مسابقة الدروس المفيده + برنامجي الممتع

التنظيف والتنظيم



بسم الله الرحمن الرحيم

الحمد لله رب العالمين والصلاة والسلام على أشرف المرسلين سيدنا محمد صلى الله عليه وسلم وعلى أله وصحبه أجمعين ...


قبل أن أبدا بكتابة يومياتي الممتعه أود أن أشكر عالمنا الوردي عالم حواء لأعطائنا هذه الفرصة الرائعة لنشر وتبادل خبراتنا المنزلية بما يعود بالنفع على الجميع وأسال الله العظيم رب العرش العظيم ان يجعل كل حرف من الحروف التي كتابة أجر لمن كتبها واصحاب المنتدى ويكون اجرنا بأذن الله كناشــر علم ينتفع به ...


أخواتي الرائعات... مثلما لزوجك حق ولنفسك حق ولأبنائك حق أيضاً لمملكتك حق وليس بالهين أبدأ ..بيوتنا هي مركز استقرارنا ..مصدر راحتنا النفسية والجسدية ومنها يتجدد نشاطنا لنستقبل بداية أيام وأعوام جديده ..لذلك لاتتهاوني في العناية به كطفل حديث الولادة الذي يحتاج جل وقتك ليشعر بالحب والحنان حتى ينمو ويكون انسان له دور فعـــال في هذه المعمورة...


أعرفكم بنفسي زوجـــة وأم اطفال في المدرسة ومربية أجيال بأذن الله أكون ناجحة في تربيتهم .


بيتي كبير والحمد لله ست غرف وكلهم قيد الاستخدام


خمس غرفة للنوم وكل غرفة اعزكم الله بحمامها
وغرفة وحده بدون حمام للمعيشة

عندي صالتين وحده تتحت ووحده فوق


مطبخ تحضيري


وطبعا الملاحق مطبخ وغرفة غسيل


مجالس خارجية للضيوف


وحوش والحمد لله



طبعــــــــــــا واكيد ومادام بيتي بهذا الحجم فأنا عندي خدامه وحده فقط ودائما ترادوني فكرة تسفيرها ولكن اخاف من المجازفه شايله كثير صح لها هفوات ولكن مادامني مفتحه عيوني فهي قيد السيطره ...






يومي يبدأ مثل كل وحده تحب تعيش حياتها صح ومرتبه وقتها قبل الفجر بنص ساعه أصحى وماشاء الله ولاحول ولاقوة الا بالله اقوم اصلي ركعتين وبعدها استغفار الين مايأذن أقوم اصحي ابو العيال والعيال لصلاة الفجر ارجع اصلي الفجر وانزل للمطبخ احصل الخدامه قايمة تجهز للفطور اسوي الحليب اهم وجبة صباحية والحليب له خلطة سرية خاصه به لعيونكم بكتبها النتيجه من هالحليب صحه جيده وصدر خالي من البلغم وكل هذا بفضل الله سبحانه الي هداني اني اسوي لهم هالخلطه الحليب مكون من حليب اي نوع من يفور احط مقدار ملعقة ونص من خلطة مطحون فيها كل من ( كوب حلبة +كوب زعتر+ نص فنجان فلفل أسود + نص كوب كركم ) وادق فصين ثوم واحطهم في الدله واصب الحليب عليهم ويكون خلصنا الحليب يجي دور الفطور اي نوع من الخبز اللي نسوي بالبيت رقاق او جباتي معاهم فول او بيض ام عدس اوكبده او اسوي فطائر جبنه وزعتر وغيرها .واكون عاجنه من فالليل .




من اخلص الفطور اخليها تجيبهم للصاله واسبقها للبيت وبيدي مبخره احط فيها لبان وعود خام ابخر فيه البيت يكونوا عيالي وابوهم رجعوا من المسجد وكلن يعرف مهمته استحمام ولبس ملابس وينزلون تحت للفطور .


