عادات وتقاليد الزواج تختف من بلد الى اخر

مساءكم خير او صباحكم خير يا صبايا يا حلوين

اليوم جايبتلكم موضوع خطر على بالي نتكلم فيه
لنشوف عادات كل بلد بالخطوبة والزواج
للمعرفة والدردشة مش اكتر
بالنهاية كلنا عرب وكلنا اخوان ولازم نتعرف على عادات وتقاليد كل الدول
المطلوب منكم انو كل وحدة اذا حابة تكتب عادات وتقاليد اهلها او مدينتها او بلدها بهالموضوع لنتعرف على بعض اكتر


اليوم انا بأبدا اول وحدة وبكتبلكم عاداتنا اهل غزة بالزواج والخطوبة

يا طويلات العمر اول شي بنبدا من عمر الشاب الي بدو يتزوج لازم يكون بين ال 24 وال 30 سنة انو عنا اقل من هيك بيعتبروه صغير عالزواج والمسئولية واكبر من كدة بيعتبروه كبير

والبنت بالعشرينات بتكون بالجامعة او مخلصة جامعة
وكتيييير بيفضلو البنت تكون موظفة

اول شي ام العريس بتشوف انو ابنها صار بعمر الزواج وقادر عالمسئولية بتفاتحو بالموضوع وبيقبل وبتقعد تعمل اتصالاتها تدور
على بنت الحلال الي بتريدها لابنها
وبتجمع قائمة من الاسماء وبتبدا تفرفر عليهم وحدة وحدة
هادي حلوة هادي مش حلوة هادي طويلة هادي قصيرة هادي سمينة هادي ما عجبهم اهلها وهييييييييييك لحتى تحفا رجليها من الفرفرة ويقع النصيب وتلاقي بنت الحلال اللي تناسب ابنها

اول شي بتبدا القصة باتصال تلفوني من ام العريس لام العروس
بيدور الحديث بينهم عن انها حابة تخطب من عندهم لابنها وابنها بيشتغل كذا وهيك ام العروس بتقولها تفضلو باليوم الفلاني

بيجي اليوم المحدد بتروح ام العريس مع وحدة او 2 من جماعتها بتشوف العروس والعروس بتقدم القهوة وبتقعد معهم شوي وبتروح
اذا العروس عجبت ام العريس بتحكى لابنها عن العروس وبيتصلو باعهل العروس ليحددو موعد لحتى العريس يشوف العروس
بيروح العريس وامه وابوه وبيشوفو العروس وبيقعدو مع اهلها
وبيقعد العريس مع عروسته عى انفراد ليتعرفو على بعض يعني مش اكتر من 10 دقايق وبيروحو
تاني يوم بيتصل ابو العريس وبيطلب البنت رسمي وليفكرو اهلها بالموضوع ويسألو عنه
تقريبا المهلة بتكون مش اكتر من اسبوع بيحددوها بين بعض
ممكن بهالفترة العريس يطلب يشوف العروس مرة تانية
وممكن العروس تطلب تشوف العريس كمان مرة لتعطى رايها
وابو العروس واخوانها واعمامها بيستنفرو وبيقعدو يسالو من هنا وهناك وما بيخلو حد ما بيساوه عن العريس
بيسالو عه بالشغل والجيران والمسجد واصحابه حتى ممكن يسالو عنه بالداخلية ليكون من اصحاب السوابق ههههه
يعني حالة اعصاار بيضرب البيت

طيب هنا العروس بتكون فكرت وفكرت واستخارت وابوها بيسالها عن رايها لانو عنا راي البنت هو الاساس

بيتصل والد العريس وبياخد الموافقة او الرفض
بيتفقو على موعد لحتى ييجو وجاهات ومختار العيلة ويطلب البنت رسمي عالعلن من ابوها واعمامها ووجاهات ومختار عيلتها
وبيتفقو عالمهر والشبكة وكلشي وبيقراو الفاتحة

بعدها بيتقفو على يوم كتب الكتاب وبيروحو العرسان مع ابهاتهم و2 شهود عالمحكمة الشرعية وبيكتبو الكتاب وبيوثقو العقود بشكل رسمي

