موضوعي اليوم يهم كل ام واعيه وتنظر للمستقبل وتستنى الحصاد المثمر
من طفلها الي مازال بيتشكل تحت ايديها ووقت الحصاد ماينفع الندم فكل
ام لابد حترضى بزرعها وتفتكر بأيش قصرت مع طفلها
عشان كده حبيت اجيكم اليوم واحكيكم كأني احكي مع اختي الي بجنبي
بكل حب ويارب تستفيدو من موضوعي وكلو يهون عشان حبايبنا الصغار
فلذات اكبادنا
زي مابتعرفو انو صحة الطفل حاجه اساسيه
اهم من دراستو وتعليمو وتربيتو
لانو كل الحاجات دي بتعتمد على صحة الطفل
فلو كان الطفل صحي بياكل اكل صحي
وبينام بدري ويصحى بدري حتقدري تربيه تربيه
سليمه وحيتفوق دراسيا ويستوعب كل الي بتقوليه
من هنا نبغى نتعرف على حاجات اساسيه لابد لابد
لكل ام ان تهتم فيها بشكل داااائم اطفالنا امانه
ولازم نتعب عشانهم ومايحتاج اوصي ام على طفلها
الامومه غريزه وحاسه فيكم لاني ام وشعورنا واحد
ودحين صرنا في جهاد مع اطفالنا لانو الانفتاح كبير
ومطلوب من الام تصبر وتصبر وتتعب حتى ترتاح لما يكبروا
افتكر مره قالتلي ستي لما جبت اول طفل ليا
الي ماتتعب على اطفالها وهما صغار حتتعب لما يكبروا
والعكس صحيح
وقتها كنت تعبانه ومو عارفه كيف اتعامل معاه وماعندي
صبر لاني بجد ماعرفت كيف اتعامل معاه بجد تعبت
وصرت اشتكي لامي وامي تطنشني بس تعطيني
نصايح وتسيبني تقولي اعتمدي على نفسك واغلطي
لحد ماتتعلمي تخيلو حتى وانا دوبني والده ماليا اسبوعين
كنت اتعارك مع البيبي عشان يمسك صدري
وابكي مو راضي يمسك ويرضع وكانت تسيبني وتروح
بعد ماتقولي كم نصيحه اااااااااه مانسيت دا اليوم
وبعد تلاته ايام اتعلمت وصرت اعلم غيري بعد سنوات
فكيف دحين الله يعين وربي الدنيا والانفتاح صارت شويا
وحتتحكم في اطفالنا ونفقد السيطره
بس كل ام زي ماقولت لازم تجاهد وتحتسب الاجر
وانا اليوم بس حتكلم عن صحة الطفل وكيف نهتم في اكلو
وايش الاساسيات الي انتبهي يعدي الاسبوع وماتكون فيلو
الحاجات هادي
يتبع ....
الفواكه والخضروات
احرصي انو تعطي طفلك حصه
من الفاكهه وحصه من الخضار بشكل يومي
والله لو تعرفي قد ايش فايدتها على المدى الطويل
ماتصدقي زي لما بيمرض لاقدر الله تعرفي انو الطفل
الي بيتناول الفاكهه والخضار بيطيب بأذن الله قبل
الطفل الي محروم منها ومضاعفات المرض اقل بقليل
والمرض حيكون عابر وماحيترك اثر على صحتو
عكس الطفل الي مابياكلهم تلاقيه لما بيمرض بيطيح
وتطول طيحتو وتجيه مضاعفات وممكن تضطري توديه
المستشفى عشان حرارتو مرتفعه لانو جسمو ضعف
وحيلو اتهد مافي دفاعات ولاعافيه فيضطرو يركبولي
مغذي ومايطيب الا بعد معاناه وايام
عكس الطفل الصحي مابتاخد منو السخونه او التعب
غير يوم يومين بالكتير وجسمو بيقاوم وبيرجع لطبيعتو
بسررررعه وبدون حاجه للمستشفى الا في حالات نادره
فلا تقللو من اهمية قضمة تفاحه او ربع جزره يوميا
دا على اقل القليل يعني دا الطفل بيعاند وبتغلبي معاه
في اطفال بيعذبو امهاتهم عشان ياكلوها لكن الام لانها ام لازم تجاهدي
وتفكر وتخطط بكل الطرق وتدخلها في اكلهم بدون مايحسو
