meme1515

meme1515 @meme1515

عضوة جديدة

بنات عملت عملية البواسير بالليزر تعالو استفيدو من تجربتي/ قديم

الصحة واللياقة

السلام عليكم ورحمة الله وبركاته
بنات انا سويت عملية البواسير بالليزر بمستشفى الاطباء المتحدون عند الدكتور حسن نصر
بالبداية حابة اشكر الاخت mno art واقولها الله يوفقك ويسعدك دنيا واخرة ولا تشوفي مكروه بحياتك ويخليلك اولادك وتشوفيهم عرسان يارب لانه انتي من شجعني بعد الله على عمل العملية لما كتبتي تجربتك وقد ايش العملية سهلة

بداية القصة لما صابني بعد فرح اخوي امساك فظيييييع الله يكرمكم استمر معايا 3 شهور .. ماتركت شي ماسويته لكن مافي فايدة الامساك كل يوم يزيد وماراح الا بعد ما طلعتلي بواسير .. في البداية ما كنت عارفة انها بواسير بس كنت ابكي من الم وما ادري ايش هو .. ولخبرة ابوي بالموضوع قالي شوفي اذا في بروز طالع من فتحة الشرج وبالفعل طلعت بواسير .. بدأت بمحاولة علاجها بالعلاجات المعروفة مستبعدة العملية تماما خصوصا اني شفت ابويا كيف لما عملها جراحة والالم الي استمر معاه لحد 3 شهور بعد العملية تقريبا .. اخدت دوا دافلون ومرهم بروكتو جليفينول والشفا من رب العالمين .. يروح الالم اسبوع او 10 ايام بالكتير وبعدين يرجع وترجع تلتهب مع اني قطعت كل انواع الاكل الي ممكن يلهبها وقاطعت كل انواع البهارات والاكل الي من السوق ولكن الحمدلله على كل شي

شوية وبدأت اول مضاعفات البواسير الي هي حكة والتهاب في المهبل والمنطقة الامامية كلها .. رحت عند دكتورة نسائية وقلتلها كل المشكلة وفحصت وقالتلي عندي التهاب وادتني ادوية وكشفت علي وقالت عندي بواسير .. وسألتها يادكتورة عندي شرخ والا بس بواسير قالت لا بس بواسير قلت طيب الحمدلله البواسير ممكن تروح بس الشرخ لازم عملية <<< ركزو هنا يابنات لاني حرجع لدي النقطة

