شوربة "السي فود" اشربيها واستمتعي .. ومافيش اسهل ولا اسرع منها:))

النهاردة جبت شوربة السي فود لمحبي الاكلات البحرية ، طبعا الكل عارف هي مفيدة قد ايه ومغذية ولذيذة كمان :)

احنا جربناها ف مطعم "الكاستن " كذا مرة ومامتى جربتها كذا مرة واخيرا ضبطت معاها ، وقلت مش ح اعزها عليكم .

كمان الواحد زهق من شوربة الفراخ واللحمة ، وميزتها انها سهلة جدا ، وممكن تحتفظي بالمكونات البحرية النظيفة والمقطعة ف كيس ف الفريزر ، وبقية المكونات كمان تحفظ مفرية ف اكياس ف الفريزر لحين الاستعمال ...... ومش ح اطول عليكم اكتر من كده .


المكونات

- قطعتين او ثلاثة صغير (5×5سم تقريبا) لحم سمك بالعظم او من غير ، انا استعملت الهامور ، ومقطعة قطع صغيرة.
- كابوريا صغيرة ، نفتح ونشيل الغطاء ونقسم الجسم نصين ، نشيل الخياشيم بتاعتها ، ونحتفظ بالقراصات كمان علشان ح نستعملها .
- جمبرى مقشر
- سيبيا "سبيط" مقطعة مربعات
:laugh2:بكلويز لو موجود ، وطبعا يكون منقوع قبلها ف الماء بفترة كافية علشان مايكونش فيه رمل .

- معلقتين اكل بصل مفري
- مقدار كبشة يد كرفس اخضر مقطع صغير ( الكرفس ده طويل وعريض زي الكرات او البصل الاخضر تقريبا )
- ملح ، شطة، ذرة كمون ، معلقتين زيت .

على فكرة مش شرط تحطي كل المكونات دي بس الاساسية الكابوريا والجمبري هي اللى بتديها الطعم الخطير .
كمان الكميات دي مش اساسية بس الافضل انك لو حتحطي كل الحاجات دي تحطي من كل حاجة كمية قليلة وح تجمل معاكي ف الاخر بكمية مش بطالة :27:



الطريقة سهلة جدا جدا جدا

نحمر البصل ف الزيت ونحط عليه نص مقدار الكرفس
ويدوبك يبدل بسيط وقبل ما يصفر نحط السيبيا وعليها الماء والملح والكمون والشطة اذا حبيتي تحطيها ن ونخليها تغلي شوية قبل مانضيف بقيت المكونات علشان هي بتاخد وقت ف السوا اكتر من باقي المكونات.
بعد 10 دقايق تقريبا حطي بقيت المكونات وزودي الماي لغاية ما يغطيها وشوية كده وطبعا كل ما الماء كميته تقل الشوربة تكون مركزة اكتر .

وسيبيهم يغلوا لغاية مايستووا ومش ح ياخدو وقت خالص يعنى ف خلال نص ساعة تقريبا حلاقي عندك شوربة سهلة ومفيدة ومشبعة كمان . وتقعدي تقزقزي بقأة براحتك :21:


ملاحظة هامة جدا جدا
اي مأكولات بحرية تحبي تطبيخيها لازم تكون مكشوفه علشان ريحة الزفارة تروح منها . يعنى الشوربة دب يا اما تسيبيها مكشوفة او تغطيها
بغطاء موارب .

جربوها وقولولي رايكم بصراحة :2thmup: