العيش السورى مع شاورمه اللحم (هبة عبد العظيم)
لعمل العيش السورى
ثلاثه ارباع كوب دقيق
ملح / كوب لبن
لعمل الشاورمه
نصف كيلو لحم شرائح / قليل من الزيت / 2 بصله مفرومه (ماء البصل فقط ) / ملح/ فلفل/ بهارات / كوب زبادى/ نصف كوب خل / 2 ملعقه مسطرده / شرائح بصل/ شرائح طماطم / حزمه بقدونس مقطع
الطريقه
لعمل العيش السورى
يوضع الدقيق فى الخلاط ثم يضاف الملح واللبن ونخفق المكونات جيدا ثم توضع فى اناء
توضع طاسه تيفال على النار ثم نتركها قليلا ثم يوضع مقدار من العجين السابق لبفترش قاع الطاسه ويقلب الحبز السورى على الجانب الاخر بعد ان يتماسك ثم يرفع من الطاسه ويترك يبرد
لعمل الشاورمه:
توضع جميع المقادير فى اناء وتخلط جيدا فيما عدا شرائح البصل والطماطم والبقدونس وتدخل فى الثلاجه لمده 8 ساعات ثم تخرج وتوضع فى اناء مرفوع على النار به قليل من الزيت ويقلب جيدا حتى تنضج شرائح اللحم
يتم بعد ذلك اضافه شرائح الطماطم والبصل والبقدونس وتشوح معا لمده 3 دقائق ثم توضع الشاورمه فى الخبز السورى ويضاف اليها سلطه الطحينه وتقدم ساخنه

فراخ محشية في الفرن (رواء الاسلام)
المقادير
فرخة متوسطة ـ كوب رز ـ جزر مقطع مكعبات ـ بطاطس مسلوقة نصف سلقة مقطعة مكعبات ـ بصلة كبيرة مقطعة صغير ـ 2 فص ثوم مقطع صغير ـ 2 بصل اخضر مقطع حلقات ـ البهارات المستخدمة للخلطة ( ملح ـ فلفل ـ قرفة ـ بهار فراخ ـ زنجبيل مطحون ) ـ البهار للفراخ ( صويا صوص ـ بابريكا ـ ملح ـ فلفل ـ قرفة )
طريقة عمل الحشوة
اولا احضر حوالي كوب رز ( انا باستعمل بسمتي ) و اسلقه .اجيب البصل اقطعه مش افرمه و معاه بصل اخضر و ثوم و اشوحهم في زيت زيتون لحد ما البصل يصفر و بعدين احط عليه الصنوبر لحد ما يبتدي يحمر اضيف الزبيب و اقلب .اكون مقطعة بطاطس و سلقاها نصف سلقة و اقطع الجزر مكعبات و اضيفهم على البصل و الزبيب و الصنوبر و اقلب و اضيف الملح و الفالف و البهار لحد ما يدبل الجزر شوية و بعدين احطهم على الرز و اقلب و انا باضيف في الخر صويا صوص لقيت طعمها حلو اوي بيها .اجيب الفرخة و انضفها كويس و اعمل خليط من الصويا صوص و الملح و الفلفل و القرفة و البابريكا و ادهن بيها الفرخة من جوة و من برة و بعدين ابتدي احشيها بالرز من جوة و من تحت الجلد و احطها في صينية محطوط عليها ورق فويل من تحت و احطها في فرن حرارته 220 و بعد ربع ساعة احطلها نصف كوب ماء و افضل اتابعها من فترة للتانية و بتقعد في الفرن ساعتين

طبق دجاج بالكريمة والبطاطس (شيري)
المقادير:
- دجاجة مسلوقة مقطعه إلى أجزاء صغيرة
- بطاطس مكعبات
- من 1/2 إلى علبة كريمة قابلة للخفق (ويبنج كريم) - او ممكن نحط بشاميل
- علبة مشروم ( او حسب الرغبة )
- بهارات (كاري، كركم، فلفل أحمر، فلفل و ملح)
- مكعب مرقة الدجاج
- نصف بصلة مفرومة
- مقدار من الجبنه
الطريقة:
تقلى مكعبات البطاطس فى الزيت حتى تحمر. نضع قليلا من الزيت ونحمر البصل مع مكعب مرقة الدجاج. نضع الفطر مع البصل حتى يذبل. نضع الدجاج المقطع مع الفطر ونحرك، ثم نضع البهارات ونقلب المقادير حتى تتجانس. نضع الكريمة حتى يتجانس الخليط. نضع الدجاج مع البطاطس في بايركس ونضع فوقه مزيد من الكريمة ونرش على الوجه الجبنه وندخله الفرن حتى يحمر.

حلوى تركى بس لذيذه وهتعجبكم أسمها شكار باريه (ام ياسمين جيسيكا)
ممكن نسميها بسكويت دقيق السميد بالسكر
المقادير
1/2 كيلو دقيق
1/2 كوب دقيق سميد
1 و 1/2 كوب سكر بودره
2 بيضه
4 ملاعق كبيره سمن
1 ملعقة صغيرة خمير
مقادير الشربات
1 و 1/2 كوب سكر
1 كوب ماء
عصير نصف ليمونه
الطريقة
نضع الدقيق النوعين وفوقه نضع الخميرة عادى كما هى ونضع السكر والبيض والسمن وندعك ونعجن حتى تتكون عجينه .نبدأ نعمل كور صغيره مثل الغريبه ونجملها فى الوسط بأنصاف بندق وندهن صينيه بسيط ونضعها فى الفرن حتى تستوى .عندما تخرج نسقيها بالشربات ونتركها خمس دقائق ثم نرفعها واحده واحده من الشربات ونضعها فى طبق التقديم لتبرد وبالهنااااااااا والشفاااااااااااا

الجلاش بالبطاطس (ام ياسمين جيسيكا)
المقادير
لفة جلاش
4 وحدات بطاطس كبيرة مسلوقة ومهروسه
حوالى 1/8 كيلو جبنه بيضاء
بيضه
كوب لبن
الطريقة:
نخلط البطاطس المهروسه بالجبن جيدا وقليل من الفلفل ولو احتاجت ملح .نفرد وحدات الجلاش كل ورقتين ندهن بالفرشاه بسيط جدا سمن سايح وبعد حوالى 5 ورقات .نضع خليط البطاطس بالجبن ثم نكمل خمس ورقات أخرى (نفضلها كمية ورق بسيطه حسب الرغبه) ثم نقطع الصينيه ونسقيها بكوب اللبن والبيضه ونرش على الوجه حبة البركه وندخلها الفرن وبالهنا والشفا

بعض الاكلات اللي كتبت و فيها قشطة لباني او كريمة خفق (دون نقلا من التلخيص لسهولة البحث)
البشاميل 3 ملعقة كبيرة سمن _2 ملعقة كبيرة دقيق_ حليب -ملح فلفل-_ 2 بيضة مضروبة بالشوكة _ ملعقة كبيرة قشدة
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,
البيكاتا بالمشروم(دون)
شرائح بفتيك بتلو (العدد حسب ماانتى عاوزة) - ملح - فلفل – عصير ليمونة – ملعقة كبيرة زبدة_ علبة مشروم صغيرة مقطعة قطع صغيرة - 2 علبة كريمة لباني الحجم الصغير- 3 بصلات كبار مقطعين صعير
,,,,,,,,,,,,,,,,,,,,,,,,,,,,,, ,,,,,,,,,,,,,,,,,
طاجن الارز المعمر باللحمة (دون)
المقادير
2 كوب ارز
لحم مسلوق و(سبق شرحنا فى طبق الفتة)
2 كوب شوربة من بتاعة سلق اللحمة
2 كوب حليب
ملح_ فلفل_ فصين حبهان
2 معلقة كبيرة سمن _ ملعقتان كريمه لبانى
مكسرات حسب الرغبة
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,
الاستيك بالصوص و المشروم ( استيك بالصلصة البنى ) (دون)
المقادير:
قطع ستيك يفضل البتلو حتبليها بالملح و الفلفل
مشروم ( عش الغراب) طازج بيبقى فى اطباق فل فى قسم الخضروات أو معلب فى قسم البقالة مقطع شرائح
علبة صغيرة كريمة طازجة ( اللبانى )
(أو )ربع كوب شوربة لحمة او مكعب ماجى لحمة و 2 معلقة كبيرة دقيق
زبدة و زيت (لتحمير الاستيك)
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,
شوربة الخرشوف (ناني)
4 عدد خرشوف مجمد (موسم الخرشوف الطازج إنتهي )
4 كوب شوربه دجاج أو لحم
1 ملعقة دقيق
1 ملغقة زبده
1 كوب كريمه لباني
عصير ليمونه
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,
موس المانجة (دون)
4 بيضات
1/2 كوب عصير مانجة
1/2 كوب سكر
3 ورقات جيلاتين
2 كوب كريمة لبانىمانجة مقطعة قطع
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,
موس الكيوى (دون)
زلال 4 بيضات
2كوب سكر
2 كوب لبن
2 كوب كريمة لبانى2 كوب عصير كيوى
قطعة كيكة اسفنجية مدورة لتبطين قاع الصينية
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,
سلطة الكرنب ( الكول سلو ) (دون)
نص كرنبه
2 جزرة مقشرة ومبشورة
2 معلقة سكر
2 معلقة خل
نص كوب كريمة لبانى (قشدة الخفق)5 معالق مايونيز
ربع كوب حليب
زرة ملح
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,
شوربه الكريمه بالمشروم (سبانيش فلاور)
المقادير:
½1 ملعقة طعام زبدة
2 ملعقة كبيرة مشروم مقطع (معلب)و ممكن الطازج و لعلمك بيكون حلو قوي
2 ملعقة طعام دقيق
ربع ملعقة شاي فلفل اسود
¼ 4 كأس ماء
2 مكعب شوربة او لو عندك شوربه فراخ
4 ملعقة كبيرة كريمة مخفوقة .
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,
شوربة القرع (دون)
كيلو قرع
2 بصلة
معلقتين كريمة لبانى
معلقتين زبدة
ملح وفلفل
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,
طبق خفيف بالقرع العسلى (دون)
كيلو قرع عسلى
1/2 كيلو سكر
معلقة كبيرة كريمة لبانى2 كوب بشاميل (عليهم 2 معلقة كبيرة سكر)
فانيليا – زبيب – قرفة – مكسرات
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,
الكوسة بالكريمة (دون)
كيلو كوسة
كوب شوربة
معلقتين كبار كريمةمعلقة وسط زبدة
3 بيضات
بصلة متوسطة مقطعة حلقات
ربع كوب جبنة شيدر او فلمنك مبشورة
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,
القرع المهروس بالمكسرات (هبة عبد العظيم)
مكسرات المتواجده بالبيت (المفروض عين الجمل ) – 2/11 كيلو قرع –ك 3/1 كوب كريمه – 3 ملاعق مائده من الزبد – 1 ملعقه بقدونس
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,
يخنى الدجاج بالطماطم والكريمه (دون)
2 ملعقه كبيرة زيت – 2 ملعقه كبيره زبدة- علبة عيش غراب – 2/1 كيلو قطع دجاج - 2 بصله مقطعه –
ثوم – طماطم – كوب شوربة – كوب كريمه –
بقدونس – زعتر اخضر

الفرق بين الويبينج كريم والساور كريم
الويبينج كريم بتكون سايله كده واما بنضربها بتتقل واستعملتها زي مادون قالت بحسها بتدي الاكل دسامه شويه وطعم حلو كده .الساور كريم معموله من اللبن الرايب مش من الحليب العادي علشان كده تحسيها مديه شويه على زبادي او للبنه واستعملتها اللي انا شفتها الصراحه مع الفاهيتا بيجي طبق مشكل خضار مقطع وجبنه وخس ومعاه سور كريم وغالبا بيحطوها جنب الاكل الميكسيكي مش عارفه ليه (ملحوظة من مسلمة)

شوربة الطماطم (دون)
بصلة صغيرة مبشورة
معلقة كبيرة سمن
4 وحدات طماطم
معلقة صغيرة دقيق
3 معالق كبيرة حليب
من 2 ل 3 كوب شوربة او ماء
ملح وفلفل
الطريقة
قطعى الطماطم قطع صغيرة .شوحى البصلة فى السمن و بعدين ضعى الطماطم عليها وافضلى قلبيهم لحد ماتحسى ان الطماطم مبقاش فيها ماء وتلاقى السمنة ظهرت على وشها يعنى زى ماتكون اتسبكت .ضعى الدقيق عليها وقلبيهم كويس جدا لحد ما الدقيق يختفى .ضعى الماء او الشوربة مع التقليب بسرعة برضة مع الملح والفلفل اتركى الشوربة على النار بس تكونى موطياها حوالى نص ساعة ثم صفيها بالمصفاة بعد ماتصفيها ضعيها على النار وضعى الحليب عليها يا دوب غلوة

شوربة كريمة الطماطم (دون)
بصلة صغيرة مبشورة
3 معالق زبدة
نص كيلو طماطم
2 معلقة دقيق
كوب ماء
2كوب حليب او شوربة
4 فلفلات رومى
ملح وفلفل
بيضة
كريمة لبانى
معلقة كبيرة جبنة رومى مبشورة
الطريقة
قطعى الطماطم شرايح .شوحى البصلة والطماطم والفلفل فى نص مقدار الزبدة لحد ما يحمروا وبعدين ضعى كوب الماء وسبيهم لحد ما يتسبكوا وبعدين صفيهم .نعمل بشاميل بنص مقدار الزبدة التانى والدقيق والحليب بعيد عن النار نضعة على مقدار الطماطم اللى عملناة ونضرب البيضة بالشوكة ثم نضيفها عليهم ونخلطهم كلهم كويس جدا نضع الكريمة عليهم ونقلبها ونغرف الطبق ونضع الجبنة الرومى على الوش وبالهنا والشفا

طريقة المحشى الخفيييييف (دون)
كيلو بزنجان وفلفل رومى وكوسة
او كرنب او ورق عنب
2 كوب ارز
حزمة شبت
حزمة بقدونس
نص حزمة كسبرة خضراء
طماطم معصورة طازجة
طمطماية مخرطة صغير
ملح وفلفل
كمون فى محشى الكرنب
معلقة زيت زرة وممكن الاستغناء عنها
الطريقة
تقورى البزنجان والكوسة بالطريقة المعروفة .تشيلى الكاس الاخضر والبزور من الفلفل او تسلقى الكرنب وتقطعى الورق او تسلقى الورق العنب .تجهزى الحشو الارز على الشبت والبقدونس والكسيرة المغسولة والمخرطة على متوسط والملح والفلفل والطماطماية المخرطة وعصير الطماطم ومعلقة الزيت تخلطى كله وتحشى بية المحشى وترصصية فى الحلة وتسقية بالشوربة
الشوربة: بعد ما تسلقى الفراخ تشيلى الشوربة فى الثلاجة لحد ما تتكون راقة جامدة على وش الشوربة دى طبقة الدهن تروحى شيلاها بالمعلقة وترميها وتستخدمى الشوربة فى عمل جميع الاكلات الخفيفة اللى بدون دسم
ملحوظة : ممكن اضافة معلقتين او 3 لحمة مفرومة حمراء للحشوة

الملوخية الخفييييييفة (دون)
كيس ملوخية اونص كيلو ملوخية مخرطة
شوربة دجاج بدون دسم
نص راس ثوم صغيرة
ملح
معلقة كبيرة كزبرة ناشفة
الطريقة
نضع من كوب لكوبين شوربة على النار لحد ماتغلى ثم نضع الملوخية فى الشوربة بالطريقة العادية ونحضر مقلاية تيفال ونضع فيها الثوم المهروس بدون اى دهون والكزبرة الناشفة ونقلبهم لحد ماتلاقى ريحة الكزبرة طلعت تروحى جايبة كبشة من الملوخية و حطاها على التقلية وتكبيهم تانى على الملوخية وتفلبى تقليبة وتطفى

التفاح فى الفرن (دون)
4 تفاحات كبيرة
2 ملعقة كبيرة سكر
3/4 كوب عصير تفاح
4 معالق كبيرة كريمة لبانى
الطريقة
نقور التفاح ونرصصة فى طبق فرن ونرش السكر داخل التفاح المقور ونرشة بعصير التفاح .نضعة فى فرن متوسط الحرارة حوالى نص ساعة لحد ما التفاح يبقى لين خالص . بعد مايطلع نضع على كل تفاحة معلقة كريمة لبانى

الخضار بالشاميل (دون)
نص كيلو خضار مسلوق
( بسلة – جزر – فاصوليا – قرنبيط )
ثمن كيلو جبنة رومى مبشورة
بشاميل تخين
ملح وفلفل
الطريقة
نضع الجبنة الرومى المبشورة والملح والفلفل على البشاميل ونقلبهم لحد ماتسيح الجبنة .نضع الخضار المسلوق على البشاميل و نقلبهم. نضع الخليط فى طبق فرن او صينية فويل ونضع على الوجة رشة جبنة رومى مبشورة وندخلهم الفرن تحت الشواية يادوب حيحمر الوجة

الريش الضانى بالزبادى والفلفل الحامى (دون)
ريش ضانى
بصلة كبيرة مقطعة شرائح
علبة زبادى
معلقة صغيرة شطة
للتبيل ( عصير ليمون – ربع معلقة صغيرة سكر – رشة زعتر –
ملح وفلفل )
الطريقة
نخلط مقادير التتبيل ونتبل بيها الريش ونتركها فى التتبيلة لايقل عن 3 ساعات ثم نرصصها فى طبق فرن ونضع فوقها شرايح البصل ونغطيها بورقة فويل ونضعها فى فرن متوسط الحرارة حوالى ساعة ثم نخلط الزبادى بالشطة او ممكن فلفل حامى ونصبه فوق اللحمة وندخلة تانى الفرن حوالى ربع ساعة وبالهنا والشفا

بالنسبة للكرشة لما بشتريها وبتكون سوداء تجيبى حلة وتحطى فيها ماء لحد ما تغلى وتحطى فيها شوية رابسو او ايريال ولما تغلى كويس تحطى فيها الكرشة يا دوب ثوانى ولما تطلعيها تفرديها على الرخامة وبالسكينة تفضلى تحكى تحكى وتنضفيها حتلاقيها بقيت بيضاء وتدوريها على ضهرها وتسحبى الغشاء الرفيع بالوساخة والدهن اللى بتبقى فية حيطلع فى ايدك على طول زى الفتلة تروحى ماسكة الكرشة وغسلاها كويس بالدقيق والخل وبعدين تشطفيها بالماء حتبقى بيضاء وزى الفل (ملحوظة من دون)

تنظيف الكرشة انا عندي طريقة اعطتني اياها صديقة ماما ربي يكرمها ....تضيفي للمية المغلية بيكربونات الصوديم تعرفي تخلي وساخة الكرشة تنزل بشكل غريب جربي وشوفي وانا لا اضع اي انواع صابون خوفا من الكيماويات بس بعد ان انتهي من خرطها بالموس والمية المغلية ابشر بصل واضيف عليه عصرة ليمون مش كثير وكركم وانقع فيه الكرشة ....تعرفي ابدا لن تجدي فيها اي زناخة (ملحوظة من بتول)

الكلاوى بالكارى (دون)
نص كيلو كلاوى نضيفة ومقطعة
2 بصلة كبيرة شرائح رفيعة
4 فصوص ثوم مهروس
كوب عصير طماطم
معلقة كبيرة كارى
معلقة كبيرة عصير ليمون
ملح وفلفل
الطريقة
نضع كل المقادير فى حلة ونضع الحلة على النار لحد ما الخليط يغلى ثم نغطيهم ونتركهم على نار هادية حوالى نص ساعة .ممكن نضع شوية شوربة او ماء صغيرين اذا حسيتى ان الكلاوى لسة مستوتش

