&المبدعة&

&المبدعة& @ampalmbdaaamp

محررة ذهبية

رحلة مرض وعلاج ابني من ثقب في القلب بين الاذوينين بالتفصيل عشان الكل يستفيد

الأمومة والطفل

اخواتي
حبيت اليوم احكي لكم رحلة علاجي لابني نواف وكيف اكتشفت ان عنده ثقب في القلب وتشوهات في الاورده حابه احكي لكم بالتفصيل الممل عشان كل وحده تمر بمثل حالتي تستفيد و تتطمن لاني انا كنت ابحث في النت عن أي قصه او تجربه لمثل حالة ابني اللي الحمدلله الحين هو بصحة وعافية بفضل الله اللي اكرمنا بنعة الشفاء والصحة والعافية

ابني لما ولدته كان مولود طبيعي والمستشفى ماشكوا بشي فيه بالعكس قالوا صحته ممتازه ولا مافيه الا العافية ولما كان عمره 20 يوم صار معه زكام وطول معاه شوي و لما صار شهر ونصف صارت تجيه زيا لكتمه ونروح المستشفى ويعطونه اكسجين او فينتولين اللي كل شهر يكتبون له 6 الى 8 جلسات فينتولين بسبب الكتمه رحت فيه للدكتور ممدوح في عياده الدكتور اسماعيل رسلان وقالي ان ابني عنده حساسية في الصدر ولازم اهتم فيه عشان لايتحول لربو وكانت دائما حريصه عليه لان كل شهر اقل شي يمرض مرتين الى 3 مرات وعايشين مع المضاد الحيوي دائما
عدد زيارتنا للدكاتره لا تحصي بس كنت اقو لان مناعته ضعيفه ، على الرغم انه اول سنه كانت صحته ممتازه ووزنه طبيعي بس لما صار سنه و 3 شهور بداء فيه نحف عجيب والكل يخاصمني لايه ابنك نحيف ماتهتمين فيه ليه
والكل قام يلموني يمكن لاني ولدت بابني الثاني لما صار سنه و 4 شهور والكل قال يمكن نحف من الغيره من اخوه
المهم مرت الايام الين تعب مره وعمره سنتين و 6 شهور ووديته في مركز طبي قريب من بيتي ودخلته عند دكتور عام وانا عارفه انه بيكتب له مضاد كالعاده لدرجه صرت خبيره في هالادويه واروح اصرف دوا من راسي في الصيدليه ومرات تفيده ومرات لا
دخلت على الدكتور وكانت اول مره يكشف دكتور على نواف بدون مايبكي جلس هادي باسم الله عليه والدكتور حاط السماعة على صدره التفت لي وقال : ثقب في القلب صح ؟؟
قلت له " لا اكيد باسم الله على وليدي
استغرب وقالي : متاكده ،
قلت : مليون بالميه مافيه الا العافيه بس يتعب كثير بسبب حساسية صدره
قال: مادري بس لو رحتي عند دكتور اطفال قولي له ينتبه لنقطه انه في صوت في نبض القلب
انا لما رجعت البيت وقال لي زوجي انه بدى يوسوس ، قلت له اساسا هذا دكتور عام وش عرفه باشياء زي كذا نحن كل اسبوع عند دكتور اطفال ليش ماحد علق هالتعليق ، او قال في صوت بالقلب ، مادام هالصوت واضح زي مايقول ؟
المهم مسحت الموضوع من راسي
الين جاء يوم ورحت عند دكتور ثاني عام بس اثق فيه لما سمع الصوت قال لي فعلا فيه صوت بس مو شرط ثقب في القلب يمكن مجرد صوت للقلب .. انا وقتها فرحت بكلامه و مسحت الموضوع نهائي من راسي
وبعدها بـ 3 اسابيع تعب مره ثاني بس كان مره تعبان واخذته للدكتور ممدوح ولما قلت له على الملاحظه بخصوص صوت القلب قالي يمكن من لان جسمه نحيف وشكله عندده انيميا او اعتقد انه مافيه شي بس احتياطا اعملي اشعه ايكو في مستشفى دله . انا قلت اوكي عشان اشيل كل الافكار اللي براسي ... ورحنا لدله عند الدكتور زهير طاهر

