= كيف أزرع الثقة في نفس طفلي (حياج الأفكار موجوده) =

الأمومة والطفل

أتمنى إن كان لابد من نقل الموضوع إلى منتدى آخر ذكر إسم صاحبة الموضوع لأنه اجتهاد شخصي وشكراً


وجمعت لكم مواضيعي كلها في آخر هذا الموضوع .... لأني ما أقصد غير الفائدة والله من وراء القصد




أول كلمة أقولها كل ما احترمتي طفلج ... وحسستيه بكيانه ووزنه عندج ... نشأ واثق من نفسه

1- من يوم عمره شهور إذا سوى عمل جميل صفقي له بحماس وابتسمي وتحملي تتجاهلينه.

2- من يوم عمره أشهر علميه يصافح الناس .

3- يوم بيكمل سنة إذا أخذتيه لمطعم طلعيه من عربته وجلسيه في الكرسي المخصص للأطفال ... وتكونين عامله حسابج وجايبه له من البيت ملعقته وشوكته ... أكليه من أكلكم إللي طالبتيه ... وإذا طلبتي عصير شربيه معاج ... لكن إذا طلبتي مشروب غازي ... اطلبي من الجرسون يجيب نفس كاسة المشروب الغازي بس يخلي فيه ماء مع الشفاطه .

4- عطي الطفل مساحة من الإختيار سواء لعبة أو لبس أو رفض بعض الأوامر.

5- ناقشي طفلج الأمور الخاصة فيه أو اهتماماته واسمعي آراءة برحابة صدر واهتمام.

6- إذا زارج أحد وقدمتي لهم العصائر ... فلا تتجاهلين وجود طفلج وقدمي له معاهم ... وإذا سألتيهم أي نوع من العصاير تفضلون فسألي طفلج.

7- إذا كنتي تلاعبين أحد الأطفال فلا تتجاهلينه وناديه بلطف وقولي تعال حبيبي اجلس جنبي لسببين.

a. ماينطوي على نفسه ويضن ما عادت له أي قيمه وجاء من ياخذ مكانه.
b. علشان ما يقلد الطفل الآخر ... يقصد يلفت انتباهكم وبالتالي تضيع شخصيته. لأنه بيكون همه التقليد

8- اسالي طفلج وين يحب يسير أو شو يبغي يلعب معاج أو اي شي ثاني ... المهم تاخذين رايه.

9- إذا سرتوا أحد المحلات التجارية خليه يقوم بعملية الشراء .. من اختيار السلعة .. إلى دفع الثمن .. إلى أنتظار الباقي... وإذا شوي أكبر خليه ينزل بنفسه وانتظريه بالسيارة.

10- إذا أخذتيه للعيادة خليه يقول للدكتور شو المشكلة إللي يعاني منها ويوصف حالته للطبيب.

11- إذا سرتي لأحد الجهات وطلبوا منج بياناته الخاصة وهو موجود اطلبي منه يعطيهم هذي البيانات ( تنفع هذي الحركة مع الأطفال من 4 سنوات وممكن تساعدينه في بعض البيانات إذا توهق)

12- إذا زاروج ضيوف عرفيهم على طفلج ... وقولي هذ ولدي الغالي فلان أو ولدي الغالي أبو فلان.

13- دائماً شجعي طفلج على السلوكيات الحلوة وامتدحيه بس لاتزيدين في الجرعة علشان ما بنصاب بداء الغرور

14- إذا امنج طفلج على سر ... فاحترمي هذا السر ولا تفشينه ...
بس ممكن تقولينه إذا كان شي عادي لكن مب قدامه ولا قدام أحد من الأطفل إللي بيوصلون له


15- إذا عندج ضيوف وأخطأ ولدج في تصرف مثلاً قاطعكم أثناء الحديث ... أو في مركز تجاري قعد يصيح إلا يبغي هذي اللعبة .... لا تحرجينه أمام أي شخص ... حتى لو جدته وانتظري لين تقعدين بروحج معاه ومب معاج بقية عيالج ... بس بروحكم وصلي له ملاحظاتج وإن هذا الشي يضايقج وإنج ما تحبين إن يعيد هذا التصرف ووصلي رسالتج بإسولب حلو وجميل يتقبله.

