pampered child

pampered child @pampered_child

محررة ذهبية

كل ام عندها طفل بعمر السنه الى سنه ونص تجي ابيها

الأمومة والطفل

اهلين
اخباركم
حبيت اكتب الموضوع هذا عشان نفيد بعض بالاكلات اللي نعطيها لعيالنا
كل وحده ياليت تقول عمر بنتها او ولدها وتعلمنا وش تعطيها من الاكلات ووشي الاكلات اللي تحس انها تفيد وتمتن
ووشي الاكلات اللي مايحبها طفلها
عموما ببدا بنفسي

:) :) :) :)
عمر بنتي سنه وشهرين تقريبا

عدد الرضعات : اعطيها باليوم 3 رضعات تقريبا
استخدم حليب نيدو بالعسل
مااحاول اكقر عدد الرضعات عشان يكون لها شهيه بالاكل

اذا قامت الصباح افطرها
احيانا اعطيها زبادي
او توست بجبن صب عليه شاهي<<<على حسب المزاج احيانا ماتبيه
واحيانا بيض مسلوق
والظهر اعطيها رضعه



واذا جاء وقت الغداء اغديها
احيانا شوربه كويكر
او شوربه جريش
او رز مو شوربه
او جريش
او سليق
او شوربه مع مكرونه مع شوي رز اخلطهم مع بعض


واذا جاء العصر اعطيها عصير او رضعه


واذا جاء العشاء اعشيها اي نوع من نفس الاصناف حقت الغداء اللي ذكرتها فوق


وقبل وقت النوم اعطيها رضعه وفي الليل اذا نامت مااعطيها رضعه ابد الى لين تقوم من بكره
اذا صحت من النوم وبكت تبي رضعه اعطيها رضعه فيها مويه وبس مااعطيها حليب


بالنسبه للاشياء اللي اشتريها لها من السوبر ماركت
اشتري لها دانينوا بالفراوله زي الزبادي بس صغير
امس انا في السوبر ماركت شفت حليب بالفراوله من نادك شريته لها بس لسى ماجربته افكر اعطيه اياها في العصر بس عساها تتقبله لان مزاجها صعب مو اي شي تحبه:09:

السيريلاك ماتفكر تذوقه ماتحبه ماادري ليش
المهلبيه كانت تحبها بس مدري وش جاها ماعاد تحب تاكلها
وكريم الكراميل نفس الشي ماتحبه
بسكوت الاطفال الخاص اللي مع الشاي او الحليب ماتحبه<<<مغلبتني مو كل شي يعجبها:09:

تموووووووووووووت بالبفك عرفتوه هذا البطاطس اللي اسمه فش فاش او بفك بس انا مااحب اخليها تاكله احسه مضر مره

ماتحب الشوكولاته
احيانا تحب الموز واحيانا لا <<<مزاجها يجيب الهم
تحب عصير البرتقال



وهذا اللي جاء ببالي
يالله عاد دوركم علمونا وش نظم عيالكم مثل مافصلت لكم
وياليت تعلموني الاشياء اللي تمتن وتقوي مو شرط تكون دبه بس ابيها قويه :42: :42:
125
489K

يلزم عليك تسجيل الدخول أولًا لكتابة تعليق.

تسجيل دخول

درة البحرين_947
بنتي عمرها سنه و 14 يوم
احاول كثر ما اقدر إني ما اكثر الحليب عندها وخاصه بالليل
اعطيها بس رضعه وحده وساعات ما اعطيها الحمد الله


والاكلات إلي اعطيها

الفطور :

افوح لها كوسه وبطاطس واهرسها لها واعطيها إياه
او
جزر وكوسه ونفس الطريقة
او
بيض


الغذاء :

اهرس لها بطاطس ورز ودجاج او لحم وكوسه واهرسه لها واعطيها
او افوح لها خضره بس واعطيها


العشه

اهرس لها خضره مع إي نوع من البروتينات



وبين الوجبات اعطيها فواكه
اعطيها قطعه تفاح او جزر واعطيها بإيدها واخليها تتعلم تاكل بنفسها بس طبعاً انه جالسه معاها علشان ما تغص فيه
او اعطيها دانينو إلي مثل الزبادي
و اعطيها كل يوم وجبه من السيريلاك على الساعه 3 العصر يعني بين وجبه الغذاء و وجبه العشاء
ام قودي
ام قودي
انا بنتي عمرها سنه ونص
تجيها حالات ترفض الاكل ..حسب المزاج يعني المزاج حاله مشتركة بين الاطفال
بس انا حبيت اقولك اشياء ان شاء الله تفيدك
1- مثل ماقالت درة عوديها تاكل بنفسها مثل انك تعطيها شي بيدها او اجيب لها صحون ملونه واقطع اللقمة واغرسها بالشوكة(شوكة اطفال) واناولها لها بتتشجع تاكل