سواء في الشوربه بعد نضجها او مع الحليب ككوتيل
حاولي تعمليلو بالنهار صحن فواكه مكون من حبة فروله وربع برتقاله وموز
وربع تفاحه وحبة عنب وقطعة بطيخ صغيره او الي متوفر لو صنفين
وخليها عااااده لاتقطعيها مهما حصل
وبعد ماتقطعيها صبي عليها ملعقه عسل وملعقه حليب مركز محلى
ماتخافي منو صحيح مو صحي بس بيكون سبب بعد الله في تقبل الطفل
للفاكهه ورشي فوقهم كاكاو بودره وحطي جنب الطفل ولاتعطي نصايح
ممكن يوسخ حالو وممكن يكبكب معليه اتحملي لو ماخرب ووسخ
ماحيتعلم وماحياكل دا عالم الطفل حوسه بحوسه ولازم نتحمل ونصبر والجنه
تحت اقدام الامهات
حاولي تصغري الطبق اصغر حاجه وتكون الكميه قليله الين مايدمن على الفواكهه ويصير يحبها
بعدها كبريه لانو الطفل بس يشوف الطبق كبير يجيه احباط ويرفض بدون مايذوق
وبعد مايحبها ابدي قللي كمية الاضافات عشان صحتو
دحين اتفقنا انو مايعدي يوم بدون طبق الفواكه لو ماياكل الا ملعقه كفااااايه مؤقتا
نجي للخضروات لاتقل اهميه عن الفاكهه احرصي على انو ياكلها يوميا
يابتكون مع الغدا او بشوية اضافات وتصير وجبه رئيسيه
واهم انواع الخضار هوه البروكلي احرصي انو طفلك ياكلو في الاسبوع تلاته مرات
بمعدل ملعقتين كحد ادني لو تعرفي كيف بيقوي المناعه ابحثي واقري عنو
نصيحتي لكل ام ماتهملها
وفي طريقه احيانا اسويها وبتجيب نتيجه اجيب اصغر قدر كاتم واخصصه لعمل الخضار
احط الخضار بحجمها الكبير بعد غسلها وتنظيفها وقطعها نصفين في القدر
واضيف شوية شوربة لحم او دجاج او مويه عاديه وملح واقفل القدر 7 دقايق
الاقي الخضار مستويه ولذيذ بس مش مهريه يعني الطفل يقدر يمسكها
بيدو وبياكلها وممكن تحطي معاها حبات الذره وحبات البازلا او البليله
ياامهات لاتخافو بالبدايه
اكيد حيرفضو بس بعد مرات حيتعودو
ويدمنوها زي ادمان الاكل المعلب والوجبات السريعه
هما ادمنوها عشان اتعودو عليها لااقل ولا اكتر
حتتعبي وتتعبي بس حتنتصري في الاخر لابد من الجهاد ربنا يعين ويصبرنا
دحين نكمل من الاشياء الضروريه هوه البروتين النباتي
زي العدس الفول والحمص والبقوليات بس اهمها العدس
مو مهم نوعو اهم حاجه انو الطفل ياكلو اقل شي تلاته مرات بالاسبوع
لو يكون سناك يكون افضل اعمليها بقدر الضغط عشان ماتروح قيمتو الغذائيه
بكترة الطبخ 10 دقايق يكون خالص وحطيه بكوب وحطي معاه رشة ملح وشوية زبده
وقدميه للطفل حياكلو لانو لذيذ ومالح بس انتي لاتتكلمي حطيه جنبو وقومي
خليه ياكلو بيدو يستمتع كده ويخلص الصحن مجربه:22:
كمان الحليب لو الطفل اكبر من سنتين
اديلو الحليب مرتين يوميا بس بشرط مايقل عن 400 مل حاولي ماتنزلي عن
دا القدر لانو حيقل معدلو اليومي ودا شي خطير على الطفل بكره لما يكبر
ويدرس وكمان لما يمرض حيتعب لو نزل عن 400 يوميا والافضل 450
فيه امهات عندهم اعتقاد خاطيء انو الطفل بس يكبر ويصير سنتين وتلاته واكبر
خلاص مايحتاج الحليب وكفايه عليه حليب طويل الاجل
الطفل لحد مايصير عجوز يحتاج الحليب الطازج او البودره
وطويل الاجل يكون سناك او مكمل او للزنقات والخرجات
يتبع....