وانا ماألبس احد من عيالي كلن يتسبح بروحه ويلبس بروحه ماعدا شعر البنات أشرف على الكبار لما يمشطن شعرهن والصغار امشط لهن ، يفطر الجميع وابخرهم واعطرهم واستودعهم الذي لاتضيع ودائعه ويرحون بحفظ الله .



في الوقت الي أكون فيــــه افطر عيالي وأبوهم تكون الشغاله تخم الحوش او تغسله وتغسل سيارة ابو العيال .وهذا اول ماتبدي به يومها يوم تكنيس حوش ويوم غسله ترشه بالماء فقط اما الغسيل المضبوط اللي على اصوله يكون شهري .



ثم نتوجــه انا وأياهــا مع بعض للحمامات .قبل لاتغسلها اشرف عليها : تمسح الرفوف وترجع كل شئ بمكانه من شامبو وصابون وليفه وفرشاه والـخ تطلع الملابس وسلة الزبايل ، ثم ترش الحمام والبانيو والحوض بمزيج من صابون تايد كلوركس ومقدار غطاء واحد فلاش وتحركه بمخمه تحريك بسيط ونتركه وهكذا كل الحمامات ونتركهم الين نخلص تكنيس ومسح الغرف ونرجع لهم .



بعدها دور الغرف نفتح الشبابيك انفض الستائر ونرفع مع بعض قطع السجاد كلهن صغار ونبدأ مسح كل شئ بالغرفه وهالمهمه اشتغل فيها معاها لانها ماراح تخلص بروحها وماتقدر لحالها ع كل الغرف لاتنسون انهن ست غرف وكلهن واقعات تحت الاستعمار البس قفازاتي بعد مااكون دهنت يدي بزيت زيتون وابدا امسح طاولات الغرف وحواف السرير والمرايا ومقابض الدولايب والباب بنفس الوقت هي تمسح السراميك .
الطاولات وحواف السرير والمقابض امسحهم بمزيج من داك بالبخور وماء حاطتهم ف بخاخ المرايا بالبخاخ الخاص بالزجاج .



السراميك يكنس اولا ثم يمسح يوميا وكل اسبوع اغسله بكلوركس وكل شهر يغسل بفلاش . امسح السراميك بماء مضاف له فنجان من معطر اسمه سوفتي بالبخور موجود بالجمعيات عشان الريحه تكون حلوه . وكل مانخلص غرفه من مسح وتنظيف شغالتي تدخل الحمام وانتوا بكرامه تفركه زين ويكون دوري ارجع السجاد اسكر الشباك وارتب الستاره اعدل اغراض عيالي بشكل مرتب وحلو عشان يرجعون ترتاح نفسيتهم فيها . من نخلص كل الغرف والحمامات والصاله ابخر البيت بعود خام فقط واحط بكل حمام بخور لبان ..