رحنا مستشفى دله وبالقوه اخذت موعد بالتلفون عشان اشعة الايكو ، رحت الساعة 7 مساء قالوا ماعندك موعد بس ممكن ندبر الموضوع وفعلا كلم الدكتور ووافق رغم انه قالولي بالتلفون انه الموعد اوكي
معلومه عن اسعار الايكو : سعر الاشعة 1200ريال + 250ريال كشفيه الدكتور لان لازم دكتور القلب يعملها له
انا كنت متاكده ان اللي في ابني شي ابسط من البساطه ، دخلت على الدكتور وحدي كالعاده لان زوجي مايحب يدخل عند الدكاتره جلست على الكرسي سألني كم سؤال عن صحته و كيف امراضه قلت له بالتفصيل كل شي
76
92K

يلزم عليك تسجيل الدخول أولًا لكتابة تعليق.

تسجيل دخول

&المبدعة&
&المبدعة&
قال يله نكشف عليه .. حط السماعة على صدر ابني وفي 10 ثواني قال هذا ثقب في القلب يااختي .. بس بشوف التفاصيل بالايكو ..
انا لما قال كذا ضاق صدري شوي لان يمكن كان عندي خلفيه بسيطه ، دخلنا غرفة الايكو دخل الدكتور مع استشاريه ثانيه ويتكلمون بالانجليزي
الدكتور ه : وش حالة الطفل ؟ الدكتور : ماعرف بالضبط بس شي مو سهل ...
لما قال هالكلمه انا حسيت قلبي طاح بين رجليني واحس ببروده مشت في جسمي .. وجلست ادعي ربي وادعي وادعي ربي
استغربت ان الدكتور طول ويتكلم مع الدكتوره و على وجههم تكشيرة وفجاء سأل زوجي : انتو تعالجون على حسابكم ؟؟\
قاله زوجي : ايه ..؟ قاله الدكتور : ماعندكم تأمين ؟ قال زوجي : لا ... قال الدكتور : وين تشتغل ؟؟ قاله زوجي وين يشتغل وسكت الدكتور
انا خفت اكثر وش يقصد بهالاسئلة لهدرجة ابني فيه شي خطير ونحن مو حاسين فيه ؟ صحيح هو دايم تعبان بس في كل شي ثاني طبيعي ...
ابني بدا يبكي وحاولت اهديه وصرخ علي الدكتور انا وياه . هديه خلاص عطيه اللي يبيه ؟؟ قلت له ان طفش ..
كان اسلوب الدكتور مره جاف
طلع من غرفه الايكو وابني اخذ هابوه وراحو في الممر ورحت مع الدكتور وهو جلس على مكتبه ويكتب ويكتب ويكتب
ومطنشني ولاهو حاس بالنار اللي فيني ... وفجاء قالي بكل برود : ابنك فيه ثقب بين الاذينين ، ووصلة في الشريان و تضخم في الجهة اليمين من القلب .. ولازم تشوفي مستشفى حكومي اما التخصصي او العسكري او الحرس الوطني عشان يعملوا دراسه ويشوفوا كيف يعالجوه ؟
قلت له وانا كلي خوف : طيب وش بيعملون ؟
قال " هم بيقولون لكم ..
قلت : لا قلي انت مو تقول هالخبر وبس خلاص قول وش بيعملون ؟
قال : بيعملون له عمليه يسكرو الثقب و يعملون دراسه ليه التضخم هذا ويسكرو وصلة الشريان ، انا خلاص دوامي خلص مع السلامه ..
كان اسلوبه مره جاااااااااااااااااااااااااااااااااااااف انا طلعت ودموعي غرقت عيني واول ماسألني زوجي : بشري وش قال الدكتور ؟؟
انا بديت ابكي وابكي وابكي وبالقوه طلعت مني كلمتين عشان يفهم وطول 4 اايام وانا بس ابكي
الين مارجعت لدكتور نفسه اطلب منه ورقة تحويل لاي مستشفى وهنا خربها معي اكثر واكثر وسألت الموظف اذا اقدر اقابل الدكتور وطلب لي الملف ودخلت على الدكتور حتى ابني مو معي ؟ وسالته اذا يشوف حالة ابني مستعجلة واذا ممكن يعطيني ورقة تحويل ؟ قام يهاوش ويخاصم ويقولي روحي ادفعي حق الاستشاره وبعدها تعالي اسأليني
قلت له انا ماجيت مراجعه ولا ابي شي غير تطمني على حالة ابني هذا ملفه ؟ وبالقوه والصراخ رضي يشوف الملف وقال كلام مو مفهوم ان حاله ابنك مو مستعجله لا اسبوع ولا شهر .. واذا فيه شي ثاني روحي ادفعي وارجعي والورقه حق التحويل مافيه شي زي كذا روحي شوفي لك امر يدخلونك أي مستشفى يله
&المبدعة&
&المبدعة&
بصراحه حقدت عليه حقد .. طلعت من عنده ورحت لدكتور ممدوح في عيادات رسلان شاف التقرير حق الايكو وهو طلب مننا انه يصوره له على سي دي بس الدكتور رفض يسلمنا اياه واستغرب من اسلوبه و تعامله وقال هذا جزار مو دكتور واساسا حتى لو ابنك فيه شي مايقولك بهالاسلوب ؟
شاف التقرير وقال ان شاءالله حالة ابنك بسيطه وماقدامه الا العافيه وحتى علاجه سهل
طمني الله يطمن قلبه ...
المهم تسهلت الامور وفتحنا ملف في مستشفى الحرس الوطني مركز الملك عبدالعزيز للقلب
اول موعد كان مع الدكتور فهد الحبشان الله يسعده يارب وين ماراح .. في البدايه طلبوا مني انه لازم ينمون نواف عشان يكون هادئ جدا وقت الايكو لان أي حركه او بكاء يخربط عليهم وهذي لازم يشوفون القلب من كل الجهات
قلت اوكي .. عطوه تقريبا 15مل منوم عن طريق الفم بعد 10دقايق نام لبسوه قميص عشان يكون الصدر مكشوف وبدء فني الاشعه يعمل اشعة الايكو وهي اشعة مثل اشعة الموجات الصوتيه بس خاصة بالقلب مو بالجنين توضح القلب والصمامات

