فضفضه ، محتتاجه رفع معنويات و دعواتكم ..

سلام عليكم

انا بنت عمري 23 اخر سنه جامعه بقولكم مشاكلي و همومي و حطوا نفسكم مكاني لاني والله تعبانه نفسيتي و كل يوم ابكي من القهر .. انا الناس يشوفوني بنت ناقصه يحسسوني بالنقص من ناحية شكلي و انا والله العظيم ما عمري ذميت احد او سبيت شكله او نقدت شكلهم انا ف حالي بدأت احس و افهم الناس من يوم انا بالمتوسط يعطوني نظره اني مو جميله مع اني والله يا بنات الحمدلله بشرتي صافيه بس انا سمرا غير عن خواتي شوي و اسوي خلطات و اهتم بنفسي و بشكلي لكن الناس للأسف مستمرين علي بهالنظره لدرجه سبب لي الخجل اذا تكلمت ما ابغى احد يطالع فيني و لا يناظروني ابغى يخلوني في حالي حتى لما اكون مع اختي اكبر مني بسنه و اختي جميله اذا جوا يقولوا سالفه يتكلمون معاها هي و يضحكون معاها هي مع اني والله العظيم اسولف و اضحك معاهم و انا كاتمه ف قلبي و فيني غصه ، كل ما نرجع من عشا من عند اعمامي ارجع انام و ابكي و اتذكر نظرتهم لي .. ما فيني عيب الحمدلله ف شكلي بس ملامحي مو حلوه زي خواتي كأني مو اختهم وكل من شافني قال انتي احلى شي فيك جسمك بس و انا اضحك و احس انهم يقصدون ان وجهك مو حلو بس مو ذنبي ربي خلقني كذا ما تصدقون اني الين الحين وانا بهالسن احس كذا و ارجع ابكي حتى من بنات الجامعه مع انه ما تلفظوا علي بس تكفي نظراتهم لي صرت حساسه صرت اتمنى انه ماني بهالحياه ، و انا محرومه من اشياء كثيره من صاحبات يكونوا معاي من حب و حنان من شخص يهتم فيني و اشكي له فاقده اكون عايشه زي كل البنات اشترى اللي ابغاه راتب ابوي 3000 ريال و هذا مصروفنا فيه مع مكآفآتي الحمدلله راضيه بالمكتوب متأكده انه ربي بيعوضني يوم و احياناً ايأس ، احس اني محرومه من كل شي الحمدلله على كل حال .. تخيلوا مره كنت اتكلم مع اختي اقولها ان شاء الله ربي يرزقني رجال فيه كل المواصفات اللي ابغاه ربي قادر على كل شي ردت علي قالت مستحيل هالشي اصلاً محد بيطالع ف وجهك على طول قمت و رحت ابكي بالحمام طبعاً هي مادرت عني ..


والمشكله الثانيه اني قبل سنه و 5 شهور حبيت واحد عن طريق تويتر مع اني والله العظيم مو حقت هالخرابيط بس حسيته غير عن كل الشباب حبيته من قلبي محترم و هو بعد يحبني جلسنا نكلم بعض رسايل كيك و احياناً مكالمات و انا ما كنت اقدر اكلمه كل وقت عشان اهلي و لا مره طلب يقابلني مع انه احنا بنفس المدينه و هو عمره 24 يدرس طب .. عشت احلى ايامي معاه هو الشخص الوحيد اللي كان يهتم فيني و بعدين صرتت اسمع قصص عن العلاقه المحرمه و انه حرام وكذا و انا ما كنت ادري الا قريب قلت ايش اسوي ياربي تعللقت فيه مقدر اتركه ياربي ساعدني وجا تاريخ 10-10-1435 و صار هواش بيننا مع اني الغلطانه هو ما عمره غلط علي و لا جرحني كان اقرب لي من اي شخص .. كان يقولي كل صبح انتبهي لنفسك اقرأي الاذكار استودعي نفسك و اهلك الله يحفظك ، تركته هذاك اليوم وانا ابكي و اصيح تركته لسببين اولاً لوجه الله و ثانياً هو يتمنى بنت جميله مره يا بنات والله العظيم خفت بعدين لما يخطبني ينصدم و اقعد ابكي و انجرح و قلت خلاص هذي فرصه اتركه و تركته و من هذاك اليوم مو قادره انساه و كل يوم ابكي له مشتاقه و قبل شهر جا كلمني تويتر و يحاولني ارجع و يترجى فيني و قلتله انه اللي نسويه حرام مقدر استمر معاك ربي غضبان علينا بهالعلاقه وردلي انه انتي خذلتيني كسرتي قلبي و انا اتمناك معاي طول عمري وقالي بكيفك الله يحفظك ، وبكيييت اكثر من اول و خرجت من تويتر نهائياً و قلت بنساه بس للأسف الين الحين ما نسيته و لا نسيت طيبة قلبه و حنانه و جلست ادعي له و ادعي ربي يعوضني و يشيله من قلبي ااااااه يا بنات احس بضيقه و خنقه مع اني الحمدلله محافظه على صلواتي و الوتر و الضحى و استغفر بس احياناً احس باليأس لاني ابكي كل يوم .. تمنيت احد يوقف معاي يساندني يقولي انتي اللي سويتيه صح لا تبكين لا تنزلين دموعك ما لقيت اللي يواسيني و يوقف معاي حسيت بالوحده .. حتى حكيت اختي قلت يمكن تهون علي لكن كان ردها علي لييه مسويه ف نفسك كذا و تبكين خلاص اذا تحبينه مره ارجعي له بدل العذاب النفسي .. تمنيتها تقولي كلام غير ذا وتقولي اللي سويتيه صح !.. احس ان الدنيا كلها ضدي و كل شي اتمناه وودي فيه مو عندي صرت اتمنى الموت الحمدلله على كل حال

محتاجه دعواتكم نصايحكم تجاربكم الله يعلم اني اكتب لكم و دموعي تنزل مع كل كلمه ..