شرايكم نسوي ملف لأفضل و أسوأ ما استخدمناه من مكياج لكل الماركات..ياليت الكل يشارك

السلام عليكم ورحمة الله وبركاته


انا حبيت اسوي هالملف ونشارك فيه كلنا
وكل وحدة تكتب عن اي شغله حلوة من اي ماركة مكياج استعملتها
واي شغله مو حلوة او ماتعطي نتيجة من اي ماركة
يعني مثلا استخدمتي اساس حلو
اكتبي اسمه واسم الماركة والسعر اذا امكن
واذا استخدمتي ماسكرا تدبق وتلصق الرموش وتتلف العين هم اكتبي اسمها عشان محد يشتريها ويتوهق
عرفتوا شنو اقصد؟؟

يالله ابي همتكم وابي الكل يشارك بكل اللي تعرفونه
وانا اول وحدة راح ابدي



بالنسبة للاساس
استخدمت اساس ديفينورا من جيرلان النوعين اللي غرشته زجاج واللي علبته بلاستيك
واستخدمت بودرتهم المضغوطة
وصراحة اكثر من روعه
تغطيه كامله وملمس مخملي وثبات ولون حلو
خصوصا للبشرة الدهنيه
وانا ماافكر اغيره لانه احسن شي مشى معاي


اذا بشرتج دهنيه وتبين تغطيه عادية موشرط تغطيه كامله بس ملمس حلو
استخدمي اساس سوفت سنسيشن soft sensation من كريستيان ديور يجي بعلبه تنضغط وملمسه كأنه فيه بودر يعني مايحتاي بودر فوقه
وهو رائع للبشرة الدهنية بس مثل ماقلتلكم مايعطي تغطية كامله يعني مو مال حفلات وعزايم لا حق طلعه حق جامعه جذي يعني


استخدمت بعد البودرة المضغوطة من جيفنشي رقمها 5 واااااااااااااو موطبيعية هالبودرة جزاها الله الف خير اللي قالتلي عنها نور الكويت بعد قلبي
هذي ممتازة وتقدرين تحطينها فوق اي اساس تعطيج تغطيه روعه ولون اروع


وعندكم بودرة شانيل المضغوطة هم بعد عجيبة تستخدمينها باسفنجة مبلولة وجافه على كيفج وتغطيتها كامله تنفع للعزايم


وعندكم البودرة الحرة او السائبة من هيلينا روبنشتاين لونها حلو وفيها شويييييييي لمعه حلوة مو زايدة عن الحد


بالنسبة للكونسيلر استعمل كونسيلر لانكوم اللي يجي بعلبة فيها 3 دوائر بثلاث درجات وايد حلو وثابت ويعطي تغطيه حلوة سعره 10 دنانير كويتي


الماسكارا كنت استعمل لانكوم بس هونت لان مااحسها مثل اول
واستخدمت ماسكارا كريستيان ديور الجديدة وااااااااااو ثابته وتطول الرموش وتفرقهم ومايتلزقون ببعض تينن
اسمها ديوريفكت
واي نوع ماسكارا ديور ترى حلوة قاموا يصكون على لانكوم


طبعا الاي لاينر من لانكوم بلاشك مااغيره ولا اعرف استخدم غيره


الكحل القلم عندكم نينا ريتشي فظييييع فحمي وملمسه مثل البودر وسهل بالرسم
وحتى ديور الكحل عندهم وايد حلو


الحمر والارواج عندكم بوبي براون كلشي اخذوه منهم لان الالوان تهبل والملمس هالشفايف فظيع واحسها ماتشقق الشفايف


بالنسبة للجلوس عندكم من لانكوم اللي بعلب شفافه تنضغط وطعمهم فاكهة عجيبين
وترى في منهم نفسهم بالضبط عند زارا ونفس الالوان على دينارين

وعندكم جلوس لونه ابيض من جيفنشي ابيض مو شفاف هذا حطيه فوق اي حمرا خايسة وبتطلع فظيعه انا احطه فوق حمره بيج متوسط مو فاتح ولا غامج ويطلع اللون عجييييييييييب وفيها لمعه وثابته ماتتحرك من مكانها سعره بفافافووم 6 دنانير ونص

بالنسبة للاي شدو عندكم شارمل بلا منازع عجييييب والوانه ثابته خصوصا اللون البيج الطبيعي مااستغني عنه دايما احطه تحت الحاجب
وهم شدو ميك اب فور ايفر ممتاز نفس الشي يعطيج نفس اللون اللي بالعلبه
هذي بالنسبة للاشياء اللي نفعتني

الحين نروح للاشياء اللي اي كلام وماتنفع

عندكم ماسكارا لوريال اللي ضد الماي الله لايوريكم شلون نتفت رموشي وقطعتهم وساعتين عشان انظفها وامسحها مؤذيه

وعندكم كريم اساس كلارينس واااااااي كلش مو شي
اول ماتحطينه عالبشرة ينشف ولما اجي اوزعه يتفتفت هم تحسفت على فلوسه
الآي شدو من شانيل لاتنغرون فيه وتشترونه طيعووووووووووووووني لانه لو تحفرين الكرة حفار هم مايطلع اللون ولا يصير نفس اللي بالعلبه لو شنو
يعني اذا اللون ازرق لما تحطينه على عيونج يصير سماوي فاااااااااااتح يادوب يبين
هم تقطين الفلوس عالفاضي


عندكم شغله انا ماجربتها بس الخبيرة اللي تبيع اهي اللي قالتلي تصوروا
الجلوس السائل من نينا ريتشي تقول لو تحطينه عقب دقيقتين بينمسح نهائيا
لاتشترونه ولاتغركم الوانه ترى ينمسح وهذا كلام الخبيرة
اشتروا جيفنشي لانه ثابت سبق وقلتلكم


هذا اللي عندي حاليا
وان شاء الله اذا تذكرت شي يديد بكتبه بس ابي همتكم عاد مو كله انا