قصه ولادتي عجزت القى عنوان مناسب لقصتي المؤلمه
ماعرف اكتب مقدمات بكتب اللي يجي من قلبي
بعضكم يعرفني انا اللي امي حامل معي
امي ولدت قبلي بعمليه قيصريه وكانت بتموت بس ربي كتب لها عمر في نفس الاسبوع انا كنت متنومه بالمستشفى وولدوني قيصريه بعد مع ان باقي لي شهرين بس ولدة ولاده مبكره
امي مسكينه نفسيتها تعبانه تقول مو عارفه اعتني فيك لانها ولدت قبلي بكم يوم
وكل خططنا اللي كنا متفقين عليها رااحت لو اني ولدت في التاسع كان امي طلعت من الاربعين ونفستني بس انا استعجلت يلا لو ولا مالو مابتسوي شي لان كل شي مكتوب
ببدا لكم بقصتي من البدايه
طبعا تعرفون ان حملي جاي بتعب بعد علاج و انتظار سنتين ونص مابي اكتب تفاصيل علاجي لان يبيلي مجلدات عشان اخلص
هذا العمليه الثانيه حملت فيها بحقن مجهري
انا من بدايه السابع واحس برطوبه تحت ورحت عند دكتورتي اللي اتابع عندها حسبي الله عليها وسوت لي مسحه وقالت فيني التهابات وعطتني علاج ولا راحت الرطوبه وقامت قالت لي ساعات تنزل الالتهابات مائيه وصدقتها لان افكرها شاطره ورجعت لها بعد اسبوعين وقلت لها الحركه قليله مرره وكل مالها تقل سوت لي سونار وقالت لي كل شي تمام بس الوزن ناقص طول الاسبوعين ماتغير وزنه وقالت لي الحركه قلت بسبب قلت الاكل وانا بعد صدقتها ورحت البيت واكل واكل لاعت كبدي من الاكل بس ابي جنيني يتحرك ولا في فايده جالست يوم كامل مافي تغير صارت الحركه مرتين يمكن بس وقلت لزوجي ودني مستشفى حكومي عشان اتطمن انا مو مرتاحه وزوجي يقولي تونا رايحين امس وكل شي تمام قلت ابي اتطمن واختربت سيارته مع انها جديده من الوكاله ياربي وقالت له مالي دخل دبر نفسك اذا صار لبنتي شي انت المسؤول وانا اقولها مزح وهو يضحك ماكنت ادري شنو ينتظرني في المستشفى
رحت المستشفى الحكومي العصر جلست بالطوارئ استنى دوري الا اشوف وحده تعبانه حييل ودموعها ع خدها والد قيصريه واقول مسكينه مو عارفه حتى تمشي من الالم تاسيت لحالها ماتوقعت اني بنحط نفس مكانها وافكر نفسي غيرها مخططه اذا طلعت من المستشفى اروح السوق اشتري اقراض للبيت هههههههه ياحليلي
واشوف وحده ثانيه جايه تقول الحركه قليله مررره يمكن بس 5 مرات باليوم واحط يدي ع قلبي هذي خمس ولا بعاجبها كيف انا مرتين بس الله يستر
جا دوري وقلت لها ينزل معي مويه والجنين حركته قليله من اسبوعين
وكشفت علي بالسونار وقالت لي المويه قليله شوي وقلبي انقبض وقلت لها يعني شي خطير قالت تنويم !!!؟؟؟!! وانا انصدمت قلت لها حالتي تستدعي تنويم قالت ايه لازم نتابع حالتك قالت قرري قلت لحظه اقول لزوجي وقلت له قالي من جدك انتي يفكرني امزح وياه قلت ايه تنويم واتصلت ع امي وقلت لها قالت لي اني ماطلع واتنوم
وخلصو اوراقي وصعدوني ع غرف التنويم والمتابعه وحطو لي جهاز التخطيط وكشفت علي دكتوره استشاريه وقالت المويه قليه الجنين نموه متاخر وقالت بكره بيجي استشاري يشوفك وكتبت لي ابرة الرئه عشان احتمال اذا مازاد المويه بيكون خطر ع الجنين وبيولدوني وانا بس سمعت كلمه توليد مشاعري اضطربت فرح ع خوف فرح اني بشوف طفلي وخوف انه مايعيش وانتظرت الصباح ولين جا الاستشاري وكشف علي ونفس الكلام قال بنحطك تحت المراقبه
وقالي جنينك صغير ولا عندنا حظانات مناسبه له يمكن يموت عندنا وراح ارسل فاكس للمستشفى الحرس الوطني اللي عندنا لان عندهم حضانات لعمر جنينك وراح ارسل لباقي المستشفيات اللي في الشرقيه والرياض عشان يستقبلوني عندهم
وقالي ماعندك واسطه او شي عشان يستقبلونك الحرس ع طول قلت له لا للاسف قال بنرسل لهم تقرير وان شاء الله يستقبلونك
وتميت خمسه ايام وكل شوي حطو لي مضاد حيوي وجابو جاهز التخطيط
وجات اللحظه العصيبه حط علي جهاز التخطيط بالعصر وقت الزياره وكان التخطيط سيء وحطت علي مغذي وجابت جهاز البخاار وهذه الحركه تسويها لي كل ماصار الجنين ضعيف قلبه ولا بخطر ويتحسن بعدها بس هالمره غيييرراحت نادت لي ممرضات كثير وكل وحده تجي تشوف الجهااز ينعفس وجها وانا يدي ع قلبي وهم مايقلون لي شي وبعدين قالوا لي روح كشف الحين ورحت كشفت والدكتوره حط السونار وشافته النبض سيء وقالت للممرضه نادي الاستشاريه بسرعه وجات وقال لازم نولدك قيصريه قلت لها اليوم قالت الحين وانا بس سمعت كلامها دموعي قامت تنزل اربع اربع قالت اهدي وفجأه تعدل النبض وصار طبيعي يارب لك الحمد ورجعت الغرفه وركبو لي جهاز التخطيط مره ثانيه والنبض تمام لين جا منتصف اللي الساعه 12 يمكن والنبض صار سيء جدا جدا وجات الممرضات كثير وراحو يسرعون وجابو لي دكتور استشاري وقال لازم عمليه نسوي لك الحين وجابولي القسطره وملابس العمليات وقلت لدكتور قالتو بتحولوني لمستشفى الحرس قال شنو نسويه الحرس رفضو يستقبلونك ولازم تولدين الحين وانا اقولهم صبرو اكلم زوجي وقلت له بيولدوني وهو خذ خيره ان نروح مستشفى الحرس وراح طلعني من المستشفى ع مسؤليته ورحنا مستشفى الحرس ولا دخلوني يكشفون علي وانا اقول لزوجي بسرعه بنتي بتموت قول لهم وبعدين دخلوني كشفو الضغط والحراره وبعدين ودوني غرفه وجلست ع السرير مده طويله واقول لزوجي قول لهم بنتي بتموت خل تجي الدكتوره تكشف علي وبعدين جات الدكتوره الهنديه وسوت لي سونار وقالت المويه قليله والجينين فيه نبض بس ضعيف وكشفت علي من تحت وانا مسويه ربط وكان الكشف مؤلم وقالت مفتوح واحد سانتي وانا مسويه ربط استغربت المهم قالت تحتاج تنويم بس مانقدر ننومه قال زوجي عادي حتى لو بفلوس اهم شي تسوي العمليه هنا في البدايه وافقت واتصلت ع مدري منو وبعدين قالت لا مانقدر ناخذها لان رافضين التقرير من قبل
طبعا هم خافو ان اذا اقبلوني بفلوسي تصير عليهم مساله ليش رفضتوها وبعدين قبلتوها بفلوس
راح زوجي يكلمهم وحاول بس رجع وقالي خلاص بنرجع مستشفى الولاده وانا قمت مشيت خطوتين وطحت من طولي وزوجي مسكني وانا قمت اصارخ واصيح بقووه ودموعي نزل لين سبحت من دموعي وزجي ضمني وانا اصيح واصيح انهرت بنتي بتموت ولا بعارفه انقذها ليش هالظلم عشاني ماعندي واسطه بخسر بنتي
