تبين تعرفين ليش انتي موب سعيده مع زوجج؟ تعالي اقول لج!!

الأسرة والمجتمع

السلام عليكم ورحمه الله وبركاته


اللهم اني اعوذ بك ان اضل او أُضل او ازل او أُزل او اجهل او يجهل علي او ارتكب معصيه لا تغفرها لي


اخواتي حبيباتي ..

بحكم عملي في مجال الاستشارات الاسريه

حبيت انقل لكم بعض خبراتي البسيطه التي اكتسبتها في علاقاتي مع العملاء

اخيتي تكثر في مركزنا الشكاوي على الزوج واصبح قانون الاسره مائل لصالح المرأه وللأسف استغل هذا القانون استغلال سيء مما ادى الى زياده حالات الطلاق

في هذا الموضوع احب ان اعطيكم بعض القواعد لكي تستمري في حياتك مع زوجك بهدوء وتؤدي حقه وتأخذي حقك من زوجك بالحب والموده والرحمه



عندما خطبك زوجج تكونت في ذهنج صوره ذهنيه حلوووووه في ذيك اللحظه زوجج كان كامل بلا عيوب في عينج حتى عيوبه كانت مميزات وحتى مستواه المادي البسيط كنتي تنظرين له بأمل وتقولين في نفسج انا احبه وبتحمل الحياه معاه ولو في عشه من قش!

وبعد الزواج!

ماالذي يحدث ؟؟

تبدا الصوره الذهنيه تتغير لييش ؟

وتبدا المشاكل ليش؟


انا بقول لكم

زوجج ما تغير ولكن في عوامل كثيره تدخل في حياتج تغير صوره زوجج في ذهنج بس هو هو ما تغير!

من هالعوامل مثلا:


1- المقارنات!

زوجج موب زوج اختج ! زوجج موب زوج رفيقتج زوجج هو زوجج!

لو كان زوج اختج غني ويسفرها وزوجج ما يقدر يسفرج هاي موب مشكله زوجج هاي مشكلتج !

لو كان زوج رفيقتج رومنسي وزوجج موب رومنسي هاي موب مشكله زوجج هاي مشكلتج

حطي ايجابيات زوجج تحت المكرسكوب وكبريها قد ما تقدرين في عينج اما سلبياته صغريها لا تشوفينها
لو ما سافرتي السنه موب لازم ما نقص منج شي لانج ما سافرتي واعرفي ان السفر موب فرض على زوجج انه يسفرج !! لو كل اهل بلادج سافروا موب يعني ان انتي لازم تسافرين!!!!!

وصدقيني اختي كل ما دخل الشيطان مخج وبدا يوسوس فيه ويقارن زوجج بزوج غيرج كل ما عشتي بكدر ونكد وراح تكرهين زوجج وممكن تتطلقين منه بهالسبب وواجد ناس كان سبب طلاقهم المقارنات


قصه:

احدى الحالات هي بنت صغيره بعمر 27 تقريبا من عائله فقيره ودوله مختلفه عن دوله زوجها لديها على ما اتذكر 3 اخوات متزوجات ولديهن عيال تزوجها رجل قريب من الخمسين انجبت منه طفل زوجها غني لدرجه كبيره اسكنها في منزل كبير غرقها بالفلوس لدرجه انه قام بشراء مزرعه ابل لأبو الزوجه،، الزوجه لم تتقبلها عائله الزوج لان لها تصرفات غريبه فهم صدمو بأن كل اخواتها المتزوجات قد خلعن ازواجهن وقامت هي بالاعلان عن ذلك ليس عند نسوه العائله فقط بل حتى رجال العائله بدؤو يسمعون ان اخواتها تطلقن !!!وهدفها ان يتزوجن من عائله زوجها ولكن هيهات كل العائله بدأوا ينصحون اخواتها بأن يرجعن الى ازواجهن فان الله الغني يغني من يشاء وربما لو صبروا على ازواجهن لكان خير لهن!!!!


2-الانتقاد!!!


كثير من الازواج ينفرون من زوجاتهم بسبب كثره الانتقاد وفي فرق بين انتقاد المرأه والرجل !

الرجل اذا انتقد منج سلوك معين فهو لا ينتقد ذاتج ولكن ينتقد سلوكج مثال :

ابنج طاح وتعور على الارض وانتي ما كانت رده فعلج سريعه تجاه هالحادث وقال لج يالبارده! هو ما يقصد انج طول حياتج معاه بارده لاااااا
هو يقصد ان سلوكج في هاللحضه يتسم بالبرود


اما انتي لو انتقدتي زوجج فانتي تنتقدينه لذاته ما تنتقدين سلوكه !! مثال


زوجه تشتغل وزوج يشتغل الزوجه حنونه كل راتبها تنفقه على عيالها ومحد جبرها على انها تنفق راتبها كله على عيالها هي من نفسها وزوجها ما كان ينفق على البيت موب لأنه بخيل لكن لأن محد يطلب منه انه يجيب اغراض البيت او يشتري ملابس للعيال ولو اطلبت زوجته منه كان عطاها كل فلوسه في هالموقف تجي الزوجه في اي موقف زعل بينهم تطلع عيوب زوجها وتشتغل انتقاد

تقول له انت ما تتحمل مسؤوليه البيت وانا شاله مسؤوليه البيت على راسي!!!! انت موب مفتكر فيني انت وانت وانت وانت ،،، الحين كل شي صار سلبي فيه وصار الشرير اللي ما يدري عن البيت وما يدري عن شي

شفتي المرأه تنتقد الرجل لذاته ولكن ما تنتقده لسلوكه!!!!