المهم كان مدة الاشعة ساعة وربع لما خلصوا جاء الدكتور وعرف بنفسه وسألني كم سؤال جلس يراجع الصور اللي في الجهاز وحط السماعة على صدر ابني والتفت لي وقال : ابنك هذا مافيه دكتور قد حط سماعة على صدره وسمع دقات قلبه ؟؟؟؟
قلت له : الحمدلله رب العالمين كل شهر مرتين الى 3 ونحن في المستشفى بس ماعرف ليه ماحد حس فيه
المهم بعد ماخلص قال انا براجع الصور مع دكتور ثاني واقابلكم في العياده الثانيه بعد ربع ساعة ..
صحو نواف من النوم وخلونا ننتبه له .. وبعد ربع ساعة جا الدكتور وجا ورقه عليها رسمة قلب واورده وقال
ابنكم عنده فتحة في الأذينين وعادة مثل هالفتحات ممكن نعمل لها قسطره عن طريق شريان من الفخذ وهي زي المظلتين يرقعون الثقب اذا كان في وسط الجدار
مثل هذي الصوره الفتحه في وسط الجدار وعلى شكل دائره هنا كان ممكن ينعمل لها قسطره مثل الصوره الثانية



بس في حالة نواف الثقب جاي كبير وفي نهاية جدار الفاصل بين الاذينين ومايصلح لها القسطر
وحالته كانت مثل هالصوره بس الثقب كبير


لازم جراحه بس ترا الطب تطور والحمدلله الشريان سليم مافيه شي زي ماقال دكتور مستشفى دله والتضخم بسبب الفتحه والدم اللي يروح في غير مكانه وعادة مثل هالثقوب تجي مع تشوهات في الاورده اللي تجي من الرئة بس مااقدراعرف الحين قبل العمليه مباشره نعمل له اشعة مقطعية صبغية .. يعني نحط صبغة مع الدم ونعرف وش النتيجة .. بس لاتخافون وعاملوه طبيعي وخلوه يركض ويلعب طبيعي زي ماكان والفرق بين ابنك والطفل الطبيعي ان االطبيعي يمرض يومين ابنك بمرض 10ايام وماعنده طاقه للعب والركض وتنفسه سريع ودقات قلبه قوية ..
بس خليه طبيعي الين الله يسهل ونعمل العملية ان شاء الله
الدكتور كان شرحه وافي وجلس يرسم ويشرح كيف القلب الطبيعي ومشكله ابني
تعامله كان راقي ولطيف ورجعنا بيتنا متطمنين رغم انه عرفنا ان حل المشكله عملية بس كنا مرتاحين بسبب اسلوب الدكتور وطريقه شرحه
بعد 3 شهور اتصلوا علينا عشان العمليه بس كان نواف مريض وقالو لازم يكون سليم تماما وفي احسن حالته
وطلبوا ننتظر 14يوم عشان يصير تمام
وانتظرنا وقبل رمضان بيومين كان جمعة اتصلوا علينا وسألونا كيف صحة نواف ؟ قلت لهم الحمدلله كويس
قالوا خلاص جيبوه الظهر يترقد ...
فعلا رحنا المستشفى اخذو منه دم وفحوصات و والساعة 7 قالوا يبدا صيام عشان الاشعة بيعملونها 9ونصف مساء
الساعة 9 وربع اخذوه وماسمحو لنا ندخل غرفه الاشعة بس الدكتور والممرضات وكان اصلا عاطينه منوم عشان لازم يكون هادي ..
رجع الغرفة وبعد ساعتين جا الدكتور يعلمني النتيجة .. وقال" للاسف طلع عنه تشوه في 3 اورده طالعه من الرئة اليمني المفروض ان اثنين يكون في الجهة اليسار من القلب واحد في اليمين صارو كلهم في جهة القلب اليمين وهالشي اللي مسبب تضخم الجهه اليمين بسبب الفتحه وبسبب الدم اللي في مكان الغير صحيح وخلى الضغط على هالجهه من القلب بس كل هالمشاكل تنحل في العمليه مره وحده يرتقع الثقب و تتعدل الاورده
ولما سألته كم سؤال : قال يجاوبك عليه الجراح قبل العمليه بكرا الصباح بيجي وكل التفاصيل يعطيك اياها بس لاتخافين كل شي ينحل بكرا بإذن الله ..