دخلت معي وحده وقالت فيني بوادر ولاده وهي تمشي ع رجولها ودخلوها ع طول عشان عندها واسطه
طيب انا روح في بطني بتموت ولدوني اول انقذوها تعبت عليها مكتوب بالتقرير ان حالتها خطره وجايه بعد سنوات وحامل فيها بعلاج وعمليات طيب ليه ماتنقذونها !!؟؟ لييه ؟؟
طلعني زوجي وان امو قادره امشي حطني ع كرسي وانا بس اصيح وعباتي سبحت وكل يطالع فيني بس ماهميت احد كلن همه نفسه وركبت السياره وانا اقول الله يحرق قلبكم مثل ماحرقتو قلبي الله يحرق قلبكم واتصلت ع ابوي لان امي توها والد قيصريه وتعبانه نفسيتها مابيها تدري عن شي اتصلت ع ابوي الساعه 2 وانا اصيح واقوله ارفضوني مايبوني عشان ماعندي واسطه بنتي بتموت ولا يبون ينقذونها قالي سكتي خل اسمع شنو تقولي عدت عليها الكلام وقال شنو هالكلام عطيني زوجي وكلمه وقاله السالفه
كان ابوي مكلم واحد بنفس هالمستشفى الحرس بس قاله خل تجي بكره وادخلها بس بنتي مو راضيه تنتظر لبكره تبي تطلع هاليوم
وانا طول الطريق اشاهق وصوتي يقطع واتصل علي ابوي وجلس يكلمني ويقولي لاتسوين بنفسك كذا مثل مالله عطاك هالطفل يعطيك غيره واذا ربي باخذه مهما سويتي لو تجيبين اكبر الاطباء بتموت ولو ربي كاتب لها عمر بتعيش مهما حاولوا يموتوها ولاتسخطين لازم ترضين باللي ربي كتبه لك ......الخ
قالي كلام كثيييير وانا اقنعت وقلت الحمدلله لك يارب اذا تبي تاخذها صحيح ماقدر اسوي شي غير اقول الحمدلله لك يارب الحمدلله اني حملت وعشت هالحظات الحمدلله
وصلت مستشفى الولاده ودخلت ع الطوارئ ماسكه ورقة التقرير اول مادخلت طحت ع الارض ورشو علي ماي وانا مازالت دموعي تنزل مو بيدي تعبت وانا احاول احمل وتعبت بالحمل كنت ابيها بس تعيش وسوو اوراقي وصعدوني فوق وجا الدكتور يقولي انا ماقلت لكم لاتطعلون الحين الوقت مو من صالحنا وقال يبي يكلم زوجي وانا بس كنت اصيح ماعرف شرد عليه واتصل علي زوجي وانا اقوله انت السبب طلعتني من المستشفى ورجعتني ضيعت علي وقت مابي اكلمك انا وسكرت في وجهه بعدها حسيت بتانيب الضمير قلت هو ماله ذنب وقلت يمكن اموت بالعمليه ورجعت اتصلت فيه وقلت له انا اسفه مو قصدي سامحني انا احبك والله وقالي وانا احبك حبيبتي وقلت له انا عندي صلاوات اذا ماطلعت صلهم عني وجلس يصيح بس ماسك نفسه وقالي لا انتي بتطلعين وتصلينهم وقلت له راضي عني قالي انا راضي عنك قلت احبك حيل والله احبك وهو كان عند اهله موت نفسه صيح لان كنت اودعه طبعا ماكنت ادري انه كان يصيح بس اهله قالو لي بعدين انتهت المكالمه وكنت استعد للعمليه
حطو لي جهاز التخطيط وجاتني حلت بروود وقفوا دموعي وكان مشغل قران بث مباشر من الحرم المكي وجاتني حاله كان خلاص استسلمت للامر الواقع يعني دموعي مابتسوي شي وبعدها جات لي ممرضه سعوديه قالت لي ع فكره النبض تحسن واذا استمر كذا ماراح نسوي لك عمليه انا تشققت من الفرح بس ماتصلت ع زوجي عشان مافرحه ع الفاضي وبعدها قالوا لازم نولدك حالت الجنين مو مطمنه وقلت الحمدلله يارب تعيش بنتي يارب اكتب لها عمر يارب لاتفجعني فيها وجهزوني لغرفه العمليات وجابو القسطره بس عرفت انهم يحطونها بفتحت االبول يمه خفت واقول لها شوي شوي علي ودخلتها غلط ورجعت دخلتها من جديد ياربي شالعذاب وجابوا سرير قالوا لي اجلسي عليه وغطوني وودوني لغرفه العمليات ياربي وجسمي كله ينتفض ويوم دخلت غرف العمليات قملت انتفض بشكل فضيح حتى السرير يتحرك معاي ويقولي دكتور التخدير تبين بنج نصفي ولا كامل وانا اقول ها كااامل كااامل وجاء الوقت العصيب قالوا لي قومي انسدحي ع سرير العمليات الحقيقي اللي فوقك ذيك الانوار الكبيره واسمع صوت المشاره الي بيفتحوا بطني فيها شغلتها الممرض تتاكد انها شغاله واسمع صوت المعداات وانا مت خووف اقولهم نومووني ماابي اشوف شي نومووني بسرعه لاتسوون شي كنت مسويه ربط بعد وقلت لهم يفكونه وانا ناايمه ماابي اتالم خلاص ابي انااام وانسى الدنيااا
حطوا علي بخاار بس مازلت اقولهم انا مانمت ليش مابعد انام ولا احد معطيني وجه وحسيت انه جالسين يعطوني ابره في حق المغذي اللي مركب بيدي وحسيت بالم في يدي قووي صرخت منه وبعدها نمت واخيراا
واول ماحسيت بالدنياا حتى عيوني ماكانت تشوف شي واقولهم بيبي كويس بيبي كويس قالوا الفلبنيات أي مدام كويس شنو جبت ولد ولا بنت لان ماكنت متاكده من الجنس قالت مافي معلوم مدام دقيقه نشوف ملف وبعدين قالت لي بنت وبعدها رجعت نمت مره ثاانيه
وبعدها ودوني قسم القيصريااات ياكره هالقسم طلبوا مني اقوم من سرير النقل الى سريري ازحف من ظهري وكان مؤلم ومتعب
وكنت عطشانه بس منعو عني الاكل والشرب 24 ساعه بس قالت لي حركي ارجولك اصفطيهم يعني باستمرار عشان مايتجمع الدم ويجيني تجلط
جا موعد الزيااره و جا زوجي يزورني بالمستشفى مسكين مانام من اليوم اللي قالوا بيولدوني فيه منكسر خاطره علي وحامل بيده باقة ورد بس انا مالي صوت يادوب اهمس ألم واغلب الوقت مسكره عيوني وشبه نايمه وتروح مسكنات وتجي مسكنات صارت فخوذي مثل المشخل
وثاني يوم جات ممرضه وشالت القسطره طلبت مني اقوم امشي وانا اقولها لا مابي الم لااا قالت لازم مدام روحي حمام ورضيت بالامر الواقع ووافقت وساعدتني وانا اقوم ألم قووي حييييييييييييل اقولها ماقدر خلاص بالموووت لمست رجولي الارض حسيت اني وحده معوقه توها تتعلم المشي وقفت وانا منحنيه من الم العمليه ماعرف ارز ظهري قالت لازم اوقف عدل واطالع قدام بعد جهد جهييد وصلت للحمام وجلستني ع كرسي الحمام وشالت ملابسي انا وحده استحي حييييل بس ذيك اللحظه شافت جسمي كله وانا بس افكر بالالم كنت اول اقول لاختي يوم راحت تولد كيف تخلينهم يشوفونك قالت اصلا انتي بذيك اللحظه ماتحسي بشي من الالم
أي المهم جلست ع كرسي الحمام وياااه مو عارفه اسوي شي من الالم وكل شي صعب
