حافز مرمطنا مرمطه نفسيه والبنوك مرمطتنا مرمطه جسديه اتمنى تشوفون معاناتي مع البنك

السلام عليكم ورحمة الله وبركاته

اولا كيفكم حبيباتي

بدخل بالموضوع هذا الله يسلمكم انا كملت بياناتي في البنك وعندي رقم حساب بس ناقصني الصرافه

ابويه حبيبي ماقصر كمل لنا كل شئ بالفرع بنك الراجحي لكن مرمطونا على بال اعطونا الحساب والايبان وبعدها

كل شوي يقولون الجهاز خربان لهم شهر والفرع اللي عندنا اساسا مافيه قسم حريم المهم يوم الثلاثاء راح

زوجي ماقصر للفرع اللي فيه قسم حريم قالوا لازم من حضورها عشان توقع وتكمل الاوراق المهم زوجي قال

البارح قولي لاخوك يوديكي انتي واختك بكره عشان تكملون وتاخذون الصرافات وكلمت اخوي قال ابشري بحكم

عاطل ومن الفجر وانا صاحيه ومجهزه اموري واخذت عيالي معايه وجت امي واخويه واختي >> للعلم اختي هنا

معانا بالمنتدى بس ماني قايله >> كاني اشوفكم تقولون مالنا دخل كملي محد درى عنكم

المهم وجو ورحنا للبنك هنا يبدأ الفلم الحريم زحمه هناك قلت لاخويه بنزل انا واختي وبأشوف الوضع ونقولكم

تتنظرونا والا روحوا لان امي تبغى السوق المهم شوي وادق عليهم قلت احنا ننتظر في السرا روحوا واذا خلصنا

بندق عليكم >> ايه هين عشم ابليس في الجنه والله وراحوا ويالله وكل شوي نقرب ونمشي الا وتزاحمنا البنات

الوحده ملبقه بالثانيه وشمس حاارقه فوق روسنا فكرت اخرج لكن مافيه امل السبب اللي خلى الزحام هذا

مديرة البنك امرت بقفل الباب ووضع اثنين حراس امن ويدخلون البنات في البدايه عشر يدخلون وبعدين امرت

كل خمس يدخلون بعدين كل ثنتين كان قبل لما كانوا خمس كل مالنا نقرب بس الوضع اشتد لما قالت ثنتين

ايه وبدأ الاكشنات والله كأننا زي الموج نتحرك يمين كلنا سوا وشوي يسار ومع الضغط والدف تفرقت انا واختي

عصبت :angry2:ثم بدأت اختي المصون بالدعاء الله لايوفقكم افتحوا الباب والبنات استلموا الحراس بالترجي اللي تقول الله يوفقك

واللي تلعن واللي تدعي عليه وانا ااشر لاختي اسكتي والله كان موقع اختي ممتاز كانت بالنص وتدعي افتح

الباب الله يفتح قبرك والبنات يأمنون وكل مادعت البات يأمنون اشتغلت امام اختي وقسم اني اضحك عليها

اما انا اشتغلت تريقه مع انه مو وقته بس ننسى شوي من الدف ودعس الارجل وشوي الا وحده جنبي اغمى

وطاحت وقفتها اختها ورشتها بمويه وشربتها رجعت تطيح عاد انا صحت عليه افتح الباب وحده هنا طاحت اغمى

عليها شوي ويطالع فيني ويقول للبنات الصغيره اللي هناك وش تقول :pاخ يالقهر كله من القصر واختي تضحك لما

قالها قال خرجوها مابنفتح المهم ونحن في خضم الدف والروائح النفاثه اه منها :06: والكتمه والادهى العجايز اللي

يطافسون البنات وش جابهم مدري اشتغلت الاشاعات حتى بوسط الزحمه وبنات ورايه يقول ارجعوا ورى فيقولون

الى الامام قلت لهم ايوه لارجوع ثوره ثوره اللي بجنبي بس تضحك علي شوي اسحب عبايتي مابقى الا وتروح

وغطوتي اللي كل شوي وتنزل وانا اصلحها اللي بجنبي قالت شعرك مبين احط يدي الا وشوشتي طالعه طبعا

مااقدر ارفع يدين اسويها بعد مجاهده ضبطتها بيد وحده والله وناظلنا انا واختي وكل شوي نقرب الا والاشاعات

شغاله اختي ماعاد سمعت لها حس شوي وحده قدامي جالسه تتفلسف راح الحارس الساعه احداش ونص

وقال ماعاد بفتح مدري وين طس المهم تقول والله اخويه نزلت له 1100 الف :32: البارح من حافز تقول اعانه

من حافز لين بدل الشغل والين تلقى شغل البنات صدقوها وتقول تطمنوا بتنزل لنا 4000:eek: صارت عيوني كذا

