تزوج علي وقال شوفي حياتك وانا مدري وش اسوي

السلام عليكم
بنات انا مدري كيف اوصف وضعي
حزينة وسعيدة في نفس الوقت احمدالله ع نعمتة واسأل الله الفرج
قلت افضفض لكم يمكن تخففون عني شي مما اعاني
وتشورون علي او توعوني وتنصحوني بشي اقدر اسويه

انا في بداية زواجي عشت اجمل اوقات الحب مع زوجي اللي عمره الحين 43 سنة
كان يحبني ومايرضى علي الزعل
انا حاليا عمري 37 سنة عندي 5 ابناء

قبل اكثر من خمس سنين زوجي تزوج غيري وحده عمرها الحين بحدود 45 سنة او اكثر جابت له ولد وبنت ووصلت سن اليأس محد خذاه غيرها رغم انه كان يتمنى وحده صغيره يعشق النساء بصورة خيالية

في بداية زواجه يحاول يرضيني ويبين مدى حبه لي
وانا اصلا متمسكه فيه مايمكن اضيع نفسي وعيالي
استسلمت رغم اني عانيت الكثير من المواقف
اذا كلمته وهو عند زوجته جلس يصارخ علي ويسترجل وهي ماعمره صارخ عليها عندي يخاف على مشاعرها اكثر من خوفه على مشاعري هذا اللي يتضح لي

انا في البداية صبرت اقول مابي ارجع لاهلي واشمت الاعداء فيني وفي اهلي

مع العلم انه مايعدل يمشيها ويروح بها معه لمشاويره وسافر بها كم مره وانا لا
كل هذي الامور اكتشفتها من اهله يحبوني الحمدلله اكثر منها
ودي اوضح لكم الصورة اكثر
زوجي طبيب فاهم ذكي حازم لو اذرف من الدموع محيطات ما اهز فيه شعره
يهتم بعياله ويقوم بشئونهم ومايقصر على البيت شي بس عيبه مايعدل ومايهتم في مشاعري او بالاصح احس انه مايحبني

يوم طلبت منه يعدل ويخاف ربه قال لي اذا منتي راضيه بوضعك اطلقك وشوفي حياتك احسبه يمزح
قلت له طلقني
والصدمة انه ماحاول يراضيني طلقني بكل سهولة

بكيت وحزنت وانطويت على نفسي خواتي وامي يصبروني وانا ماني قادرة اندمج في حياتي ومابي عيالي يحسون بشي

ماتصدقون الدرجة اللي وصلوا لها عيالي لأنهم مايطلعون مايعرفون البر والا البحر
مره سمعوني اقول اختي عيالها راحوا بها تمشيه عند البحر
قال لي ولدي كيف راحوا للبحر عندهم سفينه!!!!!

حياة عيالي من البيت للمدرسة ومن المدرسة للبيت ومن البيت لاهلي او اهل زوجي
احيانا احاول فيه يوصلنا لمنتزه او للسوق ابيه بس ينزلنا ويرجع لنا احيان يوافق واحيان اكثر يرفض

بقول لكم بعض الامور المهمة
اهلي الحمدلله يحبوني جدا وقدري فوق روسهم لكن مايتحملون عيالي ولايهتمون فيهم
بالنسبة لي شكلي اصغر من عمري بكثير بتقولون هذي من كذبات الحريم لاوالله ربي يشهد محد يصدق عمري
وبالنسبة لجمالي مبهر مو انا اللي اقول عن نفسي كذا هذي شهادة اللي حولي
وبالنسبة لاهتمامي بنفسي توب حتى هو يقول اهتمامك بنفسك لايعلى عليه
اقول كذا بس عشان ماترجعون السبب لتقصيري


المهم نرجع لسالفتنا بعد ماطلقني قبل تخلص العده ارسلت له قلت راجعني عشان العيال لكن مابيننا تواصل ولا لك علي فراش ووافق وراجعني
لكن العجيب انه
صار يجينا يوم ورى يوم زي قبل ويصير بيننا كل شي بس مايعدل بالطلعات وبالمشاعر
وانا مابيه وابيه مدري كيف اعرف مشاعري الحقيقية اذا تأخر ضاق صدري واذا جا تألمت انه مايعدل واني هنت عليه
المشكلة اني اخاف منه واحترمه واستحي اقول له مشاعري ولو اني في داخلي اغلي مع العلم ان شخصيتي قوية جدا مع كل الناس الا هو ما اقدر اطلع مشاعري عنده لأنه يحاسبني على كل شي اقوله او اسويه وماينسى

ولازلت اشعر بقهرررر اخواتي يحرضوني يقولون يمكن زوجته ساحرته وانا اقول من قبل لايتزوجها وهو مايهتم بي ولا بمشاعري ولايطلعنا ويمشور ماطلعت المشاعر والطلعات الا معها

افتوني ان كنتم للمشاكل تحلون
واللي يسعد ايامكم مابي احد يزيد جراحي