وبتروح العروس لبيت العريس لتتغدا مع اهله وتتعرف على عيلة زوجها واخواته
وبيروحو بيشترو الدبل والشبكة العريس والعروس وامهاتهم

بعدها بكم يوم بيتفقو على موعد تلبيس الدبل وبيعملو حفلة صغيرة ببيت العروس
والعروس بتلبس فستان حلو ونعوم وبيلبسو بعض الدبل وهم خجلانين
وبيسهر العريس ببيت العروس او بيطلعو يسهرو سوا
بعدها بيتفقو على يوم حفلة الخطوبة واللي بتكون بقاعة حفلات
وحفلة الخطوبة بتكون طبعا من بابها لمحراابها تكاليفها على اهل العروووس
ما عدا ان العريس عليه تكلفة فستان العروس
وبهاليوم بينبسطو اهاليهم وبيرقصو وبيتعرفو على بعض
والعرسان بيكونو لسة خجانين وبيبين هالشي عليهم وهم بالكوشة كل واحد متر بعيد عن التاني ههه
وبعد الخطوبة بيصير يطلعو وينزلو براحتهم ومكالمات وهدايا ومطاعم وسهرات بجد احلى ايام
وبيطعو بينقو عفش بيتهم وبيجهزوه والعروس بتشتري جهازها وملابسها
وبتفصل فستان العرس وبتجهز لحفلة العرس وبتنظمها وبيروحو بيختارو الصالة وكوشتها وترتيباتها والذي منه
وبهالفترة العروس بتصير تزور بيت حماها وبتنعزم عندهم كتير
وبتنعزم عند بيت اعمام العريس واخواله
زالعريس برضو بينعزم عند اهلها واعمامها واخوالها
وبيفرحو فيهم وبينبسطولهم كتير

بنيجي لليوم المنتظر
طبعا بيكون كل شي جاهز البيت وقاعة الاحتفالات وجهاز العروس

وفيه عنا عادة انا ما بحبها ابدا مع انها حلوة والكل بينبسط فيها
وهيه يوم ( تعليق الجهاز )
بهادا اليوم بتكون عروستنا جهزت كل ملابسها ومشترواتها ورتبتهم بشنط سفر
بيجي العريس بياخدها هية وشنتها وطبعا اهلها وعماتها وخالاتها بيكونو معزومين عالحفلة
بتروح على بيتها مع عريسها بيكون باستقبالهم اهل العريس وعماته وخالاته وقرايبهم
بيوصلها العريس وبيروح ما بيحضر الحفلة
بيقعدو يرتبو الملابس بالخزائن وبيتفرجو عالملابس اللي شاريتها العروس وبيعلقو الجهاز وبيعملو حفلة صغيرة وبيروحو
والعروس طبعا بتكون جايبة هدايا لام العريس وخواته وبدله الفرح تبعت العريس عاللعروس بيكونو منقيينها سوا
ومن هادا اليوم خلاص العريس ما بيعود يشوف عروسته الا بيوم العرس (ممنوع)
ليلة العرس بنيجي لحفلة ليلة الحنة
بتلبس العروس فستان حلو ومنفوش او بتلبس الثوب الفلاحي
وبتعزم صديقاتها واهلها ( اه العريس ما بينعزمو بهاليوم)
وبتنبسط العروس مع صديقاتها واهلها وقريباتها وبيفرفشو وبيرقصو وبيجيبو وحدة بتعمل نقش حنة وبيتحنو وكدة

تاني يوم ( يوم العرس)
العروس من الصبح بتروح عالصالون او بتجيب الكوافير عندها عالبيت
بس بالاغلب بالصالون وبتعمل منكير وبدكير ومساج وحمام مغربي وكلشي لتطلع احلى عروس
بس تخلص من الصالون العريس لازم يروح ياخدها من الصالون بسيارته طبعا بتكون مزينة بورود
وبيروحو سوا على المصور بيلتقطوهم كم صورة وبيعملو البوم حلو
بعدها بيوصلها لبيت اهلها بيكون قرايبها مجتمعين بينبسطو فيها

