تتوقعون ايش السبب في تغير زوجي المفاجئ

السلام عليكم ورحمه الله وبركاته

اتمنى الكل بصحه و عافيه ولله يحقق لكل مسلم ما يتمناه

أخواتي بدخل بالموضوع على طول

أنا متزوجه تقريبا لي ثمان سنوات وطول سنوات زواجي و الحمدلله انا و زوجي متفاهمين لأبعد
درجه تخيلو أمي تقولي لا تسولفين قدام أختك او حريم اخوانك علشان العين و علشان المقارنات
وما يسون مشاكل مع ازواجهم يقولون شوف فلانه
ما أقول هالكلام مفخره أو أستعراض و زوجي مافيه شي مميز عن الشباب السعودي
لا زود رومانسيه ولا هدايا اربع و عشرين ساعه لا بس متفهم ولا يضغط علي ويحب يسعدني
بروحاتي لاهلي او يطلعني ونادر جدا يرفض لي طلب
و بالمقابل انا ما اضغط عليه يعني هو طلعاته كثيره مع الشباب وسفرياته كثيره بحياتي ما قلت له
لا تروح لانه رايح برضاي او غصب عني فاقوله انبسط كاني انا مبسوطه
مو هنا المشكله طبعا

تزوج اخوه الي اصغر منه و زوجته ولله مافيها اي شي مميز بدا يقارن وعادي مشيت الموضوع
وقلت لامه و اخواته لا تتكلمون بفلانه قدام زوجي وماشاءلله عليهم بدو يمدحوني و يفضلوني
عليها قدامه و اكيد يسون العكس قدام اخوه يفضلون حرمته علي علشان كل واحد ما يقارن

سلفني انسانه مو طبيعيه ابد وسوت لي مشاكل ما يعلم فيها الى الله وصار تدخل مع ام زوجي
و الحمدلله كل الحق كان معي والكل قال هي مخطيه لاني مرا خايفه الله
وقلت لزوجي انا مالي في بنت الناس لكن هذا اخوك من لحمك و دمك لا يصير بينكم شي
بسبب الحريم قال مو انتي الي تعلميني و انتي بدالك عشر لكن اخوي واحد
كلامه صحيح لكن اسلوبه ناشف مشيتها وقلت معك حق الشرع حلل لك اربع و البنات مالين بيوت
اهلهم لكن اخوك واحد و بره واجب

من يومها و الرجال اسلوبه ما يطاق صدق مو قادره اتحمله بعطيكم امثله يمكن انا مكبره الموضوع
او ما عندي سالفه

مثلا كنت ابخر البيت قبل شوي ونفخت على الجمر و طار الرماد على الارض قريب منه
قام يصرخ و يقول الواحد ما يقدر يجلس معك بالبيت وش هالوصخ الي انتي فيه
هذا لاني ابي ابخره و اطيبه

كلمته مرا و قلت المقاضي ناقصه و الرز ما يكفي الغدا جيب غدا من برا و نقضي اليوم ان شاءلله
قام يصرخ فيني و انتي ما قلتي لي وهذي غلطتك و توك تنتبهين للبيت وليش ما تكلمتي من بدري
طيب هو يدري انو ولدي معه حراره ولا انام ليل ولا نهار لانو صدره تعبان و اخاف عليه
وش فيها لو جاب معه غدا من برا وانا اصلا مو عجزانه بس ولله ما انتهت انه بيخلص وما يكفي
للغدا

اي كلمه اقولها يقلبها علي و يقول عيشتك ما تنحمل ما ادري هو الواحد بعد السنوات يطفش
ولا فيه شي مغيره ما يتحمل مني الحرف وحتى وحنا جالسين جنب بعض تحصلونه مايل بالجهه
الثانيه مبعد عني
قلت له بالمزح عطري مو عاجبك قال لا ليش قلت اشوفك مبعد عني مرا قال انتي حساسه
وبتسوين مشكله من لا شي والناس تكبر و انتي تصغرين

ولله عقلي طاير مو طبعه ولا اسلوبه
وانا من النوع الي يعرف يحل مشاكله ولله عمري ما دخلت اهلي او اهله بمشكله الحمدلله نحلها
سوا لكن هالمرا بنجن مو عارفه كيف اتعامل معه لا وبعد كل هالسنين

حاولت اصارحه و اقوله وش فيك متغير عصب و زعل وقال انتي حساسه ولا تقدرين ضغوط الحياة
تبيني ميداليه قدامك مبتسم طول الوقت وانا ما تغيرت ولا شي لكن انتي تدلعين
ولا انا دلعتك بزياده وهذا خراب

بس اسلوبه تغير لكن باقي امور الحياة مثل ماهي يعني باقي ما يرفض طلب ويوديني لاهلي متى
ما بغيت ولو حبيت اطلع يطلعني لكن اسلوبه يسد نفسي حتى وقت الطلعه

تتوقعون وش السالفه كيف التعامل مع الازواج بمثل هذا التصرف

ممكن في شي فيني مضايقه وانا ما ادري بس سالته ولا قال شي كان رده مثل ما كتبت اني حساسه
وتدلع

احد يقدر يفيدني