قبل مابدا بالموضوع اعتذر عن رداءه الصور لاني اصور من جوالي وهو على وشك انه يتشهد
لان كاميرتي كانون والكاميرا ممتازه لكن خربت علي ولها عند الوكيل 3 شهور
فأنصحكم نصيحه اللي لها نيه تشتري كاميرا تبعد عن كانون لان وكيلها جدا سيء اما الكاميرا ممتازه
اكيد كلكم داخلين تواسون هالمعذبه
المعذبه هذي سلمكم الله اكله وهي جريش احمر (لاياشيخه) واهل حايل يسموونه معذبه مثل ماوصلي
ترى مدري مادخل بذمتي براي لله
بس
كود بنتا حايل يدخلون ويعلمونا الصدق
وسبب التسميه انها تطول على النار وتاخذ وقت
ولو اني اشوف انها ماتاخذ وقت زيها زي الجريش 2 ساعتين وهي جاهزه
يمكن لاني استخدم قدر الضغط
المهم ماعلينا
هالمعذبه عليها طعم امممممممممممم خبال
انصحكم تجربونه
وهي بسيطه ومقاديرها متوفره في كل بيت
يالله قدامي ياشاطرات على المطبخ وخلو عنكم تسحيب الرجلين
2 كاس جريش تركي وهو افضل شي وبسرعه يستوي ينقع في ماء حار بعد غسله
ثم ابدي بالطبخه اقصد التعذيب
2 بصله متوسطه مفرومه +2 فص توم متوسط مفروم
نصف دجاجه او دجاجه كامله مقطعه ارباع
4 حبات طماط مجروشه او مطحونه
2 مكعب ماجي +ربع علبه صلصه
بهارات مشكله+ ماجي ابيض +فلفل اسود واحمر+والاهم الكمون كثري منه
4حبات ليمون اسود+قرفه صحيحه
في قدر الضغط يوضع الدجاج والبصل والطماط والسابق ذكره جميعا ثم يضاف اليه قليل من الزيت وسمن او نصف زبده
ثم يضاف الماء بكثره
ويترك يطبخ 10 دقائق(بدون ماتسكرين القدر)
ثم تضيفي اليه الجريش ويترك يطبخ على النار مده 5 دقائق
ثم توطي على النار ويسكر قدر الضغط ويترك ساعه
بعد الساعه يفتح قدر الضغط ثم يحرك الجريش ويعدل الماء اذا كان الجريش ثقيل
ثم يوضع 4 حبات فلفل احمر ويسكر القدر مره اخرى ويترك ساعه ثانيه
بعدها افتحي القدر وحركي الجريش واعصري عليه 2 ليمونه وحركي الجريش
واتركيه على النار الى ان تنتهي من الكشنه
الكشنه عباره عن :
2 ملعقه كبيره سمنه او ربع زبده ويضاف اليها قليل من الزيت
ويوضع عليه بصل مقطع صغار وقليل من الماجي
والفلفل الاسود والاحمر والليمون الاسود المطحون وهو اهم شي
يحرك قليلا على النار
ثم يوضع الجريش بعد التحريك بملعقه خشب في صحن التقديم او الحافظه ثم يضاف اليه الكشنه
وبالعافيه على قلوبكم
اترككم مع الصور