتكسيرهم الدايم لي او مدرسه بالصغر كانت تنتقدني و تفشلني قدام الطالبات او أي انسان صار سبب للمشكله الي انا فيها أي مخلوق لازم احط قناعه واحده بس براسي:
هذا الي حطها او تسبب فيها انسان يعني بشر معرض للخطأ يعني مو كل كلامه صحيح ومو كل راي يقوله لازم يكون صحيح
كلامه مو بالضروره يكون دايما صح او هو مو قرآن منزل ما يتغير ولا هو او هي او هم نبي و كلامهم ما يتناقش فيه
مثال: امي دايما تعلق تعليقات سلبية عني و ترا كثير امهات كذا لاشعوريا يعني مو بكيفهم غصبنا عنهم من عقدة داخلهم : اما على شكلي او تصرف او تصرفات تصدر مني بقول المشكله بامي ( او أي شخص حسب كل بنت و صاحب السبب) المشكله مو فيني و انظر لها نظرة المشفقه الحنونه على امها و ادعي لها من كل قلبي بالهدايه و ان سبحانه يكف شرها عني و التمس لها العذر مثل : جهل سوء تربية يمكن لان امها كانت تسوي كذا لها ما تشوف الا العيوب او تحط عيوب من راسها فصارت امي لاشعوريا نفس امها و يصدق المثل المصري: اقلب القدره ( القدر) لفمها تطلع البنت لامها
ترا فيه امهات معاهم الدكتوراه بس يمارسون ضغوط تحطيمية على عيالهم و السبب اللاشعور عندهم خربان بالنقطة هذي يعني غصب عليهم
بقول لكم مثال شفته بعيني ما اقول احد قالي و يعلم الله تعالى اني صادقه: اعرف قريبه لي تهبل و قعدتها ما تنمل و الناس لها الظاهر والبيوت اسرار و لكل شخص مهما كان رائع عيوب احد عيوب هالحرمه ان تعاملها جاف و متغطرس احيانا مع بعض عيالها و احيانا هذي مرات تصير كثيره وزايد مكيالها يعني عيالها قسمين قسم عصبي و لسانه طويل و يعطيها بالوجه و فيه دفاشه و فيهم شراسة كلام هذولي ما تقول لهم تعليقات سلبية بكلامها العادي بس اذا عصبت منهم تسمعهم كم زفه
يعني عادة ما تعيب عليهم او تطنز تخاف من لسانهم
القسم الثاني هم الهاديين و الحليمين هذول تنظر لهم نظرة ازدراء و تطيح فيهم تدقر و تكسر مجاديفهم لان كل واحد يرى الناس بعين طبعه هي لسانها طويل و عصبية مره و قوية فتحسب ان قوتها سببها اللسان الطويل و العصبية والدفاشة فتحسب القوة بس لما الواحد يكون مثلها
لكن لما تشوف ناس طبايعهم عكس طبايعها النقيض تماما هاديين و ثقيلين و اقوياء من داخل و برا تستقوي عليهم و يمكنها و الله اعلم تستمتع باهانتهم و تجريح احاسيسهم ما تدري ان الي رادهم هو الله تعالى ثم الدين و الله اعلم هذا تفسيري لحالتها:
يمكن لاشعوريا هي تغار منهم لان عندهم الي ما عندها الحلم و قوة الشخصية الهادية و الكلام الطيب و الموزون و تصرفها عدائي لبعض الي يعانون من نقص ما يهاجمون الاخر لان الاخر عنده الي مو عند المهاجم او لا شعوريا تقلد امها لان امها كانت تسوي كذا لها و لاخوانها
لكن و بكل صدق هالام تحب عيالها و تفاديهم و تعبت عليهم ياما ومازالت تتعب عليهم و تحاول جاهده تربيهم احسن تربيه و ضحت كثير من صحتها عشانهم بس مثل ما قلت لكم عقد اللهم يا كافي الله يشافيها و يشافينا جميع
يعني مو بالضرورة اذا امي او ابوي او زوجي او الخ الخ سبب عقدتي بنقص ثقتي يعني ما يحبوني هم بروحهم باحيان كثيره ما يعرفون هم ليش يسوون كذا
بس بنت من بنات هالحرمه كانت من النوع الي الام تدقر فيه من ايام المراهقه و البنت ماشاء الله قوية ساعات تحقر من باب بر الوالدين و ساعات يفيض فيها الكيل و تدخل بمشاحنات جدالية مع امها لين ما اكبرت و صارت باواخر العشرينات و اخذت قرار: انا الي لازم اتغير ما انطر امي تتغير و فعلا اقدرت تتغير و انجحت نجاح باهر ماشاء الله تبارك الرحمن ولا حول و لاقوة الا بالله العلي العظيم كيف؟؟؟؟؟؟؟
1- المست العذر لامها حتى لو مالها عذر اصنعت لها عذر خصوصا ان الام حتى الثانوية ما خلصتها يعني عذرها كان الجهل
2- حطت روحها بمكان امها و فيها هالعقده يمكن بتظلم بنتها اكثر من امها؟؟؟؟
3- قدرت تصادق امها حاولت تسوي الطبخات الي امها تحبها مثل الكيك السلطات العشا الخفيف بطلعاتها للسوق تذكر امها و تجيب لها شي بسيط و تجي الام تقولها ليش هالمخاسير و لاتبين انها تبي هالشغله بس تدري ان امها سعيده من الداخل و فعلا الام تغيرت كثير و تعدل لسانها و منطقها ماشاء الله يعني عالجتها و عالجت روحها بالحب و الصبر
4- الحت بالدعاء ان الله تعالى يهدي امها و و تكف عن تعليقاتها السلبيه : يا المجنونه بالخبله يا المعاقه مع ان البنت لامعاقه و لا شي بس الام الله يهداها كل تصرف ما يعجبها من أي احد تقول عنه معاق او مجنون ههه دعت الله تعالى انه يرزقها الصبر والسلوان و سكينة القلب و هدوءه واللامبالاة بل و الضحك و الابتسامه وو الله العظيم ربي استجاب لها و صارو اصدقاء صارت صديقه لامها عقب ماكانو مشهورين بالمشاحنات الي بينهم طبعا البنت الي غيرها انها اشتغلت على حالها و قرات و اطلعت و تثقفت و تاثرت بمقولة: لاتنتظر الاخر ان يتغير انت تغير و نعم للحين امها تقط بين الحين والاخر كم تعليق سلبي بس على خفيف يعني وين كانو و شلون صارو ماشاء الله لاحول ولا قوة الا بالله العلي العظيم تبارك الرحمن
حطيت المثال هذا لان ادري كثير بنات بينهم و امهاتهم مشاكل عدم تفاهم لعل هالمثال يفيدهم يارب
مره متصله قالت مشكلتها للدكتوره فوزية الدريع ان زوجها دايما يدقرها و يحاول يكسر ثقتها بنفسها فانصحتها و قالت: قولي له رايك فيني ما يعنيني يعني بفهمي قولي له بالفم المليان و بالبنط العريض ونتي رافعه راسك و حاطه عيونك بعيونه واذا حابه تاشرين باصبعك تجاهه : رايك ما يهمني فسرت كلامها لكم و ازيد عليه و اعطيه مقفاك خل يعرف ان أي كلام سلبي جوابه مقفاك طبعا مو مع كل زوج العصبي او الي يطق لاتعطينه اكيد مقفاك خوفي لايكفخك
النقطه الي بصفحه 99: هل استخدم اسلوب كل شي او لاشيئ فلا اعطي نفسي دفعه ايجابيه لبعض الامور الصح؟
شرحي: مثال: بعض البنات او الحريم او حتى الرجال معقدتهم سالفة التوازن بين الادوار: لازم اكون بيرفكت ( كامله بالانجليزي) او مثالية او ممتازه كام و زوجه و كبنت او كموظفه ؟؟؟ ليه انتي غريندايزر (بطل لمسلسل كرتوني عن رجل خارق انشهر بالسبعينات )
ترا كل حرمه و كل انسان بشكل عام من تتزوج لين تموت تعيش مشكلة التوازن بين الادوار مافي مره ممتازه بكل ادوارها لازم بالدور هذا ممتازه و هذا جيد جدا و هذا جيد و هذا مقبول او تتفاوت الدرجات حسب اهمية اولويات الادوار عندها
يعني بعض الحريم امهات افضل من كونهم زوجات البعض العكس البعض دورها كموظفه ياخذ الاولوية الاولى عندها و تاركه البيت و العيال للخدم و السواق و الطباخ؟؟؟
لكن اذا أي حرمه سوت عملية توازن و امسكت العصا من النص بكل ادوارها بحيث تجاهد دايما ان مافي دور يغلب الثاني و تعيش حياتها لنفسها اولا ثم لزوجها ثم لعيالها كان انجحت نجاح باهر
