طفلي شاف مقاطع إباحية كيف أتعامل معه ؟

ولدي مثله مثل أي طفل يعيش "للأسف " في عصر ثورة التكنلوجيا ، وبحكم إن عيال عمته أخذوا لهم أجهزة آيبود فقام أبوه أخذ له بالرغم من اعتراضي الشديد فمن وجهة نظري ان مو شرط نتبع العصر بكل رياحه العنيفة ، عندي قناعة ما ألبس ولا ألبّس عيالي إلا الشي اللي أنا مقتنعة فيه ، ورغم إن الكثير حولي مدخلين اولادهم مدارس اجنبية عشان يتعلموا انجليزي ويشوفها مفخرة الا اني اصريت ان عيالي يكونوا في مدرسة تحفيظ القرآن ، وغير كذا المبادئ اللي أحب ازرعها فيهم عن حب الله وإن الرسول قدوتنا ، لاني أم ومسؤولة عن كل شي يتعلموه وبتحاسب أمام ربي ، ورغم عني إمتلك الايبود واول يوم اخذته منه قفلت تطبيق اليوتيوب من الاعدادات وفعّلت الوضع الامن في صفحة اليويتيوب من المتصفّح وكل فترة اشيك على جهازه واعطيه فترات معينة في اليوم ، إلا إنه ومع الوقت صار يفهم كل صغيرة وكبيرة في الايبود وثار يفهم ان الكل معهم يوتيوب الا هو وكلما يسألني ليش اتهرب من الاجابة او اقول له افتحه من المتصفح بس ما كان يقتنع وظل يبحث حتى اكتشف مكان فتح التطبيق وفتحه ، وانا بصراحة خليته لاني كلما اشيك عليه ألقاه يشوف مغامرات او أخليه يراجع حفظ القرآن من قناة سمسم في اليوتيوب ولكن اليوم تفاجأت لما قلت له يا ولدي راجع حفظك وبعدين إلعب براحتك واخذت منه الجهاز عشان اكتب في البحث اسم السورة تفاجأت بأني لقيته كاتب " خرا حريم " وانتم بكرامة وشفت المحفوظات وشفت صور مقاطع الفيديو اللي شافها ، شي ما اقدر اتخيله ، شاف عراه وشاف مقاطع إباحية واشياء يندى لها الجبين ، صُعقت وتمنيت الارض تنشق وتبلعني ولا اعرف ان طفلي انتهت طفولته طفلي انتهت براءته ، طفلي ماعاد طفل ، هذا اخر حرصي عليه وعلى تربيته ، ليش سوى كذا هل هو،فضول هل هذا الشي طبيعي ؟ ماني عارفة ، محتارة ما اعرف اقول لمين ، لاني انا وانا امه احس اني كرهته احس بحقد لما اطالع في عيونه احساس غريب اول مرة احسه ، ضيق وكآبة ، يالله ساعدني ولدي عمره يا دوب كمل سبع سنوات ، ماني عارفو كيف اتصرف وما ابغى اقول لابوه اخاف يتعامل معاه بشكل قاسي وما يفيد شي :(