غسالة الصحون اريستون بالصور ( تجديد الصور )

الأجهزة المنزلية والمشتريات

السلام عليكم .. بناء على طلب اختي كيفي مزاجي اعاده تنزيل الصور لموضوع غسالة الصحون اريستون .. :)
وهذا رابط الموضوع الأصلي مع الردود المفيده باذن الله ..

http://forum.hawaaworld.com/showthread.php?t=729122#Scene_1
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

حياكم الله ... نورتوا موضوعي بدخولكم ..

هذا الموضوع اقتراح من الأخت الغاليه بريداويه .. وبيكون عن غسالة اريستون بالتفصيل وان شاااء الله اني ماانسى شيء ...

1. بالنسبه للغساله اول ماتوصلك لازم تركبي خرطوم التصريف بعلو ( 40 إلى 100 سم ) مايكون اقل او أعلى .. وإلا بيبقى في الغساله مويه ماتتصرف وماتنشف الصحون تماااام
وهذي الصوره من الكتالوج للتوضيح :




ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــــ

2. الأزرار على الغساله :



رقم1 لتشغيل واطفاء الغساله
رقم2 لمبه (مصباح انذار) خاص بالملح اذا نوَر يعني اضيفي ملح للغساله
وهذا مكان الملح



فكي غطاء خزان الملح وحطي المحقان داخل فتحة الخزان وعبي الملح حتى يمتلي " وبيكون فيه مويه اول ماتفتحي الغطاء عادي عبيه حتى يمتلي " وقفلي الغطاء ..

رقم3 زر الغسيل الشديد
رقم4 هذا اذا غسيلك مو كثير تجمعيهم في السله العليا واللي تحت تتركيها فاضيه وتختاري الغسيل اللي تبين وتضغطي هذا الزر رقم4 " على الغسالة مكتوب عليه "2/1" بيغسل الصحون اللي فوق فقط ..

ــــــــــــــــــــــــــــــ ـــــــــــــ
نجي للغسيل واختياره وكمية الصابون :
اولا مكان الصابون والملمع:



اذا تستخدمي الصابون المكعبات " لاانصح فيه ماينظف زين" حطي المكعب في الحجره رقم1 "الكبيره"
اذا تستخدمي البودره على حسب الغسيل بتكون كميته ومكانه وبيجي بالتفصيل مع كل غسيل :

هذي صورة مؤقت الغسيل واختياره :





رقم 1 زر الغسيل العادي : يغسل مرتين بمويه بارده وبعدها بمويه حاره55درجه ويشطف وينشف
كمية الصابون : تملي الحجرة الكبيره ونصف الصغيره ..
وممكن تختاري الغسيل هذا وتضغطي زر pulse اللي على يسار الغساله هذا للغسيل الشديد للصحون كثيرة الاتساخ بيزيد دورات الغسيل ..

رقم 2 زر الغسيل الخفيف :يغسل مره بمويه بارده وبعدها بمويه حاره 55درجه ويشطف وينشف
كمية الصابون : تملي الحجرة الكبيره فقط ..

رقم3 زر تنظيف الزجاج : ميزته انه سريع ويستخدم للأواني الحساسه "الزجاج" اللي مايتحمل درجة حراره عاليه يغسل مره وحده بمويه ساخنه50درجه ويشطف وينشف
كمية الصابون : الحجرة الكبيره اقل من مليها بشويه ..

رقم4 للشطف والتنشيف فقط : مايحتاج صابون .. فقط ملمع

رقم5 غسيل سريع واقتصادي للصحون قليلة الاتساخ وبعد استخدامها مباشره ، يغسل مره واحده 55درجه ويشطف وينشف .. ( وهذا اللي استخدمه دايما وماياخذ نص ساعه وتنظيفه جدا رائع )
كمية الصابون: الحجرة الكبيره اقل من مليها بشويه

رقم6 نقع الصحون اذا عندك صحون تنتظريها حطي الصحون اللي عندك داخل الغساله واختاري النقع يغسلها بمويه بارده بس حتى ماينشف أثار الأكل عليها حتى تكملي صحونك وتختاري غسيل ..
كمية الصابون : مايحتاج صابون ولايحتاج ملمع
ــــــــــــــــــــــــــــــ ــــــــــــــــــ

بالنسبه لعمل المؤقت وكيفية تشغيله : مثل ماهو واضح بالصوره باتجاه السهم تحركي المؤقت وتوقفي على الغسيل اللي تبيه وتضغطي زر التشغيل بيبدأ الغسيل وبتلاحظي المؤقت بيدور شوي شوي ولما يخلص من الغسيل والشطف والتنشيف بيوقف عند أحد علامات الوقوف" على الصوره عليها دائره وحرف S" يعني ان دورة الغسيل خلصت قفلي زر التشغيل وافتحي الغساله ..
مثال: لو اخترتي الغسيل العادي "رقم 1"بتدوري المؤقت عليه وبعدها هو بيدور حتى يوصل علامة الوقوف S اللي تسبق رقم5 .. يعني انتهت وافتحيها ..
ولو اخترتي الغسيل 5 بيدور المؤقت لعلامة الوقوف S اللي قبل رقم6 ..