يعني سالفة شيل هم التوازن شي حلو لان يدفعنا دايما للعطاء و للتوازن لكن اذا زاد عن حده انقلب قلق و توتر و لعدم الرضا عن النفس
و عدم الرضا هو اساس نقد الذات او جلدها، نقد الذات امر طبيعي اذا كان بحدوده الطبيعية مثلا طبختي كانت مالحه شوي اعترف و اقول ان شاء الله بالمره الجايه اضبط الملح و اكتب القياس عشان لا انسى
لكن انها تجلد ذاتها و تقول انا طباخه فاشله و تقعد تقارن روحها بين امها او اختها او سلفتها او ام زوجها هذا امر مرفوض
و قيسو على المثال البسيط هذا امثله عديده باختلاف ادوراها
انا اشوف اذا الواحده بكل ادوارها جيده جدا فهذه و الله عبقريه بعض الحريم جانب يطغى على جانب يعني كام ممتازه بس كزوجه جيده او ماشي حالها اوكي وضعك ماشي حاله بس تطوري بجانب الزوجه يعني لاتهملين روحك استمري بالاهتمام بجمالك و المحافظه على وزنك لا تتعلثين بالعيال و المسؤوليات هذي مو حجه كثير من اللبنانيات و المغربيات حسب ملاحظاتي بالحريم عندهم كومة عيال و اجسامهم كنها جايبه بس واحد او اثنين ماشاء الله
عندك من نص الاربعاء لين الجمعه فاضية يعني اسبوعيا يومين و نص فاضيه خلي نص يوم لك بس بدون أي مسؤولية لا لاولاد ولا لزوج ولا لوظيفه
لكن رغم الاستمرار باننا نوازن صعب جدا نصل للكمال يعني اخذو روحكم بالهون المثل يقول الهون ابرك ما يكون
لانتوقع من النفس البشرية الكمال لاننا مهما حاولنا لابد جانب يطغى على جانب
و الحل الاستمرار بعملية الموازنه مثلا الاسبوعين الي فاتو اختبارات العيال اكيد اكثر التركيز بيكون لهم لانها فتره مؤقته و تعدي و اذا ما اهتميت فيهم بيسقطون و بيعيدون السنه و بتعب من اول و تالي
بعد الاختبارات اعوض زوجي و اهتم بروحي عشاني ثم عشانه اسوي برنامج لو ليومين ادلل روحي وياه اسوي شهر عسل قصير مو بالضروره لازم نطلع اذا الطلعه صعبه او تبي ميزانية
بالبيت اجدد و اجدد بكل شي
بعض البنات او الحريم تحب تعقد روحها او تفرض على نفسها شعور قاسي مستحيل يتحقق : لازم اكون كامله بكل شي؟؟؟؟؟؟
بعلاقاتها الاجتماعية لازم تكون اجتماعية و لبقه و سوالفها تونس لازم كشخه و انيقه دايما و تعرف اخبار الموضه اول باول
بالدراسه لازم تكون الاولى بالبيت لازم علاقتها مع الكل طيبه نست ان التوافق احيانا بين بعض الاخوه و الاخوات يكون صعب فالمفروض نتقبل طباع بعض كماهي مو بالضروره نفهم كل شي بنفس الوقت عشان نتقبل الواقع نفهم بعدين مع الزمن بننضج اكثر و نفهم اكثر
لازم تجيد الطبخ و الاطباق الصعبه لازم اذا هي طالبه بعد ما تتخرج تتوظف لازم لازم لازم و يستمر مسلسل لازم اكون ممتازه بكل شي او انا ولا شي تحب النكد تحب تنغص على حياتها هل تظن انها ما تعرف تعيش الا اذا حست بالنقص؟؟؟ الله اعلم
لازم كل بنت و حرمه و انسان يفهمون مو لازم الواحد يكون ماهر بكل شي بالدنيا هذي قدرات تتفاوت بين الحريم و البنات حتى الرجال يتفاوتون بكل شي مثلنا احنا الحريم
لابد من الرضى و اني اقبل عيوبي اقبلها عشان اعدلها و احاول جاهده اصلاحها النواقص و العيوب مثل سياره زينه بس اخربت هل صاحبها يقطها ولا يصلحها ؟ اكيد لازم يوديها لاحسن كراج و يصلحها
الكراج او المصلح هو العلم أي نقص عندي ولازم يكون عندي نقص لاني بشر اروح للعلم اسال روحي وش مشكلتي تخص أي تخصص؟ اعرف التخصص من نوع مشكلتي و بموضوعنا ( نقص الثقه بالنفس) يخص علم النفس اذن اشتغل على حالي و اقرا كتب تشرح لي النفس البشرية و شلون اتعامل معاها ادور كتب عن الثقه تشرحها لي و تشرح ليش تتعرض للمشكلات و للمخاوف و للاهتزازات و تشرح لي و تفهمني كيف اسيطر على مخاوفي و اخلي لها حد و اكون اقوى منها و على فكره جرير منزل كم كتاب جديد عن الثقه بالنفس غير القدامى
لازم افهم نفسي عشان اداويها و اسيطر عليها لازم افهم سبب هالخوف او المخاوف شنو؟ اذا عرفنا السبب بنسيطر على الخوف
الدكتوره فوزية اذكرت 23 نقطه تدل على الثقه بالنفس و مثلهم تدل على مشكله بالثقه بالنفس
و صعب او يكاد يكون نادر او مستحيل انه ينوجد شخص فيه كل 23 نقطه ايجابيه
لكن اذا تبي تعرفين عندك مشكله بالثقه بالنفس اولا: اذا عندك 3 نقاط سلبيه او اكثر يعني عندك مشكله
اذا بنقطه او نقطتين بحياتك انتي مو واثقه من نفسك فيهم عادي الوضع عادي كلنا تهتز ثقتنا بانفسنا احيانا هذا وضع طبيعي مثل لاعب السيرك الي يمشي على الحبل يمشي و يمشي و فجاة يهتز بس بعدين يشد طوله و يكمل الدرب
نقاط تتعلق بالثقه بالنفس تخص الشكل الخارجي للواحده
الملابس:
مثلا : انا ما اعرف اكشخ ولا اركب قطع او ما اعرف الالوان الي تتناسق على بعض و دايما اخواتي يلبسوني على ذوقهم و اذا شريت شي مهما كان ماركه او غالي احسه مو حلو علي او مدري يمكن اللون الثاني احلا علي بيكون او اذا شفت واحده تبهر باناقتها اجلد و انقد روحي من داخل و اقول و الله فرق وين ذوقها و ذوقي كني بمعسكر صدق افشل؟؟؟؟؟
هالشعور غلط المفروض تشجع روحها و الله ذوقي بدا يتطور و عادي بقعدات الحريم لازم واحده تاخذ الجو و يبدون الحريم يتفاوتون بالاناقه عادي وضع عادي جدا صحيح هي اكثر اناقه مني بس انا اجمل منها او مهتمه بعيالي اكثر منها او مراعيه زوجي اكثر منها او باره بامي اكثر منها يعني اتذكر الجانب الايجابي الي انا متفوقه فيه عليها وما احسد احاول جاهده طرد الوسواس و ادعو لها بالبركه والفال لي اوصل لاناقتها
و قيسو على المثال هذا ان كان طبخ او تربية اطفال او اهتمام بزوج او بحموله الخ الخ
و سقت المثال هذا لانها مشكله شايعه بين الحريم فعلا كثيرات ما يعرفون وشلون يكونون انيقات بابهي صوره
الحل: اشوف العارضات شلون يلبقون اللبس ادور عارضات اجسامهم و تقاطيعها تشبه جسمي و تقاطيعي اشوفها شلون تلبس و شلون تركب قطعها شلون تربط الشال شلون تمسك الشنطه وش الشي الي ينقصني بالاناقه باي جانب احدده و ادخل النت و افرفر بمنتديات الاناقه و اجمع بالصور و اعرف الموديلات الي تناسبني شي اخليه بمجلد اسميه بخيطهم ان شاء الله لان السوق مافيه كل شي طيب خلصنا من الاناقه النظرية اروح للاسواق واطبق عملي اشوف وين اللبس الي يناسبني باي محل باي مول؟ اذ ا ما اعرف انزل موضوع و اكتب الي بخاطري بعالم حوا لان تجارب البنات توفر الوقت و الجهد بدال ما اروح ل3 مولات و اتعب و يمكن القى كذا موديل بس لما اكتب موضوع مثلا ابي فساتين تصلح لقياس كذا لمناسبة كذا و اشوف تجارب البنات و اكثر مول امدحوه و اروح له لان هم ما انصحو من فراغ كن تعبهم و فرفرتهم بكل محل كن جهدهم من البيت للسوق كن هذا التعب جالي و انا بالبيت بضغطة زر استفدت من نصايحهم
و ادخل المحلات و اشتري كم قطعه احسهم حلوين علي طبعا الكثير بالازياء تطلع غير باللبس مهما كانت الواحده جسمها حلو و مو بالضروره الي على اختي حلو حلو علي تقاطيع الجسم يختلف من واحده لواحده قصة الجسم تفرق
