حماتي وال……… !!

السلام عليكم ورحمة الله وبركاته ..
يمكن الموضوع يكون مضحك لكم .. بس ب النسبه لي متألمه منه :(
معليش بسرد لكم قصتي .. او معاناتي ب الاصح ..وابي حلول اقتراحات اراء المهم ان يشفي غليلي ..


بنات انا تزوجت من فتره اقل من سنتين وساكنه مع اهل زوجي وعندي بس غرفه وحده اللي هي غرفة النوم .. وفي الممر اللي فيه غرفتي فيه دورة مياه للكل يعني مو لي بس انا قاطه وجه فيه .. هي للعايله كلها واحنا بيتنا ماشاء الله كله عيال اطفال وغير كذا اختهم المتزوجه دايم عندنا مع اطفالها .. المشكله مو هنا ..

المشكله يا بنات واللي اعاني منه اني من يوم وانا صغيره عندي حساسيه شديده ف صدري عندي ربو وضيق ف التنفس لدرجة احيانا م اقدر اتنفس وابكي احيانا انام وانا ابكي من كثر مايجيني نغزات ف صدري بسبة ضيق التنفس ..
المهم اللي قاهرني هذا الحمام اللي عند غرفتي .. تخيلو يابنات كل يوم وكل شوي اطلع من غرفتي وريحته واصله عندي لااا وانا ف الغرفه والريحه عندي يابنات لما اكون في عز فرحتي اطلع من الغرفه واشم الريحه خلاص ينهد حيلي انواع الضيق وانا ما اتحمل الروائح الكريهه والنفاذه .. تخيلو يابنات حماتي هذي تعبتني زياده عجزت افهمها .. كل شوي تجي تطفي مروحة الشفط وتفتح الشباك والشباك ياليته يطل ع الشارع لا .. يطل على مكان كله زباله واوساخ وياليت الحمام يتنظف عشان يغطي على ريحة الخياس لااااا انا انظف اطلع واللي بعدي يدخل يقلبه فوق تحت مع اني مالي دخل فيه مفروض م المسه بس م احب زوجي يدخل ويلقى ريحته خايسه .. انا اقول اذا الكل نام وشغلته ممكن اهونها لان الكل نايم بسسسسس هي كل شوي تطفيه اشغله تطفيه ما ادري ليش هي كذا مع اني مره قلت لها انا عندي ربو وقلت لها لاتطفينه انا م اتحمل .. قالت روحي قولي لزوجك يدفع الفاتوره بعدين تكلمي وزوجي وربي يدفع للبيت وانا بصراحه م ارضى اني اعيش على حسابهم .. المهم جاء مره من المرات والريحه بغت تموتني وانا حامل ف الشهور الاخيره .. هنا ضغط الحمل وهنا الريحه المعفنه .. قلت لزوجي قول لامك ثاني مره لاتطفي المروحه انا ما اتحمل قلت انا كلمت امك قالت قولي لزوجك يدفع بعدين قام يقول عادي تحملي امي اي شي تقولك عني قلت طيب انا ايش ذنبي المهم زوجي ما عبر .. تخيلو الحمام مافيه لاشامبو ولا صابون ولا شي اي احد يتسبح يجيب اغراضه يتسبح وياخذها معاه واذا حطيت فيه شي اجي بكره م القاه .. بنات وربي تعبت تعبت تعبت .. وش اسوي معاهم .. علما بان علاقتي معاها جدا سطحيه من بعد المشاكل اللي جتني بسبته احيانا يجيني ضيقه اعصب مررره ودي اروح اصرخ ف وجهها بس امشيها .. اه ي بنات لو تحسون بس شوي وش يصير فيني لما ينقطع عندي التنفس ترحموني امي كانت مرررررره ترحمني لما تشوفني كذا .. بس وش اسوي مع الشكليات اللي كذا .. انا مو قادره اتحمل .. تكفون علموني تعبت معاهم .. هذي اخر حل اني جيت وشاورتكم بعدها خلاص م اقدر اتكلم معاهم بالطيب ما نفع ..

حسبي الله ونعم الوكيل