السلام عليكم ورحمة الله وبركاته
دائم أقرأ مواضيع لبنات يسألون عن المدينة الطبية فقلت ان شاء الله بس أولد بذكر تجربتي فيها أنا أعاني من اجهاضات متكررة وأتابع مع الاستشاري مأمون العوض وكان أكثر من رائع وباله طويييييييييييل وهو استشاري في الاسقاطات المتكررة وعنده دائما زحمة وكان انتظار المواعيد يأخذ وقت طويل عنده وبصراحة مرة منظمين في المواعيد والفحوصات للحامل من وزن وضغط وبول بفضل من الله وحده والمداومة على شرب ماء مقري فيه وصلت للشهر التاسع اللي كان بالنسبة لي حلم وكملت الشهر التاسع ووصلت للعاشر قرروا تنويم لطلق الصناعي رحت لموعدي يوم الثلاثاء وتنومت طبعا البداية ماكان فيه سرير بالقسم المخصص للطلق الصناعي وحطوني بغرفة فيها 4سراير وعملوا لي تخطيط وكانوا مهتمين والممرضات هنا مرة طيبات وكويسات وعلى الساعة 7ونص بالليل نقلوني لقسم الطلق الصناعي وكان وقتها زيااارة غرفة فيها 4 سراير وفيها 3 حوامل وأنا الرابعة وعلى الساعة 10 قالوا الممرضات بتجي الدكتورة حنان (هذي دكتورة مصرية أغلب وقتها بالطواري وبصراحة مرة ممتازة وحنونة وحتى بالكشف تراعي النفسية ويدها خفيفة الله يسعدها ويوفقها وين ماراحت)قالت الرحم مفتوح عندي وماأحتاج تجميلة أما اللي معاي بالغرفة حطت لهم وراحت طبعا قالت لي اتمشى بالسيب وهو قسم مستقل بس الحمامات :09:قرف مافيه نظافة بهذا القسم والله أسد خشمي لما أدخل الواحد مضطر ماادري ليه بعض الحريم ماتحافظ على نظافة المكان لما تطلع من بيتها من جد عيب الممرضات بهذا القسم هنديات وبصراحة من تجربتي مرة طيبات وكويسات المهم لما جت الساعة 3 بالضبط الفجر انسدحت أبي انام الا المية تنزل علي ولما قلت للممرضات ركبوا لي جهاز التخطيط وقتها سبحان الله بدأ الطلق وقاست لي الممرضة لقته من 4 الى 5 والله يدها مرة خفيفة وجهزوني عشان أطلع لغرفة الولادة ولبسوني عباتي وجابوا الكرسي وطلعت .
قسم الولادة مستقل وهادي دخلوني غرفة كبيرة ومرتبة ونظيفة ولحالك وفيه ممرضة عندي بس سبحان الله شكلها غيرمريح وهي فلبينية بدأ الجد والله يابنات من الساعة 3 الى الساعة 6 وأنا بموت من الطلق ولا عطوني مسكن ولا شي وأنا أترجاها تنادي الدكتورة وهي قاعدة تكتب بالأوراق اللي لو هي رواية كانت خلصت ولا كأن فيه جنبها وحدها تتألم أشد الالم وأقسم بالله حتى صوتي راااح وعلى أخر مناوبتها مرت الدكتورة وكانت سورية اسمها لينا متنقبة وتقعد تهزأ فيها تقول هذي بكرية ليش تتركونها تتعذب كل هذا الوقت بدون مسكن والخايسة الممرضة تعطيني كمام فاضي مافيه شي حسبي الله عليها وين ماراحت وطلعت الدكتورة وأنا والله تمنيت الموت من الألم وعلى الساعة 7 بدأت المناوبة الجديدة جت ممرضة هندية الله يسعدها ويرزقها بغير حساب تمسح على رأسي وواقفة طول الوقت جنبي ولما وصل الرحم 10 سانتي جت دكتورة صغيرة والله مدري وش اسمها وجهها يفتح النفس سعودية وتحاول كل ماجت طلقة ادفع بس مافيه فايدة وبالأخير نادت استشاري سعودي وواحد سوري وأنا أعطوني ابرة بالعضل تدوخك بس تحسين بالألم ويحاولون وأخيرا طلع البيبي عالساعة 8ونص صباحا يوم الاربعاء بتاريخ 2/5/1432 وبدأت الدكتورة تخيط بس بصراحة خياطتها مش ولابد والزوج عادي يدخل مع زوجته بغرفة الولادة بعد مانظفوني طلعوني للتنويم تخيلي وانت تعبانة يجيبون البيبي عندك ولاياخذونه ابد وانت ترضعينه من صدرك فيه حليب والا لا ماعليهم منك حتى بالليل والحمامات واااع .
ختاما :
الكادر الطبي كويسين التمريض بالتنويم زفت النظافة سيئة بغرف التنويم مايعطونك ولا شي للخياط ولا أحد يشيك عليها قبل الخروج الملف يقفلونه بمجرد خروجك
ماأفكر أعيد تجربة الولادة عندهم أبد
الله يرزق كل من تتمنى طفل ولا يحرمها من كلمة ماما
هذي تجربتي يمكن تفيد وحدة منكم
الحمدلله على كل شي
املي كبير @amly_kbyr_1
عضوة فعالة
يلزم عليك تسجيل الدخول أولًا لكتابة تعليق.
الف الف مبرووووووووووووك عطيتيني معلومات مره افادتني الله يجزاك خير انا اول موعد لي عند الدكتور مأمون الشهر الجاي ............وبسألك سؤال علاجه كويس بتثبيت الحمل ونتي حامل مانوموك عندهم ابد تخوفن من الأجهاض؟
الصفحة الأخيرة
الحمدلله على سلامتك انتي والبيبي