فوتشيني آلفريدو بالبروكلي و الدجاج المشوي

السلام عليكم حوّائيات
جبتلكم طبق ألذ من باستا مطعم بياتو بألففف مرة !

أنا عن نفسي دايمًا أحب الأكل اللي يبدولك بسيط بس يوم تاكلينه تتفاجئين بالنكهات اللذييذة و المختلفة اللي تدغدغ حليمات التذوق 3/>
فعشان كذا حبيت أحط لمستي الخاصة على الطبق و أول مرة جربته في جمعة عايلة و ما بقت منه فتفوتة و العيال الصغار شوي و يبوسون إيديني هههه

المقادير كفاية لـ12 شخص :

علبتين باستا فوتشيني بيرفيتو
علبة كريمة طبخ متوسطة الحجم
علبة كريمة خفق صغيرة
كوب كبير جبن موزريلا
كوب كبير جبن تشيدار مبشور
ملعقة صغيرة طحينية سايلة
حبتين ثوم مدقوقين ناعم
ثلاث قرون شطة حمراء مجففة و مجروشين
أصبع زبدة
4 صدور دجاج
بروكلي حسب الرغبة
بودرة ثوم
ملح
كركم
حبتين ماجي
ملعقة صغييرة كمون
فلفل أسود
3 إلى أربع ملاعق زيت نباتي
ربع كوب ماء

الطريقة :

نحط البروكلي المقطع في قدر مع ملعقة ملح من 8 إلى عشرة دقائق و نغطي القدر.

"الصوص"
ناخذ صاج عميق أو قدر متوسط و نحط كوب من كريمة الخفق و كوب من كريمة الطبخ و ناخذ الزبدة و هي بحرارة الغرفة (لازم قوامها قشدي) و نضيفها للكريمة و نظل نحركه لين تذوب الزبدة .. بعدها نضيف الثوم و الفلفل المجروش و نحركه لين يختفي الثوم مع التحريك .. لما تبدأ الكريمة تغلي أضيف كوب جبنة الموزريلا شوي شوي مع الخفق اليدوي لين تذوب تمامًا ثم أضيف بقية الكريمة و أضيف عليها جبنة التشيدر و نخفقها لين تذوب و نضيف ملعقة الطحينة السايلة و ذوقيه لو كان ناقص ملح بالنسبة لذوقك ملحيه.
"الدجاج"
تتذوّب حبة ماجي مع الزيت بالماكرويف ثم ينصب على الدجاج و يتبهر بملح و فلفل و ملعقة كمون صغيرة و ملعقة كركم و ينقص بوسط الدجاج خطوط طولية و تتدخل فيها التتبيلة عشان تتشرّب الطعم أكثر و يتغطى و يدخل الثلاجة لكم ساعة كل ما طال وقته بالثلاجة كلما تغلغلت النكهة .. عقب تطلعينها يا تشوينه بالفرن و قبل يستوي بكم دقيقة تدخلين معه فحمة حارة في صحن و ينكب عليها زيت عشان ياخذ طعم المدخن و اللا تشوينه عادي اللي يريّحك .. عقب يستوي يتقطع شرايح بالحجم و الطول اللي يناسبك.
آخخر شي عقب يتجهز كل شيء تنسلق المكرونة لين تستوي تمامًا و يضاف لها كل المكونات و تمزج و يضاف لها ربع كوب ماي ساخن مذوّبه فيه حبة ماجي و تملحينه بعد لإن البروكلي يحبب الملح و شوي بودرة ثوم و بالعاافية ;*

مب لازم نفس المكونات كل مرة إلعبي سوي شيء جديد .. مرة إقلي الدجاج مرة استخدمي دجاج بالبقسماط غيري أنواع الجبن و اللا زيدي لها و ضيفي مكونات .. جربتها أنا مع جبن بالأعشاب بدل التشيدر و قليت الدجاج و هو مقطع طويل و نحيف و زدت للمكونات بودرة ثوم و ملعقة صغيييرة صويا معتدلة لين تحمّر و طلع طعمه يجنننن و مرة جربته مع دجاج غمسته بالطحين و معه فلفل كايين و بابريكا و ملح و بودرة ثوم و ثم ببيض ثم بالطحين مرة ثانية و قليته و قليت على جنب ألوان الفلفل أحمر مع بصل بالإضافة للبروكلي و الصوص و طلع طعمها رووعة

و الصور اللي أنا حاطتها تصوير جوال أختي لإني عادة ما أهتم أصور و ظالمة الصورة الفوتشيني جددًا .. بس من اليوم وطالع بهتم أصور *-*


أول مشاركة لي و أتمنى تعجبكم ^-^