إدام باكستاني باللبن على طريقة صحبتي الباكستانيه ( روعه لايفوتكم )

أطباق رئيسية

بسم الله الرحمن الرحيم
اخذت طريقه الادام من 4 سنين وكل ماطبختو الكل يعرف اني اسوي هالادام من الريحه
وتقدري تسوي الادام وتضيفي معاه البطاطس
وانا احب اسويه مع البطاطس
ومعليش الموضوع بدون صور لأني فجأه اتحمست انزل موضوع

...

ورح اكتب المقادير على قد دجاجه واااحده واذا تبغي تزيدي الدجاج زيدي الكميه من المقادير
وانا افضل اي طبخه جديده تسويها لاتستهلكي كل الدجاج فيها خلي التجربه الأولى بحبه دجاج او نصف دجاجه
لكن زي مانوهت المقادير (( لدجاجه واحده ))

...

اولآ / المقادير ،،

جيبي بطاطس حسب رغبتك وقشريها وقطيها لنصفين وانا احب اسلق البطاطس بقدر ضغط لحالو عشان بسرعه يستوي
وبعد ماتسلقيه حطيه على جمب

...
جهزي الدجاج وقطعيها ارباع وبعدين افصلي الرجل من الفخذ واذا كان الصدر كبير قطعي نصفين
وفي معلومه حطيها ببالك كل حبة دجاجه تساوي كوب لبن شراب (( قبل ماتبدائي بالطبخ حطي كوب اللبن وخليه برا الثلاجه ))
واذا طبختي نصف دجاجه حطي نصف كوب لبن شراب وهكذا ...

جهزي علبة صلصه (( انتبهي لاتحطي عصير الطماطم ))

حبتين بصله متوسطه مفرومه فرم ناعم , وحبة زنجبيل طازج قشريها وافرميها فرم ناعم , ملعقتين طعام ثوم طازج مفروم
2 قرن فلفل حار مفروم فرم ناعم

(( البهارات ))
ملعقة طعام ممسوحه فلفل اسود مطحون , 2 ملعقة طعام كزبره ناشفه مطحونه , ملعقة طعام كاري , ملعقه صغيره كركم ,
ملعقه صغيره من بهار الشطه ( وتقدري تتحكمي فيها اذا تبغي حراره قويه حطي ملعقه طعام واذا تبغي حراره معتدله حطي ربع ملعقه صغيره )
في معلومه ابغى اقولها عن بهار الكاري في شركة مهران وفي شركه ثانيه جدآآ رائعه واحب بهار الكاري حقها وجارتي قالتلي عليها
مكتوب على العلبه اسم الشركه بالانقلش National
وانا احط من النوعين ملعقه ممسوحه من بهار الكاري حق مهران وملعقه طعام ممسوحه من الي بهار الكاري الي اسمه بالانقلش
انا اخذتو من بنده
(( وعلى فكره انا مااحط كمون ابدآ بـ الادام ))
وجهزي كل هالبهار بصحن صغير على جمب

....

وجهزي 10 حبات قرنفل

(( سر ريحة ونكهة الادام ))
تجيبي هيل حبشي او هيل اسود روحي العطار وقولي ابغى هيل حبشي او هيل اسود ورح يعطيكي
يعني نوع واحد يكفي رح يعطي نفس النكهه بس انا عندي النوعين ف احط النوعين
اما الكميه المناسبه للطبخ ف هي 5 حبات تكفي

ولبن الشراب جهزيه وحطيه برا الثلاجه زي ماقلتلكم بمقدار كوب واحد

وجهزي المويه المغليه على جمب

وقبل مااعطيكم الطريقه لااشوف وحده تضغط على الاكل بقدر الضغط مرره رح يخرب الاكل معاكي عن تجربتي


الطريقه /
حطي مقدار فنجان قهوه من الزيت بقدر لين يسخن وبعدين جيبي البصل وحطيه عالزيت واقعدي حركي شوي
وبعدين حطي الثوم المفروم والزنجبيل المفروم والفلفل الحار المقطع وقلبي شوي وبعدين حطي الـ 10 حبات من القرنفل
وحطي الـ 5 حبات من الهيل الحبشي وقلبي فيهم لين تحسي بدائو يذبلو البصل والثوم والزنجبيل
وبعدين حطي الدجاج وقلبيه مزبوط وبعدين حطي صحن البهارات الي جهزتيها بالقدر وقلبي فيه وحطي شوي مويه
عشان تتقلب البهارات مزبوط
وبعدين حطي علبة صلصه كامله عالدجاج وكمان حطي شوي مويه عشان الصلصه تذوب بالقدر وقلبي فيهم
وبعدين حطي مويه مغليه بحيث انك تغطي الدجاج لا تحطي مويه فوق الدجاج ولا اقل وزبطي الملح حسب رغبتك
وارمي 2 قرن فلفل بدون تقطيع بالقدر
وغطي القدر وخليه لمدة 20 دقيقه على نار هادئه جدآ وبعد مرور 20 دقيقه جيبي البطاطس الي سلقتيه وحطيه بشويش بالقدر وبعدين
كل شويه راقبي الوضع واذا شفتي المويه نقصت زيدي بحيث مايسير المويه اكثر من الدجاج
عشان نبغى المرق متوسط مانبغااه خفيف ولو زدتي المويه فوق الدجاج مو مشكله بس اهم حاجه المرقه لاتسير مره خفيفه
وبعد مرور 10 دقائق جيبي كوب اللبن وحطيه عالادام وقلبيه مزبوط وذوقي المرق اذا احتاج اي تعديل من ناحية الملح او بهار الشطه
وبعد ماتحطي اللبن بس خليه على النار من 5 الى 10 دقائق وطفي النار
وزينيه بالكزبره الخضراء

...

ملاحظه تقدري تسوي جميع الخطوات وتستغني عن كوب اللبن برضو يطلع لذيذ

...

وممكن تسوي على جمب رز ابيض وتقدميه مع الادام

...

حابه اوضح مدة الطبخ بشكل كلي 35 او 40 دقيقه على نار هادئ
بعد مرور 20 دقيقه نحط البطاطس وبعدين نصبر 10 دقائق وبعدها نحط اللبن وبعد مانحط اللبن نخليه على النار 5 او 10 دقائق وبس
حبيت اوضحلكم

وصحه وعافيه للجميع
113
51K

يلزم عليك تسجيل الدخول أولًا لكتابة تعليق.

تسجيل دخول

springdeer
springdeer
يسلموووو 👍
ام اصيل الحجازيه
الله يسلمك يارب
ركايز
ركايز
لااله الا الله
تسلم الاياادي ياارب
زائرة
تسلم يديك
*أم المنصور*
*أم المنصور*
جزااك الله خيرااا