المكرونة بالبشاميل الخفييييييفة (دون)
كيس مكرونة فرن
لحمة مفرومة
ملح وفلفل
معلقة بقسماط ناعم
البشاميل(كوب حليب خالى الدسم – كوب شوربة بدون دسم – معلقة دقيق )
الطريقة
تسلق المكرونة عادى بالماء والملح ونقطتين زيت ونشطفها بالماء ونصفيها
نعمل العصاج
(نضع اللحمة فى مقلاية تيفال مع الملح والفلفل والبهارات مع التقليب لحد ما تستوى مع اضافة شوية ماء )
نعمل البشاميل
(نضع الحليب و الشوربة والدقيق مع بعض على البارد ونخلطهم كويس لحد ما يتخنوا واذ احتاجت ممكن تزودى شوية دقيق صغيرين لحد مايمسك) ونضعها على النار لفة واحدة .نحضر صينية ونرشها رشة بقسماط ومعلقة بشاميل واحدة ثم نضع طبقة مكرونة ثم طبقة لحمة معصجة ثم طبقة مكرونة ثم طبقة بشاميل خفيفة على الوجة ثم رشة جبنة رومى وندخلها الفرن لحد ماتستوى ووشها يحمر

ترانشات السمك بصلصة الطماطم (دون)
4 ترانشات سمك
معلقة كبيرة عصير ليمون
معلقة كبيرة زيت
ملح وفلفل
فلفلة رومى مقطعة صغير
بصلة مقطعة رفيع
عودين كرفس مقطعين صغير
نص كيلو طماطم مقطعة صغير
راس ثوم مفرومة
زرة زعتر
الطريقة
نرصص ترانشات السمك فى طبق فرن ونضع عليها الملح والفلفل وعصير الليمون .نضع الزيت على النار ونشوح فية البصل والفلفل الرومى والكرفس على نار هادية وبعدين اضع الطماطم والثوم والزعتر واترك الخليط لحد ما يغلى ثم اغطية واتركه حوالى ربع ساعة .اضع هذا الخليط على ترانشات السمك واغطية بورقة فويل وادخله الفرن لحد مايستوى حوالى نص ساعة

طبق مسقعه خفيف (ام ياسمين جيسيكا)
على فكره أنا بعمل المسقعة الخفيفه بأنى بقطع الباذنجان وادهنه بأيدى مسحه خفيفه جدا زيت واضعه فى الفرن تحت الشواية ومعاه وحدات فلفل رومى وافضل اقلب فيه لما احس انه أستوى كويس برصه فى الصينيه مع الفلفل واكون مجهزه صلصه عباره عن بصل وثوم مفرومين ومضاف لهم عصير الطماطم وبدون اى زيوت يترك على النار حتى يتخن ويضاف له معلقتين خل وملح وفلفل وبهارات وقليل من الكمون ويوضع فوق الباذنجان والفلفل بحيث يغطيه جيدا ويدخل الفرن ويترك حتى تمام النضج وممكن بدلاً من الباذنجان قرنبيط مسلوق

صدر الخروف المحشى (دون)
( خفييييييييييييييف)
كيلو صدر خروف مخلى من العظم
الحشو ( 1/8 كيلو جبنة بيضاء – 1/8 كيلو مشروم – عود كرفس مفروم
ملح وفلفل – بشر ليمونة )
الطريقة
اخلطى كل مقادير الحشو .افردى اللحمة امامك على الرخامه ونفرد الحشو فوقها بس نترك حوالى سم من الاطراف وبعدين نلف اللحمة كويس ونربطها بالدوبارة .نضع اللحمة فى طبق فرن ونغطيه بورقة فويل ونضعة فى فرن لمدة 3 ساعات لحد مايستوى وبعدين نشيل الورقة لحد ما اللحمة تتحمر .نفك الدوبارة ونضعة فى طبق التقديم

ترانشات السمك بالليمون (دون)
( خفييييييف)
4 ترانشات سمك وقار
عصير وبشر 3 ليمونات كبيرة
كرفس
ملح وفلفل
الطريقة
نضع السمك فى طبق فرن ونضع علية الملح والفلفل وعصير الليمون وبشر الليمون ونتركه فى التتبيلة
حوالى 3 ساعات .نحضر ورقة فويل على قد ترانشة السمك ونضع فيها ترانشة سمك وفوقها شوية من تتبيله النقع وعود كرفس ونقفل الورقة كويس وهكزا نعمل باقى ترانشات السمك بنفس الطريقة .نضع وحدات الورق الفويل فى فرن حامى لحد ما السمك يستوى حوالى من ربع لنص ساعة

بيض محشي بالجبنة (دون)
4 بيضات مسلوقة جامد
3 معالق كبيرة جبنة رومى مبشورة
2 معلقة كبيرة مايونيز
معلقة صغيرة مستردة
ملح وفلفل
الطريقة
نقطع كل بيضة نصفين ونطلع الصفار ونهرسه مع الجبنة والمايونيز والمستردة والملح والفلفل كويس
بالمعلقة الصغيرة ناخد من الخلطة ونحشى بيها البيض

اللبفتيك البتلو بالكوسة (خفيييييف) (دون)
نص كيلو كوسة كبيرة
نص كيلو بفتيك بتلو
3 معالق كبيرة جبنة رومى مبشورة
ملح وفلفل
3 معالق كبيرة شوربة لحمة
الطريقة
نقشر الكوسة ونقطعها حلقات رفيعة ونرش عليها ملح ونتركها ساعة كاملة وبعدين نشطفها وننشفها .نرصص حلقات الكوسة فى طبق فرن ونرصص فوقها طبقة من البفتيك ثم نرصص طبقة من الكوسة .نرش على الوش ملح وفلفل وزرة جوزة الطيب و الجبنة المبشورة والشوربة وبعدين ندخل الطبق الفرن لحد ما البفتيك يستوى حوالى من نص ساعة لساعة الاربع
ملحوظة: بالنسبة للتبيل انا كاتبة انتى بتحطى ملح وفلفل وزرة جوزة الطيب والجبنة المبشورة على الوش زى ما انا كاتبة وخلى بالك ان الجبنة بتدى شوية حدق وبنحط شوربة لحمة زى ما انا كاتبة وطبعا البفتيك دة بتلو بيستوى على طول وخلى بالك اى شىء وهو بيستوى يا ام احمد بيحتاج تزويد شوية ماء او شورية لحد ما يستوى وعلشان برضة مانحتاجش لتزويد ماء على اى اكله بنغطيها علشان تستوى اسرع والماء اللى فى الحلة او الصينية ماينشفش بسرعة كدة تمام ؟؟؟؟ وملحوظة احنا بنكتفى بتتبيل الصينية ككل علشان دة اكل خفيف بنراعى فية تقليل الملح وتخفيف او حزف الدهون

اللحمة بالمستردة والزبادى (دون)
نص كيلو لحم
كوب زبادى
معلقة كبيرة مستردة
2 بصلة كبيرة مبشورين
كوب شوربة لحمة
معلقة صغيرة زبدة
مشروم
ملح وفلفل
الطريقة
نخلط الزبادى مع المستردة والملح والفلفل ونركنهم .نقطع اللحمة شرائح رفيعة زى الشاورما .نضع الزبدة فى حلة ونشوح فيها البصلة ونضع علية شوربة اللحمة ونسيبهم حوالى عشر دقايق على نار هادية ثم يضاف المشروم وشرائح اللحمة ونتركهم لحد ما اللحمة تستوى .لما نيجى نغرفة نضيف له صلصة الزبادى (اللى كنا راكننها فى الاول)

الكمثرى فى الفرن (دون)
4 كمثرات
2 كوب عصير برتقال
معلقة صغيرة قرفة
الطريقة
نقشر الكمثرى ونشيل القلب ونقطعها ارباع. نرصص الكمثرى فى طبق فرن ونصب فوقها عصير البرتقال
ونرش عليها القرفة. نسخن الفرن ونضع فية الطبق حوالى نص ساعة لحد ما تستوى

استيك بانيه بصوص المشروم (رواء الاسلام)
المقادير
نصف كيلو لحمة استيك ــ مشروم حوالي اربع حبات كبار ــ بصلة صغيرة ــ 2 كوب كريمة لباني ــ معلقة دقيق
خلطة الاستيك عبارة عن
كوب و نصف لبن ـ معلقتين زيت زيتون ـ بيضتين ـ عصير ليمونة ــ ملح و فلفل و بهار زي ما تحبي ــ معلقتين خل ابيض ــ 2 ثوم مبشور او مقطع صغير
احط الاستيك في الخلطة اللي فاتت لمدة ساعتين و بعدين احطه على طول في خليط من الدقيق و البقشماط الناعم عليهم البهارات بتاعتهم .احمر الاستيك و احطه على جنب
لعمل الصوص
اجيب معلقة سمنة او زبدة واسيحها و اجيب البصلة اقطعها حتت كبيرة نسبيا و اقطع المشروم معاها و اشوحهم شوية في السمن .بعدين اجيب معلقة الدقيق احطها عليهم و اقلب شوية و بعدين احط الكريمة و الملح و الفلفل و ممكن شوية قرفة .اسيبها تغلي شوية و اعمل السمك اللي احبه يعني لو عايزاها سميكة ازود دقيق و لو عايزاها خفيفة ازود ماء او لبن .بعد كدة احط الاستيك البانيه في الطبق و اصب عليه من الصوص .يتقدم معاه بطاطس او مكرونة بصوص المشروم مع سلطة خضراء( انا عملت معاه رز بالخضار كان حلو اوي)

القرنبيط بالدجاج (دون)
4 صدور دجاج مسلوقة
قرنبيطة صغيرة
بشاميل: ( نص معلقة كبيرة زبدة – 4 فصوص ثوم صحيحة– معلقة
كبيرة دقيق – كوب ونص حليب – نص كوب شوربة - معلقة كبيرة
جبنة مبشورة - ملح)
الطريقة
نسلق الصدور او نشويها ونقطعها قطع كبيرة. نسلق القرنبيط فى الماء والملح ثم نقطعه الى وردات. نحضر طبق الفرن ونرصص فية القرنبيط ثم نرصص الدجاج فوق القرنبيط ثم نصب الصلصة على صدور الدجاج ونرش الجبنة المبشورة على الوش ونضعها فى الفرن لحد ما الوش يحمر
طريقة عمل الصلصة
نسيح الزبدة ونشوح فيها فصوص الثوم لمدة ثوانى ثم نضع الدقيق ونقلبه وبعدين نشيل فصوص الثوم ثم نضع الحليب والشوربه ونقلب كويس لحد ما الصلصة تتخن وتستخدم .

سمك مشوى فى الاسياخ(خفييييف)
نص كيلو سمك ابيض (وقار مثلا)
4 طماطم مقطعة اربع
كوب مشروم
فلفلة رومى مقطعة قطع تخينة
ورق لورو
عصير ليمون
ملح وفلفل
الطريقة
نقطع السمك الى قطع مكعبات كبيرة .نجيب الاسياخ ونرصص فيها بالدور مكعب سمك ثم قطعة طماطم ثم مشروم
ثم فلفل ثم ورقة لورو ونرش السيخ بعصير الليمون. نشويها على الشواية مع التقليب باستمرار مع رش عصير ليمون لحد ما يستوى

بيض محشى بالسردين (دون)
4 بيضات مسلوقة جامد
علبة سردين صغيرة
معلقة كبيرة مايونيز
ملح وفلفل
الطريقة
نقطع كل بيضة نصفين ونطلع الصفار ونهرسه مع المايونيز والسردين والملح والفلفل كويس بالمعلقة الصغيرة ناخد من الخلطة ونحشى بيها البيض

لحمة بالصلصة و الزبادى (دون)
نص كيلو لحمة بتلو مكعبات - معلقة زبدة كبيرة - بصلة كبيرة شرائح
فلفلة رومى شرائح رفيعة – مشروم - كوب ونص عصير طماطم
نص كوب شوربة - زرة جوزة الطيب - ملح وفلفل
- 4 معالق كبيرة زبادى
بقدونس مفروم
الطريقة
نسيح الزبدة فى مقلاية ونشوح فيها اللحمة 5 دقايق تقريبا ثم نضع البصل ونقلبة مع اللحمة دقيقتين تقريبا
نضع المشروم والفلفل الرومى و عصير الطماطم و الشوربة والملح والفلفل وجوزة الطيب وورقة اللورا ونتركهم لحد ما يغلوا على النار ونقلبهم ثم نضعهم فى طبق فرن فى فرن متوسط الحرارة لمدة ساعة ونص تقريبا .نضع عليها الزبادى قبل الاكل مباشرة ونرش البقدونس المفروم على الوش

الدجاج بالجزر والكرفس (دون)
4 صدور دجاج
بصلة متوسطة
4 عيدان كرفس
4 جزرات
كوب ونص شوربة دجاج
ملح وفلفل
الطريقة
نقطع البصلة حاقات كبيرة ونقطع عيدان الكرفس قطع كبيرة. نقشر الجزر ونقطعة قطع كبيرة .نضع نص كمية الخضار فى صينية ونرصص فوقها قطع الدجاج ثم نضع باقى كمية الخضار فوق الدجاج .نرش عليهم الملح والفلفل ونصب الشوربه .نضع الصينية على النار لحد ماتغلى ونشيل الريم اللى حيظهر .نغطى الصينية ونضعها فى فرن متوسط الحرارة لحد ما يستوى حوالى ساعة
ملحوظة : ممكن استخدام الدجاج بعظمة بس منزوع الجلد

اللحمة بالثوم والطماطم (دون)
4 شرائح بفتيك
2 طماطم كبيرة مقطعة صغير
راس ثوم مهروس
ملح وفلفل
عود كرفس مخرط صغير
الطريقة
نضع كل واحدة بفتيك فى ورقة فويل .نخلط قطع الطماطم مع الثوم مع الكرفس ونوزعهم على .قطع البفتيك نرش الملح والفلفل ونغلق ورق الفويل كويس ونضعه فى فرن ساخن حوالى نص ساعة او لحد ما يستوا

خضار بالكارى (دون)
قرنبيطة صغيرة
7 جزرات
4 طماطم
2 بصلة
مكعب شوربة
معلقة صغيرة كارى
عصير ليمونة
الطريقة
نقشر الجزر ونقطعه حلقات .نقطع الطماطم اربع. نقطع البصل شرايح رفيعة .نقطع وردات القرنبيط ونسلقها مع حلقات الجزر فى ماء وملح. بعد عشر دقائق نضيف للماء البصل و الطماطم والكارى ومكعب الشوربة غطى الحلة وسيبيهم على نار هادية ربع ساعة لحد ما يستوا اطفى النار وضعى عصير الليمون

موس البرتقال (دون)
معلقة كبيرة عسل ابيض-عصير وبشر برتقالة-2 معلقة صغيرة عصير ليمون-
2 علبة زبادى خالى الدسم-بياض بيضتين
الطريقة
اخلطى العسل مع عصير البرتقال وعصير الليمون ثم ضعى علية الزبادى وبشر البرتقالة .اضربى بياض البيض كويس جدا لحد ما يتخن ،ثم ضيفى له خليط العسل واخلطيهم بالراحة مع بعض ثم ضعية فى قالب التقديم ويوضع فى الثلاجة
ملحوظة : النوع دة بيتاكل على طول يعنى فى خلال الساعة لانك لو تلاحظى ان مفيهوش جيلاتين علشان يمسكه.

الموز بالحليب (دون)
لتر حليب منزوع الدسم - 2 موزة - 4 مكعبات ثلج
الطريقة
يقشر الموز وتوضع كل المقادير فى الخلاط ويضرب حتى يندمجوا

ترانشات السمك بالمستردة فى الفرن( خفييييييف) (دون)
4 ترانشات سمك
ثلث كوب عصير ليمون
معلقة كبيرة زيت زرة
معلقة صغيرة مستردة
ملح وفلفل
الطريقة
نخلط كل المقادير مع بعض ماعدا السمك .نضع السمك فى طبق فرن ونضع فوقة الخلطة ونسويها كويس فوق السمك ونغطى الطبق بورقة فويل وندخله فرن متوسط الحرارة لحد ما يستوى حيبقى حوالى ثلث ساعة

ترانشات السمك بالخضار (دون)
(خفيييييف)
نص كيلو سمك ترانشات
بصلة كبيرة مقطعة شرايح رفيعة
جزرة مبشورة
نص كوب بسلة
عود كرفس مخرط
معلقتين زيت
نص كوب عصير طماطم
ملح وفلفل
الطريقة
نخلط البصل و الجزر والكرفس والبسلة والملح والفلفل. نرصهم فى طبق فرن ونرص ترانشات السمك فوقهم
ونضع فوق السمك الزيت وعصير الطماطم ونغطى الطبق بورقة فويل وندخلة فرن متوسط الحرارة وندخله
الفرن لحد مايستوى حوالى نص ساعة

ترانشات السمك بالبشاميل (دون)
4 ترانشات سمك
معلقة كبيرة عصير ليمون
معلقة كبيرة زيت
ملح وفلفل
بشاميل خفيف
جبنة رومى مبشورة
الطريقة
نرصص ترانشات السمك فى طبق فرن ونضع عليه الملح والفلفل وعصير الليمون .نضع الجبنة المبشورة على البشاميل ونقلبهم ونصبه على السمك نضعه فى فرن متوسط الحرارة لحد ما يستوى حوالى نص ساعة

الخضروات المشوية (دون)
(خفييييف)
بصلة كبيرة مقشرة ومقطعة اربع
نص كيلو كوسة مقطعة حلقات تخينة
4 طماطم مقطعة اربع
كوب مشروم مقطع قطع كبيرة
8 ورقات لورو
شوربة
ملح وفلفل
الطريقة
نغلى ماء على النار ونضع فية البصل مدة 5 دقايق وبعدين نشيله .نضع الكوسة فى الماء المغلى مدة 2 دقيقة و بعدين نشيلها. نحضر اسياخ ونرتب فيهم الخضار بالدور بصل طماطم مشروم كوسه ورقة لورو .نضعها تحت الشواية حوالى ربع ساعة مع تقليب السيخ ورشه بالشوربة المضاف لها الملح والفلفل لحد ما يستوا

دجاج محشى بحشوة جديدة (دون)
فرخة صغيرة (كيلو)او (كيلو الاربع)
ربع كيلو مشروم
بصلة كبيرة مفرومة
معلقة صلصة كبيرة
لبابة رغيف عيش فينو
معلقة بقدونس مفرى
بيضة مضروبة
ملح وفلفل
الطريقة
اخلطى كل المقادير مع بعض .احشى الدجاجة بالخليط دة .ادهنى الدجاجة من برة بقطعة زبدة صغيرة جدا .ضعى الدجاجة فى ورقة فويل ولفيها كويس .ضعى الدجاجة فى فرن حامى لحد ماتستوى حوالى ساعة وبعدين افتحى الفويل من على وش الدجاجة علشان تحمر

صلصة الليمون (دون)
3/4 كوب زيت زيتون او زيت زرة
معلقة كبيرة خل
2 معلقة كبيرة عصير ليمون
معلقة صغيرة مستردة
بشر ليمونة
ملح وفلفل
الطريقة
اخلطى كل المقادير مع بعض وبعدين حطيهم فى زجاجة ورجيهم كويس قوى علشان يتخلطوا لحين الاستخدام

كبدة بالدقة (دون)
1/2كيلو كبدة بتلو
1/2 راس ثوم مهروس
3 معالق زيت
عصير ليمون
معلقة كبيرة بقدونس مفروم
ملح وفلفل و كمون
الطريقة
تغسل الكبدة كويس بالماء والخل وتشطف بالماء وتقطع شرائح رقيقة .ندهن مقلاية بالزيت ونشوح فيها الكبدة كويس على نار عالية لحد ما تستوى ونشيلها من على النار .نخلط كل مقادير الدقة اللى عندنا مع بعض الثوم والبقدونس و عصير الليمون والملح والفلفل والكمون ونضعهم على الكبدة اول ما تنزل من على النار ونقلبهم كويس لحد ما الدقة تتخلط كويس بالكبدة ونقدمها ساخنة وبالهنا والشفا