ــــــــــــــــــــــــــــــ ــــــــــــــــــ
بالنسبه للملمع :

كل غسلتين او ثلاث حطي الملمع داخل الفتحه حتى تمتلي وانتبهي لايطلع من الملمع شيء برا .
بتلاحظي مثل المؤقت او الساعه داخل الدائره عليها ارقام من1 إلى6 هذا حتى تضبطي درجة التلميع بالعاده يكون4افضل شيء لكن حتى تعرفي جربي اذا صحونك بعد التنظيف يطلع عليها بقع مويه او قطرات مويه يعني زيدي درجة التلميع باتجاه الرقم الكبير
اذا لاحظتي عليها خطوط بيضاء يعني قللي من درجة التلميع باتجاه الأرقام الصغيره ..
انا بعد تجربتي أفضل شيء على 4 ...

ترتيب الصحون داخل الغساله :
السله العليا دايما فيها الأشياء الحساسه والخفيفه :الكاسات، فناجين القهوه والشاي وصحونها ،الصحون اللي مالها عمق ..
وعلى الرف الأخضر السكاكين الكبيره والمغارف وملاعق الخشب اللي تحركي فيها الأكل ..

السله السفلى : القدور، المقالي ، الصحون العميقه

وفيه سله للملاعق والشوك

ــــــــــــــــــــــــــــــ ــــــــــــــــــ

أتمنى اكون افدتكم واي سؤال انا حاضره :)

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

ملاحظة ::: هذي صورة الملمع والصابون .. للأسف الملح مالقيته في السوبرماركت هالأيام .. وانا استخدم الغسالة بدون ملح وتنظيفها رائع لذلك بستغني عنه ..
الملمع ماركه فانيش ايضا منقطع له فتره واستخدمت كذا نوع لكن اللي في الصوره افضل نوع جربته بعد فانيش ..


،،،،،،،،،،،،،،،،،،،،،،،

اي سؤال انا في الخدمه خواتي ..
73
48K

هذا الموضوع مغلق.

صهيل الخيل
صهيل الخيل
شكرا يعطيك الف عافيه
توني ادري ان الفلتر ينظف
من3شهور شاريتها ولاعمري فكيته
رحت فكيته تو مالقيت شئ
نظيف
مافيه الا قشامتين فصفص!!!!!!!
ليش اجل أنظفه باستمرار؟؟؟؟
تراني استفدت من موضوعك ودعيت لك
الله يخلي لك احبابك

والملمع فانيش لقيته في هايبر بنده
والملح مهم
يطول عمر الغساله
لانه يمنع التكلسات
وملح سوملت رخيص ب7ريال
أحسن من فانيش22ريال
كيفي..مزاجي
كيفي..مزاجي
والله ماادري شقول لك يالغاليه

من جد فرجتي عني الله يفرج عنك...

ويسعدك ويخلي لك البنوته الحلوه يارب...

..................................

بس عندي سؤال...

<<<<<ماراح تخلصين منها ابد

الصابون اللي تستخدمينه...مسحوق والا سائل؟؟؟وايهم افضل
أم البنوته الحلوه
هلا اختي صهيل الخيل .. الله يسلمك ويجزاك خير على الدعوه :)
فعلا احتمال الملح مثل ماقلتي يطول عمر الغساله اجل بروح اجيبه احسن .. شكرا لك

بالنسبه لتنظيف الفلتر انا احيانا بعد كم غسله وعلى حسب الغسيل طبعا تطلع لي الصحون وعليها قطع صابون بودره ولما افتح الفلتر اشوفها حوله ولما انطفه ترجع تنظف لي مضبوووط ... :)

اختي كيفي مزاجي عسى لقيتي اللي يفيدك في الموضوع اختي انا استخدم الصابون البودره ولاجربت السايل .. ومدري اذا فيه سايل او لا .. بس على كلامهم في الكتالوج يقولون الصابون اما بودره او مكعبات والملمع هو اللي سايل .. فما اقدر افيدك بهالسؤال لأني ماجربته ..
مشكوره والله يجزاك خير على الدعوه الحلوه ...

واي سؤال انا في الخدمه يالغاليات

:)
salan
salan
الله يعطيك العافيه
أم البنوته الحلوه
الله يعافيك اختي salan