مشكلتي نفسيتي الغريبه

صباح الخير

والله مادري من فين ابلش بالموضوع

انا نفسي مو فاهمه نفسي

انا بنت عمري 25 سنه

الى يومكم مو فاهمه شخصيتي اللي قالي انتي مزاجيه واللي قالي تفكيرك غامض وغريبه

انا انسانه ابسط كلمه ابسط شي ياثر فيني ويثيرني يعني اللي بيستفزني بالراحه اكل بنفسي اكل

لدرجه مع امي انا وياها 24 ساعه مشاكل بسبب ان امي تفكيرها غير وانا غير

الى هنا وصلت لك صفه وحده فيني اني نفسي ضيق ماتحمل كلمه ماتحمل اي شي

واكتم واكتم واكتم واكتم لما خلاص بيجي يوم انفجر

اطنش مره بس بالاغلب الاوقات انفجر

احسد البنات اللي مايحسون ولا يتاثرون

اقسم بالله يابنات اكون جالسه رايقه فجاه تجيني كلمه بسيطه من امي

مثلا او احد من اهلي مثلا يقولون انتي ماتساعدين او بس انتي طول وقتك نوم او مامنك فايده

او ساعدين بالبيت او بالاكل انفجر تفهمون كيف انفجر كانهم سابيني وتقلب نفسيتي ولا اتكلم ولا شي عشان هالكلمه البسيطه

هاذي اول صفه عدم التحمل

ثاني شي فيني طبع اكرهه تجيني فتره اكون 24 ساعه من ناس سوا اقارب او صديقات

فجاه بدون مقدمات اقطعهم ولا ابي اكلمهم ولا ابي اطلع معهم ولا ابي قربهم بالعربي

لدرجه هم ينهبلون ويرسلون لي وش فيك عسى ماشر جاك منا شي وانا كذا بدون سبب اكون مالي خلقهم وبس

واذا شفت نفسي فاضيه او طفشانه رحت لهم وبعدين اسحب على هالحاله من لما كنت بالثانوي الى يومكم وانا هالعاده مو قادره اتركها

حتى امي منهبله تقول انتي وش بك مريضه نفسيا مره تطيرين فيهم ومره يصيرون كانهم اعداء لك

بما اني اكبر خواتي بين اربع عيال وبنت بالمتوسط

تقدرون تقولون صرت ادقق امي كيف تعاملني وتعامل اختي واغار مانكر لانها امي تعاملها كبت صغيره

اما انا خلاص تعاملني مره كبيره وكل ماقلت شي قالت انا يوم كبرك معي ولدين وانا وانا فصرت اقولها انتي غير وانا غير ماحد غاصبك تتزوجين

ماحد غاصبك تعيشين هالعيشه يعني صرت ارد واتنرفز اذا قالت انا وانا مع انها تعامل اختي كطفله فصرت اقول ليه تعاملني كذا وهي

كثي ر قالو لي لاتقارني نفسك باختك اختك بزر مراهقه عمرها 15 سنه وانتي 25 شي طبيعي بتعاملك غير بس قلتكم شي مو بكيفي بنفسيتي

اكثر شي والمتعبني

احس ان كل الناس ضدي ماعرف ليه احس المشاكل ماتصير الا لي احس مجرد احساس امي تحب تشوفني اقل من اختي

تحب تشوفني اكرف تحب تشوفني كاني اكبر من عمري اي والله يابنات احس انها ضدي وماتتمنى لي الخير

احس الكل ضدي والكل يتحكم فيني مع

انه العكس انام براحتي جوالي وجهاز الابتوب حقي ماحد يلمسه وكلمهم بارقام سريه

اروح وقت مابي لصديقاتي اصور بالسناب واحد صوري براحتي ولا يقولون لي اهلي شي

بنت عمي وبنات خالي انام عندهم او اسهر الى الصباح ولا احد يمنعني

فلوس يعطوني مطاعم وكافيهات ختمتهم

عباية كتف وتميل كانها فستان للاسف البسها ولا احد يمنعني

انا حطيت براسي موقف واحد انهم يتحكمون فيني ويكرهوني

قبل سنه رحنا تركيا واختي طبعا كان عمرها 14 سنه كانت لابسه عباية كتف ومتحجبه

لما قلت بتحجب طيب كلهم رفضو وقالو انتي كبيره مع ان اختي بالغه مثلي فليش ماتحرمونها