ترانشات السمك بالبطاطس (دون)
4 بطاطسات متوسطة ومقشرة ومقطعة حلقات
4 ترانشات سمك
4 طماطمات مقطعة حلقات
بصلة مقشرة ومقطعة حلقات
فلفلة رومى مقطعة حلقات
2 معلقة صلصة كبيرة
ملح وفلفل
الطريقة
اغلى ماء على النار وحطى فية ملح وضعى البطاطس لمدة 10 دقائق تقريبا. شيلى البطاطس من الماء بس ماترميش الماء .فى طبق فرن او صينية رصصى البطاطس ورصصى فوقها البصل ورصصى فوقه الفلفل ورصصى فوقه الطماطم واخيرا ترصصى فوقهم ترانشات السمك .دوبى الصلصة فى كوبايتين من ماء سلق البطاطس وصبيها على الصينية مع الملح والفلفل غطى الصينية بورقة فويل ودخليها الفرن بس يكون حامى تقريبا حوالى نص ساعة لحد ما تستوى

عصير برتقال ( خفييييف) (دون)
2 ونص كوب عصير برتقال فريش
1 ونص كوب زبادى خالى الدسم
4 قطع ثلج
الطريقة
نضرب كل المقادير فى الخلاط ويقدم

سمك التونة المشوى (دون)
شرائح سمك تونة حسب العدد
نص كوب صويا صوص
ربع كوب زيت
معلقة كبيرة عصير ليمون.
فصين ثوم مهروسين
ملح وفلفل
الطريقة:-
فى صينية ضعى الصويا صوص مع الزيت وعصير الليمون والثوم و الملح والفلفل و اخلطيهم ثم ضعى هذا الخليط على شرائح التونة و بعدين غطى الطبق اللى فيةالسمك ودخلية الثلاجة حوالى ساعة .جهزى الشواية وامسحيها بمسحة زيت(زى مابنشوى البورجر) ثم ضعي شرائح سمك التونة على الشواية وقلبية على الناحيتين حوالى 5 دقائق لحد ما تستوى

صلصة للسلطة (خفيفة) (دون)
معلقة كبيرة زيت زرة
معلقة صغيرة خل
1/4 معلقة مستردة
عصير ليمونة
ملح وفلفل
الطريقة
اخلطى كل المقادير مع بعض وبعدين حطيهم فى زجاجة ورجيهم كويس قوى علشان يتخلطوا لحين الاستخدام

كفتة بالصلصة (خفيييييفة) (دون)
1/2 كيلو لحمة مفرومة حمراء
نص راس ثوم صغيرة مقشرة ومهروسه
معلقة كبيرة بقدونس مفروم
بيضة مضروبة
ملح وفلفل
الصلصة:
بصلة كبيرة مفرومة
نص كيلو طماطم مبشورة
معلقة صلصة
زرة جوزة الطيب
زرة سكر
الطريقة
نخلط اللحمة المفرومة مع الثوم مع البقدونس مع الملح والفلفل كويس ثم نضيفلهم البيضة ونخلط كويس ثم
نشكلها كور صغيرة .نضع فى حلة على النار كل مقادير الصلصة لحد ما تغلى وبعدين نوطى النارونضع فيها كور اللحمة غطى الحلة وخليها على النار لحد ما تلاقيها استوت وطبعا ممكن تحتاج شوية ماء وتغرفيها
ملحوظة : لو تلاحظى ان احنا ما حمرناش الكفتة خالص كله نى فى نى . والصلصة بدون دهن

التونة المقلوبة (دون)
علبة تونة كبيرة (صفيها من الزيت)
2 معلقة كبيرة مايونيز
2 معلقة كبيرة عصير ليمون
بصلة صغيرة مفرومة
خيارة مخللة صغيرة مفرومة
معلقة كبيرة بقدونس مفروم
معلقة كبيرة صلصة طماطم
نص معلقة صغيرة مستردة بودرة
3 معالق صغيرة جيلاتين
معلقتين كبار ماء
ربع معلقة صغيرة سكر
الطريقة
اخلطى التونة والمايونيز والبصلة و عصير الليمون والخيار المخلل مع بعض كويس فى الخلاط ثم ضعى عليهم البقدونس والصلصة والمستردة البودرة والسكر واخلطيهم كويس .دوبى الجيلاتين فى الماء الساخن ثم ضيفية لخليط التونة. هاتى ةرقة فويل او ورقة كيس بلاستيك وافرديها امامك وضعى التونة ولفيها على هيئة قالب سويسرول و اقفليها كويس وضعيها فى الثلاجة من بليل لتانى يوم ولما تطلعيها تفتحى الورقة وتقطعيها شرائح وتزوقيها بالخس وشرائح الليمون ( او ). جهزى قوالب صغيرة من بتاعة الجيلى وبليها بالماء وماتنشفيهاش قسمى الخليط على القوالب وسوى القالب ودخليهم الثلاجة من بليل لتانى يوم .عند التقديم اقلبى القالب فى طبق وزينيه بحلقات الليمون

شكشوكة(خفييييفة)بدون دسم (دون)
4 بيضات
3 فلفل رومى شرائح رفيعه
بصلة متوسطة شرائح رفيعه
1/2 كوب شوربة دجاج
1 وربع كوب عصير طماطم
الطريقة
نضع فى حلة على النار الشوربة وعصير الطماطم و البصل وشرائح الفلفل لمدة عشر دقايق تقريبا بس
تكون النار هادية وبعدين تصبى الخليط دة فى طبق فرن ونكسر البيض علية بس مش جنب بعض لأ خلى مسافة بين كل بيضة والتانية وندخله الفرن بس يكون حامى لحد ما البيض يجمد و يستوى يعنى نقول حوالى ربع ساعة لان الفرن حامى
صلصة الكارى (دون)
(تستخدم للسمك والجمبرى)
4 معالق كبيرة خل
4 معالق كبيرة زيت زرة
معلقة صغيرة ملح
معلقة صغيرة كارى
الطريقة
اخلطى كل المقادير مع بعض وبعدين حطيهم فى زجاجة ورجيهم كويس قوى علشان يتخلطوا لحين الاستخدام

دقة الكشرى (دون)
نص كوب خل.
معلقة صغيرة شطة.
نص راس ثوم صغيرة مفرومة ناعم.
فلفل وكمون .
الطريقة
- تخلط كل المقادير مع بعض و توضع فى برطمان لوقت الاستعمال وعندالاستعمال ترج جيدا

صلصة طماطم للسلطة (خفيفة) (دون)
3/4 كوب عصير طماطم
3/4 كوب خل
معلقة صغيرة بصل مبشور
ربع معلقة صغيرة مستردة
رشة بقدونس مفرى(معلقة صغيرة)
ملح وفلفل
زرة سكر
الطريقة
اخلطى كل المقادير مع بعض وبعدين حطيهم فى زجاجة ورجيهم كويس قوى علشان يتخلطوا لحين الاستخدام

كفتة البطاطس بالكريمة (دون)
2 كوب بطاطس مهروسة
بيضة كبيرة
معلقة كبيرة دقيق
2 معلقة كبيرة كريمة
معلقة كبيرة بصل مبشور
4 معالق كبيرة زيت او زبدة
الطريقة
اسلقى البطاطس وقشريها واهرسيها كويس .اخلطى البطاطس مع البيضة والدقيق والكريمة والبصل مع بعض كويس ثم شكلي الخليط على هيئة اقراص وحمريها فى الزيت لحد ما لونها يصفر يبقى زهبى وطلعيها على ورق ماص للدهون وقدميها

الكرشة المحشية (دون)
كيلو كرشة (ضانى) - كوب ارز - كوب لحمة مفرومة -ربع كوب سمنة
يصلة كبيرة مبشورة - ملح وفلفل وبهارات
2 معلقة كبيرة بقدونس مفروم
الطريقة
تنظف الكرشة وتقطعها ونسلقها (كما سبق شرحنا) نغسل الارز ونضع علية البصل المبشور و اللحمة المفرومة والسمنة والملح والفلفل والبهارات والبقدونس المفروم ونقلب كله مع بعض كويس نخيط بالابرة والفتله كل قطعة من الكرشة من الثلاثة جوانب ماعدا جانب واحد نحشى فية شوية من الخليط ثم نخيطه هو كمان نضغط عليها بالشوكة .نضع فى حله ماء لحد مايغلى ثم نضع فية معلقة ملح ونص معلقة خل ثم نضع الكرشة المحشية لحد ما
الماء يغلى تانى .نهدى النار ونتركها لحد ماتستوى وبعدين نشيلها ونتركها لحد ماتبرد وممكن تقطعيها حلقات

جيلى البرتقال (خفييييف) (دون)
3 كوب عصير برتقال فريش
1 ونص كوب زبادى خالى الدسم
معلقة كبيرة بودرة جيلاتين
الطريقة
نضع بودرة الجيلاتين على عصير البرتقال ونزوبة على نار هادية مع التقليب .نسيب الخليط دة لحد ما يبرد وبعدين نضيفله الزبادى وانتى بتقلبى جامد وكويس جدا .نصب الخليط فى القالب ونسيبة شوية لحد ما يبرد وبعدين ندخله الثلاجة لحد ما يجمد

صينية لحمة (خفييييفة) (دون)
كيلو لحمة بفتيك او فلتو
3بصلات مقطعة شرائح
3 طماطم مقطعة شرائح
ثوم مهروس
ملح – فلفل – كمون
كزبرة نا شفة
الطريقة:
ندعك اللحمة بالملح و الفلفل والكمون والكزبرة .نرصص في صينية طبقة من شرائح البصل ثم طبقة من شرائح الطماطم ثم نرصص اللحمة عليها ثم طبقة من شرائح البصل وطبقة من شرائح الطماطم .نغطى الصينية بورقة فويل وندخلها الفرن لحد ماتستوى وبعدين نشيل الورقة الفويل لحد وشها ما يحمر

كفتة سمك (خفييييفة) (دون)
حوالى 1/3 كيلو بطاطس مسلوقة
1/3 كيلو سمك ابيض مسلوق
معلقة كبيرة مستردة
ملح وفلفل
وزيت بسيط
الطريقة
نهرس السمك ونهرس البطاطس ونحط الاتنين مع بعض والملح والفلفل والمستردة ونخلطهم مع بعض كويس
(دول حيعملولك حوالى 12 كفتة تقريبا) حضرى صاج او صينية الاجناب بتاعتها متكنش عالية وغلفيها بورقة فويل كويس .ندهن الكفتة بالفرشاة بزيت خفيف ثم نرصص الكفته على الورقة الفويل ونضعها تحت شواية الفرن حوالى من 5 ل 10 دقايق بالكتيرلانها حتحمر بس لان هى اساسا كل مكوناتها مستوية

الكمثرى فى الفرن (دون)
4 كمثرات
2 كوب عصير برتقال
معلقة صغيرة قرفة
الطريقة
نقشر الكمثرى ونشيل القلب ونقطعها ارباع. نرصص الكمثرى فى طبق فرن ونصب فوقها عصير البرتقال ونرش عليها القرفة. نسخن الفرن ونضع فية الطبق حوالى نص ساعة لحد ما تستوى

الكفتة ( الخفييييفة) (دون)
نص كيلو لحم مفروم- كوب زبادى - ثوم مفروم– معلقة بقسماط ناعم -
2 بصلة مفرومة- ملح- فلفل- بهارات لحمة – بقدونس مفروم
الطريقة :
نضع اللحمة المفرومة والبصل والبقسماط والبقدونس و الملح والفلفل والبهارات و الثوم ونخلطهم كويس ثم نضع الزبادى ونقلب كويس لحد ما تبقى متماسكة وان كانت طرية قوى ممكن تحطى معلقة كبيرة كمان بقسماط ناعم ثم تعمل كور او اصابع و توضع فى صينية تيفال ونغطيها بورقة فويل ونضعها فى الفرن حتنزل مايتها وتستوى فيها وتحمر وممكن نرصص عليها شرائح طماطم او تشوى على الشواية

صلصة الزبادى بالليمون (دون)
كوب زبادى خالى الدسم
معلقة كبيرة عصير ليمون
معلقة كبيرة نعناع مفرى
ملح وفلفل
الطريقة
اخلطى الزبادى مع عصير الليمون والنعناع وعليهم الملح والفلفل .ضعيهم فى الثلاجة لحين الاستخدام

سمك التونة المشوى (دون)
كيلو سمك تونة-نص كوب بقدونس -نص كوب كسبرة خضراء
3 فصوص ثوم مهروسين -معلقه صغيره كمون ناعم
معلقه صغيره فلفل اسود -معلقه صغيره كزبره جافة
نص كوب عصير ليمون -ربع كوب زيت زيتون- ملح
فلفلة رومى خضراء وفلفلة حمراء وفلفلة صفراء
الطريقه:
قطعى سمك التونا الى مكعبات 3 سم وتوضع في طبق كبير ثم نضع جميع المقادير الباقيه في الخلاط لحد ماتبقى ناعمة خالص وحنتبل بيها السمك. تخلط مكعبات التونه مع التتبيله ونسيبها فى الثلاجة من بليل .نرصص قطع السمك فى العيدان الخشب و بين كل قطعة والتانية قطعة فلفل اخضر او احمر او اصفر وتشوى على الفحم او فى الشوايه مع تقلبيها من الجهتين لحد ماتستوى وتحمر

صينية سمك (دون)
كيلو سمك جزل
علبه لبن زبادي
2معلقة كبيرة طحينه
2 معلقة كبيرة مايونيز
معلقه صغيره مستردة
3 معالق كبيرة عصير ليمون
معلقة كبيرة ثوم مهرس
ملح وفلفل
شرائح طماطم
الطريقة
نرص جزل السمك فى صينيه مدهونه زيت .نخلط كل المقادير مع بعض ثم نضعها فوق السمك ثم نرصص على
وش الصينية شرائح الطماطم. نغطي الصينيه بورقة فويل وبعدين ندخلها الفرن لمدة من ربع لنص ساعة تقريبا
وبعدين نشيل الفويل علشان السمك يحمر

البرقوق فى الفرن (دون)
ربع كيلو برقوق
معلقة صغيرة قرفة
2 صفار بيض
2 علبة زبادى
معلقة صغيرة عسل ابيض
نص معلقة فانيليا
معلقة صغيرة كورن فليكس مطحون
الطريقة
نقطع البرقوق كل واحدة لنصين ونشيل النواة .نرصص البرقوق فى طبق فرن ونرش علية نص كمية القرفة
نضرب البيض والزبادى والفانيليا والعسل مع بعض ثم نصبهم على البرقوق .نضع الطبق فى حمام مائى وندخلة فرن متوسط الحرارة لحد مايستوى حوالى نص ساعة ولما نطلعة من الفرن نرش علية بقية القرفة والكورن فليكس

بالنسبه للسمك المشوى (ام ياسمين جيسيكا)
بفضل السمك البورى
يتبل
بصل مخرط + توم + كرفس + طماطم مكعبات - حلقات فلفل - كمون وليمون وملح وفلفل وقليل من الجنزبيل والزعتر
يتم حشو السمك بالتتبيله السابقه ثم يوضع السمك فى الرده ويقلب مثل البقسماط ثم يوضع على الصاج فى الفرن للشوى أو على صاج فوق الفرن مدهون بالزيت وعندما ينتهى من الشوى نرش طبقه خفيفه من الملح والفلفل والكمون

تورتة بالزيت و بدون بيض (دون)
(مقاس الصينية 22 )
المقادير
1 ونص كوب دقيق
1 ونص كوب سكر سنترفيش
كوب عصير برتقال او ماء
6 معالق كبيرة زيت
باكو بيكنج بودر
3 معالق كبيرة خل ( الخل بديل الببيض)
فانيليا
الطريقة
ولعى الفرن الاول عند البدء فى الشغل .نضرب الزيت والسكر كويس ثم نضع الخل والفانيليا ونخلط ثم نضع البيكنج بودر على الدقيق ثم نضع البرتقال بالتناوب مع الدقيق على الخليط لحد ما تتكون عندك العجينة .ندهن صينية بالزيت اوالسمن النباتى ونرشها بالدقيق ونصب فيها العجينة وندخلها الفرن لحد ماتستوى

بيتزا (خفييييييفة) (دون)
عيش توست (اسمر - بر - سن )
2 طماطم
2 فلفل رومى
بصلة صغيرة
جبنه قليلة او خالية الدسم( ممكن الشرائح )
يا دوب كام زيتونة
ملح
الطريقة:
قطعى البصل والطماطم والفلفل الى قطع صغيرة جدا ويوضع فى مقلاية تيفال على النار بدون زيت لحد ما يدبلوا شوية ثم نضعها على التوست ونضع الزيتون والجبنة على الوش ثم نضعها في الفرن وبالهنا والشفا

الكاليمارى المحشى فى الفرن (دون)
كيلو كاليمارى
2 بصلة كبيرة مفرومة
رأس ثوم مفروم
2 كوب عصير طماطم
ملح- فلفل- كمون- بهارات سمك
كوب بقدونس - كوب شبت
كوب كسبرة خضراء
زيت
2 كوب أرز
الطريقة
نحمر البصلة فى الزيت لحد ما تصفر ثم نضيف الثوم ليصفر ثم نضيف عصير الطماطم و البهارات و نتركها تتسبك. نشيل المقلاية من على النار و نضيف الشبت و البقدونس و الكسبرة و الأرز و نخلطهم كويس. ًنحشى الكاليمارى و نضعها فى طبق فرن وعليها قليل من عصير الطماطم نغطى الطبق بورقة فويل و نضعه فى الفرن لحد مايستوى ويحمر الوش
ملحوظة: اذا تبقى عندك من خلطة الحشو ممكن نضعها فى طبق الفرن ثم نضع الكاليمارى فوقها

الكاليماري المحشي(المسلوق) (دون)
كيلو كاليمارى
2 بصلة كبيرة مفرومة
رأس ثوم مفروم
2 كوب عصير طماطم
ملح- فلفل- كمون- بهارات سمك
كوب بقدونس - كوب شبت
كوب كسبرة خضراء
زيت
2 كوب أرز
الطريقة
نضع كل المقادير على بعض ونخلطها كويس و نحشى الكاليماري بس ما نملهوش قوى .نخيط الكاليماري بالخيط اونقفلة بعود خشب .نضع فى حلة ماء على النار و بصلة وملح و فلفل و حبهان ونسيبها لحد ماتغلى الماء ثم نضع الكاليماري في الماء لحد مايستوى وبعدين نشيله و نصفيه ونحمره

المخ بالزيت والليمون (دون)
مخ
3 معالق كبيرة زيت
ملعقة كبيرة فلفلة رومى مفرومة
ملح وفلفل
عصير ليمون
الطريقة
نسلق المخ ( شرحناه قبل كدة) و بعد سلقه نشيله من ماء السلق ونتركه لحد مايبرد نهرسه بالشوكة ونضيفله الملح والفلفل والزيت وعصير الليمون والفلفل الرومى المفروم

كفتة المخ (دون)
مخ (بتلو)
ملح وفلفل
بقسماط ناعم
3 بيضات للعجن والغطاء الخارجى
سمنة للتحمير
الطريقة
يسلق المخ ويترك يبرد ثم يفرم ويتبل بالملح والفلفل .نضرب البيض فى طبق بالشوكة ونبتدى نضع بيض شوية شوية على المخ المفروم وانتى بتعجنى بايدك لحد ماتحسى ان كدة البيض مضبوط على كميه المخ وتتركى الباقى للتغطية. نضعة فى مقلاية على النار مع التحريك المستمر لحد ماتلاقية تخن تشيلية من على النار وتضعية على طبق وتسبيه يبرد تماما بقطاعة او بكوب صغيرة تقطعيه على هيئة اقراص مدورة وتغطية بالبيض والبقسماط وتحمرية فى السمنة الغزيرة وتشيلية على ورق ماص للدهون

مخ بالعجة (دون)
مخ(بتلو)
2 بيضة
بصلة مفرومة
معلقة كبيرة بقدونس مفروم
ملح وفلفل
سمنة للتحمير
الطريقة
يسلق المخ ثم يقطع شرائح (سميكة نوعا) نخلط البيض بالبقدونس بالبصل والملح والفلفل ونضربهم كويس قوى بالشوكة .نغمس شرائح المخ فى خليط العجة ونحمره فى السمنة

بسكوت بسيط للاطفال (دون)
بسكوت بسطا فلورا
3/4 كوب سمن
1/2 كوب سكر بودرة
بيضة
2 كوب دقيق
معلقة صغيرة بيكنج بودر
فانيليا
الطريقة
نضرب السمنة كويس ثم نضع السكر ونضرب تانى كويس .اضع عليهم البيضة والفانيليا ونستمر فى الضرب اضع البيكنج بودر على الدقيق واخلطهم ثم اضع الدقيق على الخليط واخلطهم .اضع العجينة فى ماكينة البسكوت واعمل وحدات باشكال مختلفة فى الصينية ادخله فرن متوسط الحرارة وبعد مايطلع من الفرن ويبرد الزق بالمربى كل اتنين مع بعض

البسبوسة (دون)
نص علبة جوز هند __1 و نص علبة سكر __ 2 علبة قشطة __ 3 علبة سميد بسبوسة .__ 1 علبة سمن __ 1 ملعقة صغيرةبيكنج بودر
حطى المقادير كلها على بعض و بالملعقة الخشب افضلى ادعكى فيها لحد ما تلاقيها نعمت .ادهنى صينية البسبوسة (اللى ملهاش حفة عالية اللى زى بتاعة البيتزا) بالسمن بالفرشاة ثم ضعى المقدار فى الصينية و بلى ملعقة و امسحى و جة البسبوية عشان تساويها و تدخليها فى الفرن وممكن تضعى شوية لوز فى ماء ساخن لحد ما القشرة البنى بتاعتة تتقشر على طول . افتحى كل لوزة بالطول من النص و ر صصى الانصاص على وش البسبوسة او ممكن انصاص بندق برضة و دخليها الفرن اول ما لونها يبقى زهبى طلعيها و اسقيها بالعسل الساخن و غطيها على طول و بالهنا و الشفا
كل المقدار بنفس العلبة بتاعة القشطة مش بالكوباية فاهمة قصدى اية ؟؟؟ شطة المراعى او بوك او نستلة
ملحوظة : بعد خروج البسبوسة مباشرة من الفرن تسقى بالعسل الساخن وتتغطى على طول .وسيبى الغطاء عليها طول ما بتاكلوا منها
بصى يا سيتى اولا انزلى اشترى علبيتين قشطة اى نوع عندكم نستله او المراعى او بوك الحجم الكبير من السوبر ماركت ماشى ؟؟؟؟؟افتحى العلب ماشى ؟؟؟؟ طلعى القشطة من العلبة وحطى القشطة فى الطبق البلاستيك اللى حتعملى فية البسبوسة ماشى ؟؟؟؟ كدة بقى عندك علب القشطة فاضية صح ؟؟لاننا شيلنا منها القشطة صح؟؟؟؟؟هاتى بقى كيس جوز الهند اللى عندك وفضى منه فى علبة القشطة الفاضية لحد ما الجوز الهند يملى نص العلبة فقط وتروحى مفضية الجوز الهند من العلبة فى الطبق البلاستيك اللى حتعملي فية البسبوسة ماشى؟؟؟؟؟؟؟هاتى كيس السكر اللى عندك وروحى مفضيه منه فى علبة القشطة الفاضية لحد ماتملى العلبة على الاخر وبعدين تفضيها فى الطبق البلاستيك اللى حتعملى فية البسبوسة ماشى ؟؟؟؟؟؟ وتروحى منزله سكر تانى من الكيس بتاع السكر لحد ما تملى نص علبة القشطة الفاضية وبعدين تفضيها فى الطبق البلاستيك اللى حتعملى فية البسبوسة ماشى ؟؟؟؟؟؟ وبعدين تروحى جايبة علبة السمنة اللى عندكم وتروحى منزله منها سمنة فى العلبة الفاضية بتاعة القشطة لحد ما تمليها وبعدين تفضيها فى الطبق البلاستيك اللى حتعملى فية البسبوسة ماشى؟؟؟؟؟؟وبعدين تروحى شارية سميد بسبوسة نص كيلو مثلا وبعدين تروحى مفضية منه فى علبة القشطة الفاضية 3 مرات يعنى مرة تملى علبة وبعدين تملى كمان علبة وبعدين تملى كمان علبة وتفضيهم فى الطبق البلاستيك اللى حتعملى فية البسبوة ماشى؟؟؟؟؟؟؟ كدة تمام بقى عندك كل المقادير فى الطبق البلاستيك تروحى عجناهم كويس قوى بالمعلقة الخشب لحد ماتبقة طرية فى ايدك وبعدين تدهنى الصينية يادوب بحتة سمنة وتروحى منزله كل الخليط فى الصينية ماشى ؟؟؟؟؟ وبعين تساوى الوش كويس زى ما انا كاتبة وتحطى شوية لوز فى شوية ماء مغليين حتلاقى اللوز اتقشر روحى فاتحة كل لوزة نصفين ورصصيهم على وش الصينية ودخلى الصينية الفرن لحد ما تستوى ويبقى لونها ذهبي .اول ماتطلع من الفرن على طول تكونى مجهزة العسل ساخن وتسقيها كويس قوى وتغطيها لمدة ساعة وبالف هنا وشفا

اللسان
اللسان المسلوق (دون)
لسان
عصير ليمون
بصلة مبشورة
ملح وفلفل
حبهان
الطريقة
نغسل اللسان كويس ونقشط الطبقة الخشنة اللى فوق وندعكه كويس بالملح وبعدين بالدقيق ونشطفه كويس .نملا حلة بالماء ونضع فيها اللسان على نار هادية لحد ما الماء يغلى براحته وبعد ما يغلى نروح راميين الماء دة ومغيرينة بماء تانى نظيف وبارد .نضعه بالماء النظيف تانى فى الحلة مع الملح والفلفل والبصلة والحبهان على نار هادية ويترك لحد مايستوى نشيله من الماء وننزع جلده . ويااما نقدمه مع البقدونس المفروم والليمون
او باى طريقة مطلوبة

اللسان بالكركم (دون)
لسان
معلقة صغيرة كركم
بصلة مبشورة
3 معالق سمنة
ملح وفلفل وبهارات
صلصة
الطريقة
نسلق اللسان(سبق وشرحناه) .نضع السمنة على النار ونشوح فيها البصلة واللسان لحد ماتصفر ثم نضع الكركم والملح والفلفل والبهارات ونقلب لحد ما يندمج كله مع بعضه ويقدم ساخن

اللسان بالكمونية (دون)
لسان
3 معالق سمنة
2 كوب عصير طماطم
راس ثوم مهروسة
2 معلقة كمون
ملح وفلفل
الطريقة
نسلق اللسان كما شرحناه .نقدح السمنة ونحمر فيها اللسان ثم نضيف له الثوم المهروس والكمون ونقلبهم كويس .نضيف عصير الطماطم والملح والفلفل ونتركهم على النار لحد مايغلوا ثم نوطى النار لحد ما اللسان يستوى وممكن اذا احتاج تزودى شوية ماء تزوديله لحد مايستوى

الكيكة المظبوطة اللى بالميزان (دون)
للحصول على اظبط كيكة
طبعا علشان حجم الكوبايات بيختلف اثناء تنفيذ اى صنف حلو فللخروج من هذة المشكلة اثناء عمل الكيكة استخدمى الميزان و تجهزى كل المقادير على وزن البيض بمعنى انك لو حتعملى قالب كيك طويل المقاس الصغير فهو بياخد 3 بيضات يبقى توزنى ال3 بيضات وبعدين نفس الوزن سكر و نفس الوزن دقيق و ملعقة صغيرة بيكنج بودر و كيس فانيليا ووزنهم زبدة .تمام ؟ ولو الفورمة اللى مخرومة من النص يبقى توزنى الاول 5 بيضات و بعد كدة كلة نفس الوزن,,

شيش بالقشطة (دون)
دجاج منزوع الجلد والعظم ومقطع مكعبات
او ممكن الفرخة سليمة بس منزوعة العضم
علبة قشطة كبيرة
عصير ليمونة كبيرة
معلقة صغيرة مليانة ثوم مهروس
نص معلقة صغيرة بهارات دجاج
معلقة صغيرة سماق
ملح
زيت للقللى
الطريقة
ضعى القشطة فى طبق غويط وعليها الملح وعصير الليمون والبهارات والثوم واخلطيهم بالمعلقة كويس
ضعى الدجاج فى الطبق مع التتبيله واخلطيهم كويس وغطى الطبق وسيبية حوالى ساعة ( مش اقل من كدة عشان يبقى حلو ) .رصصى قطع الدجاج وراء بعض فى العيدان الخشب .ضعى فى مقلاية زيت بس مش كتير يعنى يغطى قعر المقلاية بس لحد ما يقدح وبعدين .نضع عيدان الدجاج جنب بعض فى المقلاية وكل شوية افضلى قلبيهم علشان يستووا ويطلع كلهم لونهم دهبى حلو وما يتحرقوش .لو حتستعملى الفرخة سليمة بدون عظم يبقى ممكن تمسحى صينية بالزيت وتحطى الدجاجة وتغطيها بورقة فويل وتضعيها فى الفرن لمدة ساعة وبعدين شيلى الغطاء وخليها لما تحمر حوالى عشر دقايق كمان

مخ بالصويا صوص (دون)
2 مخ
ربع كيلو بصل
كوب جبنة
نص حزمة كرفس مفرومة
ربع كوب خل
2 معلقة كبيرة مستردة
2معلقة كبيرة كاتشاب
ربع كوب صلصة الصويا
ملح وفلفل
3 فصوص ثوم
الطريقة
اغسلى المخ بماء بارد ثم تبلية بملح وفلفل ثم ضعية فى حلة فيها ماء مغلى وشوية خل لمدة 5 دقايق بس. شيلى المخ من الماء واركنية .قطعى البصل شرائح رفيعة وقطعى الثوم كمان شرائح رفيعة .شوحى البصل والثوم فى ربع كوب زيت لحد ما لونهم يحمر وبعدين تروحى ضايفة المستردة والخل و والكاتشاب وتقلبيهم كويس وبعدين
تضيفى لهم الكرفس والملح والفلفل فى الاخر .قطعى المخ شرائح ( او حلقات) وضعيه فى طبق فرن وضعى فوقه
الصويا صوص ( بس رشرشيه فوق المخ ) ثم ضعى خليط البصل اللى عملناه وسويه على المخ ثم رشى الجبنة على وش الصينية ودخليها فرن متوسط الحرارة حوالى نص ساعة وبالهنا والشفا

اضربى البفتيك الاول بالشاكوش المخصوص بتاع البفتيك اضربى من الناحية اللى فيها البوز البارز كبيرة مش من الناحية التانية وبعدين اضربية من الناحيتين دى اول حاجة ويكون الزيت على النار قدح بس مش قوى يعنى اعملى تجربة الاول انك تحطى رشة بقسماط بايدك خفيفة فى الزيت اذا ما تحمرتش وطلعت فقاعات بسرعة وفضلت عايمة على الزيت يبقى استنى شوية لما الزيت يسخن اكتر تانى حاجة لما تضعية فى البيض والبقسماط ابقى اضغطى علية كويس بايدك تالت حاجة عند التحمير تكون النار وسط ولا عالية يقوم البقسماط يتحرق ومايستويش البفتيك ولا تكون واطية ان البقسماط يفك من البفتيك وبرضة ما تقلبيش البفتيك على الوش التانى الا لما الوش الاول يتحمر فاهمة قصدى ؟جربى تانى كدة وقوليلى وعلى فكرة للمعلومة ان البانية اللى بيتعمل الاول دقيق ثم بيض ثم بقسماط بيبقى عرضه ان يفك اكتر من اللى بنعمله بدون دقيق يعنى جربى اعملية ببيض ثم بقسماط فقط بدون دقيق لحد ما يظبط معاكى (ملحوظة من دون)

طبق مكرونة بالزبدة للاطفال(دون)
ربع كيس مكرونة مقصوصة حمراء
ربع كيس مكرونة مقصوصة خضراء
ربع كيس مكرونة مقصوصة عادية
معلقة كبيرة زبدة
معلقة كبيرة زيت
ملح
الطريقة
نغلى الماء على النار مضاف له ملح ومعلقة الزيت لحد ما تتسلق المكرونة نضعها فى المصفاة ونشطفها بالماء البارد نضع معلقة الزبدة فى الحلة لحد ماتسخن ونروح حاطين فيها المكرونة ونقلبها فى الزبدة لمدة 5 دقايق ثم نطفى النار ونضعها فى طبق

طبق مكرونة باللحمة المفرومة للاطفال (دون)
ربع كيس مكرونة مقصوصة حمراء
ربع كيس مكرونة مقصوصة خضراء
ربع كيس مكرونة مقصوصة عادية
عصاج
معلقة كبيرة زيت
ملح
الطريقة
نغلى الماء على النار مضاف له ملح ومعلقة الزيت لحد ما تتسلق المكرونة نضعها فى المصفاة ونشطفها بالماء البارد تكونى مجهزة العصاج ومستوى بس يكون ساخن ونروح حاطين المكرونة على العصاج ونقلبها لمدة 5 دقايق ثم نطفى النار ونضعها فى طبق

طريقه للبفتيك دايت لو تحبوا (ام ياسمين جيسيكا)
بنسخن طاسه تيفال بدون اى زيوت او سمن ولما تسخن كويس بنحط شريحه البفتيك نرش عليها ملح وفلفل واثناء التحمير بنعصر عليها نصف ليمونه وتأكل ساخنه طعمها بيبقى جميل ومن غير دهون

السمك البانيه (دون)
فيلية سمك بلطى او قشر بياض
ملح و فلفل
نص ليمونة
2 بيضة مضروبة بالشوكة
بقسماط ناعم
زيت للتحمير
الطريقة
نغسل السمك ونتركه لحد ما يصفى مايته .نتبل السمك بالملح والفلفل وعصير الليمون ونتركه حوالى نص ساعة
نضع شريحة السمك فى البيض ثم فى البقسماط ونحمرها فى الزيت لحد ماتستوى وتحمر ونشيلها على الورق الماص للدهون .يقدم الطبق مع سلطة الطحينة وسلطة بابا غنوج مع العيش او الارز

وصفات كتاب (مدراس كارى مسحوق)
(1) كسرولة السمك (دون)
كيلو سمك ستيك قطع كبيرة
2بصل اخضر
6 فصوص ثوم مهروسين
2 معلقة كبيرة كارى
فلفلة خضراء رومى مقطعة رفيع
نص كوب زيت
معلقة صغيرة ملح
2 معلقة عصير ليمون
كوب قطع خبز
الطريقة
اقلى البصل الاخضر فى الزيت لحد ما يدبل .ضيفى له الثوم والفلفلة الخضراء والكارى و الملح وحركيهم كويس لحد ما يتخلطوا ببعض .ادهنى السمك بالليمون والملح واركنيهم على جنب لمدة ربع ساعة .هاتى طبق فرن وافرشى فى القاع من الخليط اللى عملناه ثم رصصى طبقة من السمك ثم افرشى فوقه طبقة تانية من الخليط ثم رصصى طبقة من السمك ثم طبقة من الخليط والخبز .ضعى السمك فى فرن متوسط الحرارة لمدة 1/3ساعة تقريبا لحد ما يستوي
تعليقى: مش شرط التقيد بعدد طبقات السمك والخليط اللى هما كتبينها يعنى ممكن على قد الكمية اللى حتعمليها

(2) كرات اللحم المقلية ( الكفته) (دون)
نص كيلو لحمة مفرومة
2 بصلة
3 معالق جبن مبشور
2 فص ثوم مهروسين
معلقة كبيرة شبت مقطع
3 شرائح خبز
معلقة كارى
2 بيضة مضروبة
معلقة ملح
معلقة جريب فروت
الطريقة
انقعى الخبز فى عصير الجريب فروت وبعدين اعصرية .ضعى فى الكبة اللحمة المفرومة والخبز والثوم والبصل والجبنة المبشورة والشبت والكارى والبيض والملح .اضربيهم كويس لحد ما ينعموا خالص ويتجانسوا. ادهنى كفوف ايدك بعصير الجريب فروت وشكلى المقدار على هيئة كور صغيرة .سخنى الزيت وحمرى فية الكفته على نار معتدلة لحد ما تستوى ويبقى لونها بنى ( تقدم الكفته مع الفتوش او الحمص)

تورته الجيلى بالموز (ام ياسمين جيسيكا)
مقادير الكيكه
8 بيضات
كوب و ربع دقيق
كوب سكر
باكو فانيليا
باكو بيكنج بودر
الجيلى
3 باكو جيلى فراوله (أنا بستخدم كوكس )
حوالى 1/2 كيلو موز
أولا يتم تحضير صنيتين مقاسهم زى بعض (يفضل مقاس 28) الصينيه الأولى يتم وضع طبقة من الجيلى فيها وتركها بالتلاجه
تحضير طبقة الجيلى
يتم أخذ كيس ونصف من الجيلى مع 2 كوب ماء وندوبه جيدا ثم نضعه على النار واول ما يغلى نطفى عليه
نصب المقدار فى الصينيه ونتركه ليبرد .نقطع الموز حلقات بالورب حتى تعطى شكل جيد ونبدأ فى رصها بداخل صينيه الجيلى على شكل دائره من الخارج إلى الداخل حتى ننتهى فى المنتصف فيكون شكل الموز حلقات
وندخلها إلى الثلاجه
طريقه عمل الكيكه
يتم ضرب البيض لمده خمس دقائق ثم يضاف اليه السكر ونستمر فى الضرب بالمضرب الكهربائى لمدة نصف ساعه ثم نضيف الفانيليا وفى أثناء الضرب يتم تشغيل الفرن ليكون ساخن عند ادخال الصينيه .نوقف المضرب
يتم نخل الدقيق مع البيكنج بودر ويتم إضافته إلى خليط البيض والسكر بخفه شديده مع التقليب فى شكر دائرى حتى لا يخرج منه الهواء .نبطن الصينيه بطبقه بسيطه جدا من السمن ثم الدقيق ونزيل الدقيق الزائد بالتخبيط على الصينيه .يتم صب الخليط بالصينيه وندخلها إلى الفرن هادى وليس عالى الحراره حتى لا تحترق الكيكه من الخارج وتظل نيه من الداخل .الفرن الحامى يتم التسويه به حوالى 30 دقيقه أما إذا كان بطئ فيكون 45 دقيقه ولا يتم الفتح على الكيكه قبل مرور 30 دقيقه حتى لا تهبط ونعلم انها استوت عندما تترك الكيكه جناب الصينيه نخرجها على منخل سلك حتى تبرد .فى أثناء ذلك يتم عمل الجزء التانى من الجيلى الكيس ونصف المتبقى مع 3 كوب وماء ويدوب على البارد ثم يوضع على النار وأول ما يغلى نطفئ ونتركه حتى تبرد .نخرج الصينيه الموجود بها الجيلى من الثلاجه ونضع فوقها الكيكه البارده وبملعقه نبدأ نسقى الكيكه بالجيلى المخفف بعد ان برد ونسيقها جيدا واحده واحده حتى نتأكد أن الكيك تشرب كله بالجيلى ثم نعيد الصينيه إلى الثلاجه ونتركها لتتماسك جيدا .عند التقديم نأخذ الصينيه ونلفها بخفه على شعلة البوتجاز ونهز الصينيه عندما احس انها فكت من الصينيه نقلبها فى طبق التقديم فتكون الكيكه فوقها الجيلى الأحمر بحلقات الموز. يفضل عملها من المساء لتانى يوم مع مراعاه عند تجهيزها للتقديم لا نضع الصينيه على النار ونستخدم النار بحذر حتى لا يسيح الجيلى مره أخرى .ممكن استخدام خليط من الموز والتفاح أو البرتقال المقشر أو اى نوع فاكهه محببه ولكن يكون لها لون مختلف عن الأحمر حتى تعطى شكل جميل. بتضربى البيض + السكر نصف ساعه وده اللى بيخلى الكيكه الأسفنجيه ناجحه

