منقول من الاخت العزيزة (غالية المري)
شحالكم خواتي وشخباركم
اليوم بعلمكم طريقة وايد سهلة ..
في صبغ البيت او الغرف او اي مكان انتوا تحبونه وحابين انكم تغيرونه
لاحظت ان نحن المواطنات والعرب بشكل عام عندنا ماشالله مهارات وطاقة بس ما نستغلها
ولو نلاحظ الاجانب الحريم منهم والرياييل يقتصدون في كل امورهم
ف نلاقيهم عندهم في البيت مخزن اساسي يظم انواع الصبغ والنجارة والسمكرة و و و
ونشوفهم سواء في الحياة الطبيعية او الافلام او البرامج الوثائقية
هم اللي يبنون بيوتهم
وهم اللي يصبغون
وهم اللي عدلون ويسوون كل شي
ونحن قليل جدا الي يكون بينا يصبغ بيته بروحه او يعدل او يبني
كل شي نباه على الجاهز
ندفع قيمة 5000 درهم او اكثر على مساحة غرفة سته في سبعه وهي تكلفته يمكن 500 درهم وبس
انا سبق وعرضت عليكم لوحاتي الفنية في معرضي الاخير
وسبق عرضت عليكم الرسم على الكيك
والقيت عليكم 3 محاضرات اسرية
اباكم تنتبهون اني استغليت حسن الحوار وفني التشكيلي في حياتي الخاصة والعامة في كل شي
اصبحت انا اللي اصبغ بيتي واركب ورق الجدران
انا اللي اشرف على ديكوراته
انا اللي اصمم نماذج النجارة
انا الي اشرف على حفلات العايلة واشرف على طبخها
سواء الوجبات الرئيسية او الكيك والحلويات
ليش ما نكون نحن سباقين في كل شي
ليش ما نستغل طاقاتنا ومهاراتنا في كل شي
تعالوا الحين براويكم كيف صبغت جانب من صالتي ..
خطوه خطوه
نبدأ
بسم الله الرحمن الرحيم
اول شي قيسي المساحة اللي تبين تصبغينها اذا كانت غرفه ولا جدار واحد
خذي الطول والعرض
بعدين سيري السوق (( محل الصبغ اللي انتي تفضلينه))
وانا طبعا افضل (( جوتن))
تعطينهم قياس الجدار اللي خذتيه وهم بيقولولج شكثر تحتاجين صبغ
وطبعا تختارين درجة اللون اللي تبينة .. وتقوليلهم يجهزونة لج .
بعدين تشترين اللي تحتاجينة اول مرة وعقب بيكون عندج حق المرات الياية مثل
رول الصبغ
فرشاة الزوايا
تيب( لزق) للحواف
فوطة
سلم
فرش مقاسات لرسم
نايلون للأرضية
ولجدار صالتي انا اخترت اللون الاخضر الفاتح ( التفاحي) وعشان اعطيه ضربات الترخيم
خذيت صبغ الخضر غامج بدرجتين واصفر ذهبي.. وطبعا اللون البني المحروق عشان الرسم النهائي
الحين نبدأ
أول شي ناخذ اللزق ونلزق حواف الجدار من تحت ومن فوق عند السقف وعلي اليمين وعلى اليسار
بعدين نلزق وصلات الكهربا بهاطريقة
يعني حافة السقف وحافة اليمين وحافة اليسار والحافة اللي تحت وطبعا حول وصلات الكهربا
بعدين نكمل ونصبغ بنفس اللون ( الاخضر التفاحي) اللي صبغنا فيه الحواف نستخدم الرول ونصبغ القاعدة الاساسية
وفي حالحالة قبل لا ينشف اللون الاساسي ناخذ الفوطه ونحطها في اللون الاخضر اللي هو اغمج بدرجتين ونضرب الجدار بيدينا ضربات عشوائية وبفوطة ثانيه انحط اللون الأصفر المذهب ونضرب فوق بعض عشان يكون معانا بهاشكل
الحين خلصنا ترخيم الجدار بالألوان الثلاثة وصار جاهز
نتريا 30 دقيقة ينشف لان الصبغ اللي مستخدمتنه ( مائي) ونبدأ مرحلة الرسم
بفرشاة دائرية نبدأ نرسم بالبني .. وانا اخترت رسم نباتي كلاسيكي
الحين خلصنا ومر على الصبغ والتصميم 24 ساعة
تاخذين كرستال الشوارفسكي الاصلي اللي بحجم الدرهم الكبير اللون البني
وتبدين تلزقين نهايات الرسم بالكرستال بواسطة الصمغ الحراري
بهاطريقة
وخلصنا وصارت النتيجة معانا بهاشكل .... صلوا على حبيب الله المصطفى سيدنا محمد صلى الله عليه وسلم.
فديتكم اتمنى اتكونون استفدتوا من طريقتي واستسهلتوها بأذن الله
امانة يا بنات اللي بتقرا موضوعي تدعيلي انا وعيالي وزوجي بحسن الخاتمة وان ربي يحفظنا من كل شر
واللي حبت طريقتي وتقدر تسويها بكون سعيده جدا فيها
واللي حبت طريقتي وحابه غيري يسويها ياريت تقول لرسام او الصباغ ان الفكرة فكرة وتنفيذ مواطنة.
وشكرا