3- التجسس:

التجسس وسوء الظن راح يوديج في داهيه

انت مع زوجج عايشه معاه على ثقه هو يثق فيج وانتي تثقين فيه

وبقول لج شي:
لو كنتي تدورين شي فراح تلقينه

ولو كنتي تدورين على زوجج الزله راح تلقين الزله

وراح تتغير الصوره الذهنيه في عقلج من صوره ثقه الى صوره خيانه وشك

وراح تكتأبين وتزعلين وتصيحين وتحرقين قلبج ولا راح تقدرين تسوين شي وراح تكونين قدام ثلاث خيارات:

1- تسكتين عنه وتعيشين معاه فيج غصه
2- تواجهينه وراح يبدأ يكلم ويخونج قدامج وبعلمج وراح تتغير معاملته لج للأسواء
3- تتطلقين منه


وفي هالحلات الثلاثه انتي الخسرانه!!!!

لازم تعرفين شي زوجج موب معصوم وانتي موب معصومه بعد!
وحطي في بالج ان هالرجل ممكن يخونج وممكن لا لكن انتي قومي بحقه الشرعي عشان تقيمين الحجه عليه اما اذا انتي مقصره معاه فلا تلومين الا نفسج وخصوصا في مسائل الفراش!!!


4-التكبر والعجرفه!!

انتي مليانه عيوب والحمد لله ان زوجج متحملج!!!
ليش تتكبرين عليه مين كنتي!!
تبينه كامل بدون عيوب انزين انتي شفتي نفسج !
لا تطلبين من زوجج يكون كل شي غني حنون رومنسي طيب حبيب كشخه يسفرني غني يدلعني يجيب لي هدايا بزنس مان رشيق معضل ما يهاوشني يثق فيني ما ينتقدني ما يقول لي شي يخليني اروح كل مكان واطلع على كيفي يعزمني على فندق يسوي لي حفله يوم ميلادي و،،، و،،، و،،،و،،،و،،،،

وانتي يالشيخه اذا ما سوا لج هالاشياء تبدينتبرزين عيوبه وتشوفين نواقصه لكن عمرج ما فكرتي تشوفين مميزاته الفريده زوجج في مميزات كل بنت تحلم فيها بس الشيطان خلاج تصدين عن هالمميزات ،، والشيطان كبرج في عيون نفسج لكن الشي اللي ما تعرفينه انج صغرتي في عيون اللي حولج وطحتي من عينهم...!


زوجه ذكيه تتذلل لزوجها فرفعها الله هذه الزوجه كان زوجها بذيئ اللسان ولكنها لاتنظر الى لسانه بل تنظر الى قلبه فهو طيب وكريم ومجتهد ويعمل ويكد عشان هالزوجه ما تحتاج تشتغل ،،في يوم من الايام حصل للزوج موقف سلبي في عمله وكان معصصصب دخل البيت وقال للزوجه حطي الغدا الزوجه حطت الغدا ولكنها زادت الملح اشوي بالغلط .....الزوج صرخ عليها وشرشحها وسبها :انتي ما تفهمين انا ما ادري اشلون لين الحين مستحملج انتي وانتي وانتي.....
فهالموقف بكت الزوجه وقالت له:انا من يوم بديت اصلي كانت كل دعاوتي يارب ارزقني زوج يستحمل عيوبي !!والحمد لله الله رزقني انت وانت من كثر طيبتك استحملتني وما وديتني بيت هلي وطلقتني!! وراحت غرفتها!
زوجها لحقها وصالحها وحب راسها قال لها انتي والله شيخه وفوق راسي وانا لو الف العالم ما احصل وحده مثلج!!




5- اهل زوجي هم اعدائي!!!

تظن معظم الفاشلات في الحياه الزوجيه ان اهل الزوج اعداء ولازم ابدأ بالهجوم قبل الدفاع وهذا في نظري قمه الغباء فالمرأه بدالها عشر لكن اهل الزوج هم اهله
اكسبيهم حبيهم حتى لو هم سيئين احتسبي الاجل من الله عز وجل ! انتي تعاملينهم بأخلاقج موب اخلاقهم بقول لكم قصه


كانت هناك زوجه متزجه رجل له اهل سليطين اللسان لا يعرفون يحشمون حد الزوجه كانت تحاول تكسبهم بأي طريقه ولكنهم ارفضوها ومع هاي هي تحتسب الاجر من الله عز وجل كانت ما تذكر عند زوجها مواقفهم معاها وما تذكرهم الا بالخير تقول حق زوجها امك هي امي واختك اختي !! اشتر حق امك هديه ! سفر امك وسع صدرها !! ياحبيبي بر امك انت الفايز !! ياحبيبي امك اولى مني اعزمها على مطعم!!!
في المقابل اهل الزوج ما يذكرون زوجته عنده الا بالشر يسبونها ،ويوزونه عليها ويقولون له طلقها تزوج عليها الخ،،،،
الزوج ذكي وبدأ يقارن وانحاز لزوجته وقال لها لا تروحين لهم الافي المناسبات لاني ادري في اللي يصير فيج وصج كبرتي في عيني يالغاليه!!



