السلام عليكم ورحمة الله وبركاته
شفت كثيرين يسألون عن الولادة في امريكا,, قلت خليني احط تجربتي بالتفصيل :27:
بداية:
1- انا اشتغلت سنوات في قسم الولادة بالسعودية :) يعني مقارنتي على سنع
2- انا في مدينة الباني - نيويورك ,, واكيد الولايات تختلف
3- بحاول اتطرق بشكل سريع على اجراءات الجواز الامريكي والـ Social Security Number
بسم الله
انا جيت امريكا بداية الشهر الثامن,, تشوفي اول شيء شركة التأمين الي هي Aetna تغطي اي مستشفيات,, تتصلي عليهم وتحجزي موعد
انا رحت قبل التامين يوصلنا,, وعادي استقبلونا ووقعنا على ورقة ان لو ماوصل التامين احنا ندفع
الافضل تطلبي تقرير من دكتورتك بالسعودية,, عادي قولي ابي تقرير للحمل فيه ( نتائج التحاليل الاولية + نتائج الاشعه )
انا هذا الشيء وفر علي شيء كذا,, لان كانوا ناوين يعيدون تحليل داء القطط,, والروبيلا وكل الشلة الي تنعمل اول الحمل
والاشعة تفيد لان لو وصلتي متأخر ,, وعملوا لك اشعة ماتكون دقيقة زي اول الحمل
اوكي اخذتي موعد,,,
خلال الموعد الروتين العادي ياخذوا وزن وعينة بول الله يكرمكم,,
بالاسئلة راح يسألوا تشربي كحول,؟ انتي متزوجة؟ - انا عجزت امسك نفسي من الضحك يوم قالت متزوجة !! -
عندهم لااازم بكل حمل ياخذوا مسحة لعنق الرحم,, وكمان تحليل للايدز
بعدين تصير مواعيدك روتينية زي السعودية بالضبط,, وزن>> تحليل>> فحص بطن>> ومع السلامة :time:
الاشعة عملوا لي لان كان عندي سكر حمل بحملي ببكري,, وخافوا من زيادة الوزن
والا الروتين الي عندهم اشعة بالاسبوع 36,, وخلاص,,, الا لو وصلتي 40 وماولدتي,, يعملوا لك ثانية ( وهذا الي صار معي )
انا يوم تأخرت ولادتي,, عملوا لي اشعة يتأكدوا ان المشيمة لسى تشتغل,, وعملوا لي تخطيط للطلق
- وهذا شيء عجبني جدا جدا انو يحرصوا من بدري -
كمان اول ماتدخلي التاسع يعملوا لك فحص يشوفوا وضع عنق الرحم ( عشان وقت الولادة يعرفوا انتي كنتي فين !! زي حالتي كنت الولادة الثانية والعنق كان لين مررررة ,, يعني لو جيتهم وقت ولادة او معي الم خفيف بيقولوا ايووه دخلت في ولادة,, بينما الحق انا كذا من بدري !! فهمتوا ؟ )
طبعا هم يدلعوك والكل يبتسم بوجهك.. انا دكتوري كنت انفخ فيه وابكي يوم تأخرت ولادتي وكان يحاول يضحكني,,,! ( صراحة ما الوم الاطباء بالسعودية,, عدد المرضى كثيييييييييير,,, هنا عندهم 10 ولادات باليوم ويقولوا كثير !! )
طبعا مايعطوك كرت معاك للمتابعة !
ولو صار معاك شيء تتصلي على القسم وتكلمي الممرضة وتشرحي لها الي صاير معاك ,, ثم ساعة كذا يكلمك الدكتور المسؤول عنك او الفريق المناوب لو اجازة,, ووقتها يحدد يحتاج تجي المستشفى او لا ,, - ميزة ممتااازة -
يتبع . . . .
الولادة مافيها شيء مميز الا الدلع,, يعني القابله الي معاك ماتتركك ابد,,,
ابرة الظهر مافيها فرق صدقوني,, بس انهم ممكن يعطوك جرعة زيادة وقت طلوع الراس ماتحسي بشيء ابد ابدددد !!
طبعا مايشجعوا شق العجان حتى للبكرية,, يعني لو انتي البيبي الثاني وفوق,, بيحاولوا كثير مايقصوا لك,,
انا ماقصوا لي لكن صار لي جروح بسيطة,, والحمد لله حسيت نفسي مرتاحة اكثر من بكري مع القص !! :35:
عناية بعد الولادة,, تجي ممرضة معاك تدخل معاك الحمام,, تساعدك بالشاور وتبديل الملابس
احلى شيء عجبني الفوط الصحية الباردة ( اول احسب انها تنحط بالفريز ),, عبارة عن فوطة وتكسري شيء جواتها وتصير باررررردة تخفف تورم المنطقة ,,
كمان بخاخ لألم الغرز,,
وحاطين لك ملابس داخلية استعمال مرة وحدة,,, جداا مرييييحة بدل الداخلي القطني
اهم شيء اذا سألوكم عن نوع الدايت عشان الاكل بعد الولادة اطلبوا Kosher Diet
البيبي كان عندي,, بس متى مابغيت ارتاح اخذوه
يشجعوا على الرضاعة الطبيعية,, وتجيك اخصائية تعلمك كيف الرضاعة الصحيحة وتجاوب على اسئلتك
حطوا على بنتي مع السره جهاز صغير لو طلعت من الجناح يطلع انذار للقسم كله,,!
وقت ماجيت اطلع ادوني ملابس ذكريات لبنتي,,
موعد بعد الولادة
يكون بعد 6 اسابيع من الولادة
تشيلي ملابسك كاملة ! :35: يفحصوا الصدر والثديين
البطن والرحم,, ويشوفوا الجرح
وياخذوا مسحة عنق الرحم
كمان يصرفوا لك مانع حامل ويناقشوك
يتبع . . .