فراخ بالكارى (دون)
(صدور مخلية من الجلد والعظم )_ بصلة صغيرة _ حوالى 2 ملعقة اكل ز يت _ملح _2 ملعقة كبيرة كارى و ممكن 3 لو بتحبى حراق .
الطريقة:
ضعى الزيت على النار الى ان يسخن .اضع البصلة المخرطة ناعم و اقلب لحد ما تصفر .اضع الكارى ووراة الفراخ و اقلب حيتخلطوا ببعض ثم اضع ماء حسب كمية الفراخ يعنى تغطى الفراخ فقط و الملح حيغلوا وعلى فكرة حتستوى على طول الفراخ ما بياخودش ثلث ساعة .بالنسبة للارز اعملية عادى بس قبل ما يشرب الماء بتاعه حطى ملعقة كبيرة كارى فى الما ء ( او ) نص ملعقة صغيرة كركم عشان يبقى لونه اصفر
فكرة للتقديم . اما تضعى طبق الارز لوحدة و طبق الفراخ بالكارى لوحدة . او بالكبشة المخرمة تشيلى الفراخ من الصوص و تحطيها فى قعر الطبق ثم تضعى الارز علية و تكبسى جامد بظهر الملعقة ثم تقلبية فى السرفيس و ترش رشى شوية صوص كارى على الوش و الباقى تحطية فى طبق جانبى يقدم مع سلطة ذبادى
ملحوظة : ممكن استبدال الفراخ باللحمة اوبالجمبرى .ممكن وضع معلقة كبيرة كريمة لبانى قبل مانطفى على الفراخ او اللحمة بخمس دقايق ونفلبها ونطفى

سلطة البازنجان بالكارى (دون)
2 حبة بازنجان
نص معلقة مايونيز
بصلة متوسطة مقطعة
معلقة كارى
ملح
الطريقة
اطهى البازنجان فى الفرن لمدة ساعة ثم يبرد ويقشر ثم اخلطيه فى الكبة مع المايونيز والكارى والملح والبصل
اضيفى بعض من عصير الليمون ويقدم مع الدجاج او اللحم المشوى

لزانيا بالفطر (زوزا)
المقادير:
شرائح لازانيا حسب حجم الصينية المستعملة - جبنه رومي مبشوره - 2 كوب طماطم معصورة - حليب - دقيق - زيت زيتون - زيت قلي - جبنة موزاريلا - حوالي 1/2 كيلو فطر مقطع - زبده - ملح - فلفل اسود - جوزة الطيب
الطريقة:
الباشميل: ذوبي 2 م ك زبدة على النار واضيفي 2 م ك دقيق وحركي الى ان تتجانس اضيفي كوبين حليب واستمري بالتحريك الى ان تتماسك ثم ارفعيها من على النار واضيفي الملح وجوزة الطيب.أضيفي زيت الزيتون في وعاء على النار واضيفي له الطماطم المعصورة واستمري بالتقليب من فترة لأخرى لمدة 10 - 15 دقيقة ثم تبليها بالملح والفلفل. اقلي الفطر بزيت القلي واتركيه جانبا. اخلطي صلصة الطماطم مع الباشميل. في صينية الفرن ضعي في القاع قليل من مزيج الباشميل والطماطم ثم ضعي شرائح اللزانيا حسب حجم الصينية ثم قومي باضافة كمية من الفطر وكمية من الموزاريلا ورشي جبنه رومي. قومي بتكرار العمليه حسب مقدار كمية الفطر واخيرا اخر طبقه من اللزانيا واضيفي عليها كل ما تبقى من الصلصة ورشي جبنة الرومي وقليل من زيت الزيتون على الوجه. ادخليها الفرن الى ان تنضج حوالي 30 دقيقة على حرارة 180
الأفضل انك تجهزيها قبل دخول القرن بساعتين وإلا اذا كنتي مستعجلة فاسلقي شرائح اللزانيا لمدة 3 دقائق

الــــــــــــــــــرز بالكــــــــــــــــــارى و الجمبرى (دون)
بصلة كبيرة شرائح
5 فصوصثوم
زيت نباتى
ملح - فلفل
ملعقة كبيرة كارى
2 كوب ا رز
نصف كيلو جمبرى مقشر و مغسول
الطريقة
نحمر البصلة فى الزيت إلى أن يصفر لونها قليلاً ثم نضيف الثوم ثم الجمبرى و البهارات و نقلب إلى أن يصبح الجمبرى برتقالى اللون و نقلب قليلاً ثم نضع الرز و نقلبهم معاً جيداً إلى أن تختلط كل المقادير مع الرز .نضيف حوالى كوبايتين ماء أو أكثر حسب نوع الرز و نتركه يتشرب الماء ثم نوطى النارو نتركه يستوى حوالى ثلث ساعة بنفس طريقة الارز العادى .عند التقديم نضع الارز فى طاجن او سلطانية او طبق غويط ونكبسة كويس وبعدين نقلبه حيبقى شكلة حلو وممكن نجملة بوحدات من الجمبرى المسلوقة بقشرة

جمبرى بالكارى (دون)
جمبرى مقشر ومتنظف ( وحقولك تنظيفة ازاى)_ بصلة صغيرة _ حوالى 2 ملعقة اكل ز يت _ملح _2 ملعقة كبيرة كارى و ممكن 3 لو بتحبى حراق .
الطريقة
ضعى الزيت على النار الى ان يسخن
اضع البصلة المخرطة ناعم و اقلب لحد ما تصفر .اضع الكارى ووراة الجمبرى و اقلب حيتخلطوا ببعض ثم اضع ماء حسب كمية الجمبرى يعنى تغطى الجمبرى فقط و الملح حيغلوا وعلى فكرة حيستوى على طول الجمبرى ما بياخودش ربع ساعة .بالنسبة للارز اعملية عادى بس قبل ما يشرب الماء بتاعه حطى ملعقة كبيرة كارى
فى الما ء ( او ) ملعقة صغيرة كركم عشان يبقى لونه اصفر
فكرة للتقديم .اما تضعى طبق الارز لوحدة و طبق الجمبرى بالكارى لوحدة . او بالكبشة المخرمة تشيلى الجمبرى من الصوص و تحطية فى قعر الطبق ثم تضعى الارز علية و تكبسى جامد بظهر اللعقة ثم تقلبية فى السرفيس و ترش رشى شوية صوص كارى على الوش و الباقى تحطية فى طبق جانبى يقدم مع سلطة ذبادى

طريقة تنظيف الجمبرى (دون)
امسكى الجمبرياية فى ايدك و بالايد التانية سكينة. ببوز السكينة الرفيع اعملى خط فى ظهر الجمبرى حتلاقى خط اسود تشيلية ترمية دة بيكون الرمل اللى لحسة الجمبرى من الماء و لو انتى متمكنة اعملى فتحة صغيرة فى اول الظهر و امسكى اول طرف الخط بتاع الرمل و اسحبية لفوق حيطلع معاكى على طول

عزومة لسبانيش فلاور
المائده:
كركديه و تمر هندي
شوربه فراخ بالكريمه و المشروم
سلطه بطاطس بالمايونيز
سلطه فاصوليا خضرا
سلطه خضرا
ارز بالخلطه
محشي فلفل
محشي كرنب
صينيه بروكلي بالباشاميل و الجبنه
كانيلوني
صينيه فراخ بالليمون في الفرن
طاجن لحمه بالبطاطس و المشروم
و الحلويات:
سينمون رولز
تشيز كيك
و شاي و قهوه و شاي اخضر و نسكافيه و مايه ساقعه

صينية المكرونة بالزيتون (دون)
كيس مكرونة (اسباكتى او ريشة او اى نوع)
كوب زيتون اسود حلقات
كوب زيتون اخضر مخلل حلقات
كوب بصل مخرط
كوب جبنة مبشورة
3 معالق كبيرة مستردة
بشاميل خفيف
ملح وفلفل
2 معلقة بقسماط ناعم
الطريقة
نسلق المكرونة عادى ونشطفها بالماء البارد ونصفيها. نقطع الفلفل الرومى والبصل قطع صغيرة. نعمل البشاميل الخفيف ونضع علية البصل والفلفل والزيتون والمستردة و3/4 كوب الجبنة والملح والفلفل والزيتون ونخلط
كله بالمعلقة ثم نضعهم على المكرونة ونقلب كويس لحد ما كله يتوزع كويس مع المكرونة. ندهن طبق فرن بالسمنة ونضع فية الخليط ونسوية .نرش باقى الجبنة على الوش ثم نرش البقسماط وندخلها الفرن لحد ماتستوى وتحمر
ملحوظة : ممكن تضعى على وجة الصينية طبقة بشاميل ثم ترشى جبنة بدل البقسماط والجبنة

طبق خضار للريجيم (مووتي)
المقادير:
خضار مشكلة
زيت ويتون او قطعة زبد
ملح وفلفل
الطريقة
تسلقى الخضار بس مش اوى علشان ما بتهريش
وبعد كدة تصفية
وتطى الزيدة على النار لحد ما تسيخ وبعد كدة تحطى الخضار وتشوحية شوية وتحطى شوية ملح وشوية حلوين فلفل ..

طريقه برضه باعمل بيها الخضار السوتيه وبيكون تحفه (ام زياد)
كوسه وجزر زبطاطس,او ممكن كوسه لوحدها
باغلى مايه مش كتير وبعدين احط فص مستكه وحبهان وورق لاورا وبصله وفصين ثوم وبعدين الخضار وبراعى ان المايه ماتكونش كتير يعنى يادوب تغطى الخضار وملح وفلفل طبعآ, بتبقى تحفه والله وممكن تعصرى عليها ليمون

البسكوت بالشيكولاتة ( باردة لا تدخل الفرن ) (دون)
حوالى 15 باكو بسكوت شاى _ باكو زبدة وسط _ 2 بيضة _ فانيليا _ سكر بودرة (حسب التزوق ) _حليب
الطريقة
كسرى البسكوت بايدك قطع صغيرة ( مش بالكبه نهائيا )القطعه قدعقله او عقلتين صباع و اركنيهم فى طبق كبير غويط .
عمل الشيكولاتة :
نضرب الذبدة كويس فى الخلاط .اضع عليها السكر البودرة و اضرب .اضع نص كوب كاكاو و بيضة و الفانيليا و كل دة و الخلاط شغال ما توقفيهوش ثم اضع النص كوب الكاكاو التانى و البيضة التانية و مازلنا نضرب .ابدء فى تنزيل سرسوب اللحليب خفيف خفيف و الخلاط شغال زى ما قلنا لحد ما توصلى لتخانة حلوة للشيكولاتة تكون تقرب للينة و اوقف الخلاط بس ماتنسيش تظبطى فى السكر .نفترض غلطى و الشيكولاتة بقيت سائل ؟؟ تروحى مزودة شوية كاكاو لحد ماتظبطى السمك .تجيبى اللبن البارد ( علشان البسكوت ما يبوش )و ترشى ترشى بايدك البسكوت لحد ما البسكوت كله يتبل كويس بس اوعى يبوش منك. هاتى الشيكولاتة ( بس سيبى حوالى ربعها للوش ) و حطية على البسكوت و قلبى قلبى بايدك كويس لحد ماتحسى ان البسكوت كله فية شبكولاتة كويس
ضعى البسكوت بالشيكولاته فى الصينية و اضغطى بايدك علشان البسكوت يتفرد فى الصينية و ماتبقاش حتة عالية و حتة واطية ( ولنتى بتضغاطيها فى الصينية حتكون جامدة تحت ايدك ) بعد ما تفرشيها تمام فى الصينية هاتى باقى الشيكولاته اللى كنا حاجزينه و افردية على وش الصينية . ممكن تعملى باشوكة اشكال على هيئة زجزاج على وش الشيكولاتة و ممكن ترشى فستق مفروم او بندق محمص بيدوها طعم حلو .دخليها الاول الفريزر لمده ساعة و بعدين نزليها تحت فى الثلاجة و كل ما تقعد بتطرى

طريقة لعمل الحليب المكثف المحلى كنت واخداها من الاخت دردشة مطابخ جزاها الله كل خير ,,,(مووتي)
بصو تجيبوا كيلو لبن وتحلوة يععنى تحطو كمية السكر اللى انتوا عاوزينها وبعد كدة تحطية على النار لحد ما يغلى وبعد كدة توطى علية النار يفضل يغلى لحد ما ينقص ويبقى الربع تقريبا ,,وبيبقى زى الجاهز بالظبط

طريقه تانيه حلوه اوي برضه (سبانيش فلاور)
3 فنجان لبن بودره
3 فنجان سكر
ربع كوب ماء
في الخلاط لحد ما يفطسوا و يتجانسوا خالص

الرز بالجزر (مووتي)
المقادير
جزرتين مبشورين
بصلة مفرومة
4 كوب ارز بسمتى
1ملعقة صلصة
4 كوب شوربة
الطريقة
يوضع السمن على النار ويوضع البصل الى ان يصبح زهبى اللون .نضع علية الجزر زنقلب الى ان يزبل الجرز
نضع الشوربة وعليها معلقة الصلصة والملح والفلفل وشوية قرفة وشوية قرنفل. بعد كدة نحط الرز ونسوية عادى ,,

كباب الحله بالبطاطس (اينا)
اولا بجيب حوالي كيلو نصف لحمه متقطعه مكعبات كبيرة شويه وبعد مغسلها وبفضلها متكونش بتلو تكون يعني عجل مش كبير ولا صغير يعني .المهم بجيب حوالي 4 بصلات كبار شويه وقطعمه جوانح+2 معلقه سمنه او زبده .احط الذبده وبعدين البصل ومعاهم اللحمه علطول وافضل اشوحهم كويس وبعد محس ان لونها بقه بني شويه احط ( ملح فلفل بهارات + 2 ماجي+قرفه +وكل البهارات الي عندك وعشان خاطر دون حطي كاري
المهم بفضل اشوح فيهم واحط معلقه ميه وتنشف احط معلقه ميه لحد ملاقي لون اللحمه اغمق خالص وبعدين انا عندي حله سب الي هي حله الضغط. بعد كده اقشر 4 بطاطاس واقطعهم صوابع تخينه شويه واحطهم ولو في فلفل اخضر كمان المهم الميه متكترش يا دوب تكون الحجات ديه مش متغطيه ميه المهم انا بحط حولي ربع كبايه تنشف احط ربع كمان المهم بعد متحطي البطاطس يكون عدى مثلا ربع ساعه اللحمه والبصل على النار
تغطي الحله السب بالكتير 10 دقايق نار متوسطه وتفتحي عليا ودوقي ولواحتاجت ميه متحوطيش الا معلقه لان الحله ديه بتحتفظ بالميه وبعد متستوي اللحمه البطاطس بتاخد طعم البهارات والبصل ويبقى كله لونه بني وطعمها بيبقه رائع بعملها مع رز ابيض

ممكن وانتى بتعملى اللحمة بالكارى او الفراخ بنحط برضة بطاطس مقطعة مكعبات بتبقى 1/4 مقدار الفراخ او اللحمة والبطاطس بالكارى طعمها جميل جدا (ملحوظة من دون)

شرح اللبن الرايب (دون نقلا من المنتدى)
تشترى اول مرة علبة لبن رايب من برة واذا كنتى حتعملى مقدار كبير اشترى 2 علبة لبن رايب واذا كنتى حتعملى مقدر صغير اشترى علبة واحدة لبن رايب وهى دلوقتى عملت المقدار الصغير
يعنى علبة لبن رايب
+كوب بودرة حليب من العلبة (نيدو او اى نوع)
+2 كوب ماء دافىء
الطريقة
ضعى كوب البودرة ( النيدو) فى طبق غويط وبعدين صبي عليه الماء الدافي مع التحريك السريع
ثم ضيفى لهم علبة اللبن الرايب وقلبيهم كلهم لحد ما يتجانسوا .غطي الطبق باحكام واتركيه خارج الثلاجه لمدة 5 ساعات(حتى يتخمر) حركيه مره كمان ثم انقليه في زجاجة واحفظيه في الثلاجه لوقت الاستعمال .بتقولك ابقى شيلى كوب علشان لما تيجى تعملية تانى تستخدمية كخميرة بدل ماتشترى بس تكون (مقدار كوب كبير للكميه الصغيره) واضيفي عليه الحليب وكرري نفس الطريقه

طريقة خضار للريجيم (دون)
جهزى كل الخضروات وقشريها وقطعيها مع بصلة وطماطاية ورشة ملح وقلبى كله بايدك تماما واتركيهم لحد ميعاد الغداء حتبصى تلاقيهم نزلوا مايتهم تروحى حطة الحلة على النار وتغطيها حتلاقية بيستوى فى مايته لحد مايشربها خالص وحيبقى زى المتشوح بالظبط ومش طعم المسلوق

طريقة تانية مع اللحم او الفراخ (دون)
جهزى الخضار بنفس الطريقة السابقة وخلية لحد قبل ميعاد الاكل بساعة وتضعى معاة قطع فراخ او لحمة مكعبات او ممكن فرخة كامله مع الخضار وقبل الغداء بساعة تحطية فى كيس حرارى وتقفلية كويس وتخرمية كام خرم بالشوكة وتضعية فى الفرن برضه حيستوا فى مايتهم وكمان حينزلوا مياة زيادة وحتروحى فى الاخر شقة الكيس بالسكينة لحد كله ما يحمر والطعم رائع بدون اى دهون

الحواوشى (دون)
نص كيلو لحمة مفرومة
قطعة صغيرة ( لية ) من الخروف
ملح وفلفل وبهارات
فلفلة حامية او شطة
2 بصلة متوسطة
ارغفة خبز بلدى او شامى حسب العدد
ورق فويل
الطريقة
نخرط البصل بالسكينة خشن مش ناعم ونبشر قطعة اللية بالمبشرة .نضع كله على اللحمة مع الملح والفلفل والشطة ونخلطهم كويس .نجيب الرغيف البلدى او الشامى واما نعمله بالكامل او ممكن نقسمة انصاص وممكن نقسمه ارباع .نضع قطعة من الخلطة فى الرغيف ونساوية كويس من الداخل وبعدين نقفل الرغيف ونضغط علية بأيدنا .نبططه .نفرش ورقة فويل ونضع فيها الرغيف ونقفلة كويس ونضعة فى الفرن لحد مايستوى بيبقى حوالى نص ساعة واكتر حوالى 10 دقايق اذا كنتى عيزاه مقرمش
ملحوظة :ممكن الاستغناء عن اللية بس ماتكنش اللحمة المفرومة حمراء قوى يعنى يكون فيها نسبة دهن .ممكن الاستغناء عن الشطة

ريش بتلو أو رقبه بتلو (ام ياسمين جيسيكا)
بسله - جذر حلقات - بطاطسايه واحده حلقات - كوسه حلقات - فلفل رومى حلقات- طماطم حلقات - بصل حلقات - فاصليا خضراء -ورق لورى - جوزة الطيب خفيف - فصين ثوم - بهارات خفيف - ملح - فلفل
الطريقه
بدعك حلقات البصل مع التوابل واخلط عليها اللحم وادعكهم مع بعض واضع الثوم ثم ارص الخضار طبقات وأغطيه بورق الفويل وادخله الفرن حوالى 3/4 ساعه وبعد كده اشيل ورق الفويل واتركه 15 دقيقه حتى يحمر (بدون أى زيوت أو دهون)

سويسرول البسكوت بالشيكولاتة (دون)
حوالى 15 باكو بسكوت شاى _ باكو زبدة وسط _ 2 بيضة _ فانيليا _ سكر بودرة (حسب التزوق ) _حليب
الطريقة
كسرى البسكوت بايدك قطع صغيرة ( مش بالكبه نهائيا )القطعه قدعقله او عقلتين صباع و اركنيهم فى طبق كبير غويط .
عمل الشيكولاتة :
نضرب الذبدة كويس فى الخلاط .اضع عليها السكر البودرة و اضرب .اضع نص كوب كاكاو و بيضة و الفانيليا و كل دة و الخلاط شغال ما توقفيهوش ثم اضع النص كوب الكاكاو التانى و البيضة التانية و مازلنا نضرب .ابدء فى تنزيل سرسوب اللحليب خفيف خفيف و الخلاط شغال زى ما قلنا لحد ما توصلى لتخانة حلوة للشيكولاتة تكون تقرب للينة و اوقف الخلاط بس ماتنسيش تظبطى فى السكر .نفترض غلطى و الشيكولاتة بقيت سائل ؟؟ تروحى مزودة شوية كاكاو لحد ماتظبطى السمك تجيبى اللبن البارد ( علشان البسكوت ما يبوش ) و ترشى ترشى بايدك البسكوت لحد ما البسكوت كله يتبل كويس بس اوعى يبوش منك .هاتى الشيكولاتة و حطيها على البسكوت و قلبى قلبى بايدك كويس لحد ماتحسى ان البسكوت كله فية شيكولاتة كويس .حنفرد ورقة فويل و نحط الخليط على طرف الورقة بس لجوة شوية فوق بعض بشكل الرول بتاع السويسرول و نبدء نلفة كلة للاخر و نقفل علية كويس و نضعه فى الفريزر و لما نفكة ندهن بالسكينة باقى الشيكولاتة على كل الوش او ممكن نسيح شيكولاتة خام و نصبها على الوش كلة