اشتري و اسال البايع اول فيه استبدال عشان لا اتوهق اروح و اقايس الكومه و الله يعيني على الثقل و الي يناسبني ارسى عليه الي مو على قياسي او ما عجبني ما اشتريه والله طلع اصغر مني لا تشترينه الا اذا انتي جازمه بعمل ريجيم قريب و عارفه و متاكده وزنك راح ينزل لذا نصيحه مني من تجربه لاتشترين شي على اساس راح تضعفين انطري تضعفين و انزلي السوق لان حتى الخامات تختلف هذا الخام يناسبني لارج بس خام ثاني لازم اكس لارج مع اني نفس الوزن؟؟؟ كلنا حسينا بالاشياء هذي بملابسنا
الحين انا طورت حالي بالاناقه شوي شوي يعني اشتغلت على حالي و بكل تجربة شراء ملابس حلوه بكتسب خبره بالاناقه و تزيد ا ثقتي بنفسي ولا انطر احد يمدحني يكفي مديحي و ثنائي على نفسي
الشعر
خلصت من اللبس اجي للشعر اشوف طبيعته كيف اتعامل معه وش الاقنعه الي تفيده مثال مو كل شهر ينفع معاه حمام الزيت الكثيرمن حمامات الشعر يطيحون الشعر لذا اذا بحطه ابتعد من الجذور نفس الشي الزيوت لحالها تطيح بعض الشعور لازم تخلط اما مع حنه او سدر و غيرهم
اشوف وش التيجان والاطواق و الشباصات الي احتاجها و اشوف تسريحات المراهقين بالمنتديات لان عندهم تنوع اكبرمن الشابات لان العارضات غالبا يفلون شعورهم و المصممين متعمدين يبون التركيز على الموديلات
و اهتم للون شعري اشوف هو على طبيعته اسود او بني ما احاتي أي لون يلوق عليه اذا مصبوغ اشقر مثلا اشوف العارضات بالضبط وش منقين الوان لشباصاتهم مثلا البني حلو على الشقر اذا شعري احمر ادور شباصات زيتية يلبق عليها
احاول البق الطوق نفس لون الشباصه و اختار حلق لونه يركب عليهم او نفس اللون او الخيار السهل الفضي او الذهبي يلبقون على كل الالوان تقريبا
المهم اختار كم تسريحه تلبق علي و شعر العارضه تقريبا يشبه شعري اكتب شرحها بدفتر اشوف شلون مسويتها بالضبط منين ماخذه الخصله بالضبط شلون فارقه شعرها و اكتب لوازم هالتسريحه من شباصات و اكسسوارات و غيرها و اروح للسوق
اخلي هالطلعه خاصه لشيين بس و اركز عليهم لوازم التسريحات و الجزم مثلا بس ما اتوه روحي و اشتت جهدي الاشياء الثانية لهم طلعه غير كلما ركزت اكثر على الهدف كلما انجزته اسرع و اريح و باتقان اكبر أي هدف مهما كان صغير لو طبخه جديده بتعلمها
وارجع للبيت واريح و اذا تسبحت سرحت شعري و احاول اطبق التسريحه الي بالنت شوي شوي مره بعد مره بتعلم مهارات تصفيف الشعر مو بالضروره اكون محترفه بس اعتمد 4 او 5 تسريحات لي و كل فتره اتعلم شي جديد
و الله اعرف واحده شعرها حلو للاسف كلما اشوفها القاها مسويته كبه دوم مضموم لاهي فلته وونسته ولا هي استانست فيه
الي يشوفها يقول جده عايفه الدنيا و هي توها شابه لا عندها زوج ولا عيال يشغلونها
اذا الحين ما شببت روحها اجل اذا تزوجت و احملت و بزرانها حولها شكلها شراح يصير؟
يا بنات من الحين تعودو تسوون تسريحات خفيفه بشعوركم مو اذا تزوجتو تحتاسون
انا من الحين قاعده اتكشخ على خفيف شريت لي من محل للتخفيضات كم حلق و طوق و شباصه و لبقت الوانهم و الحمد لله قاعده اتعلم شوي شوي التسريحات
و بكره صدقوني بتتطورون و تسوون للاعراس بعد خصوصا الشاطره تراقب الكوافيره شلون تسوي تسريحتها ووش الادوات الي تستخدمها تروح للسوق تشتريهم و تطبق شوي شوي بتضبطينها
الجزم
اجي للجزم ونتو بكرامه ادخل للنت ايضا يعني ما استخدمه دوم للفرفشه و السوالف اطور حالي فيه بكل شي
اشوف لبس العارضات وش نوع الجزم الي لابسينها بكل فستان بتكون عندي خبره من تركيز النظر اعرف متى البس البوت القصير متى الطويل متى الصندل متى الشبشب
مثلا من ملاحظتي ومو بالضروره تعجب الكل : لاحظت التنوره القصيره الي تحت الركبه ما يلوق عليها الكعب الطويل لان الموديل يطول الواحده و هم بعد كعب طويل مدري حسيت شكلها نافر بالكعب الطويل
لكن لو استخدمت كعب واطي او متوسط الطول بيطلع شكلها يجنن
حتى القصار لاحظت شكلهم احلا بالكعب المتوسط مع التنوره القصيره
لكن لو واحده جربت تنورتها على الكعب الطويل و حست انه لابق خلاص تلبسها
و التنوره الطويله تجي احلها على الكعب العالي و هكذا الواحده يصير عندها خبره
مثال اخر:واحده ما تعرف تطبخ: تبدا بالاطباق البسيطه من شوربات و سلطات و معجنات تتدرج فيهم لين الاطباق الرئيسية و بتقدر و الله كان لي صاحبة الله يوفقها حدها كان البيض و الشاي و الله ما ابالغ عليكم يوم رحت عنها لاني انا الي كنت اطبخ و الله طاحت بواحده بدت تعلمها انا كنت ادللها و اصلا تخصصها كان علمي بس مع الثانية حولت و صارت ادبي فصار لها وقت و الله انغصبت تتعلم الطبخ و الحين تسوي احلا كبسه
يا بنات حولو المحنه الى منحه يعني فرصه تتحدين نفسك و تطلعين مواهبك بكل شي و باي شي
انا الي اكلمكم و الله قعدت سنتين اتعلم الكيكة الاسفنجية بس كان النت بعده ما دخل عندنا و اشتغلت و الله على حالي و ياما كيكات مفشوشات و ياما التعليقات جتني من البيت خلصتي الطحين و الزيت و السكر وووو و انا مصممه على هدفي
سنتين قعدت اجرب و اكتب كل التجارب بدفتر و اشوف وين اخطات و عقب هالسنتين و الله اتحدا اشهر محل حلويات بكيكتي ماشاء الله لاحول ولا قوة الا بالله العلي العظيم اسويها ساده و ان شاء الله مخططه اتعلم التزيين
الي ابي اختصره يا بنات الي يبي شي و مقتنع فيه يوصل له مهما طال المدى و مهما طال الصبر و التغيير لاتهقونه بلمسة عصا او زر الا بحالة كن فيكون
التغيير الايجابي يبي وقت يعني أي تغيير
انتي مو واثقه من نفسك من سنين لاتهقين راح تتعالجين بسرعة البرق
العلاج نفسه يفرق من بين واحده لواحده و حسب حالتها جت من الصغر او على كبر
تفرق وش السبب ومنو المسبب تركيبة الشخص نفسه تفرق
سبحانه خلق السماوات والارض ب 6 ايام كان يقدر سبحانه بلحظه يخلقهم بس ليه؟؟؟ عشان يعلمنا سبحانه الحكمه بالتدرج و الصبر يعني لاتهقين مشكلتك الي تراكمت من سنين و تتضاعف من مواقف كثيره تروح باسبوع او شهر يبي لك مده تشتغلين على حالك
يمكن تبين 6 شهور او سنه او كذا سنه و كلما حسيتي رحلة العلاج صعبه عليك بروحك ما تعرفين او ما تقدرين استعيني باخصائية او معالجه او دكتوره نفسيه لا تهملين روحك عيشي الي بقى من عمرك بسعاده لمتى كلما صار موقف اهتزيتي مثل الغصن
هالنقاط للمتزوجات خصوصا و للكل عموما
تطبيقات عملية تخص الثقه بالنفس
1- حطي ببالك ان الزواج مو رجل تاخذينه و بس لاهو مصاهره بين عايلتين يعني بتاخذينه جمله مع امه واخواته و اخوانه بسلبيات هالعايله و ايجابياتها طيب يعني وش المغزى؟