المهم بدأت باستخدام الدوا الي ادتني هو للالتهاب وصح كان يخف شوية لكن مايروح وانا محتارة لانه بحياتي ما جاني التهاب ابدا .. وكنت اداوم على ادوية البواسير بالاضافة لزيت الزيتون والعسل الي مقري فيه ولكن يارب لك الحمد تخف اسبوع وترجع تلتهب .. وشاء ربي اني خطبت في ديك الفترة وبعد ماملكت بيومين جاني امساك الي دبحني وجلست ابكي في الحمام من الالم .. فبدأت افكر يا بنت وبعدين اذا ضليت ساكتة واتزوجت رح اموت من الاحراج مع زوجي وصعب اول الزواج اقوله وديني الدكتور معايا بواسير .. وبنفس ديك الفترة دخلت المنتدى وقرأت موضوع mno art الله يسعدها واتوكلت على الله واتصلت عالمستشفى وحجزت موعد عند الدكتور حسن نصر
طبعا ادوني الموعد بعد اسبوعين لانه ماشاء الله مرررة مزحوم .. ورحت عالموعد وكشف عليا واحب اقولكم يابنات ترى كلنا نخاف من الكشف من الاحراج لكن يا بنات الموضوع مررررررة ابسط مما نتخيل .. والله ماتحسي بأي احراج لانه لما جا يفحصني كانت معايا ممرضة قالتلي نزلي ملابسك الداخلية شوية مو كتير ولما نمت عالسرير غطوني بشرشف وهو ماشاف غير جزء بسيط ويشوف بسرعة وبس .. المهم قالي عندي بواسير متضخمة وشرخ << وهنا يابنات انا اقولكم المثل الي يقول اعطي الخبز لخبازه يعني لا تروحون لدكتورة نسائية او جراحة او ما ادري ايش لاني سبقت وقلت انه الدكتورة قالت ماعندي شرخ يعني لاااااازم جراح شرج ومستقيم مو اي واااحد
المهم الدكتور قال لازم عملية بس كان عندي المنطقة كلها متحسسة من مغاطس الديتول فأداني دوا للتحسس وقالي بعد اسبوع ترجعي .. وقلتله انه عندي التهابات مهبلية وحكة في الشفرات وقالي من البواسير لانها اتأثر وقالي استعملي دوا التحسس عالمنطقة من ورا وقدام .. وامي سألته اذا العملية تأثر على غشاء البكارة لاني لسا بنت وقالها مالها اي علاقة وسألته اذا الليزر يأثر عالحمل في المستقبل قالها ابدا مايأثر
وبعد اسبوع لما راح التحسس كان الالم خلاص قضى عليا اتوكلت على ربي ورحت المستشفى وقررت اسوي العملية .. سوولي تحليل دم وبول وقالولي تيجي الساعة 5 الصباح
يوم العملية : كان يوم الاربعاء الماضي .. رحت الساعة 5 الفجر زي ماقالولي وبعد شوية اجراءات ودوني على غرفتي وكانت مررررة مرتبة ونضيفة .. الساعة 5 ونص جاتني الممرضة وقالتلي اغير ملابسي واشلح كل الملابس الداخلية وافك شعري من كل البنس .. وعالساعة 6 جات وركبتلي المغذي بيدي .. وشوية جاتني ممرضة تانية قاست الضغط والحرارة وسالتني ازا لابسة عدسات عشان اشيلها او عندي تركيبة باسناني او عندي حساسية من اي دوا او اخد حبوب ضغط او سكر .. وشوية جاني دكتور باطني وسالني نفس هادي الاسئلة .. وكمان شوية جاني دكتور تخدير وفحص دقات القلب وسألني نفس الاسئلة ههههه
ولما جات الساعة 10 و10 دقايق جو الممرضين ونزلوني للعمليات .. وكان طبيب التخدير سعودي مرررة مريح .. قبل ما افوت قريت الفاتحة سبع مرات واتوكلت على الله .. الساعة 11 ونص صحيت من البنج وطلعوني غرفتي .. والحمدلله ماكنت احس بألم الا خفيف .. بعد 3 ساعات جابو الاكل اتغديت ونمت لحد ما جاني مساعد الدكتور حسن نصر وشال القطنة وانا كنت خايفة من دا الشي بس يابنات ماشاء الله تبارك الله والله ماحسيت بأي الم لانه قالي خدي نفسي وشالها بسرعة وقبلها كانو مديني ابرة فولترين فما حسيت بشي الحمدلله .. وجابلي الادوية وتحاميل ومرهم وقالي كلي طبيعي ماعدا الفلفل والشطة وامشي طبيعي واجلسي طبيعي ومافي مغاطس ابدا بس غسلي المنطقة بصابونة ديتول مرتين يوميا .. والساعة 5 خرجت من المستشفى
ملاحظاتي : اول يومين ماكنت عارفة اتبرز الله يكرمكم بسبب البنج .. وتاني يوم جاني امساك بس حاولت ارخي نفسي وانحلت الحمدلله .. ماكنت قادرة اجلس طبيعي والسبب خوفي وليس الالم .. بعدها اتشجعت وجلست .. وكنت اخاف امشي مشي عادي وكانت حركتي مرة بطيئة .. ايضا خروج دم وصديد وافرازات من المنطقة وده شي طبيعي كمان
حاولي في دي الفترة يكون اكلك شوربات عصاير وخبز بر او نخالة وابتعدي عن مسببات الامساك
وفي الاخير بقول لاي بنت بتعاني اتوكلي على الله وسويها والله انها هينة وماتستاهل تجلسي تتألمي وتتجنبيها .. واي استفسار لا يردك الا كيبوردك
ادعولي ربنا يتمم شفاءي ويوفقني انا وخطيبي يارب
62
611K

هذا الموضوع مغلق.

