شوق&حنين @shokamphnyn_1

عضوة نشيطة

سجينة ومحتاجة لدعواتكم

السلام عليكم ورحمة الله وبركاته

ابي افتح لكم قلبي اللي عمره ما انفتح لاحد

قصتي طويلة يليت اللي تقراها تدعيلي او تعطيني حل ولو اني ادري ما عاد فيه حلول للي انا فيه

بقولكم قصة حياتي من صغرها ... احنا بنتين على اربع صبيان اختي هي الاكبر اثنين من اخواني الله يهديهم متسلطين عنجهيين احس انهم عذبوني ... من عمري تقريبا 9 سنوات ما عرفت شي غير الممنوع والعيب ... وطبعا الطق ( الضرب )منهم ، عندنا حديقة تبع بيتنا ومسوره تخيلو يويلي اذا طلعت العب فيها الترفس والتمشع من الشعر ينطرني غير النعل اللي تنحذف علي وانا بالحديقة ... اللبس وما ادراك ما اللبس يويلي اذا لبست قصير او جم قصير ممنوووووووع تخيلو خواتي الكبار اللي من ابوي يعني من مرت ابوي لما يروحو يشترون لي هدوم يبتلشون يقولون ما ندري نشتريلج من قسم الاطفال ولا النساء !
عيال اخواني من ابوي تقريبا من عمري تخيلوا اذا زارونا شي طبيعي نطلع بالحديقة نلعب انا لاااااااا ... اطالعهم من عند الباب فقط هذي حدودي المسموحة لي ,واذا راحو للالعاب انا انطرهم بالبيت
نجي للمراهقة واللي اهي اللي دمرت حياتي .... لبسوني نقاب وعباية راس وانا عمري16 سنة يمكن في بعض الناس هذا الطبيعي بس احنا عايلتنا لااااااا اصلا حتى الحريم الكبار من بناتنا اقصد بنات عمامي وخوالي ما يلبسون على اي اساس انا البس بتقولون اخوانج مدينين اقولكم لا عاديين اصلا واحد منهم حتى اصلا ما يصلي ولا يصوم عدل يعني قطاعي الله يهديه
وطبعا جمعات بنات عمي وخوالي انا الوحيدة اللي غايبة عنها لان عييييييييب اطلع من البيت ؟؟؟

قلت اصبر يمكن يكبرون اكثر ويعقلون

جاني الفرج من توضفت (طبعا عقب الجهاد معاهم) وصار عمري 25 وصار مسموح اروح للعروس وجمعات بناتنا بس شالفايدة احس انكسرت شخصيتي حيل احس صرت مهزوزة من داخلي ارد منهم مضايقة لاني انا بوادي والناس بوادي

انخطبت كذا مرة من عقب ما اروح العروس بس اللي يخطبوني بس يعرفون عمري ينحاشووووووون لان انا شكلي اصغر من عمري

الحين صار عمري 29 سنة ومابقى إلا جم شهر واصير 30
كرهت نفسي كرهت حياتي كرهت اللي حواليني كلهم تقولون اني مريضة نفسيا اقولكم ايييييي والله احس اني تعبانة ومحتاجة لطبيب نفسي اللي معاي بالدوام وبناتنا اللي اصغر مني وكبري عيالهم صاروا بالمدارس وانا ماكو حتى خطاااب والله العظيم مو حسد والله موحسد الله يتمم عليهم وعلى الكل اساسا هذي سنة الحياة

بناتنا تزوجوا من عيالنا يعني محد طلع برة العايلة لان يشوفونهم ويقولون لاهلهم اخطبوا لنا فلانة مثلا وانا مخشوشة بين بيتنا ونقابي اللي احسه السبب في عنوستي ؟؟؟

اللي فيه انا الحين ماني قادرة اتحمله تخيلوا لحد الحين ممنوع اطلع إلا بمرافقة واحد من اخواني ممنوووع اطلع بروحي لا حتى مع امي ولا اختي ادري ما راح تصدقون لان شي مو معقول بس والله هذا اللي صاير واللي مخيليني ماني قادرة اتحمل اكثر انهم شيشوا اخواني الصغار بعد خلوهم نفس اطباعم تخيلوا اصغر واحد انا اكبر منه بعشر سنين صار مثلهم يتحكم فيني والله ماني متحملة والله يعني معقولة انا بقعد لاخر العمر وانا مدري جم الله كاتبلي بعيش