يعني لا تتوقعين تحشين امه او اخته او أي فرد من افراد عايلته و تتوقعين يزيد حبك بقلبه اقلبي الوضع و تخيليه يحش اهلك بترضين؟ طبعا لا بس اذا اظلموك قولي مظلمتك باسلوب الصابره المحتسبه و ادعي لهم بالهدايه و الصلاح و انه تعالى يشغلهم بانفسهم و يكافيك شرهم و اياك و اسلوب السب والشتايم القذره و الادعية السلبيه الله ياخذهم الله يمحيهم الله يموت عيال اختك الله الله ترا الدعوه اذا مو فعلا كنتي مظلومه ترد عليك لا و ازيدك بعد اذا فعلا هم اظلموك و دعيتي بالشين عليهم
بكره لابد بتظلمين احد و بيدعي عليك ترضينها يدعي عليك
مصيرك تخطين الانسان مو معصوم من الخطا
2-توقعي و حطي ببالك قناعه: يستحيل كل الناس تحب واحد اذا محمد عليه الصلاة و السلام اكرهه الكثيرين توقعي بعض افراد عايلة زوجك يمكن ما يحبونك ماراح اقول يكرهونك بس بخففها و اقول ما يحبونك او احساسهم عادي تجاهك
توقعي بعض الحسد و الكره تعايشي مع الوضع
مو عيب اذا كم واحد يكرهني او يحسدني العيب مو فيني فيهم
ما احسدوك الا لان عندك الي ما عندهم و تاكدي اكبر عقوبه لهم انهم يدمرون روحهم بروحهم من التفكير فيك و حسدك قولي واو و حسي بالسعاده: للدرجه هذي انا مهمه و شاغله تفكيرهم هههه و كل هالحش يحشوني؟؟؟ بالعون زادت حسناتي و ان راحت حسناتهم اخذو من سيئاتي يا سلام وما عليك الا تحصنين روحك مو بس من قرايبك من الكل
3-اعرفي ان المرأه تعيش بحالة دائمه اسمها شلون اوازن صح بادواري؟
ابنه زوجه ام موظفه: تاكدي يستحيل دايما الامتياز بكل الجوانب احيانا جانب يطغى على جانب اذا تقديرك خليط من الامتياز و جيد جدا و جيد و مقبول على ادوارك تاكدي انك حرمه مذهله
5- سالفة المقارنات: شغل الناس و هواية الفارغين: منو احلا منو اضعف منو اكثر ثقافه منو تطبخ احلا و اذا عيلو ( جابو عيال) منو عيالها احلا منو اكشخ منو اشطر اسطوانه دايما تدور ههههه و ياليت بشي مفيد كلها جلسات حش و اثام على الفاضي
فلا تتضايقين من المقارنات خليها حافز لك:اذا اخت زوجك او سلفتك او زوجة اخوك سوت ريجيم و قاومت وانجحت قلديها هذا التقليد الايجابي الي يحضون عليه العلماء
ولاتزعلين من المقارنات حتى انا و انتي كلنا نقارن احيانا بس الافضل و الحلو لما نقارن ما نحش يعني ما نعيب نقول منو احلا ما نقول هذي خشمها كذا هذي عيونها كذا
يعني لما اقول عيون فلانه ماشاء الله واضح قصدي المخفي ان الثانية عيونها مثلا ما يجذبون بغظ النظر صغار او كبار
ياما عيون عادية او صغيره و تجذب و عيون كبيره و لا تجذب
يعني اقول الشي الحلو والي يسمعني يفهم قصدي
ماله داعي اقول بس فلانه قصيره لا خلاص لما اقول فلانه الاولى طويله و اسكت عن عيب الثانية خلاص انفهم القصد
يعني لاتقولون فلانه طويله و الثانية قصيره
قولو فلانه ماشاء الله طويله و بس لاتكملون الجمله السامع يفهم
و بكذا ابتعدتو عن الغيبه
لاتزلعين ولا تقهرين روحك على شي بايخ مثل المقارنات حتى لو كانت صحيحه اصلا هي تعتمد على اذواق الناس و ارائهم ومو بالضروره كل راي اسمعه او مقارنه اسمعها يعني خلاص اعتمدها تعتمد على الذوق
مثلا انا اشوف الي تدلل روحها بالمعقول هذي حرمه شاطره مو مبذره غيري تشوفها صرافه و مبذره
انا اشوف الي تشتري بدلتين للحفلات بالسنه هذي بالمعقول تصرف غيري يشوفونها تبذير بدله واحده تكفي
و الميزانية نفسها تفرق يمكن انا اقصد الي تصرف على البدله الواحده بحدود 800 الى الف و الثانية تقصد بس ما فهمتنا قصدها احنا الحريم بالجلسه انها تقصد البدله الي خياطها و قماشها يكلف 3 او الفين
و اعرفي ان كل انسان ا و حرمه لان موضوعي للبنات و الحريم
ان كل واحده ميزها الله تعالى بشي مو في الثانية او حتى اذا امتازو بالصفه هذي تلقينهم يختلفون بالنسبة او بالدرجه
مثلا هذي ماشاء الله بيتها مرتب اغلب الاحيان الثانية مرتب بس مو معطر غالبا مثل الاولى
6- لاتوقفين على الواحده بكل صغيره و كبيره و نص النجاح بالدنيا تغافل
اذا حاسبنا كل واحده على كل تفصيل لا بالله ما بقا لنا صاحب
الواحد يشوف نفسه ترضين الواحده تحاسبك على كل هفوه و زله و تبيك ملاك ما تغلطين ؟؟؟
حتى الامام احمد بن حنبل و ابن القيم رحمهم الله لهم كلمه جميله بالتغافل
يعني بلهجتنا تعيمي سوي روحك عميه
يعني لاتشرهين على اتفه الامور مثلا بنت عمي ليش ما اعزمتني على عرس بنتها يختي يمكنه كان عائلي و بس القرايب الي مره معزومين ليش اكرهها و احقد عليها يمكن لو انحطيتي بنفس ظرفها يمكن حتى اختك او خالتك تترددين تعزمينهم او لا
مو كل الاقارب بلسم البعض اعوذ بالله مترصدين للواحد من يشوفون بيده نعمه الا اشتغل الحسد منين و شلون و بدا تربيط العصاعص( عمل الافخاخ و و فلان قال عشان يتهاوش فلان مع علان) لذا الواحد ما يعزم القريب الشرير عشان يفتك من شره
و الله اعرف واحده تبي تزوج بنتها و ما تبي تعزم اخواتها( يعني الخالات) قلت لها ليه قالت اهل مشاكل ما لمتها الله سبحانه يامرنا بعدم القاء انفسنا بالمهالك و ناس جالي منهم شر وش لي فيهم
لهم علي صلة الرحم اروح لهم و اشوفهم غيره مافي مو بس الباب الي يجيك منه ريح تسده و تستريح الا تقفله
مثلا كمثال للثقه بالنفس العاليه:عزيمتي و انا حره اعزم الي اعزم و اترك الي اتركه اذوني طول عمري و اذو زوجي اروح بكل غباء و اعزمهم عشان ياذون بنتي كني اقولهم مشكورين على كل اذيتكم لي طول العمر هذولي اساويهم ويا الي يستاهلون من الطيبين؟؟؟ ما تساوو بالفعل كيف اساويهم بالجزاة؟؟
لا والله خل الناس يشرهون و يقولون ليش ما اعزمت اخواتها الزم ما علي مصلحة بنتي هذي القناعه تعجبني يمكن ما تعجب الكثيرات منكم بس فعلا بعض الاقارب و الله عقارب ساعات امك الي هي امك تحسدك اعوذ بالله
لاتهقون اني ابالغ و الله شايفه نماذج انسانيه بعيني و قاريه قصص ناس تاذومن قرايبهم
و قريبتي اسالت شيخ عن اخت لها تاذيها و حاولت تسحرها اسالته علي اثم اذا ما دخلتها بيتي قال لا عاد الشر مو الا سحر وفيه شر معقول طاير بالهوا و فيه شر وراه خراب بيوت
نرد للتغافل يعني تغافلي عن كثير اشياء عدي تعدي الحياة فيك عقديها تعقدها الدنيا عليك
بطلي عن الغباء اللاشعوري الي نتوارثه: لازم اكون ملاك و كل الناس تحبني
لا انا انسانه ومن حقي اخطي و اتعلم من خطئي ومن حقي اكره ناس واحب ناس ومن حق بعض الناس تكرهني و البعض يحبني
يعني البعض و ترا هذا اذا وصل لمستويات مرتفعه يصير مرض( داء ارضاء الاخرين) و ناقشته اوبرا باحد حلقاتها دخلو النت تلقونه
6- الكف عن العطاء اللامحدود و تعلمي تقولين لا: الشي اذا زاد عن حده ينقلب ضده تلقون الواحد او الواحده يخافون يزعلون أي احد لو على نفسهم مثلا تدق عليها صاحبتها او جارتها بزورك و ظروفها ما تسمح تدوس على روحها ايه حياك الله و تدخل بداومه الحلا و الموالح و الشاي و القهوه و العصير و تنظيف البيت و تعطيره و الاهتمام بالعيال و الزوج و حل الظرف الي عندها