دلوعة مروان
دلوعة مروان
السلام عليكم
الحمد لله على سلامتك اختي ربي يتمم عليك شفاؤك وماتشوفين هالبواسير مرة ثانية بحياتك بس عندي شوية اسئلة الله يسعدك

كان عندك بواسير داخلية والاخارجية؟؟والشرخ اللي كان عندك مع البواسير ايش صار فيه؟؟
واحيانا اقرأ انو بعد العملية يصير الشخص مايقدر يتحكم بخروج البراز تكرمين والغازات صحيح هالكلام؟؟
وهل الافرازات اللي تخرج بعد العلمية تستمر والا تنقطع؟
ويعطيك ال عااااااااافية
شيله فوشيه
شيله فوشيه
الله يوفقك يارررب ويشفيك والحمد لله على سلامتك
اختي المستشفى ذا وين بااي منطقه وكم كلفتك التكاليف ؟ يعني انتي سويتي ليزررر بس ع شان البواسيررر والا عشان الشرخ والبواسير ؟ واذا بس البواسيررر بكم

وثاني شيء عندي ولد عمره تسع سنوات فيه شرخ ودايم يصيح من المنطقه هذي ويبكي ويعطيه الدكتور عصار وماينفع
توقعين وش علاجه لازم ليزر ؟
وانتي الحين كم لك يوم مسويته وش تحسين فيه الحين ؟؟؟
تكفين ضروري تردين علي
وثاني مره اقولك حمد الله على سلامتكككككككككك والف مبروك ياعروسسسسسسسه
meme1515
meme1515
هلا دلوعة : البواسير كانت خارجية بس الي فهمته من الدكتور ان العملية تتسوى للبواسير الداخلية والخارجية وبكل درجاتها .. والشرخ بإذن الله راح لانه استأصلوه بالليزر .. اما بالنسبة لعدم التحكم فياقلبي ان شاء الله ماحتكون عندي هادي المشكلة ممكن تحسي فيها اول كم يوم بعد العملية لانه زي ما قتلك المنطقة تكون واسعة .. بس بعد اسبوع ونص تقريبا تبدأ ترجع طبيعي وماحيصير عدم التحكم وانا قريت انه دي المشكلة بتواجه الي مسويينها جراحة اكتر من الليزر وانا دحين باليوم الخامس واي تطورات رح اخبركم ان شاء الله وبالنسبة للافرازات الدكتور قالي من اسبوع لعشر ايام وتروح بإذن الله واي استفسار انا بالخدمة


اختي شيله فوشيه الله يشفيلك ولدك يارب انا سويت العملية للشرخ وللبواسير والحمدلله .. عملتها بجدة بمستشفى الاطباء المتحدون عند الدكتور حسن نصر كلفتني مع التحاليل وكل شي 9000 ريال ..
بالنسبة لابنك الله يشفيه ينفع عملية الليزر بس اتوقع ابنك مرة صغير وماحيرضى الدكتور يسويله هي دحين الا لما يكبر .. وعالعموم انا عندي مراجعة مع الدكتور بكرا وان شاء الله اسأله عن حالة ابنك .. انا اليوم الخامس من العملية والحمدلله حاسة بتحسن .. الالم يجي شوية بعد دخول الحمام الله يكرمك ويروح بس الحمدلله على كل حال والدكتور يقول من اسبوع ل10 ايام وبتحسن ان شاء الله واي شي تحتاجيه انا اختك الصغيرة ياقلبي
واسفة اني رديت برد واحد بس انا جديدة بالمنتدى ومالي غير 3 مشاركات باليوم
ارخبيل
ارخبيل
الحمدلله على سلامتك ..........تصدقين الكثير يشتكي من البواسير اخوي ياعمري شاب
ماتزوج وحماتي انا ماعرفت البواسير الا بعد ولادتي الرابعه وقالت الدكتوره لا تخافين اهم شي
لاتلتهب اتعذب فترة النفاس من ادوية النفاس الحاره ومن التهاب البواسير مره اوقف حتى تهدى وارجع آخذ الادويه
شجعتيني اني اسويها با ليزر اول مره اسمع عنها
الله يوفقك ويعافيك ويشفيك على تفطين خواتك
شيله فوشيه
شيله فوشيه
الله يوفقك على الرد السريع
وان شاء الله ماقدامك الا العافيه