صحى ابني وطلبو مني اعطيه اكل عشان بعد كذا بيصوم
وفعلا من الساعة وحده ونصف منعوا منه الاكل الا المويه وعصي التفاح والساعة 3 منعوا منه كل شي
طبعا هو جنني يبي رضاعته لانه ماينام الا فيها .. لاتضحكون علي تقولون عمره سنتين و 9 شهور ولسه رضاعه ؟؟
بس انا كنت ارحمه لانه ضعيف مره تخيلو كان وزنه قبل شهر 9 ونصف كيلو وفي احسن حالته زي ماكان وقت العمليه 10كيلو ونصف
الساعة 7 الصباح جاء الجراح الدكتور عبدالله الغامدي الله يسعده وين ماراح
دكتور مبتسم وسمح وشرح لي بالتفصيل الممل كل شي بيعملونه في العملية وحتى المضاعفات النادرة الحدوث بس قال مابي اخوفك بس لازم اقولها
كان اسلوبه رائع ولو قال شي يخوف كان اسلوبه يحسسك انه شي بسيط ، وقالي ان نسبه نجاح عملية نواف 98% الى 99% وانه بيسكر الثقب ويعدل اماكن الاورده و علمني على اطفال معي في القسم نفس حالة ابني
وقال الغريب انه في نفس الشهر مرت عليه مثل حالة ابني 3 حالات وهي الشي غريب وكثر هاليومين وعادة ماتجيه هالحالات كثير بس المفروض اني افرح لان انسب عمر لمثل هالعمليات من عمر سنتين الى 5 سنوات وان ابني الحين في الوقت المناسب والمكان المناسب عشان علاج حالته وان الاطفال الصغار دائما شفاءهم اسرع من الكبار في هالحالات
وطلع بعد ماطمني على ان كل شي بإذن الله بيكون تمام
على فكره الجراح عبدالله الغامدي هو اللي بيعمل العمليه كانت اول مره اقابله ويشوف نواف
والدكتور فهد الحبشان هو اللي يتابع الحاله بس ماله علاقه في العمليه الا انه يعمل الاشعة قبل وبعد العمليه
الله يسعدهم ويسهل امرهم ويفرج همهم ويعطيهم الصحة والعافية ولكل من احبابهم ياارب
المهم الصباح الساعة 7ونصف جو وجهزوه وخذوه لغرفه العمليات انا طلعت معاه الين دخلوه غرفه العمليات وهي ممر كبير فيه كل المرضى اللي عملياتهم في الصباح سمحوا لي ادخل معه الممر وانا اقرا عليه واستودعه الله وبعد 10دقايق طلبوا مني اطلع خلاص
مدة العملية من الساعة 8 الى الساعة 1 بالضبط 5 ساعات
طلع الدكتور وانا كنت بعيده رحت اجيب مويه وكانت امي عند الباب حق غرفه العمليات
انا كنت وحدي زوجي ماجى كان في البيت وقلت له مو لازم تجي الا على نهاية العملية بس اهلي غصب عني جوا
سأل الجراح وقال : وين ام نواف ؟؟ ابي ابشرها ...
امي اتصلت علي ورجعت ركض وكان الدكتور راح العناية المركزه
لحظات وطلعوا ابني من غرفة العمليات انا طول الامس ونفس اليوم مانزلت دمعة وحده الله ثبت قلبي وقواني
بس لما شفت ابني كذا دموعي نزلت بصمت مادري هي فرح او رحمة على ابني الضعيف ، مادري هي خوف
جاء زوجي وامه ... ابوي ، امي ، اختي كلهم استغربوا ليه لما خلصت العمليه بكيتي وطول الوقت اللي هو في العمليه ماغير اسولف واسولف عن حركات ابني امس لما رقدوه وكيف بهذلني
ماخلونا ندخل العناية مباشرة خلونا نصف ساعة الين ماثبتوا فيه كل الاجهزه وقالو بس الام والاب بس
دخلنا وكان كل مكان في جسم ابني طالعه منه انبوب من رقبته ومن فخوذه الاثنين ومن بطنه والقسطر و من خشمه ومن فمه مثل هالصوره بس هو سريره كان اكبر لان عمره 3 سنوات



