أسألها بالله صوته عالصبح يجنن لذي الدرجه؟ تقول يوووه بس

الأسرة والمجتمع

صباح الورد والفل والياسمين .. ومسا العود والعنبر

الا صدق يازين الاصوات عالصبح ولا الليل احلى ؟! :35:



الشاعر يقول :

حبيبي آسف ازعجتك .. حلو صوتك قبل ماتنام
سمعته وانشرح صدري .. وكاني شفتك بعيني
حلو كل الكلام اللي .. يجي من مبسمك أنغام
يونسني وينعشني .. ويجلي كل ما فيني
خذاني الشوق لك ياذوق .. الا ما حلا ورود الشام
الا يامتعة ايامي .. مع شهوري على سنيني



يمكن الشاعر اخبر ويمكن انت يالي تقرى أخبر وماودي اقول يمكن انتي بعد اخبر ولا اقول عادي ؟؟!


ياشين نية بعض ناس بالموضوع وهو مااكتمل < فيس يقول لو صبر القاتل على المقتول مات لوحده :36:

المهم بس

لنا مده وانا وصديقاتي بهواااااش فوق العادي ماني قايله نقااش لان الموضوع تعدى النقاش من مده للأسف


وصار فيها :_
انتي معقده :booo:
ولاتسوين لي فيها تستحين
وتذكرين وش قلتي عن صوت فلان
ونقول ياعالم موضوعنا ترى غير تقولك ممكن بس فيه ناس تحسب الكل مثلها
وعند هالحد يتفجر الموقف بكلمة وش قصدك ؟! مع وقفه التحدي الي يصير الشيطان فووق راسها يسوي علامة النصر
:30:
طبعا مجموعتنا فيه ناس متزوجه وناس عزابيه
العزابيه تتكلم من واقع احلامها وامنياتها وجزء من وجهة نظر منطقيه احيانا طبعا كون الموضوع بالنسبه لها مازال نظري
والمتزوجه يايكون دفاع عن تجربه او انه حسره على شي تمنته وماحصلته
والبعض يحاول التغلب على الحده ويقول لكل وضع حالته


الموضوع اساسا مو جديد يعني ناقشناه قبل يوم كنا نتكلم عن حالات محدده صارت لصديقاتنا الي صاروا الحين اطراف تناقش معنا وتناقش بحده ببعض الاوقاات

طيب دامه قديم وش رجعه ؟؟!!


الي رجع الموضوع على طاولة النقاش مره يا طويلات العمر والشوارب


هذا واحد متصل على الشيخ يقوله : ياشيخ انا زواجي باقي عليه اسبوعين :icon28:
قاله الشيخ بارك الله لك ورزقك الذريه الصاله
قال اصبر ياشيخ : انا طلقتها :
قاله : كيف يصير زواجك بعد اسبوعين وانت مطلقها:confused-
قال : محد يدري انا طلقتها واهلها مايدرون
قاله : كيف ؟؟
قال : كنت اكلمها وعصبتني وطلقتها والحين العالم تجهز للزواج وانا مدري وش اسوي
قاله : الحين ياولدي صارت ماتحل لك ولا لها رجعه الا بعقد جديد لانك مادخلت عليها
فلازم تاخذ ابوها وتروح المحكمه وتعقد من جديد وتعتبر طلقت منك مره
قال : ياشيخ مافي طريقه اردها والعالم ماتدري
قاله : لاااا


ولااحد يسوي لي فيها شيخ ويناقشني بالحكم مو انا الي افتيت السالفه جاتنا كذا


طبعا على طووول بعد هالسالفه ::mouse:
وحده: شفتوا انا قلت لكم من الاول المكالمات ذي مالها داعي
وحده ثانيه : مو شرط اذا هو مطفووق مو الكل مثله
وحده ثالثه : واذا هي غبيه زعلته وهم توهم تستاهل
وحده رابعه : يمكن تحسب نفسها تموون لاصارت عروس
وحده خامسه : يعني ابوها يرضى يرجعها ؟!
وحده سادسه : طيب اذا عنّد وش بيصير وضعهم قدام العالم والدعوات موزعه
وحده سابعه : طيب اذا كانت تكلمه وابوها مايدري تصير مصيبتين انها تكلمه وانه مطلقها
وحده ثامنه : نسمع ونسلم << انتوا كم وحده بالضبط ؟
وحده ووحده ووحده تبدا كذا وتنتهي بالشوش ؟! :024:


نجي للموضوع عن وش بالضبط ؟؟

كلامنا عن المكالمات بعد الملكه . مو كل الناس تملك وتتزوج بعدها بمده بسيطه
فيه ناس تملك وتجلس كم شهر وتتزوج وناس تاخذ سنه وناس تاخذ اكثر
وناس تملك وموعد الزواج مفتوح على التسااهيل
يعني القضيه شرعا مفروغ منها هي حلال


بس الي مو مفروغ هو فايدة الموضوع

ناس تقولك حنا مجتمع مايصير عندنا خطبه وتعارف وعلاقات بعد الخطبه ومدري وش عشانها حرام
ففترة الملكه تصير مثل هالفتره بس حلال < الله من زين التفكير

وناس تقولك والله انها احلى مده بالزواج كله

وناس تقولك والله اني تحسفت على كل كلمه قلتها ايام الملكه

قبل تاخذون موقف خل اقولكم وش صار ببعض العالم الي تهاوشوا فووق


من الي يدافعون عن الموضوع دفاع مستميت وانه حلو ومدري وش وحده عاشته صدق
اذكرها يوم تكلمني تقول ارسل لي ورد عالصبح عشان مكالمتنا امس كانت تجنن
ويوم ثاني تقول اهداني اغنيه
وبالعيد كانت تقول احلى عيد مر علي لانه اول من عيد علي
وهو تقول انه كان يقولها ان ايامه صارت احلى
وتو يحس بقيمة جواله
وماابي احد يصحيني الا انتي
وياعيد ذيك السنه الوردي وطبعا تزوجوا بعطلة الحج


هذا مثال حلو وبيني وبينكم وقتها كنا نقول ياحظها بقوووه وللحين الله يسعدها يارب.


لكن الثانيه والي كانت تدافع بعد عن الموضوع واظنه من باب الكبرياء اكثر من اقتناع والكل يطالعها بنص عين ماوده يجرحها ومجموووووعة فيساات تطالعها وتقول من متى ترانا عيال قريّة ولكن يعرف اخيّه
هي كاانت من النوع الي يهتم بنفسه بشكل مو طبيعي وبسم الله عليها مره مملوحه والكل كان يتوقع لها اكثر من كذا والله
ملكت واخذ الرقم اخونا بالله وكلمها
من المكالمات الاولى كان يخوف اذكر يوم تقولي كنت اقول للبنات الله يعينها هذا وهي مادخلت بيته هذا كلامه

مدري ثقه زايده ولا وش سالفة اهله او يمكن من باب كلن يشوف الناس بعين طبعه وهذي فكرتنا عنه وقتها
كان لادق ولقاه مشغول مع مين ؟ ومن كان يكلمك واحلفي < خير يابو الشباب وش احلفي
ولاقالت امي تنادي ولا شي قالك قولي لها انا اكلمك < وش الذوق الزايد ذا

ويثووور لادرى انها رايحه مكان ومااستأذنت منه < وش تستاذن تراها ببيت ابوها
فالاول كانت تستحي وتخاف وماكانت تروح مكان بعدين صارت ماتقوله

ومره بعد مالبست بتروح زواج واحد يقرب لها حلف انها ماتطبه ورجعت من نص الدرج تقول لو دريت مارديت
يقول انتي قلتي الخميس ماقلتي الاربعاء < يلعن ابوالمخ الي عندك

والله اذكر كانت تبكي بحرقه تقول ياربي وش اسوي والله اماني عارفه اتعامل معه

يوم جا يوم زواجها كاانت نحييييفه ووجها اسووود من الهم والله ماكان احد يتصور انها لاصارت عرووس بتصير كذا على حلاها مثل ماقلت كنا متوقعينها تطلع احلى عرووس فالمجموعه

وتقول كانت الفتره فيها اوقاات حلوه ومثل ماقلت اظنها كبرياء بس لانه زوجها
هذي هي متزوجه الحين وعندها بنت والله مااطيق سيرته



يتبع
119
20K

يلزم عليك تسجيل الدخول أولًا لكتابة تعليق.

تسجيل دخول

اهم وحده في حواء
ومن القصص الي كنا نسمعها وكانت تغذي نقاشنا وماعشناها طبعا :

العروس الي يوم زواجها منزله راسها مستحيه قالها زوجها الحين كنتي تكلميني والحين تسوين مستحيه < الله يقطع وجهك على هالكلمه هذا وضع وذا وضع يالئيم :D


والثاني الي مسوي ثقه ويبيها تتكلم بإباحيه ويوم تقول مااقدر يقولها تستحين مني انا
< من متى المعرفه ياابو الشباب تراك تو ماملكت :16:


انا مافي شي يرفع ضغطي الا لاجاك واثق من نفسه ويقولك لابغيتي شي قولي لي لاتقولين لااهلك انتي خلاص زوجتي
لاياشيخ عسى بس ماكلفت على عمرك ويوم قررت انك زوجها
دارين انك زوجها بس لحظة تفكير صغيره يالذكي انها بالبيت عندها اهل واخوان ولها نظاام معين
وتراها تستحي اذا على بالك لاصارت متزوجه تشيل برقع الحيا
حتى لو صارت جريئه معك فبعض الامور لايمكن تصير كذا مع اهلها
يعني تخيل نظرة اهلها وانت جاي جايب لها شي هي موصيتك اياه
ابو الوضع الي هي فيه بيقولون مره ماصدقتي هذاا خوانك مالين البيت



ولا الي يقول لها اكلت من مطعم وعجبني العشا وبما ان اهلك مو راضين انك تجين تتعشين معي بجيب لك عشا
يااخي عااارفين نيتك زينه
وعاارفين انك رومنسي
بس مخك ذا متوقع ان هالاميره عايشه بالقصر لحالها
مافي عشرين ادمي معها بالبيت :32:
وحتى لو مافي الا امها وابوها شكلها بااايخ وانت جايب لها عشا لحالها ولو حسبت حسابهم غير انه تكلفه مااتوقع انها بتتهنى فيه وهم يطالعونها يامبتسمين مسوين فاهمين الامور
ياناقدين وماودهم يقولون يعني مررره منت قادر تصبر لين تتزوجها وتاخذها بنفسك
قولها انك تمنيتها معك والاحساس يوصل



يعني مافي تقدير وبعد نظر من يملّك على طوووول يجيك مدرعم حقوقي
والله ياعليهم تصرفاات تحرج بشكل مو طبيعي
الوحده تتمنى الارض تنشق وتبلعها

بس لحظه فكر لوانها اختك وخطيبها سوى كذا الضحكه البايخه الي بتصير على وجهك
اذا تحبها اعفيها منها واعفي بنت الناس من ضحك اخوها



ورغم كل ذا انا مااقول انه ماله ايجابيات وترى فيه لحظات حلوه كثير :35:
الشعور انه فيه احد يسال عنك يدورك ولاتعبتي كل شوي يدق وسلامات ومدري وش
وهو يوم يقولك صحيني كانه بيضيع من دونك وبيروح عليه دوامه ومستقبله
وتضبطين المنبه ولاحتى تواصلين كلش ولا المستقبل عاد
يقالك انك صرتي مسؤوله عنه ترى احساس مررره حلو على قولتهم



واحد الله يسعد قلبه يقول لها بعد الزواج تدرين انه يوم كنتي تدقين تصحيني اوقات اكون صاحي
واسوي نايم عشان احسسك انك انتي الي صحيتيني
يقول والله مره يوم دقيتي وانا احمي السياره
تقول مت ضحك على نفسي بس وقتها كنت انام مرتاااااحه بعد مااصحيه واقول الحمدلله بس ماراحت عليه نومه