السجق البانية (دون)
سجق
2 بيضة
بقسماط ناعم
ملح وفلفل
عصير نص ليمونة
سمنة للتحمير
الطريقة
نغسل السجق .نتبل السجق بالملح والفلفل وعصير الليمون .نضع السجق فى البيض المربوب بالشوكة ثم نضعة فى البقسماط .نقدح السمنة ونضع فيها السجق وحمرية بس تحمير خفيف

البيض بالعصاج (دون)
4 بيضات
1/4 كيلو لحمة مفرومة معصجة
ملح وفلفل
معلقة كبيرة سمنة
الطريقة
نضع السمنة فى مقلاية لحد ما تسخن وبعدين ضعى العصاج على السمنة بس سويه وافردية فى المقلاية
بالمعلقة أتخرى شوية عصاج علشان تخلى فى النص مكان فاضى مدور وتروحى كسرة بيضة بالراحة خالص وتنزليها فى المكان الفاضى اللى عملتية فى العصاج وهكزا تعملى اربع اماكن للاربع بيضات .وطى النار لحد ماتلاقى بياض البيض جمد يعنى استوى رشى رشة ملح وفلفل على الصفار

شوربة الفراخ بالبروكلي و الكريمة (رواء الاسلام)
المقادير
كمية من الفطر الطازج مقطع شرائح
بصلة مقطعة جوانج
معلقة سمنة كبيرة
واحدة بروكلي
2 كوب كريمة لباني و 2 كوب شوربة
ملعقة دقيق كبيرة
ربع كيلو صدور فراخ مسلوقة و مقطة مكعبات
ملح و فلفل و اكليل الجبل و زعتر بري
الطريقة
تسلقي البروكلي و تهرسيه كويس و نركنيه على جنب .تجيبي السمنة و تحطيها على النار و بعدين تحطي عليها البصل و الفطر و تسيبيهم لحد ما يدبلوا مع التقليب .بعد كدة تحطي معلقة الدقيق و تقلبي دقيقة بعد كدة تضيفي الكريمة الباني و الشوربة و تسيبيهم لحد ما تبدا تطلع فقاقيع و تلاقيها مسكت شوية تقومي ضايفة الفراخ و البروكلي المهروس و البهارات و تخليها تغلي دقيقة و بعد كدة تصب في الاطباق

هاتى الفراخ البانية ( الصدور ) وافتحى الصدر الاول بالطول من جنب واحد وخلى الجنب التانى ماسك يعنى ماتفصليش الصدر نصين وبعدين تروحى ضربه الصدر بالمطرقة بتاعة اللحمة علشان تقللى سماكة الصدر من جوة علشان توسعى مكان للحشو وبعدين تحطى الحشو بس متوصليهوش للطرف المفتوح وبعدين روحى قافلة وضغطة علية كويس وحطيه فى البيض وبعدين فى البقسماط وهو لوحده البيض زى مايكون حيلزقهم فى بعض ومش حيطلع الحشو وممكن تجربى صدر واحد وتحمرية لوحده وتشوفى النتيجة وبعدين تحمرى الباقيين (ملحوظة من دون عن الكوردون بلو)

الخبيزة بالحمص (دون)
كيلو خبيزة
ربع كيلو لحمة مفرومة
2 معلقة سمنة
2 معلقة كبيرة حمص
ملح وفلفل
بصلة مبشورة
ربع راس ثوم مهروس
ملعقة كزبرة ناشفة
كوب شوربة او ماء
الطريقة
ينقع الحمص فى الماء من بليل او قبل الطبيخ ب 3 ساعات .بعد تنضيف الخبيزة تغسل كويس ونسلقها. بعد ماتسلقيها صفيها بالمصفاة بتاعة الخضار او ممكن تضربيها فى الخلاط بتاع العصير مع نص كوب شوربة .نضع السمنة فى مقلاية ونشوح فيها البصلة وبعدين نضع اللحمة المفرومة ونضع كوب شوربة ونسيبها لحد ماتغلى ثم نضع الحمص عليهم ونخليهم على النار لحد ما الحمص يستوى ثم نضع عليهم الخبيزة ونخليهم على النار لمدة
5 دقائق ثم اوطى النارخالص .نعمل التقلية بان نضع السمنة والثوم على النار لحد مايصفر وبعدين نضع الكزبرة ثم نضعهم على الخبيزة ونخليهم يغلوا دقيقة واحدة ونتبلها بالملح والفلفل ونغرفها وبالهنا والشفا

صينية جلاش بالمشروم (دون)
او بالخضا ر( صيامى )(خفيييييييفة)(طرية)
باكو جلاش
مشروم
خضار مشكل مسلوق
كوب ماء مذاب فية ( 2 معلقة كافى ميت)
زيت للوجة
الطريقة
ادهنى صينية بالزيت واضع ورقتين من الجلاش ثم ادهنهم بالفرشاة بسمن نباتى وهكذا لحد ما نخلص نص كمية الجلاش ثم نضع المشروم او الخضار او الخضار والمشروم .اكمل باقيه الصينية بنفس الطريقة اضع ورقتين
جلاش ثم ادهن بسمنة نباتى وهكذا .لما نخلص الكمية اللى عندنا نقطع الصينية اما مثلثات او حسب الرغبه .نذوب الكافى ميت ( البودرة )فى كوب الماء ثم اصبه على الصينية كلها زاترك الصينية ولا ادخلها الفرن الا
بعد 3 او 4 ساعات ثم اضع معلقة زيت على وش الصينية وادخلها الفرن متوسط الحرارة لحد ماتستوى وتحمر
ملحوظة : اعمليها من بدرى وماتسويهاش الا قبل الاكل حتكون طررررررررية وجميله .الكافى ميت بديل الحليب

صينية مكرونة فرن بالخضار او بالمشروم (دون)
(صيامى)(خفييييفة)
كيس مكرونة ريشة
خضار مسلوق
مشروم
بشاميل
ملح وفلفل
زيت
بصلة
الطريقة
نسلق المكرونة عادى ونشطفها ونصفيها من الماء .نبشر البصلة ونشوحها فى الزيت لحد ماتصفر. نضع عليها المشروم والخضار والملح والفلفل .نخلط جزء من الشاميل بالمكرونة وندهن الصينية بمعلقتين بشاميل ثم نضع نص المكرونة ثم نضع الخضروات ثم نضع نص كمية المكرونة التانية ونضع على الوش باقى البشاميل وعلى الوش نضع معلقة زيت .ندخلها الفرن لحد ماتستوى وتحمر
مقادير البشاميل
5 معالق كبيرة دقيق
5 معالق زيت
5 كوب ماء مذوب فيها 10 معالق كافى ميت (بدل الحليب) ونعمل البشاميل بالطريقة العادية

لسان عصفور (خفيييف) (دون)
صيامى
كيس مكرونة لسان عصفور
نص كيلو طماطم معصورة
كوب مشروم
فلفلة رومى خضراء
فلفلة رومى حمراء
فلفلة رومى صفراء
بصلة مبشورة
ملح وفلفل
زيت
الطريقة
نسلق اللسان العصفور ونشطفه ونصفية. نشوح البصله فى الزيت والفلفل الرومى الملون ومقطع قطع صغيرة والمشروم والملح والفلفل لحد ما يصفروا ثم اضع عصير الطماطم لحد ما يدخل فى التسبيك. اضع الخليط على المكرونه واقلبهم كويس لحد ما يتوزعوا كويس فى المكرونة. ادهن طبق فرن بالزيت او بسمنة نباتى واصب فيها خليط المكرونة واضع على الوش معلقة كبيرة زيت وادخلها فرن متوسط الحرارة

محشى البازنجان والفلفل (دون)
المقادير
كيلو بزنجان ابيض او اسود او الاثنين
نص كيلو فلفل رومى
3 بصلات كبار
حزمة شبت، و 2 حزمة بقدونس
3 معالق كبار و مليانين صلصة طماطم
كيلو رز
ملح _ فلفل _ 3 معالق سمن كبار _3 معالق زيت
شطة حسب الرغبه
الطريقة:
ننزع قلب البزنجان بالمقورة بعد أن نضغط عليه بكفنا قليلا لتطريته
تشيلى الكاس اللى فى اعلى الفلفل بالسكينة و ينزع قلبه (البذور)
طريقة عمل الخلطة:
تفرمى البصلة بالسكبنة وتحطى عليها شوية ملح و تفضلى بايدك تدعكيها كويس كانك بتعصريها بين كف ايدك حتلاحظى انها طريت و نزلت شويه سائل وهو المطلوب نقى الخضرة( الشبت والبقدونس) طبعا و أغسليها كويس و خرطيها بالسكينة على البصل و تحطى كل التوابل و السمن و الزيت والطماطم و اخيرا تجيبى الرز وتغسلية وتصفية كويس وتحطية على الخلطة و تخلطى كله كله كويس .احشى البازنجان والفلفل بالخلطة بس ماتزغميش البزنجان قوى ( يعنى ماتمليهوش بالارز على الاخر خلى دايما الجزء الاخير فاضى علشان الارز كله يستوى .ضعى المحشى فى الحله ورصصية واقف بجانب بعض .اغلى الشوربة واظبطى ملحها ثم ضعيها فى حلة المحشى مع المحشى. حتى ثلثي الحلة و بالملعقة الصغيرة ضعى داخل كل بزنجناية وفلفلاية معلقة صغيرة شوربة
ضعية على النار لحد ما يغلى تروحى مهدية النار ( متوسطة) لحد ما المحشى يستوى

تورتة الميل فى بالسكر (دون)
عجينة ميل فى
مربى مشمش
كريم شانتية أو كستر خفيف
سكر ناعم
فستق مفروم
الطريقة
1- نفرد عجينة الميل فى بسمك 1 سم
2- و اعملى منها 4 دوائر بمقاس استدارة الصينية او ممكن 3
3- خرمى الدوائر بالشوكة و سيبيها حوالى 10 دقائق
4- توضع الدوائر فى الفرن بس يكون اعلى من المتوسط يعنى يكون احمى
5- نخرجها من الفرن بنفس الشكل و اللون اللى انتى بتشوفية برة
6- حطيهم على منخل او حديدة لحد ما يبردوا
7- سوى طروفها بمقاس واحد
8- ضعى اول دائرة على طبق التقديم و ادهنى وشها بالمربى
9- حطى الدائرة التانية فوقها و الزقيها عليها كويس و ادهنى وشها كلة بالكريمة
10- حطى الدائرة التالتة كويس و ادهنى وشها بالمربى
11- حطى اخر دائرة و اضغطى عليها كويس عشان يمسكوا فى بعض
12- ندهن الجوانب بطبقة خفيفة بالمربى وبعدين ترشى الفستق المطحون عليها فحيلزق طبعا على المربى
13- نرش السكر البودرة على وش التورتة تماما و بالهنا و الشفا
ملحوظة : قبل ما تدهنى الجناب بالمربى ابقى خففيها بيادوب معلقة ماء دافىء

جاتوة الميل فى (دون)
نفس طريقة التورتة بس بدل ما تعملى العجينة دوائر اعمليها مستطيلات فى صينية طويلة وزوقيها بنفس الطريقة و بعد ما تخلصيها بالسكينة الطويلة الحامية تروحى مقطعة المستطيل بالطول مرتين يعنى خطين بالطول و بعدين تروحى مقطعة بالعرض تقريبا 3 قطعات حيبقى بنفس المقاس اللى انتى بتشترية من السوق و ترصصية على طبق التقديم
ملحوظة : جاتوة الميل فى اللى بالشيكولاتة تدهنى فى النص بالكستر المضاف له شيكولاتة و تزوقى الوش الطبقة الاخيرة اللى فوق بحلوى الماء اللى بالشيكولاتة و بالهنا و الشفا
الكريم باتسير:2كوب حليب_2معلقة كبيرة دقيق_صفار بيضتين_فانيليا_سكر_2 معلقة كبير كاكاو
كريم باتسير - كريم باتسير بالشيكولاته - مربى - سكر بودرة

عجينة الميل فى (دون)
كيلو دقيق
زرة ملح
معلقة صغيرة بيكنج بودر
3/4 كيلو زبدة
2 كوب ماء للعجن
1/2 معلقة صغيرة عصير ليمون
الطريقة
1- انخلى الدقيق مع الملح و اعملى حفرة فى وسط الدقيق
2- نزلى الماء واحدة واحدة على الدقيق و افضلى اعجنى اعجنى بأيدك
3- لحد ما تتكون معاكى عجينة بس تكون جامدة ماسكة نفسها
4- بعد ما تتكون العجينة اعجنى فيها شوية بأديكى
5- افردى العجينة امامك على الرخامة على هيئة مستطيل طويل
6- رشى الزبدة بيادوب رشة دقبق صغيرة (علشان تسحب الماء اللى موجود فى الزبدة)
7- افردى الزبدة على نص المستطيل اللى من ناحيتك مثلا بحيث تكون فى المنتصف و بعيدة عن الاطراف و الجناب
8- .اقفلى النص التانى الفاضى من المستطيل بحيث يغطى الزبدة و دوسى بأديكى على الجناب كويس
9- بالنشابة بالراحة افردى العجينة عشان الزبدة ما تطلعش منها و طبقيها على هيئة ظرف يعنى تجيبى الجنب اليمين فى نص المستطيل و الجنب الشمال فى نص المستطيل و الطرف اللى ناحيتك ترفعية لنص المستطيل و الطرف اللى هناك فى نص المستطيل كدة حتبقى شكلها بقى مربع او مستطيل صغير
10- ضعيها فى الفريزر بالظبط لمدة 15دقيقة ولا اقل ولا ازيد بين كل مرتين
11- تطلعيها بعد ال15 دقيقة وتكررى نفس عملية الفرد بالنشابه و التطبيق تانى و تحطيها برضة فى الفريزر 15 دقيقة تفضلى تعملى كدة لمدة 6 مرات
ملحوظة
سبب الفرد و التطبيق كل هزه المرات هو دة اللى بيخليها طبقات مورقة علشان كدة ماتقلليش عدد المرات اثناء الفرد بالراحة بالنشابة علشان الزبدة ما تطلعش لبرة .ظبط الوقت بين كل تطبيقة و التانية مهم جدا .احتفظى بها فى الفريزر فى كيس نايلون لحين الاستخدام .طبعا علشان هى متعبة بس فى عمايلها فأنا من رأيى انك تتعبى مرة واحدة و تخليها عندك فى الفريزر

عجينة الباف باسترى puff pastry (دون)
نفس عجينة الميل فى بس الاختلاف الوحيد فى المقادير بس
المقادير
مقدار الزبدة هو نفسه مقدار الدقيق
يعنى كيلو زبدة
كيلو دقيق
ماء بارد للعجن
زرة ملح
1/2 معلقة صغيرة عصير ليمون لكل 1/4 كيلو دقيق

كيكة جوز الهند (دون)
2 بيضة _ كوب و ربع جوز هند _كوب حليب_1/2كوب سمن _2 كوب دقيق _ كوب سكر _ فانيليا
_ 2 معلقة صغيرة بيكنج بودر .
عسل (كوب سكر _ كوب ماء _نص ليمونة .)
الطريقة:
نعمل العسل الاول و نسيبة يبرد .نضرب السمن كويس بالمضرب الكهرباء مع السكر لحد ماتلاقيهم ابيضوا و هشوا اضيف لهم البيض بيضة بيضة مع الفانيليا .نضع الجوز الهند ( كوب) .نضع البيكنج بودر على الدقيق و نضع على العجينة شوية حليب و شوية دقيق و هكذاشوية حليب و شوية دقيق لحد مانخلصهم هما الاتنين ندهن الصينية بالسمن و نرشها دقيق و نقلبها نخبطها علشان بقيت الدقيق ينزل .ندخلها الفرن متوسط الحرارة لحد و شها ما يحمر .نخرجها و نسقيها بالعسل البارد يعنى هى سخنة و العسل بارد .نرش الوش كلة بالجوز الهند و تقطع مثلثات

السويسرول (دون)
5 بيضات
3/4 كوب سكر
3/4 كوب دقيق . زرة ملح
معلقة صغيرة فانيليا
معلقة صغيرة بيكنج بودر
مربى مشمش او فراولة
2 فرخ ورق ذبدة
الطريقة
نضرب البيض بالمضرب الكهرباء لحد ما تلاقية بقى هش و فية رغاوى .نضع الفانيليا. نضع السكر شوية شوية على البيض واحنا بنضرب لحد ما تشوفى تخانتة كانك حطة علية دقيق. ينخل الدقيق ويضاف له البكنج بودر وزرة الملح ..بالمعلقة الخشب نضع الدقيق على الخليط ونقلب بالراحة شوية شوية فى اتجاة واحد .ولعى الفرن و خلية جاهز على حرارة متوسطة. ندهن صينية طويلة بدون حواف بالسمن . نقص ورقة الذبدة على اد الصينية مع ترك 1سم من كل جنب ثم نضع الورقة على السمنة اللى دهننها فحنلاقى الورقة لذقت فى الصينية و ندهن الورقة كويس بالسمن. ويصب فوقها الخليط على ان تكون سمك الخليط 1سم تقريبا. يوضع الصينية فى فرن متوسط الحرارة لمدة عشر دقائق او ربع ساعة بالكتير حتى يحمر السطح .جهزى على الرخامة ورقة الذبدة التانية افرديها امامك و رشى عليها كلها شوية سكر بودرة. يعد ماتطلع الصينية من الفرن اقلبيها على الورقة المرشوشة بالسكر و اشيل الصينية من فوق الكيكة و اشيل بالراحة الورقة اللى لزقة فى الكيكة و الف السويسرول على الفاضى بالورفة اللى تحته لمدة 10 دقائق .نخفف المربى بوضعها فى مقلاية على نار هادية لفة واحدة حتلاقيها بقيت ناعمة و كدة حتكون سهلة الفرد .نفك السويسرول و نفردعلية المربى مع ترك 1/2 سم من الاطراف وممكن وضع خط واحد بالعرض على الطرف اللى ناحيتك مكسرات على اساس ان المكسرات كأنها فى المركز عند التقطيع .الف السويسرول و اقفل الاجناب كويس و اضعة فى الثلاجة حوالى ساعتين .لما يطلع افك الورقة واقطع القطعة الفاضية من كل جنب و اما ارش الوش بالسكر البودرة او افرش طبقة خفيفة من المربى على السويسرول و ادحرج السويسرول على ورقة عليها مكسرات فحتمسك على طول فى المربى السويسرول بالشيكولانه نفس الطريقة بس بدل المربى بنحشيه بكريمة الشيكولاته
ملحوظة :انا هنا عملت السويسرول ابيض عادى وبعدين بعد ما وضعته فى الصينية رشيت علية معلقة كاكاو ونكشته بالشوكة علشان يطلع لونه فى النهاية ابيض مشبح بالكاكاو. اول مايطلع من الفرن افضلى مغطياة بالصينية اللى استوى فيها 5 دقايق فقط وبعدين شيلى الصينية وشيلى الورقة وروحى لفة على طول حتلاقية بيلف اخر حلاوة معاكى وعمرة ما حيتكسر بس اهم حاجة برضه متكتريش الدقيق فى العجينة واوعى تسبية فى الفرن اكتر من دقايق حيطلع من الفرن وهو لونه اصفر فااااااتح

