زوجي راافع ضغطي واحنا لسى متزوجين !!

مرحبا بنات

يمكن تتذكرون موضوعي الأخير اللي اشتكيت فيه من المقاطع الاباحية اللي في جوال زوجي :(

للاسف كل ما عشت معاه أكثر تبين لي شخصيته وأسلوبه

طبعا بالنسبة للمقاطع سمعت بنصايحكم الله يجزاكم خير و ما قلت له شي و صرت ادعي له بالهداية واستودع الله بصره وسمعه وفؤاده

ما صدقت على الله المشكلة هذي تنتهي الا وبدات مشاكل ثانية تظهر لي

زوجي موظف ورااافض رفض قااطع يعلمني براتبه مع اني بعمري ما سألته كم راتبك بس بين فترة وفترة يقول لي لا يجي يوم وتسأليني فيه كم راتب لاني ما رح اجاوبك وهذا شي ما يخصك !
طيب انا مو زوجته ويحق لي اعرف مستواه المادي ؟
دايما يحسسني انه مخبي علي اشياء ومثل ما قلت لكم الموضوع اللي راح طلع مترقي ومسافر سفرات وانا آخر من يعلم
الترقية قال لي عنها بعدين في السوالف وبدون اي تفاصيل ولما قلت له وانا مو مفروض اكون اول وحده تبشرها ؟
قال لا تقلبينها افلام علمتك الحين وانتهينا !
وانا لما فتحت جواله اشوفه يبشر القروبات اللي عنده من اصدقائه واهله وكل العالم يباركون له وانا ما ادري
دايما يقول لي ترى انا ما اعلمك بكل شي بحياتي ولا رح اعلمك
دايما يقول لي ترى انا عندي اسرااار
يرفع ضغطي بهالكلام :(
لحد ما قلت له ترى حتى انا عندي أسرار وعصصب قال لا انتي ما يحق لك تخبين عني اي شي انتي غير وانا غير !!!!
احس عينه زايغه ومره قال لي ترى انا مثل اي رجال اذا شفت ممثلة ولا مذيعة جميلة تعجبني واعجب بجمالها لكن ما اعيش معاها قصة حب والاعجاب بالجمال فطرة !
تخيلوا رجال يقول هالكلام لزوجته
ومره قاعد يعدد لي المذيعات اللي يشوفهم جميلات وكل وحده وش يعجبه فيها
لدرجة انه امس يقول لي في السوالف تدرين شاكيرا" فنانة اجنبية " اصلها لبناني ؟ قلت وش دراك قال سمعت بهالكلام و لما شفت طريقة هزها ورقصها يشبه للرقص الشرقي عرفت انها عربية !!!
ومره يقول لي البطن الصغير من علامات الجمال والدليل الممثلات الهنديات معطيهم البطن شكل وهم يرقصون !
كل هذا وانا ابتسم وكأني ما اهتم واقول ايه صااادق وانا بقلبي نار والله نااار :(
دايما يلمح لي ان الرجال عادي يضرب زوجته لو كان يحبها
وانه من الرجولة ضربها وان ضربها مذكور في القرآن
واذا ناقشته تغير وجهه وقفل
لحد ما جا اليوم اللي قلت له فيه ان كان الرجال اللي يضرب زوجته يشوف هالتصرف رجولة فالزوجة اللي ما تشتكي عليه اذا ضربها ما عندها ذرة كرامة قال ان اشتكيتي علي ترى عقابك اني بتزوج عليك قلت ليش وانت ناوي تضربني يعني ؟ سكت وما رد
يحاول دايما يقلل من ابوي لانه غني الحمدلله لدرجة انه مره قال لي ابوك اتوقع انه تاجر مخدرات !!!!!!

طبعا انا عصصصصبت وما عطيته فرصة حتى يكمل قلت له احترم نفسسك وما اسمح لك تتكلم على ابوي بهالطريقة
حتى عمي يغار منه بشكل مو طبيعي لدرجة انه لما شافني اسلم عليه بالخد تغير وجهه وقال عادي عندك تسلمين عليه بالخد ما تستحين ؟ قال لا ما استحي عادي
مع اني احترم اهله وما اتكلم عنهم بسوء ابددا لا قدامه ولا قدام اي انسان بالعالم حتى امي
دايما يبغاني اهديه واشتري له لدرجة والله اني احيانا ابخل على نفسي بالمصروف او اتسلف من اهلي عشان اشتري له شي هو نفسه فيه
ومو اي هدايا اغلى الهدايا
الحين يلمح لي يبغاني اشتري له لابتوب وبغيت ابيع من ذهبي عشان اشتري له لولا ان امي وقفت بوجهي وقالت لااا ما رح اسمح لك تسوين هالشي
بالمقابل هو ولا مرررره من تزوجنا ذكرني ولو بهدية ب 50 ريال
ندخل انا وياه السوق يشتري له عطور ويشتري له ملابس و لا حتى يسألني لو محتاجه شي ولا لا
او يعرض علي اني اشتري لنفسي شي
فصرت ما عاد اهديه حتى لو يلمح سنين قدااام
حتى المصروف اللي يعطيني اياه ما يكفيني واستحي اطلب منه واضطر آخذ من امي ما كأني متزوجة :(
متقلب بشكل غير طبيعي تعبني بتلقباته :blink:
تعبني هالانسان :(
كل من شافني قال ليش تغيرتي للاسوأ بعد الزواج ؟
ما قدرت افهمه و ما قدرت اعرف اتعامل معه
دايما انا اللي اتغاضى وانا اللي اعدي وانا اللي اعطي ماديا ومعنويا وعاطفيا
وبالمقابل هو لو شاف مني اي تقصير انقلب 180 درجة
احيانا يروح لاهله لانهم ساكنين بمنطقة ثانية و ما اروح معه فيخليني عند اهلي
تمر عليه يوم يومين ما سأل عني ولو بمسج وارسل له اعاتبه وحتى ما يكلف نفسه يعتذر :(
واذا قلت له وينك ما تسأل يقول انتي اسألي
تعبت يا بنات والله تعبت , هذا وانا ما كملت سنه متزوجة !
مدري كيف بتحمل هالشخصية طول عمري
وصار هالمنتدى هو الوسيلة الوحيدة اللي افضفض فيها ما ودي اقول شي لامي او لخواتي المتزوجات او حتى صديقاتي احس ما بيدهم حل ولو بعدين انحلت المشاكل بشوف بعيونهم نظرة الشفقة والرحمة وانا ما احب هالنظرات :(
مره صارت بيني وبينه مشكلة ودقيت على صديقتي افضفض لها وندمممت مرره
وامي مع انها ما تدري عن حياتي تقول لي كل مره يا بنتي ترى الوحده اذا ما عاشت سعيدة تتطلق من البداية قبل ما تنشب باطفال
وترى يمكن حظها في الزواج الثاني احسن من حظها في الاول
سبحان الله قلب الام يحس
وشرايكم ؟ هاذي حياتي باختصار ما فيها اي استقرار وهو السبب احس كل تصرف يسويه يخطط له كأنها حرب دفاع وهجوم ما كأنها حياة زوجية وش المفروض اغير فيها عشان تتعدل وتمشي صح
ووشلون اغير ؟ ولا ما فيه امل اعيش باستقرار مثل العالم ؟ :(