ورجعت لسرير وانا احس بدوخه بس مسكتني لين وصلت السرير وعدت الايام الى ان جا اليوم الثالث وصلت لمرحه اكتائب شديد جالسه بس اصيح خلاص زهقت من المستشفى واتصل ع زوجي هو بس يهديني وياخذني ع قد عقلي اليوم باخذك خلاص
وجا الدكتور وقالت له شيل هذي الماصوره مابيها وبطلع خلاص قالي بشيلها بس ماراح اطلعك لان لازم تمشين عشان تونا شايلين الماصوره (القسطره ) اللي هي
قلت له امشي بالبيت قال لاا بس تروحين البيت بتنامين هذا انتوا الحريم كلكم كذا امشي هناااا عشان نعطيك بعد مضادات حيويه وبكره اكتب لك خروجم الخرووج
وجا يوم الخروج ورحت اشوف بنتي قبل اطلع تقطع القلب كلها جلد وعظم وجسمها كله ابر ومغذي ودم واكسجين وعفسااا
وطلعت شقتي ونفستني ام زوجي الله يجزيها خير وطلعت قرونها
صراحه تعبت وانا اكتب واختصرت النهايه
ادعوا لبنتي تطلع بالسلامه الحين لها بالمستشفى شهر و15 يوم
وقلبي محروووق كل مافكرت فيها يضيق صدري اشوف اخوي الجديد اكبر منها بيومين ملابسه صارت قديمه من الغسيل وملابس بنتي جديده
ربي لاتفجع قلبي وقلب ابوها فيهاا
راح ارجع واكتب جزء ثاني لقصتي بعد ماتطلع بنتي
أي وحده عندها معلومه عن الخدج تقولي الله يجزيها خير للمعلوميه انا ولدتها في الاسبوع 29 ووزنها 950
ترد الروح @trd_alroh
محررة ماسية
يلزم عليك تسجيل الدخول أولًا لكتابة تعليق.
بحرالعنى
•
حبيبتي الحمدلله ع سلامتك والله لايضيع اجرك انا مثلك ولدت انا بنهاية السابع بكري وجلس بالحضانه كله ابر ومغذيات ورابطين اعيونه والحمدلله والشكر الحين رجال ومتفوق بدراسته استودعيها الله واحتسبي واكثري من الاستفغار والصدقة عشان ربي يعافي بنوتك وتزفيها بيدك يارب
بحرالعنى :
حبيبتي الحمدلله ع سلامتك والله لايضيع اجرك انا مثلك ولدت انا بنهاية السابع بكري وجلس بالحضانه كله ابر ومغذيات ورابطين اعيونه والحمدلله والشكر الحين رجال ومتفوق بدراسته استودعيها الله واحتسبي واكثري من الاستفغار والصدقة عشان ربي يعافي بنوتك وتزفيها بيدك ياربحبيبتي الحمدلله ع سلامتك والله لايضيع اجرك انا مثلك ولدت انا بنهاية السابع بكري وجلس بالحضانه كله...
ألحمدلله على سلامتك إنتي والبنوتة الله يقومها بالسلامة وعقبال ماتشوفيها عروسة أن شاء الله
وطـــن
•
ماعندي اي معلومه عن الخدج للأسف
الله يرفع عن بنتك ويقومها لك بالسلامه وتكون هالأيام مجرد ذكرى يااااارب
الله يرفع عن بنتك ويقومها لك بالسلامه وتكون هالأيام مجرد ذكرى يااااارب
بحرالعنى :
حبيبتي الحمدلله ع سلامتك والله لايضيع اجرك انا مثلك ولدت انا بنهاية السابع بكري وجلس بالحضانه كله ابر ومغذيات ورابطين اعيونه والحمدلله والشكر الحين رجال ومتفوق بدراسته استودعيها الله واحتسبي واكثري من الاستفغار والصدقة عشان ربي يعافي بنوتك وتزفيها بيدك ياربحبيبتي الحمدلله ع سلامتك والله لايضيع اجرك انا مثلك ولدت انا بنهاية السابع بكري وجلس بالحضانه كله...
يسلمووو ا
ذا ماعندك مانع
متى طلع ولدك من الحظانه بعد كم شهر
ذا ماعندك مانع
متى طلع ولدك من الحظانه بعد كم شهر
الصفحة الأخيرة