بتقولون وين امي وابوي ... ابوي رجال كبير عطاهم الخيط والمخيط للاسف ما تدخل وامي .. آآآآآآآآآآآآآآه من امي مسكينة ماعندا شخصية كلللللش ما تقدر عليهم ابد ابد

للملاحظة اختي الله نجاها منهم لانها اكبر من هم ما قدروا عليها وتزوجت بسرعة خذاها ولد خالتي وانا كل طلبي منهم الحرية حرام عليهم ليش ساجنيني مدري تخيلو الحين تزوجوا قلت يمكن ابفتك شوي طلع الحال من المحال ماتغير شي يااااارب رحمتك علي

هذي قصتي واتمنى انكم تدعووولي من قلبكم لاني احس اني طفشت واستغفر الله مرات الشيطان الرجيم يوسوسلي والله ساعات اقول يليت الانتحار حلال .. بس اتعوذ من ابليس واقول انا ماعشت الدنيا ان شاء الله الله يعوضني بالاخرة يارب
تقولون غيرج مصايبة اكثر اقول طبعا بس انا مقتنعة ان الله ما يبلي انسان إلا على قد قدرته واللي انا فيه احسه من اخواني هم اللي اجرموا فيني مو ابتلاء لان الله عطوف كريم على عبادة واخواني هم المجرمين..

سامحوني عالاطالة بس فعلا انا تعبانة وطفشت مدري شسوي .

يلزم عليك تسجيل الدخول أولًا لكتابة تعليق.

تسجيل دخول

lavindar • 13 سنة

الله يفرج همك يارب ويسخر اخوانك واهلك ليكي ويجيكي نصيبك اللي يرضيكي ان شالله وجعتي قلبي بقصتك الله يفرج همك

فوفا الحلوة • 13 سنة

يااااااااربي الله يحنن قلوب اخوانك عليك ويرزقك ابن الحلال
ويعوضك ويهنيك ويسعدك ربنا كريم اختي

شوق&حنين • 13 سنة

لافيندا الله يسهل عليج يقلبي ويخلي اللي ببطنك يارب ولا يوجع قلبج على غالي

فوفا الحلوة الله يجزاك الخير يارب

w_f_m • 13 سنة

شوفي اختي انا قريت قصتك وتاثرت من اجلك واسال العلي القدير يعوضك عن سنواتك الي مضت بزوج الصالح التقي الي يكون سبب سعادتك وينسيك احزانك
انتي لاتلومين الغطاء بسبب تاخرك في الزوج لان الزواج قصمة ونصيب لعل تاخرك في زواج خير لك لا تعلمينه ولعل الله سيرزقك بمن هو افضل من ابناء اقاربك وبمن هو يستاهلك اكثر دين وتقوى فصبري وعليك بلحاح في الدعاء كل ليلة مع ملازمة الاستغفار وتصدق كل يوم باقل القليل وسوف ترين الفرج
ولا تجعلي الشيطان يوسوس بك ان غطاؤك هوسبب تاخرك في امر الزواج فالحشمه والغطاء امر من الله ليسى من البشر
والله ان احدى قريباتنا تاخرت في الزواج الى سن 29او30 بسبب اهلها وكانت مضغوطه كل المنزل عليها من تنضيف وطبخ وغيره ولا تخرج من المنزل حتى يراها احد فيخطبها وكانت جدا عايديه وسبحان الله على صبرها وتحمل خدمة اهلها والضغوط عليها رزقها الله شاب وسيم وغني يمللك ملاين وحنون ويراها ااجمل شي في حياته برغم انها اقل منه كثير من ناحيه الشكل والامال مستواهم عادي فربك كريم يوزع الارزاق على من يشاء

شوق&حنين • 13 سنة

W_F_M الله يجزاك الخير ويوفقك