جاتوه فانيليا وشوكولاته وجاتوه فراولة من مطبخ الشيف مونى بالصور

السلام عليكم ورحمة الله

النهارده ان شاء الله هقدملكم وصفة جاتوه حلوة وسهلة وشكلها جميل فى الضيافة

انا عملت الجاتوه بدقيق الاسبونش الجاهز وعايزة اقول حاجة على دقيق الاسبونش عشان ناس كتير محتارين هو بيختلف عن الدقيق العادى بيكون مضاف عليه السكر والبيكنج بودر والمحسن احنا بنضيفله البيض والماء فقط وبيستخدم للكيكات الاسفنجية بس وبنحط عليه البيض والميه ونخفقه بالمضرب لأن طريقته بتختلف عن الكيكة العادية وانا بشترى السايب من محلات خامات الحلويات التورتة بتاخد نص كيلو فيه جاهز فى السوبر ماركت الطحان وبيتى كروكر ونوع تونسى اسمه فنواز طبعا انا بتكلم على داخل مصر لكن خارج مصر الصراحة معرفش

المكونات:

نص كيلو دقيق سبونش

نصف كوب ماء

6 بيضات كبار

فانيليا

مكونات الحشو:

ربع كيلو كريم شانتى خام

10 ملعقة كبيرة حليب بودرة

10 ملعقة كبيرة سكر بودرة

2 كوب ماء مثلج او حسب مايحتاج الكريم شانتى

فراولة(لجاتوه الفراولة)

وممكن نستبدل الحليب البودرة والماء المثلج بحليب طبيعى

للتزيين:

فراولة

شوكولاته مبشورة

كريز

الطريقة:

فى اناء هنحط ربع كيلو من الدقيق الاسبونش اللى عندنا و3 بيضات كبار وربع كوب ماء وفانيليا

وهنخفقهم بالمضرب لمدة من 3 ل5 دقايق لغاية مايتكاثف الخليط ويبقى كريمى

ونحط الخليط فى صينية مربعة على ورق خبز

دخلتها فرن حرارته هادية لغاية ماتستوى وطبعا كل شخص فرنه بيختلف عن التانى

وهنكرر كل اللى فات مع بقية دقيق الاسبونش اللى هو الربع كيلو التانى وهيبقى عندنا كيكتين

وهنحطهم فى التلاجة لمدة يوم كامل او 6 ساعات ع الاقل عشان يتماسكوا ونطلعهم ونبدأ نشتغل

هنجيب كيكة من الاتنين ونقسمها بالنص بالظبط

ونبدأ نحشيها بالكريم شانتى

ونجلسها من برة بالكريم شانتى ونساوى الاطراف بالسكينة

ونقطعها قطع متساوية بالطول وبعد كده بالعرض ونزينها بالكريز والشوكولاته المبشورة

واستخدمت الشوكولاته دى وممكن اى نوع تانى

كده خلصنا جاتوه الفانيليا والشوكولاته وهندخل على جاتوه الفراولة

عندنا كيلو فراولة هنحطه فى حلة مع كمية السكر اللى عايزنها (بس ده هيكون قبل تحضير الجاتوه بيوم) ونحطها فى التلاجة

تانى يوم هنطلعها من التلاجة وهنلاقى الفراولة والسكر جابوا ميتهم

تااااااااااااااااابعونى