ماشاء الله تراوالي لو هي سوبرمان ما سوا كذا ههه
قولي بكل بساطه : و الله انا مشتاقه لك يا عمري بس الحين اسمحي لي ظرفي ما يسمح من يعدي بتصل فيك
يعني تعلمو يا بنات ان الامور و الزيارات و الطلعات تبي موعد الحياة تغيرت و متطلباتها زادت ما عدنا نفس امس
الواحده تزور جارتها بهدوم البيت تسمع حسها و هي تطبخ لا هذاك الزمان ولى و راح والي راح ما يرجع
يعني الحين لازم تبدلين حق جارتك و تحطين مكياج لو خفيف و تعطرين بيتك و البلاوي خليهم بغرفه اذا ما مداك الوقت و قفلي عليها لا يجي بزر و يفتحها يعني صارت الحياة صعبه بكثير اشياء و انا لازم استعد و ادرسها صح عشان انجح بالمهمه
ما ابي جارتي تزورني و تنقرف و الانسان ياخذ انطباعه من اول مره بكره تكره زيارتي او تحشني بسبب عدم استعدادي
وكلمه تعلمناها من اجدادنا كلمة تستحي منها بدها الكلمه الي احس فيها بحرج و وودي الزم بقولها اقولها باسلوب لطيف
و قالو قبل : الي مبدي على نفسه من اهل النار
يعني اعطي بس مو لدرجة ادوس على نفسي بكل اختصار تعلمي تقولين لا و افهميها انها مو عيب انا مو ملزوم لا شرعا ولا عرفا اني اقول حاضر طيب ان شاء الله على طول الخط انا انسانه لي راي و لي مزاج و لي طاقه و قيسي على ذلك اذا تعبانه وقالك زوجك اكوي ثوبي قولي له تعبانه لا تنطرين ترتاحين الحمد لله كوي الثوب بريال قوليها و عوديه يكويه برا
اياك تعودين زوجك انك تسوين كل شي
اخذيها قاعده شرعا الزوجه بعقد الزواج مكتوب زوجه مو خدامه اذا اطبخت و اشتغلت و نظفت حمامات و رضعت هذا من باب المساعده و المروؤة
حتى الرضاعة بحاله الطلاق تاخذ عليها اجر تدرون هالشي؟
يعني لاتعلمين زوجك او عيالك انك تسوين لهم كل شي
علميهم يرتبون هدومهم و سريرهم اول ما يقعدون من النوم ما يطشرون ملابسهم بالارض
العيال استخدمي الحرمان معاهم يعني مو الطق
و الله اعجبتني تجربة واحده ولدها بالروضه عمره 3 او 4 عودته يلم العابه و ملابسه و يرتبها اتعبت صح كم يوم بس ارتاحت دوم
حتى زوجك علميه اسبوعيا مافيه طبخ بيوم من الايام تبينه خميس جمعه نص الاسبوع براحتك الله ما كثر مثل المطاعم بغض النظر موظفه او لا و الله احيانا سيدات البيوت يتعبون اكثر من الموظفه
الموظفه تتعب صحيح بس اغلب الوقت شغلها مكتبي لكن ربة البيت مثل النحله ما تقعد على حيلها ابد علميه انك مو آله و صحيح البعض بيزف او بيقط كم تعليق بايخ انتي طنشي مصيره يرضخ للامر الواقع و المثل المصري صدق لما قال زوجك على ما تعوديه و ابنك على ما تربيه
و الله شوف عيني رجال من معارفنا شكله ابضاي من ملوت سوريا جسم و طول و عرض و عصبي و كله يهاوش اعرفت له زوجته
جابت له ولد و بنت و تبي خدامه رغم ما عندها ذاك الشغل و هو مو قادر ماديا
تدرون شتسوي هو حرام الي تسويه لانه ظلم بس ابيكم تاخذون نظرية عوديه حتى لو هو عصبي بيتعود
قامت ما تطبخ الا عقب الظهر يعني ينطر للعصر راح للمطاعم مل تهاوش معاها كثير مل
بالاخير رضخ؟؟؟ هالجبل رضخ؟؟؟ بس هو رحيم ما يطقها
يمكن زوج ثاني يطق و الله اعلم يعني على حسب شخصية زوجك تعلمي كيف تعودينه
انا ضدها اكيد يعني ما عندك الا بزرين و شقه دارين و تتعنفقين لا تطبخين و تبين بعد شغاله هذي تبي واحد يرميها من الشباك بس ابيكم تفهمون شلون جرئتها حطتها غلط انتو تجرئو بس صح
يعني قريبتي صارت عجوز لانها ما عودت عيالها يشيلون حالهم الحين اتعبت ولا قامت تطبخ مثل اول تعودو على المطاعم او طبخ الشغاله
طيب المفروض من الاول تعودهم يوم او يومين بالاسبوع مطعم مايروح شبابها سدى مصيرهم بناتها لعيال الناس و اولادها خيرهم لبنات الناس كلامي واقعي ولا لا؟
يعني انا ضد الحرمه تكون شمعه تحترق من اجل الاخرين الي هم عيالها وزوجها
اعجبتني مقابله حرمة ناجحه قالت بما معناه انا عايشه عشان نفسي اولا ثم زوجي و عيالي
هذا الترتيب المفروض اغلب الحريم العربيات و خصوصا سيدات البيوت ترتيبهم بالعكس
الاولاد ثم الزوج ثم نفسي؟؟؟؟
بمعنى عادي بعض اجزاء البيت تكون غبره او معفسه مو مطلوب مني انظف و المع و امسح الغبار عن كل جزء من البيت و اذا زوجي نقد اقوله مو انت الرجا ل و الاعمال الصعبه لكم تفضل شمر عن كمومك ما اكتم بالحرات ارد عليه اول باول بس بادب و ذوق و دلع و نعومه اخلط بين الدفاشه و الرد الغير مباشر
7- جربي تردين الاساءة باحسان ادري صعب على النفس بس بالبداية جربيها مو شرط تقتنعين فيها و الله بتحسين باحلا شعور شعور يقولك الله تعالى يحبك لانك سويتي هلاشي عشانه مثلا حماتك( اخت زوجك بالخليجي مو بالمصري) ما زارتك بالمستشفى انتي زوريها اذا ارقدت فيه
8- تهادو تحابو هذي وصية المصطفى عليه السلام: بين كل فتره و الثانية اشتري لخالتك ام زوجك هدية : عطر بخور شيله عبايه مصلى ملفع صلاة سجاده مسبحه علك لين دراعه شنطه شحاطه صندل طبي ساعه بهورات حب ( فصفص) قهوه غالية هيل زعفران ترا العجز يحبون هالسوالف هذي ههه بتحبك غصبن عليها لو شوي حتى لو هي معاديتك على الاقل بيخف عدائهاا حبتين شر اهون من شرحسسيها بالشكر و بكذا بترضين الغالبيه بقدر الامكان و اولهم الله تعالى ثم نفسك لان بكره مرت ولدك بتسوي نفس ما تسوين بام زوجك كما تدين تدان ثم ترضين زوجك و ام و ابو زوجك و تكونين خوش ابنه باره لاهلك بيفتخرون فيك و ان تربيتهم انفعت وياك بعض الزوجات استغفر الله عليهم لسان شره مستطير لوهي على حق صراخ و سب ومالكم شغل فيني و احترمي نفسك تكلم خالتها ام زوجها كنها تتهاوش مع جارتها ولا بنت قدها يا حريم و يا بنات مهما كانت ام الزوج بينكم و بينها مشاكل او سوء تفاهم مو حلو السب و الشتايم و شيل الميانه و عدم الاحترام و عيالك يتفرجون عليكم و الله ناقصك ربطه تربطينها على خصرك و تردحين على مسرح ههههه و اعرفي ان الرابح الاكبر هم اعدائك الي ما يحبونك بيضحكون عليك و يحشونك عند معارفهم ما تستحي شلون تكلم خالتها هذي جزاتها اختارتها دون كل البنات لولدها وطبعا الناس لهم الظاهر غالبا ما يصفون مع العجايز ووكبار السن و بنات هالجيل قليلات ادب لكن الواحده تفكر لبعيد اذا تهاوشت علني بينها و بين خالتها او اخت زوجها لوهي على حق بتصير فيلم عربي لهم و يسمونها المهاوشجية و طبعا اخوان زوجها بيقولون لحريمهم الي هم بنات الناس لنتخيل خمس اخوان ماخذين من 5 عوايل يعني بتنفضح عند 5 عوايل و ال5 عوايل بيفضحونها عند غيرهم و هكذا و بتنفضح عند اخوات زوجها فرضا 4 ماخذين اربع رجال من 4 عوايل يعني بتنفضح عند 4 عوايل و بيفضحونها اكثر عند غيرهم هذي الحموله و مشاكلها حتى لو سكنتي بعيد فالذكيه تعرف البيئة الي هي ساكنه فيها احنا مو امريكا او الغرب الواحد ما يشوف اهله الا بالكريسماس احنا مجتمع متداخل صلة الرحم فيه حيل مهمه لذا السياسه الي المفروض تستخدمها دامها الطرف الاضعف الصبر و التطنيش كثر ما تقدرين طنشي و حاولي تدافعين عن حقوقك بكل ادب مو قبالهم عند زوجك اذا صرتو على مخده واحده
