طريقة عمل المسخن الفلسطيني على اصوله

اليوم بدي اكتبلكم طريقتي في عمل المسخن الفلسطيني على اصوله

اولا بنجيب طنجرة او قدر بنحط فيه شوية زيت و بصلة كبيرة مفرومة و شوية توم و حبة هيل وورق غار و شوية بهار عادي و فلفل اسود و بنقلبهم مع بعض لمدة دقيقتين او تلات و بعدها بنحط قطع الدجاج عليهم و بنقلبهم مع بعض لمدة 7 دقائق و بعدها بنحط مي غمرتهم و زيادة و لما تغلي المي بنوطي النار و بنغطي القدر
و بنخليهم لما تستوي الجاجة
خلال هاي الفترة بنجيب 5-6 حبات بصل بنفرمه ناعم و بنجيب قدر بنحط فيه زيت زيتون حوالي كوب واحد و بنحط فيه البصل و بنضل نقلب فيهم لحتى يستوي البصل منيح و بنحط عليهم سماق و شوية ملح و بنحط من ماء سلق الدجاج عليهم و لما يستوي البصل و يجهز بنطفي النار عليهم
بعديها بنجيب خبز صاج عربي يعني خبز كبير و بنحط عليه زيت و بصل من اللي طبخناهم و بنرش عليهم كمية كبيرة من السماق و بنحط عليهم كمية من اللوز المقلي و الكاجو
و بنحط اخر اشي على الخبز قطع الدجاج المطبوخة بعد ما نبهرها و نحمرها بالفرن
و صحة و هنا