طبق سهل (سمسم)
جبت صدور وقطعتها ترنشات عريضة شوية وبعدين شوحت بصلة واما اصفرت حطيت الفلفل ثوانى وبعدين حطيت الفراخ وجزر مبشور تشويحة وبعدين ملح وفلفل وبهارات فراخ ودبس رومان وقلبتهموبعدين سبتها علن نار هادية تستوى فى ميتها وبعدين كنت سالقة مكرونة حطيتها فى طاجن بيركسوعليها الفراخ وعلبة كريمة خفق وقلبتهم مع بعض وعلى الوش شوية زبدة كانت خفيفة جدا وسريعة جدا وممكن بطاطس محمرةوسلطة جنبها

صينية البفتيك بالكريمة (دون)
نص كيلو بفتيك
كوب مشروم
بصلة متوسطة
عدد 2 بطاطس شرائح بالعرض
5 معالق كريمة لبانى او قشدة الخفق
ملح وفلفل
معلقة زبدة
الطريقة
اذاكان البفتيك بتلو
نتبل البفتيك بالملح والفلفل والبهارات. نسيح الزبدة بس ونشوح فيها البفتيك لحد ما لونه يتغير بس .بعد ما نقشر البطاطس ونقطعها شرائح رفيعة بالعرض .نشوح البطاطس مكان البفتيك ثم نضع فى طبق فرن شرائح البطالطس تغطى قاع الصينية ثم نضع البفتيك بجانب بعض فوق البطاطس. نشوح البصلة والمشروم فى نفس المقلاية مكان البفتيك لحد ما يصفروا ثم نضع الكريمة ونقلب لحد ما يختلطوا ببعض ثم نصبهم على وش الصينية وندخلها فرن متوسط مش عالى لحد ما يستوى البفتيك والصينية كلها حتندمج مع بعض وطعمها جميل وبالهنا والشفا
اما اذا كان الفتيك كندوز صغير
يبقى تضربيه الاول و بعد ما تشوحية فى الزبدة تخلية يستوى نص سوى الاول وتكملى الصينية عادى
بنفس الطريقة

صينية المكرونة بالحليب (دون)
كيس مكرونة قلم
3 لتر حليب
5 معالق كبيرة نشا
كوب سكر
4 معالق كبيرة سمنة
فانيليا
جوز هند
مكسرات
الطريقة
نسلق المكرونة عادى بس متحطيش ملح فى الماء. خدى من الحليب كوب ودوبى فية النشا .اغلى الحليب ودوبى فية السكر ثم ضعى علية كوب الحليب اللى بالنشا وقلبيهم كويس ثم نضع المكرونة فى الحليب والفانيليا والسمنة
وقلبيهم ثم ضعى المكسرات وجوز الهند .ادهنى صينية كبيرة بالسمن وبعدين صبى بقى الخليط فى الصينية ودخليها الفرن بس خليه حامى لحد ما يجمد الحليب ويحمر الوش نطلعها من الفرن وبتتاكل ساخنة او باردة

مكرونة بالزبادى (دون)
كيس مكرونة (نص كيلو)
2 كوب زبادى
4 بيضات
نص فرخة مسلوقة ومقطعة
ملح – فلفل – زعتر
كوب جبنة مبشورة(اى نوع)
زبدة
معلقة كبيرة سمن
الطريقة
نسلق المكرونة ونشطفها ونصفيها .نقدح السمن ونضع علية المكرونة والملح والفلفل ونقلبهم لمدة 5 دقائق نضرب البيض ونضيفة على الزبادى ثم نضيف الجبنة الى الزبادى والبيض ونقلب كله مع بعض ثم نضيف قطع الدجاج ونخلط كله مع بعض .نضع المكرونة فى طبق فرن ونضع عليها الخليط ونضع قطع زبدة صغيرة على الوش وندخلها الفرن لحد وشها ما يحمر (مش حتاخد كتير لان كل المكونات مستوية) يعنى حوالى ربع ساعة

الكيكة يا ام العلاء (البان دي سبانيا) (دون)
3 معالق كبيرة سمنة( نص كوب)
كوب حليب
3 بيضات
معلقة صغيرة فانيليا
كوب سكر
معلقة كبيرة بيكنج بودر
3 كوب دقيق
الطريقة
نضع السمنة فى طبق بلاستيك وندعكها كويس قوى بكف ايدنا لحد ما تنعم خالص .نضع السكر على السمنة ونضربهم كويس بايدنا لحد ماتحسى ان السكر زاب .اضع البيض بيضة بيضة مع الفانيليا واضرب بايدى وانا برفع ايدى من تحت لفوق علشان الهواء يدخل للعجينة .اضع البيكنج بودر على الدقيق واضع القيق شوية شوية بالتبادل مع الحليب يعنى شوية دقيق وشوية حليب لحد ما جتتكون عندك عجينة .ادهنى الصينية بالسمنة ورشى رشة دقيق وصبى فيها العجينة .دخليها الفرن متوسط الحرارة لحد ما تعلى وتستوى .بعد ما تخرج وتبرد قطعيها سمبوكسات بالسكينة

تورتة الكريمة بالفراولة (دون)
كيكة اسفنجية
6 بيضات
1/4 1 كوب سكر بودرة
1/4 1 كوب دقيق
معلقة بيكنج بودر
معلقة فانيليا
كيلو فراولة
كريم شانتى
الطريقة
ناخد نص كمية الفراولة و نقطعها انصاص و نحط عليها كلها سكر عادى و نقلبها و نسيبها شوية حنلاقيها نزلت عصيرها دة حنستخدمه
1-زى ما اتفقنا نقطع الكيكة بالعرض بالسكينة لنصين
2-بالمعلقة نبتدى نسقى الطبقة الاولى من الكيكة بعصير الفراولة (او) نحط الفرشاة فى العصير و نبتدى زى مانكون بنسئسء على الكيكة
3-نضع جزء من الكريمة و نسوية كويس بالسكينة العريضة او الباليت
4-نضع انصاص الفراولة على كل الكيكة
5-نضع الطبقة التانية من الكيكة و نسقيها بعصير الفراولة بنفس الطريقة
6- نضع الكربم شانتية اما نفردة على سطح التورتة و الاجناب كويس اما نضع الكريمة فى الكيس و القمع و نعملة على هيئة وردات و نضع فراولاية على كل وردة كريمة وممكن تزوقى الجناب بالقمع تعملى الكريمة على هيئة خطوط او صوابع بالطول. نرش سكر على الفراولة ونتركها لحد ما تنزل العصير بتاعها اللى حنسقى بيه التورته .نضع الفراوله فى مصفاة علشان ناخد العصير .نقسم التورتة نصفين او ثلاثة بالعرض. نسقى التورتة بالعصير وبعدين ندهنها بطبقة كريمة ونرصص عليها انصاص فراولة .نضع نص التورتة التانى ونضغط علية كويس بايدنا نسقى خفيف بالعصير من على الوش وندهن الاجناب بالكريمة بالكيس والقمع نزوق التورتة زى ما انتى عيزاه

قالب الارز بالفاكهة (دون)
2 و نص كوب حليب
نص كوب ارز
3 معالق كبيرة سكر
2 معلقة كبيرة زبدة
3 بيضات
فانيليا
زرة ملح
علبة كمبوت
الطريقة
نغسل الارز ونحطه فى حلة على النار فيها ماء يكفى لتغطية الارز لحد مايغلى لمدة 5 دقايق مثلا وبعدين تطفى النار وتصفيه وتغسلية بالماء العادى .نغلى الحليب على النار مع السكر ثم نضع الارز علية ومعلقة زبدة وزرة الملح ونخلية على النار لمدة من ربع لتلت ساعة وانتى بتقلبى كويس وبعدين اطفى النار .نضرب بياض البيض لوحدة ونضرب صفار البيض لوحدة مع الفانيليا ثم نضع الصفار على الارز ونقلبهم بالراحة ثم نضع البياض
ونقلبهم بالراحة خالص .صفى علبة الكمبوت من العصير بتاعها خالص .ادهنى قالب بالزبدة( قالب الكيك الطويل)
ضعى نص كمية الكمبوت فى القالب ونص الكمية التانية اخلطيها مع الارز وحطيه فى القالب فوق الفاكهة .غطى القالب بورقة فويل وضعية على حمام مائى(زى الكريم كراميل) داخل الفرن لحد ما يستوى تطلعية وتضعيه فى الثلاجة يبرد وبعدين تطلعية وتقلبية وقت التقديم وبالهنا والشفا

صينية العجة فى الفرن (دون)
المقادير
10 بيضات
3 معالق كبيرة دقيق
بصلة متوسطة مخرطة
نص حزمة بقدونس مخرطة ( الاوراق بس بدون العيدان )
2 طماطماية متوسطة و مقطعة صغير
ثلث كوب زيت
ملح و فلفل
الطريقة
فى سلطانية نضرب كويس البيض و الدقيق بمضرب البيض .اضع علية البقدونس و الطماطم و البصل و الزيت و نخلطهم كلكم تماما .ندهن صينية بالزيت و نصب فية الخليط و ندخلة الفرن حوالى من 10 دقايق لربع ساعة لحد ما تلاقى الوش بقى مصفر و لونة حلو مش احمر علشان تفضل هشة زى الكيكة ما تنشفش
ملحوظة /انا مش بحط فيها بيكنج بودر لان البيض كافى انه يخليها تنفش وانتى بنفسك حتشوفيها حتطلع هشة و عالية و خفيفة زى الكيكة

قرص العجة الصغير المدور (دون)
4 او 5 بيضات حسب مقاس الطاسة التيفال بتاعتك
نص حزمة بقدونس _ معلقة صغيرة دقيق
بصلة متوسطة
طماطماية متوسطة
ملح _ فلفل
معلقة سمن
الطريقة
اكسر البيض و اضربة بالشوكة فى سلطانية و احط الملح و الفلفل و الدقيق واربهم كويس بالشوكة .اضع السمن فى المقلاية و اضع البصل لحد ما يصفر و بعدين الطماطماية و اقلب تقليبة و بعدين البقدونس المغسول والمفروم و اقلب تقليبة و بعدين اروح كباهم على اللى فى الطبق الغويط و اقلب كلة عشان يندمجوا مع بعض .احط حتة سمن صغيرة و انزل عليها كل المقدار لحد مايستوى قرص العجة من تحت و اروح قلباة فى طبق و ارجعه تانى المقلاية على الوش التانى لحد ما يستوى و كدة يكون قرص العجة استوى و بالهنا و الشفا
ملحوظة :ممكن تزودى مثلا المقدار ل 10 بيضات و تضعفى باقى المقادير و تعمليها فى صينية فى الفرن و تبقى غداء

صينية البطاطس ( باللحمة او الدجاج) (دون)
كيلو بطاطس _ نص كيلو طما طم _ ( او 3 ملعقة كبيرة صلصة مذ ا بة فى ماء ) _ملح _ فلفل _ بصلة متوسطة _ 2 ملعقة سمن _ قطع لحم حسب العدد المطلوب _ 3 فصوص ثو م _ عدد 2 حبة طماطم شرا ئح
الطريقة
_ تغسل البطا طس و تقطع حلقا ت متو سطة التخا نة _يقشر البصل و يقطع حلقا ت متو سطة _ تغسل قطع اللحم و تو ضع فى الصينية تو ضع البطاطس و الملح و الفلفل و الثوم و الصلصة و نرصص حلقات الطما طم على وجه الصينية ثم نوزع السمن على الوجه _ نضعها الاول على عين البوتجاز من فو ق الى ان تستو ى نص سو ا_ مع تز و يد قليل قليل من الماء كلما ا حتا جت _ نضعها فى فر ن متو سط الحر ار ة الى ان تستوى و يصبح لونها احمر جميل
ملحوظة ::: اذا كا نت اللحمة بتلو او ضا نى تو ضع كما شرحت فوق واذا كانت اللحمة كندوز يفضل ان تسلق اولا لوحد ها ثم تو ضع فى الصينية

اللي حيبقى عندها لية الخروف و مش بتحب تستخدمها زي ما هي، ممكن تقطعها كلها مكعبات و تسليها كلها مرة واحدة و تصفيها و تعبيها في برطمانات و تستخدمها زي السمنة، و لو مش بتحب البقايا اللي حتفضل من التسييح ترميها، لكن ممكن تخليها في برطمان لوحدها و تضيفها مع التسبيكات بتدي نفس حلو و مش بتضايق في الطعم لانك مش بتحسي بيها (ملحوظة من نودي)

الشعيرية بالسكر (دون)
كيس شعيرية (او نص كيلو)
3 معالق كبيرة سكر
4 معالق كبيرة سمنة او ممكن زيت زرة
2 معلقة كبيرة سكر ناعم
فصين حبهان( وممكن الاستغناء عنهم)
الطريقة
كسرى الشعيرية قطع صغيرة .نضع السمنة او الزيت فى مقلاية لحد ما يسخن ونضع فيها الشعيرية ونحمرها لحد ما لونها يبقى بنى فاتح ثم ضعى ماء عليها والسكر ووطى النار عليها حتلاقيها استوت على طول خليها لحد ما الماء ينشف كله يبقى مفيهاش ماء خالص .ضعيها فى طبق ورشى على وشها سكر بودرة

كباب الفقراء (دون)
علبة فول مدمس
2 معلقة كبيرة طحينة
نص حزمة كسبرة خضراء
2 معلقة كبيرة سمنة (او نباتى)
بصله متوسطة
ملح - كمون
فص ثوم
قطعة فحم
الطريقة
افرمى الكسبرة ناعم. ابشرى البصلة ناعم .ولعى الفحمة لحد ماتحمر. سخنى الفول كويس وضعية فى الطبق
وضعى علية السمنة و البصل والثوم والكسبرة والطحينة والملح والكمون واخلطيهم كويس .اعملى حفرة فى نص الطبق وضعى الفحمة المولعة وغطى الطبق بسرعة حوالى 5 دقايق ثم شيلى الغطاء وشيلى الفحمة وقدمية مع الخبز المقمر ( الناشف _ المحمص)وبالهنا والشفا
صينية البولوبيف (دون)
2 علبة بولوبيف
نص معلقة صغيرة مستردة
كوب فتات خبز(خبز فينو مبشور )
2 معلقة كبيرة سمنة
3 معالق كبيرة بصل مبشور
2 بيضة
نص كوب شوربة
الطريقة
نهرس البولوبيف كويس بالشوكة اوافرمية فى الكبة خشن واخلطية بفتات الخبز .ضعى السمنة فى مقلاية وحمرى فيها البصل الى ان يصفر ثم ضعى خليط البولوبيف .اضربى البيض بالشوكة وضعيه على الشوربة وقلبيهم ثم ضعيهم على خليط البولوبيف وقلبى قلبى لحد ما حتلاقى الخليط بقى طرى نوعا ما. ادهنى صينية بالسمنة وضعى فيها الخليط وسوى السطح كويس وقطعية مربعات اوسمبوسكات ودخلية فرن متوسط الحرارة حوالى من نص ساعة لساعة الاربع لحد ماتستوى ووشها يحمر وبالهنا والشفا

صينية البيض المسلوق (دون)
8 بيضات مسلوقة
بصلة صغيرة مبشورة
2 فلفلة رومى مقطعة صغير جدا
2 معلقة سمنة
3 معالق كبيرة دقيق
كوب و نص عصير طماطم
كوب ونص ماء او شوربة
معلقة كبيرة بقدونس مفروم
ملح وفلفل
بقسماط ناعم
جبنة رومى مبشورة
الطريقة
نشوح البصل والفلفل الاخضر فى السمنة ويعدين نضع عليهم الدقيق ونقلب لحد ما يتخلطوا .نضع الماء وعصير الطماطم والملح والفلفل ونتركهم لحد مايغلوا ثم نشيلهم من على النار ونضيفلهم البقدونس المفروم. ندهن صينية بالزبدة ونقطع البيض شرائح ونرصصها فى الصينية ونصب الخليط فوقها ثم نرش شوية بقسماط وجبنة رومى مبشورة وندخلها فرن متوسط الحرارة حوالى ثلث ساعة وبتتاكل ساخنة وبالهنا والشفا

البيتزا (دون)
( سريعة بدون تخمير)
2 ونص كوب دقيق + 1 كوب حليب دافىء + 5 معالق كبيرة زيت ورشة ملح
ملعقة كبيرة خميرة فورية+ ملعقة سكر صغيرة+ بيضة+ رشة زعتر
للوجة: صلصة - فلفل اخضر مقطع قطع صغيرة – سوسيس – بسطرمة
تونة – زيتون اسود واخضر (اى اضافات )
الطريقة
نضع جميع المقادير فى العجانة ونضربهم حتكون العجينة مفرولة .اضع الحليب شوية شوية والعجانة شغاله لحد ما تلاقى العجينة اتلمت واتكورت وتركت جناب العجانة خالص .نرش الرخامة بالدقيق ونبدء فى فرد العجينة بالنشابة ونضعها فى الصينية ونخرم العجينة با لشوكة .نفردالصلصة على العجينة ثم نرش رشة جبنة صغيرة ثم نضع الاضافات حسب الرغبة ثم نرش طبقة الجبنة المبشورة ثم نرش نقطتين بالظبط زيت .ندخلها الفرن متوسط لحد ما الجبنة تسيح وتطلعيها يادوب لونها يبقى فاتح علشان مالتنشفش منك. اذا كنتى عايزة البيتسا (مارجريتا) بدون اى اضافات يبقى حتكتفى فقط بالصلصة وعليها الجبنة المبشورة

بقسماط فى السريع علشان كوباية الشاى (دون)
نص كيلو دقيق - زرة ملح - نص كوب زيت - ربع كوب سكر - معلقة كبيرة بيكنج بودر - معلقة صغيرة فانيليا - 2 بيضة - حليب حسب العجن (انا اخد منى نص كوب)- سمسم
الطريقة
اضع فى العجانة الزيت والسكر والبيض والفانيليا واضربهم شوية ثم اضع الملح والبيكنج بودر على الدقيق واضعة على المقدار والعجانة شغالة .انزل شوية شوية حليب لحد ما تلاقى العجينة اتكورت زى الصورة وتركت
اناء الخلاط كدة اصبحت جاهزة .ناخد حتة صغيرة على هيئة كرة ونعملها اصبع حسب الرغبة يعنى ممكن صباع طويل وممكن قصير وممكن تخين وممكن قصير يعنى حسب رغبتك انتى .ارصص الاصابع فى الصينية وادهن الوش بالحليب وارش سمسم حسب الرغبة يعنى ممكن لأ .دخلية فرن متوسط الحرارة مش حياخد وقت وحتلاقى الوش احمر وبقى جميل وبالف هنا وشفا

السمك الهامور هو السمك الوقار هنا عندنا وفعلا بيكون جميل اوي في البانيه وكمان جربيه مقلي بالدقيق بعد تتبيله طبعا وتحمريه في زيت مع ارز احمر بيكون تحفه
اما انواع السمك :عند البلطي البحري احلي من النيلي طبعا وممكن تشويه او تقليه زي الصوره كده .وفي السمك البوري طبعا وده ممكن مشوي زي الصوره برضو او تعمليه سنجاري بالبصل والخضره والطماطم .وسمك اللوت وده بيكون تحفه في الصينيه او في المقلي بانيه وسمك دنيس وده حلاوته مشوي بالزيت والليمون او بالرده وسمك البربوني
اما السمك المشوي ازاي تخليه متبل حلو هقولك علي سر
بصي ياستي بعد ماتشوي السمك عموما بالرده تكوني محضره كيس نايلون (شنطه بلاستيك من بتوع السوبر ماركت )وكل سمكه تشويها تحطيها في الكيس وترشيها ملح وكمون وتروحي لفه الكيس تقفليه يعني وهكذا لحد ماتنهي السمك كله شوي وده طبعا لانه النايلون بيخلي السمك يعرق وبالتالي الميه دي تطري السمك ويفضل محتفظ بسخونته وكمان وده الاهم انه يتقشر بسهوله وقت الغداء ولو اتفضل عندك سمك ممكن يتسخن تاني يوم علي بخار ماء او تلفيه بالفويل وفتحطيه في الفرن او التوسترودي احسن طريقه عشان السمك يتبل كويس لكن محلات السمك بعد الشوي بيكونوا محضرين ماء وملح وشطه وكمون ويضعوها علي السمك بمجرد خوجه من الفرن وانا مش بحبز الطريقه دي وده عن خبره جربي طريقتي وهتعرفي الفرق (ملحوظة من ام الهنا)