نخلص شغل التنظيف ع العشره بعدها احط لنفسي فطور خفيف واجلس اما ع النت او أقرأ شوية .
اما الشغاله تروح للمطبخ تفطر وتريح شوية بعدها تنظيف صحون الفطور وتجهز عشان الغدا.عشره ونص يبدأ تنظيف الروح والجسد بركعتين لله سبحانه الين 11بالضبط ، بعدها امسك زيت زيتون وليمونتين وادهن جسمي بالكامل مع شعري واظافري والبس لبس المطبخ واروح اطبخ لزوجي العزيز غداه واسوي صحن حلو للعصريه 12.30 ادخل اخذ شور والبس وبينما انا اخذ شور الخدامه مهمتها تحط الاكل في الحافظات وتجيبه على السفره مع صحون الغرف والملاعق والماء والتمر اصلي الظهر واتمدد اريح جسمي الين يجي زوجي 1.15 يتغدا وينام ثم يجون البنات الصغار1.30 اغير لهم ملابسهم اخليهم يغسلون جسم ورجولهم زين يصلون اغديهم واشغل لهم سبيس تون وانبهم انه مايسوون ازعاج ويذكرون اخواتهم واخوانهم للصلاة واروح انام ، العيال الكبار معودتهم يرجعون يدخلون الحمام يغسلوا اجسامهم وينظفون رجورهم واياديهم زين يصلون ويتغدوا وبعدها ينادون الخدامه تشيل الصحون ومافي نوم يتمددوا بس ولا كلن يمارس الهوايه اللي يبيها اما انا انام الين الساعه 3.00 اقوم اسوي بخور لزوجي واسوي له شاي او نسكافيه واحط له شئ حلو ياكله يقوم زوجي ياخذ الولدين يروح يصلي وويلبس ابخره يروح مره ثانيه بحفظ الله لعمله الخاص .
اما الاولاد فيبقون في المسجد عشان التحفيظ ومايرجعون الا المغرب ، انبه بناتي لصلاة العصر واروح اصلي بعدها ارتب سرير غرفتي وافتح شباكها وانا نازله امر اشوف غرف العيال لو فيه شئ طايح ارفعه ، انزل للبنات اعطيهم كلن كوب عصير فريش بالاضافه لشئ حلو ياكلونه او فطائر ادهن لهم شعورهم وامشطها ونبدأ نذاكر مع بعض .




الشغاله يكون دورها تغسل الملابس وتكوي وتفك الماء على الزراعه لمدة 45 دقيقة عشان يسقى الزرع
قرايب أذان المغرب اكون خلصنا مذاكره انا والبنات اخليهن يقرن الاذكار مع بعض عشان يسمعون لعض اما انا اروح اتجهز لصلاة المغرب من يأذن نصلي مع بعض ثم يبدأ قرآة الورد اليومي وبعدها يجون الاولاد احط لهم شئ يأكلونه يرحوا يذاكرون . اما البنات الي تبي تلعب براحتها والي تبي تجلس ع النت بعد براحتها والي تبي تقرأ براحتها عندهم وقت الين 8 مسـأء .بعدها نصلي واحط لهم عشاهم ويغيرون ملابسهم ع التسعه عيالي نايمين اما انا ابخر غرفتي وانتظر زوجي الي يرجع عشره احط له عشاه وعلى 11 نحن نايمين وبكذا خلص يومنا الحلو والمر بنفس الوقت .
48
7K

يلزم عليك تسجيل الدخول أولًا لكتابة تعليق.

تسجيل دخول

أم السنيدي uae
أم السنيدي uae
هذا نظامي طوال الاسبوع ماعدا السبت أجازه :) واجازتي موزعتها طوال الشهر لشئ مره أزور اهلي وأخرى لاهل زوجي وثانية لاستقبال صديقاتي ورابعه للتنزه مع حبايب قلبي زوجي وعيالي ووحده خاصه فيني مع زوجي وهكذا . وعندي نظام تعود عليه كل من يعرفني :44: عذرا لأستقبال أحد خلال ايام الاسبوع لاني اكون مشغوله بعائلتي .


اكيــــــــــد حالي حال غيري لي جدول للتنظيم والتنظيف :angry:



اليومي شفتوه وعشتوه معي بحذافيره .

كل يومين عندنا تغير شراشف اســرة العيال مع البطانيات وبطانيات العيال من النوع القطني الخفيف سهل الغسيل كأنه شرشف تحصلونه بأيكيا ..

كل يومين تكنيس السجاد بعدها ينحط طشط فيه ماء وكوب من معطر رشوش سوفت اللي بالبخور وينحط فيه البروش ونبرش السجاد عشان نطلع الوبر والشعر والخيوط .

كل يومين تنظيف الكنب الي بالصاله وغرف التلفزيون من الداخل والخارج بالمكنسه ثم امسحه بفوطه فيها معطر من كل الجهات .وبأبره اشفط من المعطر وادخله ف الكنب

اسبوعيـــا:

-تغيير مفارش سرير غرفة نومنـــــا .