9- حطي قناعه بنفسك و حسيها بوجدانك: اي اناقه لي اولا هالوقت لي مو لغيري لروحك يعني تتجملين و تهتمين عشان روحك اولا ثم عشان زوجك لانه من حقه شرعا و عقلا يشوفك باحلاصوره ما يشم الا كل طيب منك مو تستقبلينه بريحة البصل و الثوم او بدراعه و لبس شايل عرقك او بلبس رضيعك مسعبل عليه و مبقع تعلمي السنع لما ترضعين حطي قطعه خصيصا تفرشينها على كتفك و صدرك تمص الحليب و السعابيل بالرضاعه كثري من الستيانات القطنية لانها بتمتلي و بتحتاجين كمية و اريح نوعية جربوها قريباتي ام 10 ريال كدي فيهم لين تقولين بس لكن يبون غسل يدوي لان الغساله تخربهم يعني مجرد تنقيع كم ساعه و عصرتين و شطفتين و شريهم
انا مو متزوجه و جربت الماركات ما ارتحت فيهم ما ارتحت الا بام 10 ريا ل و الله اريح و انعم حتى ما يخنقون المنطقه غالبا الماركات يكون فيهم حديد او مو مخصصين للبيت للطلعات
اكشخي عشان تستمتعين بالحياة وزوجك يستمتع معاك من جد مو يشوف المذيعات و يقارن و يلطم حظه ما اقولك صيري منيكان لكن نوعي و لوني بلبسك حتى لو لك كرش او زنود او مناطق مترهله ما يمنع الاناقه و الكشخه ومن حق عيالك يطالعون امهم بمنظر جميل مو يقربون منك يشمون ريحة العرق و البصل و سنون من يومين ما فرشتيهم يعني كومة .... متنقله مع احترامي للكل و الله بعض الحريم اشوفهم كذا ببيوتهم و بالطلعات منتهى الاناقه طيب تانقي ببيتك بعد وش الي يمنع ما تعودتي بسيطه تعودي
ومن حق بناتك يشوفونك مرتبه جميله ومومعنى الحرمه تكون معيله و مزحومه انها لازم تكون مبهذله و الله حرمه دايما تربط شعرها عود تطبخ طيب خلص الطبخ و اكلتو للحين رابطه شعرك ليه؟ و دراعه مبقوره و داخله يدة الباب فيها و شاقتها و للحين لابستها ههههه؟؟؟؟ يعني اذا ما رحمتي الدراعه و تخلصتي منها حولتيها لخرجه تبرعتي فيها اذا ما رحمتيها الحين متى بترحمينها؟؟
هالنوعية ناس عايشه مدري ببخل يعني حتى البعض بخلهم مو على سنع على هدايا الناس يكبون كب و لبسهم بالبيت يا ساتر و الله الشغاله ارتب منهم لا و لهم عين يلومون ازواجهم اذا اطفشو و صاحبو و خربطو؟؟؟؟
9- خلي بدولابك كم تايور بقياسين و بشرح لك ليش:قياسك العادي و قياس اذا خربطتي بالاكل و زدتي بالاكل او ولدتي او مرضتي او صار لك أي شي سمنك كم كيلوعشان اذا زدتي كم كيلو 3 او 4 تلبسين من القياس الكبير علما تسوين ريجيم و رياضه و تردين لمقاسك العادي يعني مو معقوله تحترمين من الاناقه و الكشخه و المتعه بالجمال بالدنيا بس لانك ماتنه كم كيلو مثل واحده احترمت الاناقه 9 شهور دايما تقول تغير مقاسي ماراح انزل السوق لين اضعف و لليوم ما اضعفت؟؟؟ طيب اشتري كم بدله على بجامه و خليهم بالدولاب كلما رجع المتن لك البسيهم يعني لاتلبسين خلاقين لانك متنتي كم كيلو تصيرين تحفه من القباحه لاتنطرين تضعفين عشان تكشخين اكشخي بكل حالاتك متينه ضعيفه معصبه راضيه لذا خلي قياسين وارتاحي
10- عيالك لا تتوقعين او تحاولين تجبرينهم يصيرون مثلك او مثل طباعك و مهاراتك: كل مولود و له فطرته الي فطرها الله تعالى عليه بكل شي من طباع و اهواء ومواهب و مزاج و ذوق لاتجبرينهم على شي الا لمصلحتهم و حاولي تقنعينهم بالحب و الرضا و السياسه والمنطق و الخوف عليهم بحب مو بهلع و بصراخ ، مو العصبيه يعني اخذيهم على قد عقلهم لوهم بالجامعه ترا النضج الواحد ما يوصل له الا بحدود ال30 ما تشوفون الانبياء لا يكلفون بالرساله الا اذا صار عمرهم 40 سنه بعض الامهات مافيها صبر على عيالها جننوني عذبوني اهلكوني و تتسبب لهم بمشكله بالثقه بالنفس و تحس انها ام مقصره ولا تعرف تربي و بالتالي تضعف ثقتها بنفسها هي لو تقرا و تطلع على كتاب يشرح المراحل العمرية للعيال و كيفية التعامل معاهم كان افهمتهم و ارتاحت ولا لامت نفسها لان عدوك ما تجهله بعض الامهات تلاحق عيالها الصغار اكل يا بن اللذين اكل راجعه تعبانه من الدوام لا تاذيني طيب اذا جاع كلش اكليه يعني مصيره بيجوع لا بعد و تطقه كف بس عشان يطيعها وش الفايده يشبع و رجولته و شوكته تنكسر ؟؟؟ يعني حتى الاكل الي اكلاه كيف بيستفيد منه و نفسيته عدم صراخ و ضرب و سباب لا بعد و تبي تثق بروحها و هذي سواياها بطفل لو تدعي له الله يسخرك الله يصلحك بدال الله يلعنك و يلعن امك ههه عندها الدعوه بالجمله الله يهديها ولا يبلانا
11- عيشي حياتك لنفسك اولا انتي بالبطاقه مو مكتوب زوجه او ام مكتوب اسمك يعني انتي انسانه فهل اشبعتي هالحاجه اولا؟؟؟ بعض الحريم و خصوصا الخليجيات والمصريات من ملاحظاتي يفنون حياتهم لازواجهم و لعيالهم و التجاعيد مكبرتها اكبر من سنها الحقيقي يعني وش الفرق بينك و بين الشغاله الي طول اليوم تكرف؟؟؟؟ عندها هوس البيت لازم يمشي مثل الساعه ما ترضى قطعة ملابس بسلة الغسيل حبيبتي اجل السله ليه مخترعينها ؟؟؟ عادي لو تجمع لبسك 5 ايام اسبوع عادي من الهوس و الشده على النفس لازم ما اصير كسلانه و تتذكر بيت فلانه شلون يبرق حبيبتي الناس مظاهر تعالي لها فجاه و شوفي حوستها الحوسه المعقوله امر طبيعي بس الواحده تضبط البيت تضبيطات خفيفه قبل لاتنام يعني ترتب الصاله الدور ترتيب سريع بعض الحريم تعطي و تعطي مثل المروحه شغاله و الله لا احد حاس فيها ولاشي كل لاهي بعمره محد بيخسر شبابه و صحته الا هي البنات مردهم لازواجهم و العيال لبنات الناس يعني الواحد يعطي بس بالمعقول الامام علي رضي الله عنه يقول من يعطي كثيرا يندم كثيرا او بما معناها
12- حطي لك جدول و امشي عليه قسمي وقتك مو كل يوم لازم طبخ او غسيل او تنظيف حمامات مافيها شي اذا كل 3 ايام الحمام تنظف الصاله دام العيال كبار كل يومين تنخم ريحي نفسك شوي مرق احيانا خليه حق يومين العشا سوي احيانا حق يومين لاتعودين اجسام عايلتك على طبخ بالغدا و بالعشا كذا المعده تتعب شوفي اجسام اهل الشام كيف صحية لان اغلب اكلهم خفايف بالصبح و بالعشا فقط الاطباق الي تبي طبخ بالغدا و اغلب سفرتهم زيتون و زيت زيتون و سلطات و خضره غيري نظام اكلكم لا تظلين بنفس عادات امك و المجتمع ريحي حالك و استخدمي التكنلوجيا عندك الغساله الاوتوماتيكية تعلمي عليها اذا راحت الشغاله تدربي على غسالة الصحون سوي موضوع بالنت و اخذي من خبرات البنات اشتري مكنسه و ممسحه مريحه يعني عيشي زمانك الدنيا كل يوم تتطور و تطلع اختراعات جديده و بعض الحريم و الله شوف عيني للحين على الغساله القديمه؟؟؟؟ الطبخ بقدر الضغط ياخذ بس نص الوقت تخيلي اللحمه نص ساعه و الدجاجه 12 دقيقه بس اذا حجمها اكبر تاخذ ربع او 17 دقيقه بس بعض الحريم يخافون ينفجر فيهم يا حبيبتي خوفك ماله داعي كل الدنيا تستخدم قدر الضغط ما صار لهم شي اقري اذكارك و سمي و توكلي على الله و خوفك بيروح شوي شوي