ماما لما بتعمل السمك المشوى بتحضر تتبيله كدة بتحطها عليه بعد ما بيتشوى و بيطلع تحفه ما شاء الله و هى عبارة عن ليمون و خل و ثوم و نعناع و ملح و كمون و كزبرة ناشفه و فلفل حامى او رومى و ممكن الوان بيعمل شكل حلو اوى و شويه ماء صغيرين . طبعا تفرمى الثوم مع الملح و الكمون و الكزبرة و تحطيهم فى طبق و عليهم باقى المكونات مع رشه نعناع و بعد لما تشوى السمكه و هى سخنه تحطيها فى التتبيله دى شويه صغيرين على الناحيتين و تطلعيها منها و بعدها ترشى عليها معلقتين من التتبيله دى و تقدميها بيها بتبقى تحفه والله جربيها (ملحوظة من مسلمة)

كفتة بالكارى والبطاطس(طبق سريع) (دون)
نص كيلو لحمة مفرومة
عدد 2 بطاطس كبيرة
3 معالق كبار كارى بودر
بصلة مبشورة
ملح وفلفل
زيت
الطريقة
تخلط اللحمة المفرومة مع البصلة والملح والفلفل .ناخد قطعة لحم اد الليمونة و نكورها بين ايدينا على هيئة كورة وهكذا نستمر حتى ينتهى المقدار كله .نحضر مقلاة تيفال ونضع فيها سمنة الى ان تسخن ثم نحمر الكفتة
بعد ماتتحمر نشيلها فى طبق جانبا .نقشر البطاطس ونقطعه مكعبات صغيرة .نضع معلقة زيت فى الحلة ونشوح فيها بصلة مبشورة صغيرة لحد ما تصفر ثم نضع الكفتة والبطاطس والكارى ونضع ماء ساخن عليهم فى الحلة ونظبط الحودء ( الملح) ونتركة حتى يستوى يعنى لما البطاطس تستوى لان الكفته اساسا مستوية يغرف فى طبق مع الارز الابيض او الارز بالكارى وبالهنا والشفا

انا الشوى بستخدم التتبيلة الاتية
سواء لحمة او دجاج او شيش مثلا للفرخة الواحدة او كيلو اللحمة عدد 1 كوب زبادى مع بصلة متوسطة مبشورة ناعم جدا مع طمطماية مبشورة ناعم وملح وفلفل وخل ...............الزبادى والخل بيخلوا اللحمة او الفراخ طرية وتستوى بسرعة وياريت لو تتبليها من بليل او من الصبح بدرى بالنسبة للطماطم قبل لما تنغزيها فى السيخ تشيلى منها الجزء اللى فية البزر اللى بيبقى طرى وداخله ماء ولكن تسيبى اللحم اللى بجانب القشرة ولما تنغزيها تنغزيها من ضهرها مش من عند اللحم علشان من عند اللحم بتاع الطمطاية مع الحرارة بتستوى وتطرى الطماطم وتقع لكن من ورا من عند الجلدة بتاعة الطماطم بتفضل ماسكة فى السيخ ما بتقعش
وبالنسبة لحرق البصل والفلفل والطماطم ممكن يحصل لما تكون اللحمة كندوز لانها بتاخد وقت لكن الضانى والبتلو بتستوى بسرعة والخضار مش حيلحق يتحرق او اللى حيتحرق هى القشرة الخارجية لكن من الداخل بتبقى مشوية وجميلة (ملحوظة عن شوي اللحم لدون)

صينية الجلاش بطعم البيتسا (دون)
باكو جلاش
كوب شوربة ( مرقة)
سمنة
زيتون اسود وزيتون اخضر
لانشون
فلفل اخضر (رومى)
جبنة بيضاء مهروسة بمعلقة زعتر
جبنة شرايح (سلايس)
الطريقة
نحضر صينية وندهنها سمن خفيف. نضع ورقتين من الجلاش ثم ندهن سمن بالفرشاة وهكذا لحد ما نخلص نص كمية الجلاش. نضع الجبنة البيضاء المهروسة بالزعتر ثم نضع حلقات الفلفل ثم نضع دوائر اللانشون ثم شرائح الزيتون بنوعية .نضع باقى كمية الجلاش بنفس الطريقة الاولى ثم نقطعها اما مثلثات او مربعات .ندخلها فرن متوسط على 180 يادوب 5 دقايق او لما تلاحظى ان وشها اتلون و اصفر نطلعها ونصب عليها كوب الشوربة وندخلها تانى الفرن لحد ما تحمر

الكرنبيت بالايطاليان صوص (ام زياد):
كرنبيت مقطع ومسلوق فى ماء وملح وكمون
2-مقادير الصوص:-
1كوب الاربع دقيق
1ونصف لتر لبن
1بصله صغيره مبشورة ناعم
3 ملاعق كبار سمنه او زبده
1/4 كجم جبنه شيدر(او ممكن اى نوع جبنه تحبيه)
1كوب ماشروم
2كوب فراخ مقطعه صغير ومتشوحه على النار أو ممكن تسلقيها الاول وبعدها تقطعيها
الطريقه:-
نشوح البصل فى السمن واول ما يصفر اضع الدقيق واقلب كويس تقليبتين ثم ابدأ اضع اللبن شوى شوى مع التقليب المستمر بالمضر السلك عشان مش تكلكع .بعد ما اضع مقدار اللبن كله اقلب على نار هاديه حتى يصبح قوامه كريمى ثم اضع الماشروم والفراخ والجبنه واقلب كويس .فى قالب بايركس مدهون سمنه اضع قليل من الصوص ثم الكرنبيط ثم باقى الصوص واضع على الوجه شرايح جبنه شيدر واضعه فى الفرن حتى يحمر وجهه

الفتة (دون)
ارز ابيض مستوى _ عيش بلدى محمص _لحمة مسلوقة بالشوربة _صلصة طمامم بالخل و الثوم .
طريقة سلق اللحمة ( ضانى او بتلو او كندوز صغير او رقبة )نضع الماء على النار و فية بصلة كبيرة مقطعة نصين و وورقتين لاورو و ملح وقلفل الى ان تغلى اضع اللحمة و اشيل طبعا الريم كل ما يطلع و ارمية الى ان تستوى 3/4 سوى اروح بالكبشة اشيلها من الشوربة و اصفى الشوربة بالمصفاة
اجيب حلة تانية نظيفة و اضع فيها ملعقة كبيرة سمن و لما تقدح ارمى فيها فصين مستكة و فصين حبهان حتلاقى ريحتهم طلعن تروحى حطة على طول اللحمة كلها ثقليبة فى السمنة و تلروحى منزلة عليها الشوربة حتعمل تششششش و حتشمى بقى ريحة الشوربة الجميلة
حتستوى اللحمة اطفى النار
طريقة عمل الصلصة بالخل و الثوم :
اضع على النار 2ملعقة سمن و عليهم راس ثوم مفرى لحد ما يصفر بس الثوم
اروح حطة علية 1/2 كوب خل حتى يغلى ثم اضع صلصة طماطم وملح وفلفل و بهارات و قليل من الماء ؤ اتركها حتى تتسبك حوالى 10 دقائق
طريقة تركيب طبق الفتة :
1_ اقطع العيش قطع متوسطة فى الطبق او الصينية و ارشرشة بالشوربة لحد ما كلة يشرب شوربة
2_ اضع الارز على العيش و افردة كويس و اضع كبشة شوربة
3_ ثم اضع بالكبشة صلصة الطماطم علىوش الارز كلة بس مش قليلة
4_ ثم ارصص قطع اللحم الهوبر على و ش طبق الفتة و حيطلع منظرة و ريحتة تفتح النفس و بالهنا و الشفا

صينية البقلاوة بالمهلبية (دون)
باكو جلاش
سمنة سايحة
المهلبية:
كوب حليب – معلقة كبيرة نشا- فانيليا
معلقة زبدة
شراب (شيرة ) 2كوب سكر – كوب ونص ماء
نص ليمونة
الطريقة
نعمل المهلبية
ناخد من الحليب نص كوب ونذوب فية النشا كويس .نضع باقى الحليب فى حلة على النارلحد ما يغلى ثم نضع النشا المذاب فى الحليب ونقلب لحد ماالخليط حيتخن (يتماسك) ثم اضع الفانيليا والذبدة ونقلبهم كويس ونتركها جانبا .نحضر الصينية وندهنها بالسمن ثم نضع اول ورقتين من الجلاش ثم ندهن بالفرشاة بالسمن وهكذا حتى
الانتهاء من نص كمية الجلاش ثم نضع طبقة من المهلبية بس تكون بعيدة عن الاطراف .نعمل نص الصينية التانى بنفس الطريقة ومتنسيش تبقى تضعى الزيادات اللى بتتبقى من ورق الجلاش بين الطبقات. نقطع الجلاش اما مثلثات واما سمبوكسات ثم نرش سمن سائح على الوجة وندخلها الفرن لحد ما تستوى ويحمر الوجة ثم تخرج من الفرن وتسقى بالشراب البارد وهى ساخنة وبالهنا والشفا

الجيلى بالكريمة (دون)
2باكو جيلى فراولة _ 2 ظرف كريم شانتية _ فراولة للزواق
نغلى على النار 3 كوب ماء ثم نضع علية الجيلى لحد ما يغلى و يدوب .نعمل الكريمة بنفس الطريقة المكتوبة على العلبة .نضع الكريمة فى الثلاجة و نضع الجيلى حتى يجمد تماما .نخرجهم من الثلاجة و نضع الكريمة على الجيلى و بالمضرب الكهرباء .نخلطهم مع يعض كويس حيبقى الخليط فاتح و ناعم لانهم حيتجانسوا على بعض نضعهم فى الكاسات و نجمل الوش بوردات كريمة و وحدات فراولة صغيرة .
مبيكونش سايل يا نودى خالص بيبقى ماسك نفسة لان المفروض بندوب باكو الجيلى فى 2 كوب ماء دة الطبيعلى لكن احنا هنا مدوبين ال2 باكو فى 3 كوب ماء فقط مش 4 وكدة بيبقى ماسك نفسه اكتر من الاول وبعد كدة لما بنضعه مع الكريمة برضه بيبقى ماسك لكن اهم حاجة لما تيجى تجمدى الجيلى الاول خالص وهو لوحده ماتجمديهوش فى الفريزر علشان ماياخدش ماء من التلج ابقى جمدية فى التلاجة من تحت

وبالنسبة للبفتيك انا بعملة يا اما فيلية بالبصل او بانية او بيكاتا او بصوص المشروم او بالصلصة البنى او بحشية لحمة مفرومة معصجة او خضار سوتية (ملحوظة من دون)
وبالنسبة للكفتة المشوية انا مبعملهاش بالحمة حمراء لأ بتكون فيها نسبة دسم او ببشر معاها حتتة لية صغيرة مع الملح والفلفل والبهارات وماء عصير بصل وليس بصل يعنى باخد من البصلة البشر بتاعها ماء خالص بالمبشرة العين الضيقة خالص وبعدين اصبعها واخرمها من النص بايد المعلقة الخشب علشان الفتحة تبقى واسعة (ملحوظة من دون)

قرص طرية (دون)
4 كوب دقيق
زرة ملح
كوب سمنة
قطعة خميرة بيرة(قد اليوسفى الصغير)
لبن رايب او زبادى
الطريقة
نضع الملح على الدقيق .اضع السمنة واخلطهم ببعض .ادوب الخميرة بنص معلقة سكر صغيرة فى ربع كوب ماء دافىء ثم اضعها على الدقيق .ادفى اللبن الرايب او الزبادى ثم اعجن بيهم لحد ما العجينة تتلم وتلاقى ايديكى
بقيت نضيفة مفيهاش عجينة خالص .ابدء اعمل العجينة على هيئة كور قد التفاح الاصفر وكل واحدة اخلصها ارصصها جنب التانية فى الطبق .بعد ما انتهى من عمل العجينة كلها كور .ابتدى ابطط بايدى كرة كرة بس بشرط
انى ابتدى من اول كرة انا كنت عملاها وحطاها فى الصينية مش من اخر واحدة خلصتها (فاهمين قصدى ؟)
ابطط كرة كرة. ممكن تتخنيها وممكن ترققيها زى ماانتى عايزة .تضعيها على صاجة الفرن الاساسية اللى بتبقى فوق النار مش على الرف الحديد ونضعها فى فرن متوسط لحد ماتستوى .ملحوظة مش بندهن الصاج ولا بندهن وش الفطير .ملحوظة ممكن نحشية بمعلقة مربى من الداخل

كيكة الجزر (دون)
3 بيضات
2 ونص كوب جزر مبشور خشن
2 كوب دقيق
3/4 كوب زيت
كوب وربع سكر
معلقة صغيرة بيكنج بودر
معلقة صغيرة بيكربونات
معلقة صغيرة قرفة
معلقة صغيرة فانيليا
الطريقة
ضعى الخميرة وزرة ملح والقرفة واخلطيهم فى الخلاط او بالمضرب ضعى الزيت والسكر لحد ما يدوب شوية ثم ضعى البيض والفانيليا واضربى ثم ضعى الجزر واخلطى .ضعى الدقيق بالمكونات اللى علية واخلطى كله واذا لقيتيها ماسكة شوية معاكى يا رانيا ممكن تحطى لها شوية حليب بتاع ربع لنص كوب بس (انا جربت مرة احط عصير جزر بدل الحليب بس معجبتنيش )ضعيها فى الصينية المدهونة ودخليها فرن متوسط الحرارة لحد ماتستوى زى الكيكة العادية وممكن تحطيلها زبيب او عين جمل مكسر

تورته بطريقه حبيبه قلبي don(سبانيش فلاور)
بس غيرت شويه في المقادير علشان حجم الصينيه عندي صغيره
5 بيضات
كوب سكر
كوب دقيق
معلقه كبيره بيكنج بودر
حوالي ربع كوب ماء
فانيليا
و لو التورته بالشوكولاته شيلي معلقتين دقيق مثلا و حطي بدالهم كاكاو او نفس النسبه
الطريقه
اضربي البيض بالمضرب الكهربائي حوالي 15 دقيقه و بعدين ضيفي السكر و الفالنيليا و الماء و اضربي تاني
هتلاقي المزيج بقي زي العجينه السايله بس من غير دقيق .ضيفي الدقيق المنخزل طبعا و البيكنج بودر و قلبي بالراحه و في اتجاه واحد علشان الهوا ميطلعش .انا بدل ما ادهن الصينيه عندي بابطنها بورق الومنيوم(فويل) و اصب الخليط و علي الفرن المسخن مسبقا علي 180 درجه مئؤيه حوالي 40 دقيقه .اول ما تطلع سيبيها تبرد و قطعيها نصفين و اسقيها بالشربات او عصير الكمبوت و المربي و الكريمه و زوقيها زي ما تحبي

الكريم كراميل (دون)
اولا : الكريم :
4 اكواب حليب _8 بيضات _3ملاعق كبيرة سكر_2 كيس فانيليا
الكراميل :
كوب كبير سكر _ معلقة شاى صغيرة ماء _ قوالب صغيرة او قوالب فويل صغيرة او صينية او فورمة الكيكة او قوالب الكيك المستطيلة
نبل القوالب اللى حنحط فيها الكريم كراميل من الداخل و نكب الماء الذائد
لعمل الكراميل نضع السكر فى مقلاية وعلية الماء ونقلب لحد مانلاقى السكر بدء بصفر ثم بدء يبقى بنى فاتح ثم بنى غامق .نشيلة و نصبة على طول فى القوالب المبلولة بارتفاع 1 او 2 سم .
لعمل الكريم
ندفى اللبن مع السكر على النار و نطفى النار ثم نضع علية البيض المضروب والمضاف له الفانيليا و نضربه كويس بالمضرب السلك اليدوى او الكهرباء . نصبة فى القوالب على الكراميل ونرصص القوالب فى صينيه كبيرة بها ماء لربع ارتفاع القوالب فقط علشان لما الماء يغلى ما يخشش فى القوالب يبوظها ونضع الصينية على النار حوالى ساعة او لحد ماتلاقى الكريم كراميل مسك نفسه .اشيله من على البوتجاز و ادخلة الفرن لحد ما يكمل سوى ووشه يحمر .نطلعة و نحطه يبرد فى الثلاجة و عند التقديم نمسك القالب بايدنا وفوقه طبق مقلوب ونهز القالب لحد ما يتقلب فلى الطبق حيبقى الكريم تحت و الكراميل فوق .

صينية مكرونة بصلصة الجبن (دون)
كيس مكرونة (500 جرام)
2 مقدار من صلصة الجبن
بقسماط ناعم
معلقة زبدة
جبنة رومى مبشورة للوش
الطريقة
بعد ما تسلقى المكرونة وتصفيها.اخلطى المكرونة ب 3/4 مقدار صلصة الجبنة .ندهن طبق فرن بالزبدة ونضع المكرونة ونضع باقى كمية صلصة الجبن على وش الصينية كويس وبعدين نرش رشة بقسماط ورشة جبنة رومى مبشورة والزبدة وندخلها الفرن لحد ما تحمر وتقدم ساخنة
صلصه الجبن
صلصة بشاميل
2معلقة كبيرة سمنة
2 معلقة كبيرة دقيق
2 كوب شوربة (مرق)
ملح وفلفل
5 معالق كبيرة جبنة رومى مبشورة
الطريقة
تعمل صلصة البشاميل بنفس الطريقة العادية وبعد ما تطفى النار نضع الجبنة الرومى المبشورة ونقلبها كويس بالمعلقة الخشب بس من غير مانحطها خالص تانى على الناروتستخدم

عمل الارز (دون)
كوب الارز بياخد كوب ماء ومعلقتين زيت
كوب الارز و 1/4 كوب شعيرية بياخد كوب وربع ماء و3 معالق زيت
.............................. .............................. .............................. .........
الارز المفلفل (دون)
كوب ارز ابيض عادى (قصير الحبة)
كوب ماء
2 معلقة زيت
ملح
الطريقة
اغسلى الارز
ضعى الزيت فى حلة على النار لحد ما يسخن كويس. ضعى الارز على الزيت وقلبى قلبى بالمعلقة لحد ما تحسى ان الارز كله اتبل من الزيت تروحى حاطة الملح وتقلبى تقليبة ثم ضعى الماء وقلبيهم وغطى الحلة لحد ما الارز خلاص قرب يشرب الماء كله تروحى مقلباة و موطية النار على هادى خالص وممكن تضعى تحت الحلة الشياطة او الحديدة المدورة وماتفضليش تفتحى علية علشان البخار ما يخرجش من الحلة يا دوب حتفتحى علية مرة وتدوقى الارز اذا لقيتية استوى خلاص اطفى واذا لقيتية لسة فية شوية حصحصة رشرشى بس كدة بايدك على وشة وقلبية وكل الحكاية بياخد ربع ساعة او تلت وبالهنا والشفا

الارز بالشعيرية (دون)
كوب ارز ابيض عادى (قصير الحبة)
1/4 كوب شعيرية
كوب وربع ماء
3معلقة زيت
ملح
الطريقة
اغسلى الارز. ضعى الزيت فى حلة على النار لحد ما يسخن كويس .ضعى الشعيرية وقلبيها فى الزيت لحد ماتحمر ثم ضعى الارز على الشعيرية وقلبى قلبى بالمعلقة لحد ما تحسى ان الارز كله اتبل من الزيت تروحى حاطة الملح وتقلبى تقليبة ثم ضعى الماء وقلبيهم وغطى الحلة لحد ما الارز خلاص قرب يشرب الماء كله تروحى مقلباة و موطية النار على هادى خالص وممكن تضعى تحت الحلة الشياطة او الحديدة المدورة وماتفضليش تفتحى علية علشان البخار ما يخرجش من الحلة يا دوب حتفتحى علية مرة وتدوقى الارز اذا لقيتية استوى خلاص اطفى واذا لقيتية لسة فية شوية حصحصة رشرشى بس كدة بايدك على وشة وقلبية وكل الحكاية بياخد ربع ساعة او تلت