بعدها بيبدا ملاك الرجال بنفس قاعة الاحتفالات بعد صلاة العصر
بيقعدو الرجال وعالكوشة العريس وابو العروس وبييجي شيخ
بيحكو عن الزواج بالاسلام وبيحكو احاديث
وبيسلم ابو العروس عالعريس وبيقلو زوجتك بنتي فلانة الفلانية البكر الرشيد على سنة الله ورسوله
والعريس بيقول وانا قبلت الزواج بها
وبهالمناسبة بيوزعو على كل المعازيم هدية صغير اما مصحف او تحفة صغيرة وبياكلو كنافة ليتحلو وبيروحو على بيوتهم
وبموعد الزفاف بيروح العريس واقاربه من اعمامواخوال والوجاهات والمختار
كلهم بيتوجهو على بيت العروس
وغالبا بيكون معاهم فدعوس اما زفة فلسطينية او مصرية او لبنانية وهيك
وبيدبكو على باب بيت العروس وبيطبلو وبيلعبو بالسيوف
بيستقبلوهم اهل العروس طبعا
وبيدخل العريس وابوه ومختار عيلته لداخل البيت ليستلمو العروس من ابوها واعمامها
ابوها بيوصيهم عليها طبعا على مسمع الكل
وبيسلمها لمختار عيلة العريس والمختار بيسلمها للعريس
وبيطلعو سوا من البيت وبيتوجهو للصالة
(طبعا هادي اصعب لحظة لحظة طلعة العروس من بيت اهلها لان ابوها بيصير يبكي وامها واخوانها حتى العروس مرات ما بتقدر تمسك حالها وبتبكي وبيخرب الميك اب )

بنرجع للزفة
بيمشي موكب العرس من باب بيت العروس لقاعة الاحتفالات مع الفدعوس والتصوير من باب البيت لباب الصالة ( لحظات حلوة )
طبعا كل السيارات بتوقف للموكب حتى اشارة المرور بتفتحلهم الطريق
بنيجي قاعة الاحتفال
الكل ينتظر بترقب طلة العروس
على باب القاعة بيوقفو العرسان وبيقعدو شباب العيلة يدبكو وبيحملو العريس وبيلعبو بالسيوف اكتر من نص ساعة
والعروس مسكينة واقفة بينكسرو رجليها مع الكعب

بيخلصو بيدخلو القاعة بينزفو من السيدات
وبعدها بيرقصو سلو وبيبدلو الدبل من اليمين لليسار
وبعدها ام العريس بترقص بالشموع
وبعدها خوات العريس وبعدها رقصة العروسين
وبتمضى الليلة
باخر الحفلة بيفوتو اهل العروس ابوها واعمامها وقرايبها وبيسلمو على العرسان وبيلبسوهم هدايا دهب وفلوس
وبترقص العروس مع اخوانها وزوجاتهم
وبعدها بيفوتو اهل العريس ونفس الشي بيلبسوهم هدايا دهب وفلوس وبيرقصو شباب العريس مع العريس واصحابه بيحملوه وبيطيروه بالهوا
وبتنتهي الحفلة على خير وسلااااااااام
بعد العرس بيروح على بيتهم او على الفندق اللي حاجزينو

تاني اليوم جرت العادة انو الغدا تبع العرسان اول 3 ايام بيكون على اهل العروس

بعد الفرح باسبوع بيكون محددين ببطاقات الدعوة ايام المباركة يومين او 3 ايام
بتكون اما في قاعة كبيرة بالبيت او بصالة حفلات
بهاليوم بيكون بس للبنات بينبسطو فيه
وبتبدل العروس اكتر من 10 فساتين كل فستان بلون
ولازم تبدأ بفستان ابيض وتنتهي نفستان اسود
وبتوزع على المعازيم هدية بسيطة
وبكدا بتكون انتهت ايام العرس
وبيعيشو عرسانا بثبات ونبات وبيخلفو صبيان وبنات
اسفة طولت عليكم بس حبيت اسرد التفاصيل كلها

ها شو رايكم بافراحنا ؟؟؟

وانا تعبت بكتابة هالموضوع كتبته مرتين وانحذف وهي المرة التالثة
فياليت تبادروني نفس الشعور وتكتبو عاداتكم

يلا عاد كل وحدة تشد حيلها وتكتبلنا شو عاداتهم بالزواجات خلينا نفرفش شوي بعيدا عن المشااكل الزوجية

ما تفشلوني
:27::27::27: