قصتي مع طليقي الذي عجزت انساه الله يجزى من يرد علي خير>>استوفي الردود

الأسرة والمجتمع

السلاك عليكم
انا مطلقه من ست شهور وقبلها خلاني عند اهلي شهر ونص
عمري 34 لما تزوجت قعدت عنده بس شهرين ونص
احبه ياناس والله حبيته
اكتب لكم وفيني غصه بس ابي افضفض
صار فيني قله ثقة بالنفس ذبحني لوم الذات وجلد النفس الوم نفسي كثير واحاول ارسم الف سيناريو شلون كنت بنقذ زواجي
تزوجت متحمسه مره دفعت فوق المهر مهر اشتريت لبس واهتميت بكل الاشياء الي تبسط الزوج من عطور ولبس ورومانسيات كان لارجع من دوامه يلقى ورود على السرير وبطاقات هديه عند مغسله الحمام لاني ادري اول مايرجع من عمله يدخل الحمام اشتقت اعطر شقتي اشتقت البس واكشخ اشتقت له هو بموت من الشوق محد حاس فيني يقولون لي اهلي محد تطلق الا انتي شوفي البنات مطلقات ولا سوو كذا
زواجي كان غريب انا قمت بزواج الحريم وهو حتى ماعمل زواج رجال ولا اهتميت اهله ماسوو لي حتى حفله لما رديت من السفر قابلوني بتكبر وبزواجي جو شايفين انفسهم علينا
لما تطلقت اكتشفت اشياء ان طليقته الاولى خالعته مو هو مطلقها مثل ماقالي انه طلقها بعد ماحاول استرجاعها وبعد ماجابت البيبي حاولت يردها ورفضت وطلقها لا اكتشفت انها خلعته بعد ماعلقها سنتين وانها تقول عنه بخيل ومايعرف يدبر ولا يحكي ولا يتحمل مسئوليه عائلتهم مفككه كلن على راحته الي يتزوج يتزوج والي يطلق يطلق طليقي بعد ماخلعته زوجته الاولى ملك على بنت عمته وبعدين ابوها طلب انه يطلقها قبل الدخول واخوه الثاني مطلق بعد بنت خاله قبل الدخول واخوه الثالث ملك على وحده وطلقها قبل الدخول وبعدين اخذ وحده من قرابتهم واستمر معاها ويقول لاخوي بعد طلاقي احمد ربك اختك ماحملت من اخوي واصلا انا مانجحت بحياتي الزوجيه الا لما ابتعدت عن اهلي واجرت بعيد ولي سنه ماطبيت بيتهم بينا خلاف واخوه الاكبر وهو صديق اخوي ودلهم علينا يقول تراه قصده على طليقي بارد ومو راعي مسئوليه وزعول كل كلمه يقولها لامي وامي مره شخصيتها قويه ومره قويه لدرجه اذا ماعطينها مصروف تهاوش وتطردنا من البيت وتراه بخيل مايهون عليه الفلس يعني طلعوا عيوب اخوهم بعد الطلاق
بس انا راضيه بعيوبه وابيه يكفي يصلي بالمسجد وملتزم بالصلاه صحيح يشيش بس انا اشوفه ملتزم
وبعدين فيه شك مو انه شكاك بطلعتي ودخلتي اصلا ماكان يهمه وين اروح واجي اهم شي لا اوديك ولا اجيبك روحي مع السايق وين ماتبين اقصد يشك بنواياي يعني لاحطيت ورود وحركات بالغرفه قال ادري انك تلبسين وتسوين هذا كله تبين تتحكمين وتسيطرين علي وتبين اخر شي اروح اجيب لك اولويز من اليوبر ماركت
احس امه معبيه راسه
لانه نزلني عند اهلي يضحك وش حليله ويولف عن الدراسه بكره انا مبتعثه وعلى اساس يسوي اوراقنا نروح سوى هو يكمل ماستر معاي مرافق وانا دكتوراه
اليوم الثاني اتصل انا مو مرتاح واستخرت وبعدين اخذ رقم اخوي واتصل عليه قال ماشفت منها الا كل خير وانا مو مرتاح ومش متقبلها بعد شهرين ونص جاي يقول هالكلام
ولما كلمني يهاوش ويرفع صوته يقول مااحبك ومابغاك وروحي اخذي ملابسك واغراضك قلت ليه فهميني وش اجرمت فيه لو انك شايفيني مدخل احد الشقه ماسويت كذا قال انتي تبيني انقلك من وضع لوضع ( هالكلمه اقهرتني يعني ماخذني من الشارع ولا من الصحراء انا مثقفه ومتعلمه وجميله وبنت ناس معروفين وحاجه مرتين ولله الحمد ومعيده بالجامعه ليه مستحقرني انا واهلي ) مره من المرات قلت له حلو السفر وحلو الواحد يسافر وتغيير ومن هالكلام قالي تدرين ليه تقولين هالكلام لانك بعمرك ماسافرتي انا انصدمت قلت الا مسافره ورايحه ومن الدول الي ذكرتها لينان قال ماضنتي رحتي لبنان وكذبني وطول شهر العسل يتمنن ويقول احمدي ربك سفرتك صح ماتوقعتي هالسفره صح ماتوقعتي تركبين قارب صح ماتصورتي تكونين بهالمكان بالبدايه كنت اجامل واقول واو روعه شهالمناظر وبعدين حامت كبدي من جد
يقول انتي تكرفيني ود وجيب بنات انا سايق اهلي يوديني ويجيبي بس احيانا يحتاجونه اهلي فاقول له ودني دوامي مدرستي جنب الشقه ويوديني اخر شي يقول لهم تقومني من عز نومي اوديها لعملها طيب سايق اهلي صار له ظرف من يوديني واصلا اغلب مشاويري مع سايق اهلي قلت غيره قال ليه تقولين خصص لي يوم بالاسبوع نطلع سوى طليقي اصدقاه كثير ويوميا يروح من العصر ليمن بالليل يجي وينام فقلت مو مشكله اطلع بس خصص لنا يوم بالاسبوع نطلع سوى ونبسط ونتمشى قال خليها على البركه وبوقتها وسكت مادرست انه شال بقلبه وحقد علي من هالكلمه يقول ايه انتي تبين تتحكمين فيني ويقول انتي تبين مصروف صحيح انا عندي راتب بس طلبت منه مصروف اصلا الحكومه تعطيه علاوة زوجيه علشان يصرف علي ولو قالي لا كنت بقول خلاص مو لازم سكت ماقال شي اثاريه شال بقلبه ليه تطلبين مصروف وقالها لاخوي اختك تبغى مصروف والسبب الثاني يقول انتي ماتستحين تشترين لاهلك هدايا بشهر العسل اول مره اشوف وحده تشتري هدايا لاهلها بشهر العسل انا انصدمت انا كنت استاذنه قبل مااشتري ويقول اخذي واصلا هداياي بسيطه وهو ماعمل زواج حريم ولا رجال والشقه اثاثها عادي وراتبه كبير هو مهندس راتبه بخدود ال15 او 14 الف ريال و بالمطارر بقى من فلوس من عمله الدوله الي احنا رايحين لها وصرفه بالمطار ريالات يعني باقي معاه فلوس مو انه مفلس وحديته يشتري واصلا الهديه الي جابها لابوي ذلني فيها كل شوي يسال وش قال ابوك على الهديه ويتمنن فيها و يقول بعد انتي ماتستحين تساليني من احلى انتي ولا طليقتي اعترف اني غلطت لما سالته هالسؤال وهو جاوبني قال انتي احلى بس تدرون ليه سالت لانه طول الوقت يمدحها واحسه لسه يحبها ومره غلط وناداني باسمها على الرغم من انه مطلقها من اربع سنوات وهي خالعته المفترض مايكون يعزها كذا وحسيت بالغيره بالبدايه كان مايهمني بس بعدين لما حبيته بديت اغار وسالته هالسوال وهو حقد ليه تسالين ومره قلت له خطبني كثير قبلك يجي 20 واحد بس نصيبي جا معاك سبحان الله وسكت عقب يقول انتي كلامك قويه فيه وحده تقول لزوجها كذا انتي ماتصلحين زوجه لي حسيته طول الفتره الي معاه ماسك ورقه وقلم ويجمع سوالفي ماتوقعته حقود لهالدرجه
ياجماعه انا مو ملاك وهو لو امسك ورقه وقلم واقعد اترصد له بالقى عيوب الدنيا لكن الدنيا ماتمشي كذا
يقولي طلباتك كثيره انا طلبت منه يطلع لي فستان للعيد و صوري وزعل ورماني عند اهلي يمكن اسبوع او عشر ايام وتراضينا وطلعت انا صوري مع اني كنت دافعه العربون ثلاث ارباع المبلغ وكان بخاطري يدفع الربع على الاقل مساهمه منه مادام ماتكلف بالزواج
اطبخ له واغسل ملابسه ويقول لاخوي من اسباب الطلاق اني مره اشتهيت مرقوق وقالت بخلي امي تصلحه ياجماعه انا سويت له مرقوق مره وماعجبه مره فقال مشتهيه قلت خلاص بخلي امي تصلحه وسكت ماقال شي لاني انا اداوم على الاقل يرجع يلقى الاكل موجود وهي مره بس ويقول تغسل ملابسي عند اهلها طيب انت دوامك شفتات ويومين اقعد عند اهلي ماغسل عندهم يعني وليه مااعترضت كان عادي الوضع عنده ويقول تقولي ودي ملابسك المغسله قلت انا يومي اغسل وهو يودي الملابس الاساسيه للمغسله لبس الدوام وكذا ومن طيب خاطر منه اما باقي الملابس اغسلها ماني فاهمه هذي اسباب طلاق
اهله يمشون بين الناس ويقولون طلقها لانها عوبه وسليطه لسان حرام عليهم انا هاديه مره وساكته لو عوبه ماسكت على معاماتهم اجل امه اول مره اجيهم تقولي بنغير اسمك مو عاجبنا ضحكت وسكت واخته تتمسخر على صديقاتي بالزواج وسكتت


انا مقهورة يابنات ويرميني عند اهلي اتصلت اعتذر عن الاسباب الي قالها قالي خلاص فات الفوت انا كذا مرتاح ومريح راسي ماعلي الا من دوامي ووناستي وبقعد طول عمري ماتزوج جربت ثلاث مرات انا ماصلح لكم يابنات ديرتي انتم يبي لكم واحد يسكر ويكفخكم مو واحد زي طيب وساكت طيب الاولى اخلعتك والثانيه اطلبت الطلاق انا وش ذنبي ماشتكيت
دقيت عليه قبل مايروح المحكمه وتريجيته وذليت نفسي وتعذرت قلت حبوب مانع ولاعبه لاعصابي وزواج وبعثه مع اني ماشوف اني غلطت هالاغلاط الي تستاهل هذا كله بس من اسلوبه يحسسك انك الشيطان الاكبر وانك مجرمه حاقد بشكل كبير
بس انا احبه احبه ياناس بخيل ومايتحمل مسئوليه ونيته شينه ويشك فيني ومايثق بنواياي بس لسه احبه واموت فيه وابيه
ارسلت له بالعده ولا رد علي ويارب سامحني كلمته بعد العده كلمني بنرفزة وش تبين رجعه ماني راجع واخر المكالمه قال فارقي فارقي
بتقولون وش تبين فيه بقول لكم انا مو صغيره ابي انجب اطفال الله العالم اتزوج غيره ولا لا هو يصلي وصلاته زينه وملتزم بالصلاه صحيح يشيش ويسمع اغاني بس من ناحيه الدين اشوفه احسن من غيره من شباب هالوقت بشهر العسل كان حليو وطبعه هادي ماهو عصبي وماكان يمنعني عن اهلي ولا يمنعن ياروح صديقاتي او اطلع عادي عنده مو معقد يعني واهم شي كان بيروح معاي دراسه
الحين انا ابكي ليلي ونهاري ابيه
بعثتي اهملتها ولا جبت قبول واحتمال تروح مني
ماني متخيله اروح بدونه
بس رجال المنتدى يعني كان متحمس ويركض باوراقي بيروح معاي راح لاهله ليله ونام عندهم ثاني يوم مايبغاني ويبي يطلقني
تهقون كان جاد بسالفه الدراسه ولو راح معاي كان بكمل
على فكره هو كان مبلش ماستر بدوله عربيه بعدين تركها ولما سالته قال ياخذون رشاوي وانا رجال راعي دين الحين احس انه ملول ومو قد دراسه ولا مسوليه ولا يدري وش يبي
امس فكرت لا جا العيد ارسله له مسج معايده بعدين خفت وقلت بخليها لايام العيد وبشوف يمكن هالمسج يحنن قلبه علي
189
81K

هذا الموضوع مغلق.

ام كعشة
ام كعشة
مامعك عقل بس تتعبين نفسك بلا حب بلاخرابيط
(زهرة البيلسان)
الله يكتبلك اللي فيه الخير لاتزعلي ولاتهتمي اتوكلي على الله
سوسنةزوجها
سوسنةزوجها
عزي نفسك يااختي عزيها
الرجال مو بس صلاته الرجال صلاة و كرم وأخلاق
لاحول ولاقوة إلا بالله
لآرين آلعسيري
لاتذلين نفسك كذا الله يهديك

الله يرزقك باللي احسن منه خلاص يكفي انه قال لك فارقي وطلقك بيعيه مثل ماباعك ولاتقولين احبه!
باسم حياتي
باسم حياتي
الله يهديك قاطه عمرك عليه

هو يقولك فارقي وتبينه ؟؟!!

وش تبين فيه خلاص باعك وانتي بيعيه....

خايفه ماتتزوجين لاء يا قلبي تطمني ربي بيرزقك باللي أحسن منه وربي يبي لك الخير يوم فارقتي هاالدجاجه ،،،


ماله شخصيه أهله متحكمين فيه اتفاقك معاه علا السفره وبعدها راح لأهله وغير رأيه وقلب عليك ؟،،،،،


امحق رجال ،،،،شلون ترتاحين له بصراحه يجيب المرض،،،،.


وكل اللي أصابك خيره من الله ولا تهملي مستقبلك كملي دراستك وربي يجيب لك الخير والأفراح مع الشخص اللي يستاهلك والعمر قدامك ،،،.،،


بس انتي توكلي علا الله واتركي عنك وساوس إبليس ...!!