انا ماسكت لها قلت اما 11000 الف ماره ماتمشي دوري غيرها اشاعه والاربعه كمان اشاعه بالعقل حقت محرم

ينزلونها باول اثنين وهكذا سكتت وشوي تقول بنات امسكوا لي الحارس عشان اتوطى في بطنه قلت روحي

امسكيه قالت لي ايش قلت لها روحي امسكيه قالت لانه بعيد قلت حتى احنا بعيد عنا واذا بتضربينه الله يقويك

روحي امسكيه واضربيه عاد اقولها لها بتريقه يعني مزحه بدقه والبنات يضحكون علي يقولون ماشاء الله عليك

اها هدئت الاشاعه والحارس مابعد رجع التفت اشوف اختي وينها والله مالها حس قلت ادخل الغرفه حقت رجل

الامن كلها بنات وعلى كبرها يمكن اختي هناك ودخلت الا والمكيف شغال ويازين البراد لقيت مركى وجلست

عليه قلت اكيد اختي جالسه بأي مكان عجبني البراد:22: واحنا جالسين سوالف الا جوال اختي يدق

رديت قال اخويه خلصتوا قلت مطولين وذاك الوقت الساعه 12الا ربع شوي الا ورجل الامن دخل ياخذ اوراق

وبدون اي مقدمات وهو بيخرج ماقال وخروا دف ثلاث مدري اربع بنات واقفات علي وانا جالسه الا اللي قدامي

طاحت علي ودفتني وياني صقعت براسي صقعه بالجدار اخ ياراسي :rotaeye: وكل هذا وانا باقي اكلم اخوي واصيح اه

وبدون شعور قلت لهم عجنتوني التفت اللي طاحت علي هي والبنات وضحكوا ويتأسفون مني وانا اي ياراسي

قلت ماعليه خلاص وصل اللي وصل وقالت وحده كملي المكالمه نسيييت منها رجعت اكلم اخوي الا وهو يضحك

علي عرف انه البنات طاحوا علي ويقول خلاص خلاص بعدين بدق عليك وسكرت وفي خضم السوالف الا ووحده

عند الباب طاحت من طولها قامت وحده من جنبي تعرفها تقرب لها يصحون في البنت الا وهي رايحه فيها وتصيح

افتح الباب ندخلها اغمى عليها والله ماقصر هو واللي معاه فتح الا ووحده واقفه من الموضفات ورى الباب قال

افتحي وحده طايحه هنا وجابت شلتها يدفون وهو يدف الباب افتحي تخرج يدها من الباب وتاشر بالسبابه لا

وتأشر على الغرفه حقته بعدين مسكين استحى واحسرته البنت فرش لها سجاده وشالوها البنات وحطوها

عليها انا مسحت على وجهها قلت يمكن مكتومه وامسك على انفها الا تتنفس بس مغمى عليها دقوا على

الاسعاف جا حاولوا فيها تفتح عيونها بس ماهي بوعيها وشالوها بالاسعاف وودوها المستشفى انا خرجت قلت

خلاص لما فرقوا البنات ادور اختي الا ياعمري عليها تدورني كانت جالسه على الرصيف وحاطه شنطتها على

راسها وانا كنت تحت المكيف ادري نذله ودقينا على اخوي وجا واخذنا وبعد هالمرمطه وكلناها يكمل الاجراءات

ويطلع لنا الصرافات وكمل الباقي وحنا معاه ولما رجعنا للبنك شفنا الشرطه هناك بس ماقدروا يفكون الحريم

وماسووا شئ وبكره بتطلع الصرافات هذا ان صدقوا في الوعد


ملاحظاتي على البنك

اول شئ مافيه نظام نهائي وعشوائيه من قبل الموظفات وعدم الترتيب

الادهى اقفال الباب وهذا امر من المديره عقب ماانطقت الاسبوع اللي قبله

عدم فتح باب لخروج البنات اللي خلصوا اوراقهم

بالعكس زاد الضغط اكثر على البنات اللي ينتظرون ورى الباب

وهذي ثالث انذار للمديره ومابين بعينها شين وقوي عين

استهتار وفوضى بالمراجعين وماهم هالمديرها الا عمرها

حتى البنت اللي طاحت رفضت فتح الباب لانها عارفه ان البنات مابيخلونها في حالها بيدخلون
وبيحوسونها

معاااامله خايسه من قبلها هي والموضفات واستهتار بأروح الناس
اللهم اجعلنا في ذمتها

وسامحوني طولت عليكم بس ابغى تشوفون مدى
الاستهتار لا من قبل حافز ولا من قبل البنك

واتمنى من البنات اللي يقولون ان البنات مايشكرونهم بعد تذمرهم تعالوا وشوفوا نشكرهم
على ايش بالله

وسلامتكم :42: