طرق تجعلك تستغنين عن الخادمه
السلام عليكم ورحمة الله وبركاته
إلى كل ربات المنازل جبت لكم حلول سريعه وبسيطه تقلل اعمالك المنزليه إلى الثلث بل الربع إذا كنتي شاطره وذكيه
حتى لوكنتي موظفه راح تستغني عن الخدامه..
راح اطرح لكم أفكار وتجارب وقوانين لربات منازل ناجحات..
صراحه اغلبهم مثاليات في منازلهم واطفالهم ما شاء الله كل شي يلمع الأطفال والبيت وهي شكلها كأنها بنت في العشرين..
و أغلبهم موظفات..
منهم موجهه في التعليم و غيرها دكتوره بدوامين في الجامعه و ....إلخ
كلهم عندهم القدره على مصاريف الخدم لكن استغنو عنهم بقناعتهم..
المهم.. ما حأطول عليكم,,
مجموعة قوانين تعلنينها في بيتك وراح تدعي لي بإذن الله..
1-ممنوع الأكل إلا على سفرة الأكل بس
جيبي لك من الفرش الخفيفه وسهلة الغسل او سفره كبيره وافرشيها في مكان الأكل مثلا في الصاله او غرفة المعيشه وما تنشال الا اذا بغيتي تكنسين يعني مسحوها بعد الأكل ورجعوها حتى القهوه تقهوو عليها عشان تحافظو على نظافة الفرشه وما تحتاجين انك تلمين المواعين من كل البيت لا بس مكان محدد تشيليها وتغسليها على طول عشان ما تتعدم ارضيات البيت او تكثر المواعين
2-فيه أوقات محدده لوجبات الأكل
حاولي قد ما تقدري انك تجمعين عائلتك على وجبات الأكل الأساسيه الفطور والغداء والعشاء..
سوي الفطور وبعد ما يفطرون غسلي المواعين على طول وقفلي باب المطبخ بالمفتاح عشان محد يدخل بعدك ويحوس المطبخ وعشان ما تزيد المواعين وتتكاثر في المجلى ونفس الشي للغداء والعشاء..
وكمان تزيد من الود وروابط التواصل بين افراد الأسرة الواحدة
3-(أي أحد يرمي أغراضه وراه راح تنرمي في القمامه)
قانون شرير بالنسبه للفرد الفوضوي في الأسره..
يعني (لو تجيب ألعابك وتلعب فيها وتسيبها بدون ما تشيلها او ترجعها مكانها معناتها انك ما تبيها)
اذا عصب او قام يبكي عاد انت مو ترميها لا حطيها في كيس وارفعيها عنه وقولي لو ترمي اغراضك ثاني راح اشيلها عنك حتى تتعلم ما ترمي أغراضك..
واذا زاد عاقبيه بالحبس لفتره تناسب سنه مثلا الي عمره 6سنوات وقفيه عند الجدار لمدة 10 دقائق حتى يحاسب نفسه وبعدين تعالي وقولي له (انا وقفتك عشان انت سويت كذا..) وخليه يوعدك انه ما يعيدها..او شيلي عنه الأشياء الي يحبها حتى كل فرد يحاسب نفسه قبل لا يرمي اغراضه او يهملها
أنا عن نفسي جربتها مع اخواني والله العظيم انها نفعت وصار البيت أنظف بنسبة 50 %
4-غرف النوم فقط للنوم
يعني 1- ممنوع الأكل او اللعب فيها
2-يترتب السرير كل يوم
3-اذا غرفته مكركبه خليه ينظفها لما بيجي ينام عاقبيه اذا نام وغرفته وصخه عاد هو راح يتوب انه يكركبها مره ثانيه
5-المذاكره
حددي مكان و وقت للمذاكره مثلاً من 4-5 العصر الكل يجلس ويذاكر فيها وخليهم يعتمدو على نفسهم وهم يذاكرو وانت بعدين راجعي لهم وتأكدي من أنهم حلو الواجبات صح او من الحفظ او من ترتيب الكتب وبعدها كل واحد يلم كتبه واغراضه ويحطها في مكانها المخصص وبعدها تبدأ ساعة المرح مع مرور الوقت حتلاقيهم يعتمدو اعتماد كلي على انفسهم
6-الملابس
انتبهي من انك تحددي يوم لترتيب دواليب الملابس صدقيني بيشيب راسك وأنت ترتبي
و حتكرهي الملابس وترتيبها وما حتستفيدي الا التعب بس..
1-قسمي الدولاب
بناطيل الجنز مطبقه فوق بعض ومع بعض البلايز الصوف كذلك البجايم عند بعض لا تخلي الدولاب ملخبط ترتيبه..وكمان عشان يسهل الوصول لها
2-مسحي الدولاب بديتول او اي منظف أنت تفضليه ووزعي المعطرات او بخريه وبعدين رجعي الملابس بعد ما قسمتيها..
3-أحلى وأريح حاجه جربوها الكثير لترتيب الملابس.. هي إنها لفت الملابس على شكل رولات وترتيبها كالآتي: تطبق البنطلون للنص بشكل طولي وتحط فوقه البلوزه وهي مطبقه للنص وبعدين الملابس الداخليه وبعدين تطبق البنطلون بكل الي فوقه للنص وبعدين للربع مثل التطبيق العادي
سواء ملابس مناسبات او بيت او نوم وكمان لها ميزه الي هي انها مستحيل تتصفط او يخرب الكوي
4-ممنوع للأطفال يفتحو الخزاين بدون إذنك عشان تعرفين مين الي يفتحها واذا تحوست تعاقبين الي حوسها وتخلينه يرتبها كمان
5-مو كل واحد يبدل ملابسه ويرميها لا فيه قانون لتبديل الملابس مثلاً عند النوم يلبس ملابس النوم ولما يرجع من الدوام يلبس بيجاما البيت ومواعيد الاستحمام للكل و هكذا
6- البنات من 10 سنوات وفوق هي الي تغسل ملابسها بنفسها
لا تقولي صغيره لأن هذا سن البلوغ عند بعض الفتيات او ما تعرف أنت علميها عشان تكون مشاركه في المحافظه على نظافة البيت ومعتمده على نفسها وحفزيها بقولك لها:(أنت كبيره أنت شاطره) ومن كلمات التشجيع المحفزه للبنات واذا عاندت سيبي ملابسها ولا تغسليها ابداً واذا زودتها عاقبيها
7-لبسي سلال قمامه صغيره أكياس و وزعيها في كل مكان في البيت في الغرف والممرات وعند المغاسل
و نبههيهم عليها وقولي لهم لا اشوف كيس او رقه مرميه في الأرض القمامه مكانها في سلة القمامه واذا اي احد يرمي في غيرها يعني عالارضيات او الاثاث عاقبيه على طول
8-اذا نظفتي أقسام الضيافه قفليها بمفاتيح عشان ما يدخلوها ويلعبو فيها حتى يتعودو أنها أماكن ممنوع دخولها إلا للضيوف وبعدين خليها مفتوحه والي يحوسها عاقبيه على طول
9-سوي جدول تقسمي فيه تنظيف البيت على كل أفراد الأسره علميهم ان البيت من مسؤوليتهم هم سواء كانو أولاد أو بنات الكل مسؤول عن شكل البيت وتنظيفه
10- المطبخ ممنوع دخوله إلا لأفراد معينيين من الأسره لا تعودي أطفالك على دخوله لأن مخاطره كثيره إالا إذا كان يبي مويا من البراده او من الفواكه الي على الطاوله ....إلخ
وأي احد يستخدم المواعين يغسلها واذا عاندك عاقبيه
11-الحمامات
الي يستخدم الحمام ينظفه وراه
مثلاً الي يتحمم يقفل علب الصابون والشامبو و يرجعها مكانها ملابسه الوسخه في سلة الغسيل ينظف البانيو
أو يسحب السيفون وراه ...إلخ
12-حاولي توزعي المسؤوليات على أفراد المنزل
مثلاً بناتك الكبار يساعدوك في الطبخ ولدك الكبير يساعد أخوه في مذاكرته وحده من البنات هي الي تحمم أخوانها الصغار المره الي بعدها اختها الثانيه يعني بالدور صدقيني حينبسطو مره
وهذا كل الي قدرت إني أجمعه في النهايه أنا عزباء ولسا ما جربت الحياه هذي لكن هذي من تجارب بعض ربات البيوت الناجحات
أتمنى إني أفدتكم
أدعو لي بالتوفيق و أن ربي يحقق لي ما أتمنى
والسلام عليكم ورحمة الله وبركاته