6- البقاء على ذمه اهلي!!!!!!!!

من الاخطاء الكبيره اللي تقع فيها المرأه هي انها لما تزوجت زوجها ما طلقت اهلها!!من ناحيتين هي:


1- الطلاق المادي: انتي اذا تزوجتي الرجال خلاص هو ملزوم فيج وعيشي بمستواه حتى لو كان اقل من مستوى هلج هو يصغر في عين اهلج لو اهلج يكدون عليج حتى بعد الزواج!! وعلى فكره انتي تخربين زوجج لانه بيستانس على الوضع انتي لابسه ماكله شاربه راكبه سياره هلج كله على حساب هلج لااااااااااااااااا خطأ بتندمين عليه لانج بترخصين في عينه وهو بيطيح من عين اهلج!!

2- الطلاق المعنوي:الطلاق المعنوي يعني موب كل هوشه تصير بينج وبين زوجج تنقلينها حق هلج حليّ مشاكلج بروحك بقول لكم قصه:


وحده متزوجه رجل جابت منه عيال وعاشت معاه في يوم من الايام طولت لسانها عليه ظربها كلمت اهلها جو اهلها اظربوه وخذوها وقالو له خذ عيالك وطلقها هي مع الوقت حنت حق زوجها ما تبي اهلها تبي ترجع له اهلها ارفضوا ومع الزن رضو كلمت زوجها وردها اليوم مر على هالقصه خمسه وعشرين سنه لين اليوم اهلها يذكرون لها السالفه وما نسوها لزوجها القاعده


"الزوجه تنسى لكن اهلها ما ينسون خطأ الزوج"

قصه اخرى لأسره اكثر حكمه
زوجه طولت لسانها على زوجها ظربها شلت شلايلها وراحت حق اهلها قالو لها سامحينا ما راح نستقبلج اطردوها من البيت ردت ذليله لبيت زوجها ،،، زوجها كبرو في عينه اهلها ،، البنت تعلمت درس انها تحل مشاكلها في بيتها ..


7-انتهاك خصوصيه الزوج:

حبيبتي الزوجه الزوج ما تزوجج حلاله مشاكل هو يحب يحل مشاكله بروحه واذا لجآ لج شوري عليه لكن اتركي عنج الحنه والزنه على راسه تبين تعرفين هو اشفيه لو يبي يقول لج بيقول لج بدون ما تسألينه !!

قصه:

زوجه كسرت صحن ام الزوج فاتصلت بها لكي تعتذر لها عن ذلك وقالت لها ام الزوج لا يهم في المال ولا العيال !
في نفس الوقت دخل الزوج على ام الزوج ولكنه سمع اخته في الصاله تتحدث مع رجل غريب وتتغزل فيه فار غضب الزوج فضرب اخته حتى هلكت !
رجع الزوج الى منزل زوجته غضبان قال لها جيبي لي الجرريده في الغرفه قالت له اشفيك قال مافيني شي قاالت وين كنت قال كنت عند امي قالت له :بل مسرع ما قالت لك!! قال :شنو ؟
قالت :امك مسرع ما كوكتك عليّ كل هاي عشان صحن!!!
فار غضب الزوج وانهال عليها ضرباً

هالقصه روتها ناعمه الهاشمي في احدى دوراتها

القاعده
"الزوج ينسحب اذا واجهه مشكلته لا تحاولين تعرفين مشكلته هو لما يحلها بيرجع لطبيعته"


وسبحانك اللهم وبحمدك اشهد ان لا اله الا الله استغفرك واتوب اليك

38
6K

يلزم عليك تسجيل الدخول أولًا لكتابة تعليق.

تسجيل دخول

احنا بشر
احنا بشر
3
اي والله التجسس مصيبه حرقه دم , وتعب, واذا كان اهو خوان صعبه يتغير , الوحده تعيش علي عماها ابرك
"ســونــة"
رائعه جدا

اخيتي اشكرك جدا على ه الطرح الرائع

وهذا الحال الحاصل في اغلب البيوت


والسبب الرئسي في المشاكل بين الزوجين هي نفسها التي تطرقتي لذكرها

نفع بها الجميع واتمنى من الاخوات الاستفاده من هذه النقاط
بنت الشريف الهاشمي
جزاكـ الله خير
666 بدون اسم
666 بدون اسم
جزكن الله خيرا
ابهاويه والحلا فيه
جزكن الله خيرا
جزكن الله خيرا
الله يعطيك الف عافيه