وخاصه دايم تردد امي طبعا من حريم الاولين تعرفون طبع الاولين دايم احس الكل ضدي والكل يتحكم فيني مع

تتكلم عن وحده قريبه لهم متزوجه تقول اي ماشاء الله زوج فلانه دايم عند اهل زوجته متعود عليهم كانهم اهله

عاد انا سويت حركه بايخه بوجهي وهي زي التكشير وقلت مين الحين اللي تدخل زوجها على اهلها اصلا مين



الرجل الفاضي اللي بيجلس يزور اهل زوجته فاضي مازار اهله واستراحته عشان يروح لاهل زوجته



لآني اعرف الحريم واعرف امي خاصه اللي زي طبع امي الاولين يحبون يمشون حياة عيالهم وبناتهم بمزاجهم ويتدخلون بكل شي وياثرون



على رجال البنت او على الولد عشان كذا ماحب الرجال يحتك باهله او اهل الزوجه كثير
انا طبعي اكرهه اني ادخل الزوج بعائلة الزوجه يعني احب العلاقه رسميه لاكن امي العكس تحب زوج البنت كانه فرد من العائله
وتحب تعتبره كانه ولدها ودايم تمدح اللي الرجال اللي يزورون اهل زوجاتهم عاد انا اقولها فاضين
وانا اقولها لو بعدين تزوجت لاتحلمين ادخله عندكم ماحب الرجال اللي بس مره عند اهل زوجته مره عند اهله احسه مو رجل بس بين هالحريم
وكل وحده تملى براسه كلام وانا مالي كلمه ولا راي اكون عنده انا حاطه براسي ان كثرة مايحتك الرجال باهله واهل زوجته
بيتحكمون فيه من نماذج شفتها بعيوني
تعرفون اللي كارهه الدنيا ولا فيه اي شي اي شي يسليه
حاله غريبه من اكثر من سنتين امر فيها وهي مافي اي شي بالحياة يجذبني
مافي اي شي انبسط عليه نفس النظام نفس الروتين نفس كل شي ماعاد تفرق
مانجذب لشي اسمه زواج بالعكس يضيق صدري واتنكد اذا سمعت طاري الزواج
مايجذبني سفر طلعات روحات اقسم بالله احس عشت 100 سنه مو كاني ببداية حياتي كارهه كل شي
ولا لي نفس باي شي
اقسم بالله اذا جينا الصراحه اهلي ماقصرو على ولا شي ووحده قالت لها لي
انتي اللي فيك بسبب ان اهلك عطوك وجهه بزياده فتماديتي اقسم بالله الى يومكم اتذكر وش صلحو لي بوقت مراهقتي
وش كانو يجيبون لي كانو بنات خالي يوميا يبغوني اجيهم ليه عشان بس اجيب لهم الابتوب
لان اهلهم مانعين عنهم النت مع انهم بنات بالعشرينات
قالو لي ناس اذا تشوفين هالتصرفات تحكم ماشفتي عيشت الناس البنات الثانيه كيف ذل واهانه وشك
وضرب ومايسمحون لهم بجوالات ولا طلعه مع صديقات ولا روحات طبعا انا اعتبر هالكلام هذا خرافات
لان حنا بالقرن 21 مافي ناس الى الان على هالتصرفات والتحجر
المشكله فيني بنفسيتي بسهولة استفزازي ببالي دايم ان امي بتتحكم فيني امي بتصرفني على مزاجها تبيني مثلها
كاني عجوز واشياء كثيره ماودي اتكلم عنها