رحمته مرااااااااااااا وقلبي تقطع ودموعي تنزل بس بهدوء مو بكى .. جاء الجراح وقال كل شي تمام وصار زي مايبون الحمدلله
الحمدلله رب العالمين حمدا كثيرا بلاحدود
طبعا انا ماسمحوا لي ابقي في المستشفى لان العناية المشددة مافيها مرافق مع الطفل بس اجي زيارت واليوم الثاني طلعوه الصباح في غرفه عاديه ورجعت انا معه رغم اني لما رجعت البيت يوم العملية قلبي كان بيوقف من خوفي عليه وكل شوي اتصل ورحت في بعد العشاء شفته وطلبوا مني مااطول لانه لما حس فينا بدا يبكي وهم مايبونه يتعب
الصباح رجعت معه في غرفه خاصه منعوه من الاكل طول اليوم برضو على المغذي
بعد العملية بيوم صار معه زي البلغم في صدره وكان هالشي طبيعي وعطوه جلسات فينتولين 3 مرات في اليوم طول 5 ايام وخف وراح الحمدلله وحتى جارتي في الغرفه ابنها مر بنفس البلغم عشان كذا عرفت انه طبيعي
اليوم الثالث بعد العمليه سمحوا له ياكل بس هو كان مو راضي ياكل طلعو انبوب الاكسجين من خشمه والانبوب اللي يوصل للمعده وبقي انبوب واحد طالع من فخذه للمغذي وانبوب طالع من بطنه ونهايته زي القربه الشفافة يضغطون عليها عشان تمص الدم اللي حول منطقة القلب وكل كم ساعة يجون يسحبون الدم من هالقربه ويقيسون كم مل ويفضونها مره ثانيه و سحبوا هالانبوب من بطنه 4 يوم بعد العمليه لما شافوا ان نسبه الدم طبيعيه لان القلب دائما في محيط سائل
زي صوره الانبوب اللي طالع من بطن الولد اللي بالصوره وهالشي طبيعي بعد اي عملية قلب ولايخوف



