ماكو اسامي

ماكو اسامي @mako_asamy

كبيرة محررات

بعض الاكلات اللي ممكن تجمدينها للشهر الفضيل

اطباق عالم حواء







مرحبا بالغاليات
ولهت عليكم والله
بما ان رمضان على الابواب كل عام وانتو بالف خير والله يبلغنا وياكم الشهر يارب على خير
قلت احط لكم بعض تجاربي المتواضعه للإستعداد للشهر الفضيل

اولا
الكبب واسمبوسه طبعا الكبه جاهزه اشتريها من احدى الماهرات والسمبوسه (حسب الرغبه) احنا نفضل الفونك بالبصل الاخضر وسمبوسة البصل بالماش والكزبره الخضراء وايضا سميوسة الخضار المشكله مع الشبنت وايضا كبة الجريش الجاهزه
ثانيا
الباستا كل سنه اسوي صينيتين بشمل وصينيتين لازانيا بالمواعين القصدير اللي من الجمعيه واهم شي تكون المعكرونه واللحم والصلصه سواء البيضه او الحمرا يكونون باردين لا تطبقينهم وهم حارين يشربون ولما تنخبز تكون معجنه
سوي كل صنف بيوم وبرديهم وفرزنيهم مكشوفين ولما يجمدون غطيهم بغطاهم الورقه الكرتون اللي تكون مع مواعين القصدير ويدوب تطلع الصبح بالثلاجه وتخبز قبل الفطور ووممكن تسوين اصابع الكنالوني الجاهزه بنفس الطريقه
ثالثا
المحاشي وجبتين ورق عنب ووجبتين كوسا محشي اهم شي بالنسبه للكوسه لما تحفرينها تنزل في ماء حار وتغلى غلوه وحده بس وتنشخل وتبرد جيدا وتحشى
رابعا
الحمسات انا اسوي حمسات لحم مفروم مع بصل وبهارات عشان تكون جاهزه بالفريزر اطلعها واحشي فيها الباستري او قوارب البطاط او اي اي شي
حمسة الربيان بالخضار الصيني ربيان مفروم مع بصل جوانح وفلفل احمر شرايح وجزر شرايح وثوم وشوي زنجبيل (بدون فلفل اخضر) تحمس مع ماجي ورشة بهارت وتبرد تفرزن ويدوب تطلعينها وتكونين سالقه شعريه او معكرون سباجتي مقطعه وتشرحين عليها حبة فلفل اخضر بارد عشان ريحته تخليه فريش ويصير عندج نودلز صيني بالربيان
حمسة دجاج بالبصل والماجي تكون عباره عن دجاجه مفتته محموسه مع بصل وماجي تطلعينها وتحشينها اي شي او تضيفين لها سماق ورشة زيت زيتون وتحشين فيها صمون صغار ويكون عندج صمونات المسخن
الجلاش
انا اشتري المربعات الصغيره وافك تثليجها واحشيها لحم مفروم محموس ورشة جبن عشان يمسك
وايضا سبانخ بالبصل والثوم والفلفل
وممكن دجاج او مشروم محموس مع بصل
احشيها واسكرها واثلجها على صينيه بنايلون بس تجمد المها بعلبة حافظه بالفريزر ويدوب اطلع وادخلها الفرن طبعا يدهن الوجه بالبيض
عصاير
انا اسوي كركديه لانن نحبه واحفظه ببطول بلاستيت بالفريزر بس ما اترسه عشان لا تنفجر
والحين خزنت مانجا وجوافه بالفريزر للعصاير الفريش
والحين الفاكهه ما شاء الله
فطاير
النوع الوحيد اللي احفظه بالفريزر هي فطاير الاقماع واطلعها وادهنا صلصة طحينه واحشيها فلافل او زهره مقليه مع خس
او باذنجان

بمناسبة الزهره او القرنبيط
الحين ببلاش شريت صندوقين و قصصتهم صغار وسلقتهم دقيقتين وبردتهم عدل وغطيتهم بالبيض والبقسماط
طبعا يفضل تحطين كمون وفلفل ونقط من الخل للبيض ويفرد على صينيه ويفرزن وبس يصك عدل لميه بكيس وطلعي واقلي وما راح يكون يشرب دهن

ممكن تحمرينه وتحطينه بصحن وتصبين على الصلصه البيضه الجاهزه البلو جيزه بشكل خطوط وتنثرين عليع بصل اخضر مفروم وينوكل بخبز
صواني
اهم صينيه لنا نحبها هي المسقعه واهم شي مثل ما سبق قلتلكم كل شي يكون بارد الباذنجان واللحم والبشمل ايضا بصينية قصدير او بايركس
دجاج طازج تشترين فرش وتغسلينه وتتبلينه وتقصصينه او كامله احشيها بصل مفروم مع ثوم وزنجبيل وبهارات ويدوب تطلعينها تقصين يمها بطاط وشرايح بصل وتدخل الفرن
ويارب تكون مشاركتي مفيده
132
48K

يلزم عليك تسجيل الدخول أولًا لكتابة تعليق.

تسجيل دخول

zohra
zohra
جزاكِ الله كل الخير اختى

منذ زمن و انا ابحث عن اكلات ممكن تتفرزن لأنى جديدة على المطبخ
ماريا القبطية
انا حسيت انه كله على بعضه


مافي ترتيب بين طبق والثاني


مادخل شئ بمخي
رسيل*
رسيل*
مشكوره
ام نوافي وساره
يعطيك الف عافيه اختي ماكو اسامي مو ضوعك جاء في وقته جعله في ميزان حسناتك يارب
نهله
نهله
الله يسعدك ويجعله في ميزان حسناتك يارب
عندى سؤال عزيزتى
ماهى صلصة طحينه الاقماع.......