سوالف ومواقف

بنقل لكم هالموقف ويارب تطرح فيه الخير والبركه
من الدايركت

في يوم كنت رايحه للسوق تركت ولدي مع ابوه ورحت للمصلى عشان أصلي وأنا داخله شدني منظر عاملة النظافة اللي تنظف الحمامات أعزكم الله دايم أمر ولا انتبه لها حبيت أفرحها بمبلغ بس ماكان معي صرف ولفيت ع المحلات بعد ماصليت أبي أصرف عشان أعطيها بس ماكتب ربي ألقى صرف لفيت على ست محلات تقريبا قلت سبحان ربي أكيد ربي كاتب لها هالمبلغ وأروح وأعطيها إياه فرحت ودعت لي
طلعت بعد ماأتسوقنا وحنا بالطريق ولدي كان يلعب بحضني نزل وارتكى على الباب وفتحه والسياره تمشي مسكته بسرعه وأنا ارتعد من الخوف سبحان الله اللي حماه
تذكرت صدقتي اللي قبل هالحادثه وحمدت ربي
الله دفع فيها الضرر عن ولدي
حبيت اذكركم بعامل وعاملة النظافه كثيرين ماينتبهون لوجودهم ولا يهتمون لهم

من الدايركت

السنه الماضيه1434 كنت حامل
قبل مايظهر الحمل كنت انزف كل يوم الصبح ١٠ ايام وتوقف النزف
بعدها باسبوعين ظهر الحمل لكنه كان ضعيف
وماظهر له نبض بالاسبوع السادس مثل الأجنه الطبيعيه
قالو بنجهضه لكني رفضت ورجعت بيتي اتألم
بعدها بأسبوعين نزفت كثير
رحت المستشفى قالو باين انه طاح الجنين مش واضح في الاشعه
تركتهم ورحت مستشفى ثاني
قالو فيه جنين لكن ميت تعالي لو زاد عليك النزيف وهذا موعد مراجعه بعد ١٠ ايام للاطمئنان عليك
رجعت بيتي ابكي وادعي انا وزوجي ان يكتب لنا ربي مافيه الخير
دعينا ولزمنا الاستغفار والصدقه والاحسان والدعاء ورحنا الموعد بعد ١٠ ايام والنزيف متوقف تماما
وقت الاشعه اقسم بالله انه ظهر النبض واتضح نمو الجنين
استمرت المتاعب الى نهاية حملي
وفي ولادتي استمر الطلق معي ٣ ايام بلياليها بدون ولاده
حتى دخلوني الولاده بدون اي بوادر وركبو لي الطلق الصناعي
كان الاكسجين قليل ع الجنين وقررو العمليه
لما دخل الاستشاري اكتشف ان الجنين راسه يدفع على حوضي مش في مساره الطبيعي
سحب الرحم وخرجت بنتي بالسلامه

من الدايركت ❤️
بليله من الليالي لما جيت انام قلت أشيك على جوالي واتفاجأ ان وحده ماتمون علي أبد طالبه مني سلف ألف ريال طبعاً انا أصرف على عيالي وماكان معي وقتها إلا ألف وخمس ،،
أرسلت لها إبشري وماطلبتي شي،،.
وانا كل همي أساعدها علشان يكتمل المبلغ حق العمليه اللي بتسويها زي ماقالت لي ،،مع اني كنت شايله هم عيالي ومصاريفهم
وأحول لها المبلغ على طول بنية الصدقه وقلت اعتبريه مساعده من اخت لاختها مو سلف وكنت راحمتها انها احتاجت لوحده غريبه عنها مثلي ،،
المهم وأنا نايمه الصباح وتجيني رساله إيداع بحسابي عشره آلاف انا استغربت من وين ناسيه انه كان وقت نزول مدخولي السنوي
سبحان الله بالليل عطيتها ألف والصباح جتني عشره اللهم لك الحمد وبيوم ثاني وحده محتاجه كلمتني تبي الي قاسمة الله وان ظروفها شينه كان معي خمس ميه عطيتها اياها مع ان الله يعلم إني كان عندي التزامات بس قلت تتأجل أهم شي أساعد هالضعيفه ولاأردها حتى لو بشي بسيط ومايجي عقب بكم يوم الا جايني بدال الخمس ميه خمسة آلاف ماشاءالله قلت صدق الرسول لما قال فيما معنى الحديث ان الملائكه تدعو للمتصدق اللهم أعط منفقاً خلفاً ،،خلف الله علي بكل المرتين اللهم لك الحمد
أحسنوا الظن باالله تعالى وسترون مايسركم

من الدايركت
هذي السالفه صارت لي امس كنت انا واختي في المول تسوقنا وخلصنا ومرينا المقهى نتقهوى انواع الاكل والمشروبات الحاره ويوم جينا بنطلع من زود البذخ قلنا خلنا ناخذ شي بارد يبرد على كبودنا وطلبنا عصير ليمون نعناع وشربت شوي وتعرفين الأكياس مع العصير سببت لي قلقل وادور اقرب زباله وانتو بكرامه لقيت جالس فوقها عامل نظافه وقربت ابي احذف العصير ولا قام زحف شوي كنه اللي يقول حطيه على الزباله وانا بحذفه شافني مرتبكه مد يده وعطيته العصير على انه بيحذفه واختي كانت عند الاصنصير تنتظرني واتجهت لها وكانت ( تمتم ( تكلم نفسها ) وجيتها قلت انتي وش قاعده تقولين ؟ قالت ياالله ياربي قاعد يراقبك متى تروحين عشان يشرب من العصير اللي كنتي بتقطينه ياويل قلبي عطشان اول ما عطيتيه ظهرك قعد يشرب ويسحل عيونه عشان ماتشوفينه والتفت عليه لقيته يتلذذ في برودته والله انه كش جسمي علي احنا نسرف ونرمي في الزباله وغيرنا يتمنى باقي اكلنا
دائما ارحم واعطي عمال النظافه اللي في الشارع اقول الشمس تضربهم ويحتاجون ماء ولا يخطر ببالي اني اعطي اللي في المول كنت اقول انه براد وموب بحاجه اكل او شراب لين شفت اللي صار عرفت انه ما اشتغل ذا الشغله الا وهو بحاجه لكل شي

ماأدري الفكره اعجبتكم او لا
اتمنى احصل تفاعل
عشان انزل الباقي :D