مرحبا... تجر لكم مسهلا ... تضرب لكم تحية
هناك مويضيع أفكر فيه منذو مبطي
ألا وهو النجار وبابه المخلع
شوفوا
لو وحده سمينه وتبي تروح لأخصائية تغذيه ولقت الأخصائية أكثر سمنة منها
تهقون راح تتقبل كلامها لو عندها خمس شهادات
وإلا تقول بنفسها كان نفعت نفسها أول
\\
وحده دايم تتهاوش مع رجلها وخلاص ملت مهي عارفة الحل .. وصارت تستشير اللي يسوى واللي مايسوى
تنصحها أخت جارتها وتقول لها قولي له ... فهميه ... وأخت ها الجارة مشاكلها مع زوجها واصلة للحي البعيد
تتوقعون إن صاحبتنا ذات المشكلة الزوجية راح تأخذ كلامها ... وإلا تقول بنفسها علمي نفسك وكان حليتي أمورك
\\
فهمتوني صح
طيب أنا عندي فكره
شرايكم كل وحده منا تشيل معها مراية
ايه مراية ... مقعرة مدري محدبه المهم ماتكون العادية >> لا تكون اللي تكبر الشيء
مو شغلتي الفيزياء
المهم
ونخليها دايم معنا
وأي مكان نروح ونلاقي مثل ها المواقف وبدون ما نتكلم على طول نرفع المراية بوجه اللي يكلمنا
يعني شوف نفسك والتهي بعيبك قبل تهذر على رأس غيرك
\\
مثلا زوج يقول لزوجته إنتي مهمله البيت ...وماتهتمين كل شي على الخادمه
على طول كرت أحمر تطلع المراية
مادامه مهمل وهو تارك البيت للسواق ...والا احتياجات بيتها وهي على الليموزين
\\
مثلا وحده بالمجلس تقعد تنتقد بنات فلان لان مشاويرهم للسوق واجده
وتتساءل متى يلاقون وقت لاهلهم واشغالهم
المراية نطلعها على طول
مو انتي مشاويرك مسايير ومدري متى تلاقين وقت لعيالك وبيتك ورجلك
\\
وحده تعيب على فلانه لانها ماتلبس قفازات... وان حجابها غير كامل
هوب تطلع المراية بالوجه
لان الغيبة كبيرة اشد فتكا من لبس قفاز
\\
واحد ينتقد المجتمع والتفلت من المراهقين وان ثقافتنا الاصيله انتهت
بخفة حركة نطلع المراية
ويشوف شاربه اللي مابقي منه الا ذكريات وسكسوكته اللي كانها ازقة بحي ضيق ..وثوبه المحزق
\\
واحد يتكلم عن يسر الدين وتماشيه ووو
نضع المرآآآة بين عينيه >>
ويشوف كيف معقد حجانه ومتشنج والحكمه واليسر بوادي وهو بوادي
\\
وحده تتكلم بحجاب البنات وانهم ماعادهم متسترات مثل اول
نلزق المراية بخشتها
عشان تعرف ان العباية على الراس مهمه جدا بس موب بأهمية غض البصر... والبحلقه ببنات ورجال خلق الله وهي ونظراتها من تحت النقاب كانها اسهم ناريه
\\
بالمختصر
لاتتكلم عن شي انت منت عارفه
ولاتنصح بشي وانت اول تارك له
لاتدعي الكمال والسماحه وعند اول موقف تطيح على وجهك لانك مدعي
لا تقول انا كبير وانا ادمح الزله وان تهاوشت مع قطو اكلته من العصبية
لاتتفزلكون .. لا تتنعطزون .. لا تمثلون ..لا تجاملون
كونوا زي ما انتم
ولا تسمحون لاحد انه يبين انه توب وانتم ولاشي
لاتسمعون الا من اللي قول وفعل وكلامه مطابق لاقواله
***
يازين الانسان لما ينشغل بعيوبه ويترك الناس فحالهم
كلن عنده خير ومحد كامل والنقص وارد
بطلوا الوصاية والتحكم في خلق الله وتكلموا عن علم ... مو لان الناس تقول كذا... او لانه المفروض ...تعلموا الحوار والنقد البناء
تعلموا آداب النصيحه ... واداب تقديم النصح
أخيرا
قال تعالى
_ يا أيها الذين آمنوا لم تقولون ما لاتفعلون كبر مقتا عند الله أن تقولوا مالاتفعلون _
إذا الله يمقت ها التصرفات وهو أرحم الراحمين ..فكيف الناس اللي رحمتهم وعلمهم مايوازي شي
وربكم مايغفل عنه شي سبحانه
دمتم بود
موضوع رائع ..