2- حلو لو تشرب بالكوب بنفسها ابو مزاز عشان ما تتوسخ ملابسها لو كان كوب عادي

3-حاولي انها تاكل من اكلكم اليومي عشان تتعود الطعم لانه بعد السنه مافيه ضرر من اي اكل حتى الاكلات مثل البيض

4- عوديها تمضغ!! لانه فيه اطفال يتعودوا على البلع زي الاكل المهروس ولا عاد يعرفوا المضغ حتى لو كبروا!!!
um hana2
um hana2
بنتي عمرها سنه و3 شهور
اذا صحت عطيتها حليبها ((ماتروق الين تشربه هههههه))
وبعدين بعدها بشوي
اعطيها يا كورن فلكس
او بيض (مسلوق او مقلي عادي او توست مغمس ببيض- او بيض بطماطم وخضار)
او ساندوتش جبن وسلطة فواكه
او اذا صحينا كلنا سوى تفطر معانا
ومع اي وجبه من هذول زبادي فواكه ...كل يوم نكهه تحبه مره

والغداء
تاكل معنا (رز-خضار-مكرونه-سلطات-شوربات----الخ)
واحيانا ازيد لها شي يناسبها اذا صار الاكل دسم بزياده ولا فاست فود مافيه فايده

والعشا
تاكل معانا بعد
ولا اسويلها اكله خفيفه
او عصير فواكه طازج ثقيل

وبين الوجبات اذا صار ما ناكل الا وجبتين في اليوم
اعطيها مووز -كيك خفيف او
اعطيها بسكوت خاص للاطفال
زي هذا (تعرفونه كلكم)

او

او


وماشاءالله عليها بنتي اخاف عليها احيانا
شهيتها مفتوحه هههههه
ما اعطيها شي وترفضه ((اللهم لك الحمدل والشكر صحتها زينه))

اللهم اني احمد واشكرك -- اللهم احفظ لي بنتي واحفظ لك ام عيالها --
آآآآآآآآآآآآآآآآآآآآآآمين
PINEAPPLE
PINEAPPLE
أنا عند ي بنت قد بنتك وولد عمره سنة...


يحبون الدانينو وتري التوت أطعم شئ...والزبادي السادة...يشربون حليب روناجرو... والأكل من أكل البيت يعني ياكلون مع الناس مالهم شئ مخصص...أحياناً أخلي الشغالة تسلق لهم ماش وتأكلهم... يشربون حليب بالفانيليا وعصير منجا.. طبعاً العبوات الصغار أحسن شئ...عندي البنت تحب الزيتون عشان كذا أشتري لها دايماً الزيتون الأسود بدون بذر... والولد الله يهديه يموت علي الليمون...
أحاول قدر الإمكان ما أعطيه علي إن الليمون يكافح الأمراض...دايماً يقولون إن الليمون ما يخلي الطفل يتكلم بسرعة.. ما أدري عاد صدق و إلا أي كلام..
طايحة هالأيام أعطيهم سمن بري وعسل... قلت لعل وعسي...
pampered child
pampered child
دره البحرين
مشكوره على مرورك
حتى انا احيانا اخليها تاكل بسكويت من نفسها او تفاحه اقطعها واخليها تمسكها او خيار
بس لااااااااازم ارجع البسها من جديد لانها تحوس نفسها حوس
ياملحها بس

ام قودي
نصايحك حلوه ومفيده مره
مشكوره على مرورك


ام طلال ولين
من جد فاطمتها عن الرضاعه حرام صغيره على الاقل لو بس مره او مرتين باليوم
انا صرت استخدم نيدوا لها من صار عمرها سنه بس ماافكر افطمها حاليا عنه احسها صغيره على الفطام
طبعا انا مارضعها طبيعي بس صناعي


ام هنا
من جدك تعطينها سلطات احس توها صغيره على السلطه
كيف تمضغها
بالنسبه لي بنتي ماطلع لها الا سنين تحت بس
خخخخخخ

باينبل<<<عجزانه احول الكيبورد انجليزي خخخخ
شكلك مخبطه كيف عندك بنت زي بنتي وولد عمره سنه
يعني بالله كم بينهم
حملتي وولدتي بشهرين
خخخخخخ
انا بنتي عمرها سنه وشهرين تقريبا
اكيد انتي مضيعه بالعمر تاكدي ياقلبي

ياعمري ولدك يحب الليمون احس انه قوي شوي على معدته

ومشكوره على مرورك