- تنظيف و غسل سراميك البيت كامل بكلوركس مخفف بماء + دارمر بالصنوبر .

- رش البيت والغرف والحمامات والمطبخ بمبيد حشري للصراصير + البعوض + النمل .

- تنظيف المطبخ وتنظيف الثلاجات وتحريكها من مكانها تنظيف الفرن من الداخل والخلف وتحريكه من مكانه .
- تنظيف واعادة ترتيب غرفة الغسيل والكوي .

كل أسبوعين :

تنظيف المجالس والحمامات وتهويتها ووضع شراشف على الكنب بعد مانرشها ببودره معطره وتبخير المجالس والحمامات .

مسح المراوح والشفاطات وأزار الكهرباء والسلالم والابواب الخارجية .

شهريا :

- مسح الجدران وتنظيف السقف والجبس والثريات

-تغيير سجاد غرف النوم والصالات غسل المستخدم واخراج الاخر ( وللعلم كل غرفه وصاله لها ثلاث سجدادت ثنتين للاستخدام ابدل بينهن كل شهر ووحده للمناسبات تكون من النوع الغالي وماأطلعها الا في الاعياد فقط ولا هي ملفوفه بشكل زين ولفتها بكيس نايون شفاف وحاطتها في الستور ).

-غسل بطانيات الضيوف وتبخيرهم واعادة التخزين بوضعهم بأكياس كبيره لضمان بقاء الريحه وعشان مايطيح عليهم الغبار.

-غسل السراميك والحمامات والمطبخ بفلاش وتحريك قطع الاثاث وفك الستائر وغسلها .

.غسل الحوش غسيل محترم بماء وكلوركس وتايد .

منظفاتي اللي مااستغني عنها وصارت بكل بيت

تايد لغسيل الحمامات والمطبخ والحوش وكل شئ ماعدا الملابس استخدم لهم بارسيل .+ كلونيا الاطفال الاصفر لملابس العيال
بارسيل +داوني لملابسي وزوجي
شامبو لغسيل قمصان النوم وملابسي الداخلية والشيل والعبايا .

كلوركس الالوان لكل شئ للملابس السجاد البطانيات السراميك الحمامات .

فلاش للسراميك والمطبخ الحمامات .

داك بالبخور + رشوش سوفتي بالبخور + داك بالصنوبر +ديتول
بودرة معطره بالافندر + المعطر الكهربائي بعد بالافندر


شفتوا هالنظام وهالشغل والجهد كله لو ماكنت واقفه على شغل بيتي بنفسي مع الخدامه ويدي بيدها لكانت شردت من اول يوم لان البيت كبير ونحن عائلة كبيرة ويحتاج اكثر من خدامه وبيني وبينكم هي وحده وتعبانه نفسيا منها عشان كذا قلت لازم اقوم معها ويدي بيدها . اتمنى برنامجي يكون خفيف عليكم وممتع لكم مثل ماهو ممتع لي وبالتوفيق للكل . :)
كافلة اليتيم
كافلة اليتيم
ما شاء الله ولا حول ولا قوة الا بالله

انت يا اختي مثال الزوجه والام الصابرة واحيك على نظامك الكامل تقريبا واعدتي الامل الى نفسي بان اجد من الاماراتيات من تتابع امور بيتها بنفسها بعد ان القيت المسئولية الكاملة على الخدامات وفي كل بيت لا يقل عن اثنتين بحجة كبر البيوت او عمل المراة خارج البيت

وفااااااااااااااااااالك البيرق
أميرة يكلمتي
أميرة يكلمتي
الله يعطيكي الصحة والعافية ويقويك ****لله
طاسة خبز
طاسة خبز
ما شاء الله تبارك الرحمان
الله يحفظج غناتي
وأنا سعيدة وأفتخر بج بنت بلادي ما شاء الله عليج سنعه
ربي يحفظج
وما شاء الله عليج حسيت بج حريصة مثلي
**فنجان قهوه**
**فنجان قهوه**
ماشاء الله تبارك الله