ازيكم اخواتى يارب تكونوا كلكم بخير
النهاردة جيبالكم طريقة عمل القرص الطرية بس بعجينة ذهبية
بمعنى ان العجينة دى تنفع عيش كيزر لو عجنتيه بميه
و هتلاقيه فى اللينك دة
عيش القرص الطرى **الكل افتكروه جــــــاهـــــز .... و طبعا بالصور
**اما لو عجنتيها باللبن الرايب تبقى قرص طريه و هشه و ريحتها و طعمها روووووووووووووعة
و احب اخص بالشكر فى بدايه موضوعى ولادى حبايب قلبى يحيى
و مازن اللى بجد بجد ساعدونى مساعدة
جباااااااااارة لدرجة انى كان فاضل شوية و اصرخ باعلى صوت و الم الحى كله عليا
ااااااااااااااقصد ازرغد باعلى صوت من فرحتى اوعوا تفتكروا انى كنت هفرقع و لا كنت بزعق و لا حاجة
لالالالالالالالالالالالالا انا كنت بس عامله كدا بس :huh: :icon33: هههههههههههه
يالا بينا نبتدى بسم الله
المقادير مفيش ابسط من كدا
4 كوب دقيق
ربع كوب زيت
3 معالق سكر+ معلقة كبيرة للخميرة جافه
او
قطعة خميرة فى حجم الليمونه
ربع كوب ماء دافئ لذوبان الخميرة
كوب لبن رايب دافئ او زبادى( ممكن يزيد او يقل على حسب
نوع الدقيق)
نص معلقة صغيرة ملح
الحشو : انا حشيت هنا عجوة من تمر قديم كان عندى من شهر رمضان و طريقته
انى غليت شويه ميه و نقعت فيهم التمر حوالى ساعة او ساعتين لحد ما التمر يكون طرى و بعدين فصصته
و حطيته فى الكبه شويه يتفرم و بعدين حطيته على النار بمعلقة سمنة كبيرة و معلقة صغيرة قرفة و معلقتين
كبار سكر و ربع كوب ماء و قلتبهم لحد ما بدات تبقى طريه
الطريقة
** هندوب الاول الخميرة مع السكر مع الميه الدافيه و نغطيهم لحد ما نحضر باقى حاجتنا
** هننخل الدقيق طبعا و هنحط عليه الملح و السكر و اللخميرة و الزيت و اللبن الرايب و نعجن كويس
حوالى 10 دقايق و بعدين هنحط شويه زيت صغيرين فى ايدينا و نبدا نلم العجينة و نغطيها عشان تخمر
** انا سبتها تخمر فى الجو البارد حوالى ساعة و نص اما الجو الحر حوالى ساعة
** و بعدبن قرصتها كور صغيرة بالشكل ده
** و جبت صوانى مدهونة زيت و بعدين اخدت و بدات باول كورة قرصتها عملت سادة و عملت محشية عجوة
و لمتها و ضغت عليها بايدى خفيف بالشكل ده
** بعدين سبتها تخمر ساعتين فى البرد ده لكن فى الصيف كفايه ساعة واحدة
** و بعدين شغلت الفرن حوالى 10 دقايق و خبزتها على نار اعلى من المتوسطة بقليل
** و اول ما تطلع من الفرن علاطول اغطيها بقماشة او بفوطة نظيفة عشان تفضل طريه
شوفوا ما شاء الله اد ايه هشة
و دوقى احلى قرص طرية و ادعى لاختك ام يحيى و مازن
فى رعاية الله و حفظه اخواتى