بعد 5 ايام من العمليه سمحوا له يطلع البيت مع ادوية طبعاً كان مر على رمضان 4 ايام ونحن في المستشفى
واحد من الادوية كان اسمه كابتوبريل وهو دواء للضغط الدم وقالوا لي انه كل طفل يعمل عملية قلب لازم ياخذ هالدواء عشان القلب يضخ الدم بقوه في الاورده ومايبون الضغط يرتفع 3 مرات في اليوم
والثاني دواء اسمه فييرسومايد وهو مدر للبول عشان السوائل الزيادة في الجسم واللي سببها العملية مرتين في اليوم
وعطونا برضو اسبرين مره وحده في اليوم
وهذي صورتها

وكل هالادوية لمدة 3 شهور
على الفكره الدكتور قال لاتمنعونه من شي عاملوه كطفل طبيعي خلوه يلعب ويضحك ويعمل اللي يبيه بس انتبوه على جرحه لاحد يصدمه فيه او يطيح عليه لمده 6 اسابيع
طبعا هنا المعاناة لان عندي ابني اصغر من نواف ب سنه وكان حركه ولعبه عنيف الله يهديه هو اللي خوفنا بصراحه
طلعنا والحمدلله وعطونا موعد بعد 3 ايام عشان الغرزه اللي في بطنه اللي كان طالع منها الانبوب اما فتحة الصدر كانت غرزها من نفسها تذوب
ملاحظة : ابني بعد العملية نبضات قلبه صارت هادية وخفيفه مو زيا ول كنت احس بنبضاته على كتفي اذا ضميته كانه كان يركض وتنفسه صار هادئ وقت النوم ونفسيته تعدلت وحتى وزنه الحمدلله زاد بشكل ملحوظ وهذا كان المتوقع بعد العمليه لان هالمرض يسبب عدم زياده الوزن
عطونا موعد مع الدكتور 12/10 طبعا الموعد كان قبل يومين بالتحديد رحنا للدكتور فهد الحبشان
وعمل له اشعة ايكو والحمدلله قال القلب سليم وطبيعي وخلاص حتى الادوية وقفوها مايحتاج يكمل 3 شهور
انا من فرحتي اعيد عليه 3 مرات
كل الادوية اوقفها
يقول لي كل الادوية خلاص ويراجعنا بعد 6 شهور مره وبعدها كل سنه مره بس عشان نتطمن وخلاص ابنكم طبيعي والحمدلله
طلعنا ورجعنا لحياتنا الطبيعية بدون ادوية وبدون قلق مواعيدها والعمليه وهمها والحزن والغم مره زي الحلم في لحظات
نصيحتي لكل ام انها تدعي الله في كل لحظه
الله يثبت قلبي ويقويني عشان اساعد ابني ... الله يثبت قلبي ولايجعله قلب جازع ..
انا كنت دايم ادعي هالدعاء واحمدلله واشكره كل لحظه والحمدلله الله ثبتني في لحظات ماكنت اتخيل انها بتمر علي وانا قوية لان ابني كان يحتاج قوتي في لحظة ضعفه