فيه ناااس والله ودك تحطهم على راسك وناس تقول يالله الجنه دام هذا حظي من اولها


ووحده تقولي كنت ايام الملكه حاطة أغنية : الي كان من أبلك انت وانت مش جنبي ماكنتش عايشه بيه
تقول والله يالنغمه كانت تطلّع قلبي من مكانه
وكنت ابتسم من اسمعها ولارديت ارد وانا اضحك
وكان يستانس على صوتي وانا فرحانه باتصاله
وحتى لاصحاني اتصاله من النوم كانت تصير حكايااااات
لان النغمة اساسا تهيئك نفسيا حتى وانتي توك صاحيه من النوووم


يعني بهالفتره حتى التفاصيل يصير لها طعم : النغمه , الإسم بالجوال , الرسايل , الأغاني , الشعر

وه بس

الحين عاد يجونك بناات ذكيااات مدرعمااات الي تقول مااااالي دخل انا ماعندي مكالمات والله لاتزوجته وصرت ببيته يصير خير :p

اقولها الموضوع ماعاد بيدك بالكامل مثل اول

هذي عاد وحده اعرفها :

تقول يوم الزواج يوم دخلنا الفندق طالعني بحقد وراح وخلاني

تقول والله كان ودي الارض تنشق وتبلعني واطالع بنفسي وش فيني غلط واتذكر الزفه والي صار وش سويت !!

وماجا الا بعد الصلاه غيرت ملابسها وصلت وهو توه يجي
ولا كلمها ولا كلمه
البنت مستحيه ماتقدر تقول شفيك وولد الناس ولا كأنه يشوفها
وبتل اليوم الي بعد كااامل على الحاله لين اكلت عمرها
ثالث يوم الصبح قرر يعفو عنها قالها بس بسالك سؤال : ليه يوم اقولك كلميني تقولين لا
تقول قسم بالله ماتوقعت ذا الموضوع 3 ايام وهي تغلي وبالاخير يطلع كذا
قالت له كنت مستحيه
قال لها ولو انا زوجك وارسل لك اختي 3 مرات وتردينها 3 مرات
مافكرتي اولا ان طاعتي واجبه وثانيا وش شكلي قدام اختي وزوجتي تقولي لا 3 مرات
4 شهور مملكين والولد حااقد عليها والله زين ماطلقها
وبيني وبينكم معه حق


يعني السالفه صارت تطلع من اليد اوقاات كثير وكل حاله لها ظروفها


انا سمعت من البنات كثيييير وبعضه اوجع راسي والله ومع ذلك بسمع رايكم ياحلوات يمكن تقولون شي مامر علي

وش وجهة نظركم
لؤلؤه في بحر
لؤلؤه في بحر
اقول يا اختي ترا فترت الملكه اوالخطوبه ماهي مقياس ابدددددددددددددا لمعرفة الشخص الي تبي ترطبطين به بس الواحد يدعى كثير ويستخير الله اولا واخيرا واحس معظم ا لازواج يعرفون بعضهم بوضوح بعد الزواج وتظهر السلبيات في كيلا الطرفين
جالكسي2007
جالكسي2007
الله على التحلييييييل

تصدقين اسلوبك رااااااااااااايق

دخلت جو معك

يا ليتك صديقتي بس

انا الصراحه ما كلمت أل إيه أل مستحيه

الا يا ليت الايام ترجع واكلم واكلم واكلم الييييييييييييييين اشبع من السواليف

اتوقع هالايام ما تنعاد ابدا
اهم وحده في حواء
لولوه في بحر
اكيد ماهي مقياس

بس الواحد يعيشها لانه ماتتكرر

بعدين الوحده تتفائل بالخير فيهبمعنى تفائلو بالخير تجدوه

ويااااااااااااااااااااااااااااارب يوفق كل البنات بالصالح اللي يعرف ربه ويراعيه
اهم وحده في حواء
جالكسي

اي والله نك مانتي بعيه عني الحيا حرمنا اشياء واجد

تصدقين انه لاذحين زعلان عليه اني ماكنت اعطيه فيس كثير