13- لاتسوين اشياء مو من مسؤوليتك: علمي عيالك من الصغر يرتبون سرايرهم يجيبون الملابس الوسخه و يخلون الملون بسلة الملون و الابيض بسلة الابيض و اذا اكبرو ملابس البنات تتوخر عن الاولاد كل ليله ونتو بكرامه العيال يطلعون زبالة غرفهم أي طبق شوكه ملعقه بدورهم يجيبونها للمطبخ و اذا مافي شغاله كل واحد يغسل لوازم اكله ملعقته صحنه و توابعه يحمدون الله الطبخ ينطبخ لهم
14- اذا مافي خدامه و اكبرو شوي يعني على 13 كل واحد يغسل ملابسه او كل مره دور واحد يغسل ملابس اثنين من اخوانه و البنات كل بنت تغسل ملابس بنتين بالدور و انتي عليك ملابسك و ملابس زوجك حتى الكوي كل واحد يكوي ثيابه بمكواة البيت سواء الكبس او البخار يعني حتى زوجك يكفيه و يخب عليه تغسلين ثوبه اعطيه للمغسله اقصاه بريال الكوي لا تهلكين روحك المره كلما اعتزت بروحها الرجال يحبها
بنات انا فصلت كثير ادري بموضوع الشكل و ادارة البيت و شلون الواحده ما تهلك روحها فيه بتقولون وش دخل ذا بالثقه بالنفس؟؟؟؟ لان الواثقه من روحها تعرف وش الي عليها ووش الي مو عليها تعرف الواجبات و تسويها و الزيادات الي مو مهم كل يوم تسويها الواثقه من روحها تبدأ ثقتها من البيت ثم للعالم الخارجي لان الي موواثقه بروحها و بادرتها للبيت ماراح تثق بروحها برا البيت عند الناس يمكن تفصيلي بادارة البيت عند الكثيرات عادي او مهم لكن الي يعانون من مشكلة بالثقه بالنفس هم الي محتاجينه و حاسين زين بكل حرف كتبته لان ادري فيهم مهما عطو يحسون بالتقصير
طرق العلاج من كتاب الدكتوره فوزية هناك 34 طريقة للعلاج و ابحث عن الطريقه الي تناسبك
بس بركز بالطريقه الاولى لاني اعتقد انها الاساس لان البرمجه تعتمد عليها
1- افهم افكارك بشرح بايجاز بعض النقاط يعني الكتاب ضروري يا بنات جدا مفيد يعلمك ليه تحسين بالنقص و الدونية طبعا الثقه بالنفس تجي من الداخل اساسا لكن الظروف الخارجية تاثر ايضا لكن ما يمنع ان الكثيرين يتعرضون لضغط سلبي وع ذلك رافعين الراس هذولي خلقة ماشاء الله مثل الجبل غالب الناس تتاثر سلبا فالظروف الخارجية مو بيدنا لان مو شغلنا نصلح غيرنا احنا بنشتغل على الداخل نبي نغير الافكار لان الثقه هي من الافكار و تتاثر خارجيا فذا خارجيا مو بيدنا خل نشتغل على الي بيدنا هي الافكار الي تدور براسنا اوكي يالله نحلل افكارنا و شلون نقودها صح الافكار مثل الاله و اذا فهمنا الاله كيف تشتغل و درسنا كتالوج تشغيل الاله راح نعرف كيف نسيطر على افكارنا و الاله الثانية الي لازم نعرفها هي العقل الباطن الموجه الرئيسي لكل شي نسويه لانه مخزن الذكريات بنقل لكم الفقره بالضبط ( و بحذف كم عباره لانها مكرره) و الله يعيني
:ص 98
ان انعدام الثقه بالنفس هو تجاوب مع تراكمات سلبيه متراكمه مبرمجه في اللاشعور و نحن نحتاج ان نعيد تسجيل اللاشعور نحتاج ان نعيد التسجيل على شريط الفيديو القديم نمحو السلبي و نضع الايجابي بدلا عنه لذا نحن بحاجه لفهم فصي المخ الايمن و الايسر و سنركز على ما يهمنا فقط المخ الايسر يعمل على بناء على ترابط امور من الماضي و المخ الايمن مرتبط بالفطره و بناء عليه نحن نستطيع ان نغير عقلنا و نبرمجه بتعمد اختيار افكار ايجابيه و المخ الي يخزن تجارب سلبيه قد يصر عليها و يقنع الانسان عليها ( مني: مثل شريط المسجل الي مسجله فيه أي شي كلما شغلتيه يطلع لك نفس الموضوع مراح يتغير الا اذا سجلتي عليه ثاني لاني قارية ان العقل اللاواعي ما يفهم شي يسجل أي شي حتى لو معلومه غلط مثل الكمبيوتر ما يفهم شي احنا الي نبرمجه لذلك هو لاواعي) ان العقل اللا واعي و التابع لفص المخ الايسر لديه طرق حتى يثبت انه صح وهو يريد من الانسان ان يظل يسير بذكريات الماضي المزعجه( مني: عشان كذا كثير ناس يعانون بسالفة الثقه يقولون حاولنا ما قدرنا لانهم ما غيرو البرمجه ما تزال برمجة الماضي الاليم على شريط اللاوعي كل الي عليكم تحطون افكار ايجابيه و جايه لها ان شاء الله) فمثلا حين يفشل الانسان و يقول لااستطيع تصله رساله من المخ الايسر من العقل اللاواعي تقول له الم اقل لك انك لاتستطيع ان فهم مخزون المخ الايسر أي العقل اللاوعي فهم الافكار و المعتقدات و علاقتها باضعاف الذات مساله ضرورية ان الشخص بحاجه الى ان يقوم بنفسه او بمساعدة المعالج بما يلي:\
1- رصد المواقف الي تهتز فيها الثقه بالنفس و ذلك بكتابة الموقف و الاحاسيس المصاحبه او الناتجه من الموقف ( يعني متى تحسين بالمشكله جت احساسك بالنقص و الدونية متى باي موقف مهما كان سخيف بنظر البعض) و خاصة رصد تلك الجمل و الكلمات التي تتكرر و التي يمكن تسميتها ( جمل الطقوس) لانها مثل الطقوس التي تحضر في أي موقف ثقه بالنفس ( مني: انتي زوجه فاشله يا بقره كم مره افهمك يا بنت لمتى ما تتعلمين شوفي اختك شوفي بنت عمك يا ثور كم مره تسقط شف عيال عمك شف عيال جارنا واذا هو كبير هم طلقت الاولى ما حبيتها الثانية وش عيبها بعد؟ و اذا تطلقت الواحده لوك زوجه شاطره ما تطلقتي انتي فاشله يعني مشكلة الثقه بالنفس انا استغربت من الكتاب ممكن تجي على كبر؟؟؟)
2- التعامل مع الافكار السلبيه بجمله من التساؤلات لتشخيص هذه الافكار مثل ص 99
ما الدليل؟ حيث حين تاتيك الفكره تسال نفسك هل انا متشوشر بين الحقيقه و الفكره؟ ما حقيقة ما اعتقد عن نفسي ايجابيا او سلبيا؟ ما تاثير ما افكر فيه علي؟ هل هذه الافكار تساعدني ام تعيقيني؟ ماهو الشي الاخر الاكثر مساعده لي بدلا من هذه الافكار؟ ماهو اساس تفكيري عن نفسي؟ هل انا اتسرع للخاتمه و النهاية و اقيم نفسي بدون تروي؟ هل استخدام معايير مزدوجه مع نفسي في ذات الموقف اراه بصورتين عني ( مثلا مره اشوف روحي تصرفت صح ومره غلط) هل استخدم اسلوب كل شي او لاشي فلا اعطي نفسي دفعه ايجابيه لبعض الامور الصح و هذي شرحتها بالتفصيل الحمد لله هل اركز فقط على نقاط ضعفي دون قويتي( و اعتقد هذا حال الاغلبيه يشوفون اللون الغامق الكئيب من الصوره الحلوه) هل الوم نفسي على امور بالحقيقه هي ليست من اخطائي؟ هل اتوقع من نفسي ان اكون انسانا مثاليا جدا؟ ماذا يمكنني ان افعل؟ كيف اضع افكارا جديده قيد التطبيق بدلا من السلبيه؟ هل هناك ما يمكنني عمله حتى اغير الاوضاع حولي او اغير اوضاع افكاري؟ كيف اتصرف بسلوك غير انهزامي؟
ص100
3- مواجهة التفكير السلبي بتوكيد ايجابي في نقطة 2 الامر كان فيه اشبه بتشخيص الافكار في هذه النقطه على المعاني من ازمة الثقه بالنفس ان يتعامل مع ما تم تشخيصه بطريقة مواجهة التفكير السلبي بعكسه من توكيدات ايجابيه مثل التالي:
هذه سموم يجب ان اوقفها عن اذيتي
هذه اكاذيب يجب ان لا اصدقها عن نفسي