الام هي العامود اللي المفروض يبقي قوي عشان العائلة تستمد منه القوه هذي عشان كذا لازم تكون قويه وتتحمل اللحظات اللي بتشوف الابره تغرس في ابنها ومرات كثير كان امهات يصارخون على الممرضات لانها تحاول تسحب دم بس ماتلقي الوريد ،، هذي الممرضه ماتستمتع بتعذيب ابنك بالعكس هي نفسها انها من اول لحظه تسحب الدم وخلاص
بس االاطفال اورديتهم صغيره ويبي لها حرص
لازم تكوني قويه عشان في لحظات ابنك بيطلب منك اكل او رضاعة ولابتقدرين تعطينه وقلبك يتقطع وودك تبكين
بس مافيه فايده ان ابنك يبكي وانتي تبكين كذا تخوفينه اكثر وتضيقين صدره
لازم تكون مبتسمه وضحوكه مع ا بنك طول الوقت بعد العمليه لاني والله استغربت من نفسية ابني كان زعلان مني طول اليوم اللي بعد العملية كان موراضي يكلمني ولا يبتسم في وجهي ولما سألت الدكتور قال هذا طبيعي لانه يحس انكم انتو سلمتوه لنا ونحن خليناه يتألم مو فاهم اللي حاصل له بس فاهم انكم المفروض ماتخلونه وحاولو انكم تكسبون رضاه بأي طريقة
وفعلا صرت اعمله حركات هباله وتهريج الين خليته يضحك وبعدها صار يكلمني ويبتسم وطلب مويه وطلب لعبته وتعدلت نفسيته على طول من بعدها
عشان كذا اقول لكم لاي وحده بتمر بمثل ظروفي هذي او مقاربه لها لازم تكوني قوية
انا كتبت هالتفاصيل كلها لهدف واحد انه أي احد بيمر بمثل هالتجربة يتفاءل
اي وحده تمر بمثل حالة ابني وعندها اسئلة اواستفسارات كثير عن التجربه اللي مريت فيها انا وابني انا موجوده عن طريق الخاص او عن طريق رقم جوالي اللي في توقيعي وارحب بمساعدتها في حدود تجربتي ،، يعني بمثل اللي مريت فيه ،،
اخذ مني الموضوع وقت طويل اجهزه وابحث عن صور للشرح ولتقريب الصوره لكم وحطيت كم صوره شخصية من واقع تجربتي
فإذا استفدتوا مني الرجاء الدعاء لي بان الله يحفظ لي اولادي وزوجي واهلي يارب سالمين معافين ياكريم
والله يشفي جميع مرضى المسلمين يارب
مبيعاتي
مبيعاتي
الف الحمدلله على سلامته ربي يخليه لك ويرزقك بره والحمدلله انهم اكتشفو من البدايه الثقب
متجر ضي القمر
متجر ضي القمر
الف حمد لله على سلامته اقرء القصه واحس الدمع بعيوني لحظات اليمة مريتي فيها ولك اجرها ان شاء الله وعاد تصدقي عنه وعن اخوه دايما وجعلها اخر الاحزان :(
متجر شمس
متجر شمس
الحمد لله على سلامته وان شاء الله تشوفينهم كبار وبارين فيك والله يسعدك بشوفتهم صالحين بارين