أكشن ولادتي ببنوتتي ربي يحفظها بمستشفى الولاده ببريده

الحمل والإنجاب

السلام عليكم
حيالله اخواتي الغاليات
وبالذات اخواتي في تجمع
اكتوبر ونوفمبر وديسمبر
ويشهد الله انكم مثل خواتي
وماقصرتو معي خلال فترة حملي وكنتوا خير معين لي بنصايحكم وتطمينكم لي
الله لايحرمني منكم وربي لايحرمكم مادعيت لكم
وربي ادعيت لكم مثل مادعيت لنفسي وماهوكثير عليكم تستاهلون كل خير
واتمنى انه تستمر علاقتنا ببعض ولا تنقطع

طولت عليكم
اليوم اكتب لك اكشن ولادتي الرهيب في مستشفى الولاده ببريده
في يو 24 ذي القعده وقبل المغرب بشوي كنت
متمدده عند التلفزيون جيت اقوم
يوم نزلت معي مويه انا انهبلت حسبالي سويتها على نفسي رحت للحمام اتاكد طلعت موية الجنين
لانه ماكان لها ريحه
عندها طار راسي وتدودهت لانه توني مادخلت التاسع
اخذت لي دش سريع وتنظفت وقومت زوجي قلت له نزلت مني مويه
وطيران للمستشفى بعد انتظار ساعه ونص جا دوري وهالمره رضخت للدكتوره وسوت كشف داخلي قالت الرحم منفتح 1 ونص وراس الجنين بالحوض بس المويه الي نزلت كانت قليله مقدار نص كاس
قلت لها بطلع قالت خلاص بس على مسؤليتك وطلعت لان عيالي ماعندهم احد
رجعت للبيت بعد صلاة العشا
وكان معي مغص بسيط قلت يمكن من الروعه
جلسنا بعد العشا انا وزوجي وعيالي بالصاله
ومادريت الا زي الكيس انفجر مويه نزلت على ملابسي والارض والفرشه
قومت الجميع للغرفه ودخلت اغير وربي تقولون طالعه من مسبح
وارجع ثاني مره للمستشفى وبعد ماكشفت الدكتوره وشافت نسبة الماء قالت خلاص لازم ترقيد المويه تقريبا نزلت كلها
ولازم اترقد علشان يعطوني ابرة الرئه ومضاد يخافون من البكتيريا
طلعت فوق بدو يعطوني ابر الرئه والمضاد وعلى الساعه 12 عطوني طلق صناعي لانه انفتح الرحم عندي 2 ونص بس ماراح ينتظرون لانه المويه خلصت
على الساعه 3 بالليل ناديت الممرضه وبالمناسبه كانت فلبينيه وقلت نادي الدكتوره زاد الطلق علي وجت دكتوره هنديه
كشفت علي وقالت لسى 2 ونص
جت الساعه خمس صليت وانا جالسه
من شد الوجع وانادي الدكتوره مره ثانيه على الساعه ست قلت لها انا خلاص تعبانه ومافيني حيل قالت انتي فيه دلوعه انتي مافيه ولاده اول
قالت باقي لك ولازم تنتظرين لحد مايجي الاستشاري يشوفك لانه توك مطوله
وربي ضاقت بي الدنيا من كلامها قالت لي امشي
بالممرات
لبسة عبايتي وبديت امشي بس يجيني الطلق امسك الدربزين واوقف مافيني شده رحت لغرفه بجمبي وطلبت منهم حلتيته اشمها لان الحلتيته الي معي اخذتها وحده بجمبي اول ماترقدة لانها كانت تتولد
المهم استمريت على هالحال نص ساعه اخر شي
تغيرت الورديات وراحت الدكتوره الهنديه وجا بدالها دكتوره سعوديه والمرضات جو سعوديات
سالت الممرضات من المسؤله عن غرفتي وعني وكل هذا وانا اطلق وبالممر قالت وحده انا مسؤله عنك امري وكانت الممرضه اسمها اشواق
قلت لها خلاص انا تعبانه مافيني حيل والهنديه تقول توني قولي للدكتوره السعويه ابي عمليه خلاص تعبت وتمسكني وتوديني للسرير لانها شافت وضعي البائس ونادت الدكتوره السعوديه وقالت لها اني تعبانه مره
جت وكشفت
وهنا المفاجاءه

كان الرحم فاتح 8 سانتي ارتجفت الغرفه واختبو ولاده ولاده
وانا خلاص سمعت الكلمه بديت ادفع ماقدرت اتحمل ودفوني بسرير الترقيد
وطيران للكشك وصلته والراس شبه طالع
وانا على سرير الترقيد وعلي عبايتي وملابسي
ولدت على نفسي
تخيلو الوضع انحاست الدنيا وبنتي وسعتني مع كل محل
لان حضرة الدكتوره الهنديه تقول انه توي
حسبي الله عليها وين ماكانت دعيت عليها لين مليت
اخذو بنيتي وانا اقول لهم هي حيه هي تصيح هي تتنفس
جلست شوي واسمعها تصيح
بعدها نسيت كل شي مر علي من وجع وتعب جسدي ونفسي
خيطوني وخلوني بالملاحظه من الساعه 7 ونص لحد العشا لانه ماكان فيه اسره فاضيه بالترقيد
وكانو ياخذون لبنتي كل ساعتين تحليل سكر علشانها جايه قبل وقتها
بالنهايه
اقول الحمدلله الي يسرلي وقومني انا وبنتي بالسلامه
واقول الصراحه فرق في تعامل الممرضات السعوديات معنا لدرجة الممرضه اشواق احتفضت باغراضي الشخصيه وجوالي وجت للكشك تطمن علي بعد الولاده
الله يجزاها خير ويرزقها الرجل الصالح يارب
هذا اكشن ولادتي مع العلم انه كان لي صدمه ثانيه مع المستشفى يوم ترقدت بنتي علشان الصفار بقسم اطفال كبار وكان بالغرفه طفلين فيهم فايروس بالرئه وبنتي حديثة الولاده معهم انجنيت لحد ماطلعتهامن ذي المستشفى الخايسه
وسلامتكم
عارفه ان هذرتي كثيره بس قلت اعيشكم الوضع صح بكامل تفاصيله


ولادتي كانت ب25 ذي القعده
وجت بنوتتي ايلان ونورة كل المكان
اشوفكم على خير
57
9K

يلزم عليك تسجيل الدخول أولًا لكتابة تعليق.

تسجيل دخول

سدرة تميم
سدرة تميم
مبروك وجعلها الله من مواليد السعاده
مميزة ومالي شبيه
الحمدلله على سلامتك وسلامة البنوتة
madyh11
madyh11
ما شاء الله
الحمد لله ع سلامتك الم والله بالنا كان معاكي
الله يخليلك ايلان ويحميها هي واخواتها
بس سوال شو معنا اسمها
e7sas_malekh
e7sas_malekh
الحمدلله ع سلامتكم الله يخليها لك
روته
روته
الحمدلله على سلامتك ياقلبي ويحفظلك بنوتتك يارب وعقبالنا