المضيفة المصرية: اتفضل اشرب شاي

التوفيق للجمييييييييييييع

يا سلام يا نودي حلوة اوي فكرة المضيفة ده طيب انا عايزة كوباية سحلب سخنة لحسن الجو برد اوووووووووووووووووووووووووووووووووووووووووي
و يا ريت لو تخليها ترمس علشان باقي النهار
اخبار ايه يا امول يا رب تكوني بخير و اخبار الشقة ايه
عايزة اسمع اخبار حلوة قريب
بابا صحته عاملة ايه ؟ ربنا يشفيهولكم و يطولكم في عمره يا رب

اوشا، يا هلا و غلا بأهل الاردن، شكرا على مرورك و اتفضلي المنيو و اختاري اللي على مزاجك :)


روااااااااااااااء حبيبتي، صباح الفل و السحلب و الدفا!!! نورتي المضيفة يا قمر و من عيوني السحلب عالنار، بس مش شايفة ان ترمس كتير شوية!!! بلاش طمع عشان باقي الزباين!!

لسه يا رورو مفيش اخبار عن الشقة بس ادعيلي ربنا يفرجها عن قريب. بابا بخير الحمد لله بس طبعا برد الشتاء و التعب مؤثرين على حركته شوية بس الحمد لله على الاقل قدرنا نتحكم في السكر و نظبطه شوية. تسلميلي يا قمر و الف مبروك للدكتور

و رد خصوصي لوسام لحد ما تيجي، وحشتيني يا ويسا و معلش انا مقصرة في الاتصال بس كان فيه شوية مشاكل. يعني الامر ميسلمش من خلافات كل ما بتقربي من حاجة مهمة في حياتك بس الحمد لله على كل حال

الله يبارك فيكي يا جميلة اخيرا الحمد لله خلصناها كنا عاتلين همها اوي بس الحمد لله
ان شاء الله يا امل ربنا يفك كربك عن قريب عايزة انزل مصر احضر فرحك
ما تسالنيش هتنزلي امتى لاني لسة مش عارفة بس عايزة انزل في اي وقت احضر فرحك اتصرفي انتي باه

ههههههههههههههههههههههه يبقى بصرة يا رواء!!!!! و لا انتي كمان تسأليني فرحي امتى لاني برضه مش عارفة حاجة!!!! بس ان شاء الله اول ما اعرف حاقولكم على طول، و يا سلام ياستي بس تيجي انتي بس و متضحكيش عليا!!

تسلميلي يا رورو على الدعوة الحلوة دي لاني محتاجاها جدا

حبيت اسألكم يا بنات و اخد رأيكم في حاجة غريبة، تفتكروا ممكن اخوات البنت الاولاد يغيروا من خطيبها او من فكرة ابتعادهم عنها لدرجة انهم يحاولوا بكل الطرق و بكل الحجج المقنعة و غير المقنعة انهم يبوظوا جوازها؟؟؟ تفتكروا في الحالة دي و هي عارفة و متأكدة ان حججهم واهية جدا و محدش مقتنع بيها غيرهم انها تختار مستقبلها و تفكر فيه و تضرب عرض الحائط برأيهم؟؟ طيب ايه رأيكم لو هي شارياهم و مش عاوزة تخسرهم بس همه مصممين بمنتهى الانانية انهم يوفقوا حالها و يخلوها جنبهم زي البيت الوقف؟؟؟ و ايه رأيكم لو قرروا مقاطعتها و اعتبروها ميتة بالنسبة لهم لو استمرت في استكمال زواجها بدون رغبتهم، مع انهم كانوا موافقين على الشخص و وافقوا على الخطوبة و حضروها بس لما لقوا الموضوع قرب انقلبوا فجأة؟؟

عارفة اسئلة كتير تصدع الدماغ و كلها بتدور حوالين نقطة واحدة بس محتاجة رأيكم جدا، علما بأن الاب موافقها في رأيها و أخوها الاصغر منها (اللي بيتهموه دايما انه تربيتها) برضه موافقها تماما.