16- إذا الطفل حب يساعدج أو ينجز عمل ... لا تقولين له إنت ما تقدر ... أو بعد صغيروما بتعرف ... خليه يساعدج ... بس إنتي خلي بالج عليه وكوني حذره وواعية لكل حركة يسويها علشان ما يأدذي نفسه

17- إذا طفلج خجول تحملي تقولين أمامه إنه خجول أو تنعتينه بهذا الشي علشان ما تزيدين حالة الخجل عنده ... وإذا كان يسير المدرسة فهمي إدارة المدرسة هذا الشي ... وإطلبي منهم يتعاونون معاج ... مثلاً يوزع الكراسات على الطلبة.... أو يطلبون منه يشرح فقره لطلابه .... أو يشركونه في الإذاعة المدرسة ...



الإذاعة المدرسية ... تذكرت موقف طريف بقول لكم إياه
( أذكر مرة بنت إختي في كي جي 1 وطلعت في الإذاعة المدرسية ... والمدرسة أولاد وبنات طبعاً ... وقدمت فقرتها ... فقاموا يصفقون لها المدرسات بحرارة والطلاب .... وإختي واقفة علشان تشوفها في الإذاعة ... بالرغم من إن إختي موظفة ... لكنها تحب تشجع عيالها فاستاذنت علشان تشجع بنتها .... تقول من كثر ما البنت مستحية رفعت مريول المدرسة غطت وجهها واطلعت ملابسها الداخلية... بكل براءة الطفولة .... وهي بعدها مغطية وجها من الخجل .... بس الحين ما شاء الله عليها .... جريئة وإللي في خاطرها بتقوله ) ....


مواضيع ذات علاقة بالتربية


= اسئلة الطفل كيف نجيب عليها ؟؟ =

= عندي أفكار مجربة للأطفال إللي سايرين المدرسة أول سنة =

= لاتقولين لطفلج هذه العبارة ... و لكن قولي لطفلج هذه العبارة =

= كيف أزيد التآلف وأمنع الغيرة بين الإخوان ؟؟ (الأفكار موجوده حياكم )=

= طفلج دايما معاند أو يخاف من الحمام .. حياج ... معي حلول بالصور =

= أفكار عشان ترتبين وقتج ووقت عيالج أيام المدارس =

= نصائح مهمة لكل طفل قبل ذهابه للمدرسة =
92
32K

يلزم عليك تسجيل الدخول أولًا لكتابة تعليق.

تسجيل دخول

دلوعة & حبوبة
دلوعة & حبوبة
آب :7_5_131:
لحظات ولكن
لحظات ولكن
جزاكـ الله كل خير

تسلمين على المجهود الاكثر من رااائع
k-j
k-j
نورتي الصفحة بوجودك وكلماتك العذبة الجميلة وفقكِ الله أختي الغالية دلوعة..ومشكورة على الطرح الجميل ..واحنا فعلاً محتاجين ننمي الثقة في أبنائنا ..دائما متميزة في مواضيعك
ام رغد3000
ام رغد3000
جزاكـ الله كل خير
..دائما متميزة في مواضيعك
شموخ بريدهـ
شموخ بريدهـ
هذا اللي ناقص الله يخلي عقال ابوه وعجرا امه :)

< مابقلبها رحمه :)

افضل انه يطلع هادي وعلى الصامت وش زينه

احسن من انه يطلع اناني ويتشرط علينا ويبلشنا

على العموم مشكوره يالغلا ,,

والسلام عليكم ورحمة الله وبركاته ,,