هذه ليست حقائق عني و لكنها و جهة نظر ابي ( او غيره) عني
انا انسان من حقي ان اعيش
انا انسان من حقي ان لا اشعر بالالم
انا انسان من حقي ان اشعر بقيمتي
تعليقاتي على بعض فقرات الدكتوره فوزية الدريع
ص 100، 101،،102: : بعض الناس ينقدون روحهم باستمرار و يوصلون لمرحلة قلة الثقه بالنفس وانا اخالف الدكتوره فوزية بنقطة انعدام الثقه بالنفس ما اعتقد فيه شخص معدوم الثقه، الاشخاص الي يوصلون لمشكلة بالثقه بالنفس بعضهم كل شي زين بحياتهم حتى هم انفسهم مو عارفين ليش يحسون بالنقص ؟؟؟ و السبب بعضهم تربو على كذا يعني اطلعو للدنيا و شافو احد او كلا والدينهم ينقد ذاته كثير فصارو كذا التربيه لها دور لان بعض الاشياء تصير مثل العدوى و الطفل يشوف سلوك الكبار خصوصا الوالدين و يحسب ان هذا الصح بحكم انهم اكبر و افهم منه فطلع الواحد يطبع بطبع والدينه من غير لا يدري كله من الاشعور ملعون شيطانه ههههه ( يعني مسجله الداخلي اللاوعي يسجل اي شي صح او خطا و يحسبه كذا)
بعض اسباب النقد الذاتي ( التحطيم والجلد المستمر للذات)
النقطه5 ص 103 هل هذا النقد الذاتي الذي اشبه بالجلد هو اسلوب لجعل الشخص لايتوقف و يرضى عن نفسه بل يستمر في بذل مجهود لعمل الافضل: بعض الناس ما يحس بالانجاز الا اذا نقد نفسه مثلا انا شفيني صاير لي كم يوم اقعد متاخر؟؟؟فتقول حق روحها: و الله انا كسلانه وين فلانه الشاطره ووين انا و تقعد تقارن و تحطم روحها بس عشان كم ساعه تاخرتهم بالنوم
و احيانا يكون عندها عذر و لدها مريض او صار لها ظرف طارئ و اسهرت عشانه فشتسوي عشان تثبت لروحها انها شاطره تقعد بكره بدري و تقول حق روحها طبعا لاشعوريا : ايه انا تسنعت و تعدلت لاني نقدت نفسي فصار مثل الاشتراط بالمخ
عشان انجز لازم انقد قبل مع ان ظرفها عادي يمر مع الكل
مثال 2: شرت لعيالها ملابس العيد من سيتي ماكس مثلا و معجبه فيهم مره يوم زارت حمولتها و كل الناس كاشخه بالعيد شافت عيال سلفتها ملابسهم اكشخ تقعد تنقد روحها: ليش اشتري من سيتي ماكس المفروض اروح لماركات ارقى و اغلا مو محل اسعاره عادية
ويجي العيد ال2 و تشتري لهم ماركات مره غالية بس عشان تحس بالانجاز و هي ما تدري اصلا سلفتها منين شارية الهدوم يمكن من المولات الشعبية الي يبيعون ستوكات الماركات ؟؟؟؟ الثانية تصرفت بذكاء ماهمها الماده كثر الاناقه
فالاولى تعودت على نقد روحها بس عشان تحس بالانجاز تصغر روحها مهما انجحت لازم تطلع عذروب باي شي حلو باي نجاح تسويه عندها جلد الذات هي وسيلة التقدم طبعا المفر وض تبرمج روحها صح و تقول: الحمد لله عيالي كشخه الله يخلي لنا سيتي ماكس و يكثر من امثاله مالنا غناة عنه كشخه و بسعر معقول و العيد الجاي ان شاء الله عيالي بيكونون احلا و ارقى عاد مو كلا سيتي ماكس الواحد ينوع شوي او تقول: مو مهم الماركه و السعر المهم الذوق و عيالي كشخه و اذا لقيت شي اكشخ عند سيتي ماكس ماني مغيرته
يعني اذا بتغير تبرمج روحها من باب عدم التعود على نفس المحل مو باب النقد
هذا الفرق بين الحرمه الايجابيه الي تبرمج روحها صح و بين السلبيه الي دوم غرقانه بدوامة المقارنات الي تعرف ان الاناقه مالها علاقه بالسعر و نوع الماركه و هذا الشي نشوفه كلنا بالاسواق فستان تركي مثلا احلا من ايطالي الاناقه ذوق و ترتيب و تناسق بالالوان وموديلات تناسب قصة الجسم والوان تناسب لون البشره مالها شغل بالماده
بعض الحريم عندهم قاعده مدري اذا هي تدل على مشكله بالثقه: الغالي هو الزين شي سعره معقول او رخيص نفسها تعوفه؟؟؟؟
هالكلام نوعا ما صحيح بس مو بكل شي خصوصا بالملابس و السوق كل يوم طالعه فيه ماركات جديده و بكل الاسعار الحين زمن الكل يقدر يكشخ حتى الفقراء وياما لبسنا ملابس حلوه و كشخه و باسعار معقوله و ياما شرينا ماركات و تغيرت اوزانا و للحين ما حللنا سعرها يعني الي هوسهم السعر هل الناس بتسالك عن بطاقة الفستان؟؟؟؟
من صور الي تعاني من مشكلة بالثقه بالنفس: اذا هي غضبانه من احد بدال لاتزف و تطلع حرتها او تقول ليش وتناقش و تصب غضبها على روحها و تجلد ذاتها المهم تلقى احد تحط الحره فيه و اقرب شي نفسها
من ادوات النقد الذاتي ( بعضها لانها كثيره)
ص 104:شرح مثال للتفكير الثنائي المتطرف
اما اكون الاولى او انا فاشله و قيسو عليهابمعنى اما هذا الامر او لا يعني الحياة بالنقطه هذي عندهم يا ابيض او اسود يا اتزوج رجل فيه كل شروطي اولا مافي حلول وسط رغم ان بين الابيض و الاسود مئات التدرجات مثلا ابي كلية معينه و نسبتي ما ساعدت و دخلت الخيار الثاني بس مو سعيده ليه لانها حاطه ببالها سعادتها بس بالتخصص الي تبيه و ما تدري لعلها خيره
مثال ثاني: اما اطبخ احسن واحده و الكل يشيد بطبخي او ما اعرف اطبخ اما اكون اكشخ السلفات او الكناين او انا مو كشخه اما عيالي اشطر من عيال العايله كلها او انا ام مهمله و قيسو على ذلك اما الي ببالي يصير او انتعس نسو الخيره فيما اختراه الله و الناس قدرات متفاوته نسو الرضا و قولة الحمد لله غيرهم هلكان و هم يتبطرون على النعمه
ص 105: المركزية الذاتية: الكون كله يدور حوله و يراقب حركاته
و هذه حالة الكثيرات يا عيني عليهم لااراديا الله يشافيهم اذا راحو مثلا حفله يحسون انهم مركز الكون كل الي على الطاولات يخزونها شافت ثنتين يتساسرون ايه يقصدوني ادري فيهم ما يحبوني شافت واحده تضحك و تنزل راسها قالت ايه تضحك على كرشي صار لي شهرين مخبصه بالاكل طاح حظي هذا الي ما يهتم لاكله كل لفته كل تعليق تحسبه عليها ما تدري هي وين و هم وين الله يعينها
طيب و العلاج الحل وشو؟
تابعوني ان شاء الله بالجزء 2 والاخير
لانه طويل و يبي مخمخة و بعيد قراءة هالجزء من الكتاب و ببسطه باسلوبي الي اتعمد يكون شعبي حتى الكل يفهمه و لا اريد الا الدعاء بالتوفيق و يوفقني الله تعالى واختي واخواني و الصالحين و الصالحات بالازواج الصالحين و الوظايف الرسمية الصالحه و الذرية و الحموله الصالحه و يعافي الجميع يارب
على فكره: الدكتوره تحضر لكتاب رايك فيني لا يعنيني ان شاء الله نطيح عليه
19
24K
يلزم عليك تسجيل الدخول أولًا لكتابة تعليق.
موضوعك يجننننننننن حلووووو مآآآره ياليت يخلونه من المواضيع المتميزة
آشكرك ع جهدك وربي يكتب لك الأجر.. أنا بالنسبة لي آحب أحد يتكلم معي بدي الأشياء
لكن حظي تعييييس وما لقيت صحبات يونسوني .......لكن حبدأ بنفسي و حاصير أحسن باذن الله...
حاخد شور وحرجع آآكمل ^v^
آشكرك ع جهدك وربي يكتب لك الأجر.. أنا بالنسبة لي آحب أحد يتكلم معي بدي الأشياء
لكن حظي تعييييس وما لقيت صحبات يونسوني .......لكن حبدأ بنفسي و حاصير أحسن باذن الله...
حاخد شور وحرجع آآكمل ^v^
الصفحة الأخيرة
لي رجعه اكمل قراءته ..
الله يجزاكي خير