تقريري : أنواع خياطة العجان بعد الولادة

بسم الله الرحمن الرحيم ..

تقبلوا مني خلاصة بحثي و تجاربي الناجحة
و أرجو بشدة من كل من لديها اعتقاد أو فكرة معاكسة لكلامي تطرحها بذوق
مع العلم أنني متأكدة من صحة ما أقول لأنه نتيجة بحث شاق و تجربة عميقة جداً
و هذه المعلومات قد تكون ناقصة و لكنها تعطيك الأساسيات و تصحح المفاهيم
المنتشرة بالمنتديات .. و اخترت مصطلحات بسيطة و كلام عامي حتى تصل لكم المعلومة
بشكل أوضح ..

طبعاً أكيد عارفين لابد من عملية التوسيع أثناء الولادة لمساعدة الطفل على الخروج
غالباً يكون الشق جانبي " مائل " حتى لا يصل إلى فتحة الشرج

الخياطة العادية بعد شق الولادة :
بعض المستشفيات ما تخيط الا البكرية بس
و بعضهم يتركوا الطفل يشق من حاله و بعدين يخيطون الشقوق ( هذا للي عندها اطفال من قبل )

بالنسبة للشق فخياطتهم كالتالي :
1- خياطة السراجة معليش المسمى من عندي
هذي خياطة الحكومي بس خياطة خارجية و غالباً تكون أي كلام
و الخاص يسوي نفس الخياطة بس يرتبونها كويس و يستخدمون أحيان خيوط تذوب و تنفك لحالها أو
خيوط تضطرين تشيلينها بالعيادة ..

2- الخياطة الداخلية : و ركزوووا عليها رجاء , لأن للأسف منتشرة بشكل خاطيء في المنتديات
و اسمعوها مني
يخيطون لك الشق من الداخل و أحيان يخيطون بعد من الخارج و لكن الغالب فقط من الداخل عشان
المنطقة من برا ما تتشوه من الخياطة و الخيوط تذوب لحالها ( بعضكم يسميها كبس و هذا غلط )
للأسسسف الشديد إن هالخياطة بنوعيها ( من الداخل فقط - من الداخل و الخارج )
منتشرة بالمنتديات انها (العملية التجميلية اللي عادي تحملين بعدها ) ما أعرف من جاب لكم هالمسميات ؟

و هذا غلط لانها تجميلية شكل و مظهر من الخارج فقط ما راح تشدك اكثر ..
ممكن لانها مرتبة و ملمومة تساعدك باننطباق المنطقة على بعضها كويس و تحسي المنطقة مضبوطة
يعني أبسطها اكثر ممكن تشد بنسبة 10٪
و تأكدي لو ما رافقها عوامل عناية ما بتحسين بفرق عن الخياطة العادية , و للعلم إن هالخياطة أكثر عرضة
للالتهاب بسبب الخياطة الداخلية ف شوية التهاب راح تخلي هالخياطة تنقلب عليك
حابة أذكر ميزة هالخياطة إنها كويسة بالمظهر و تساعد قليلا على منع المنطقة من الارتخاء و ألمها شوي
أشد من الخياطة العادية
لما تروحون للعيادة و تقولكم الدكتورة ايوه هالخياطة عملية تجميلية فهي تسلك لكم لان كثير يروحون العيادات
يقولون لهم نبغاها و هم فاهمين إنها تشد و تضيق .. فصار عند الدكاترة انطباع انكم تسمونها كذا فماشيين معكم تسليك .. ركزوا و التكرار يعلم الشطار هي اسمها خياطة داخلية و ليس خياطة تجميلية و اذا قالوا لك المستشفى
الا هذي تجميل فهي تسليك او الا يوهمونك عشان تدفعين عليها مبلغ اكثر
مع ان اذا طلبتيها بالخاص تكون مشمولة مع الولادة من غير رسوم إضافية
لانها نوع عادي من انواع الخياطة بس تسرجها تسريج ما تقص زوايد و لا تشد

ف اللي عندها مفهوم إن الخياطة الداخلية اسمها ( عملية التجميل اللي عادي تحملين بعدها )
رجاء تمسحها من قاموسها

ملاحظة هامة : الخياطة الداخلية ( التجميلية ) تنعمل بعد الولادة أما عملية التجميل ما تنعمل بعد الولادة أبداً
تكون بعد الولادة بشهرين أو أكثر ..

العملية التجميلية :
تشد المنطقة و ما بعدها ولادة طبيعية لو فكرتي تحملين بتكون ولادتك قيصيري ..
و هذي العملية معقدة مو بسيطة
اعرفي لو سدحتك الطبيبة عندها بالعيادة و خربطت فيك تراها شقت و خيطت بسسسس
اما العملية التجميلية لاززززم يقصون و ممكن يورونك الزوايد اللي شالوها و غالباً تتطلب
رفع للمثانة لانهم شادين كل شي و المثانة بتصير نازلة ، ،
و الاهم لاااااااااازم تخدير كامل أو نصفي بس حسب علمي انه كامل .. لأن الشغل طويل و غير
محتمل و اكيد ألمها شديد و يتطلب 6 أسابيع على ما تتحسنين
زيها زي أي عملية جراحية ..

اصحوا تصدقون اللي تشتغل لكم بالعيادة هذي تسوي لك ( خياطة داخلية فقط )
معرررروف طبياً إن أي عملية جراحية تتطلب تخدير كامل أو نصفي و ليس موضعي
و طالما سدحتك بالعيادة فهي مجرد قص و لزق ما تقدر تشيل لك أي زوائد بسبب
الخوف من حصول نزيف و ما تقدر تسيطر عليه لأنها ورطة .. ف بس تقص و تخيط
و ابحثوا في التجارب و تتأكدون من صحة كلامي ..

اللي عندها شك بكلامي تبحث بالمقالات الطبية و كلام الأطباء قبل لا ينضحك عليكم
في العيادات اللي بمجرد ما شافوا هوس الحريم بهالموضوع صاروا يستغلون ضعفكم
و حاجتكم .. فلا تطيرون فلوسكم ع الفاضي ..

و اللي ناقصها مصادر تطلبني و أجيب لها و تتأكد بنفسها
لا تكون ضحية الإشاعات و كلام الحريم و نصب المستشفيات ..

- تم بحمد الله -

لي عودة بموضوع آخر عن العناية الصحيحة بالخياطة